Dialuna Oktober 8, 2012
Pagina 4
Otro palo ta cay pa gobierno di AVP
ATA PRUEBA CU NO POR HUSTIFICA BAHA UN GOBIERNO DEMISIONARIO STA. CRUZ -- Tin hende den e gobierno di AVP ta kere cu ainda pueblo di Aruba y Curaçao ta biba den tempo di barco di bela y mandamento di mensahe via postduif. Awendia via Internet pueblo ta haya tur informacion obtenibel y asina tambe nos a haya e siguiente informacionnan cu ta papia pa nan mes y awe sigur lo bay haci su impacto y tin hende den e gobierno na Aruba cu tin hopi pa bay splica na pueblo votador. Pueblo di Aruba ningun dia a vota pa laga cualkier gobierno bay mete den asuntonan interno di oro partner den Reino Hulandes y menos pa baha of yuda baha un gobierno legitimamente escogi door di su pueblo. Gobierno di AVP bao di liderazgo di Mike Eman a core para hunto cu Sint Maarten y Hulanda pa yuda oposicion na Curaçao baha un gobierno demisionario! Shonnan lesa bon: ‘Nan a baha un gobierno demisionario!” Bao di ki hustificacion esaki a tuma lugar keto bay no ta conoci pero bao di e capa cu e golpi di estado administrativo cometi door di Gobierno di AVP, Sint Maarten y Hulanda contra e gobierno di Schotte, lo tabata bon pa bienestar general di Curaçao, e acto hopi baho y traicionero a tuma lugar. Awe laga cada ken lesa pa nan mes kico tin skirbi den Constitucion di Hulanda mes y tambe interpretacion di manda un gobierno demisionario cas. No ta informacionnan cu a wordo analiza y compila na Curaçao of Aruba pero ta analisisnan haci na Hulanda mes door di expertonan riba tereno gubernamental y riba tereno constitucional
estatal. Cualkier hende cu por lesa djis un tiki Hulandes por saca afor cu loke a tuma lugar na Curaçao ta algo cu hamas Mike Eman hunto cu e prome ministro di Sint Maarten y e gobierno y e ministro demisionario na Hulanda por hustifica. Ni cuanto cu mayan nan lo kier sconde tras di lomba di gobernador na Curacao cu ta riba peticion y exigencia di gobernador e acto di bahamento cuestionabel di un gobierno demisionario a tuma lugar; no tin hustificacion! Interesante y determinante lo bay bira si den futuro hopi cerca un caso den corte internacional tuma lugar unda cu tur esnan envolvi wordo yama pa duna cuenta di nan participacion y nan envolvimento den henter e asunto aki. Di otro banda mirando cu na Hulanda e bahamento di un gobierno demisionario simplemente no por tuma lugar y no por wordo hustifica, pueblo di Aruba y di Curaçao ta haya e ehempel y e prueba bibo y duro den cara cu descencia gubernamental y estatal ta existi na Hulanda pero no ta conta pa colonianan di Hulanda. Awe e prueba ta wordo presenta cu riba orden di Hulanda reglanan fundamental di democracia por wordo viola y trapa contra deseo di cualkier pueblo den Reino Hulandes? Si esaki no ta un berguenza pa democracia internacional cu tanto Hulanda mes ta propaganda rond mundo, anto ta con por yame anto? Esaki ta e supuesto tanto bon ehempel cu Aruba y Curaçao mester tuma di Hulanda cu tanto Mike Eman y su gobierno di AVP ta gaba cune?