Dialuna September 26, 2011
Pagina 20
VILLA FLORALINA TA PASANDO DEN MAS CAMBIO ATRACTIVO
Mas di un dozijn di tent pa ofrece un variedad di atraccion y cos pa bende STA. CRUZ -- Villa Floralina (ex Monte Blanco) a keda recibi aña pasa cu boca habri door di e bishitantenan di Interpaso. E cambio metaforico a crea asina un ambiente agradabel cu poco por a imagina esaki posibel. E diseño artistico cu klinker tur rond, e landscaping cu matanan varia y di diferente tamayo y color a duna e lugar un admosfera di trankilidad, pero na e mesun momento di alegria. A traha duro y te na ultimo momento, pa termina cu e infrastructura, pero e trabaonan a bin cla. E cambionan sinembargo no a keda te aña pasa y ey caba e propietarionan Eric, Patsy y Alina Mansur a cuminsa traha un lista di loke nan ta desea pa bin acerca. Mientras tanto e landscaping a bira mas bunita y yerba a yena e tereno patras di e tribunanan, loke a pone cu a cuminsa traha un caminda cu acera pa dirihi e autonan y evita cu nan lo staciona riba e yerba. E tribuna cu no tabatin dak, a haya su dak y awor ta ofrece mas asiento cu e mesun comfort. A drecha un espacio pa un cushina moderno cu ta cumpli cu tur e
exigencianan sanitario y cu por sirbi despues pa un facilidad mas structura. Interpaso lo ofrece 4 cushina cu platonan diferente. Tin un 10 hende ta trahando riba e propiedad haciendo diferente encargo y nan ta haciendo bon progreso. E espacio pa staciona auto a bira hopi mas grandi pa asina por acomoda mucho mas hende. Aña pasa mester a parkeer basta leu despues cu e parkeadero a yena y hende mester
a cana basta distancia pa yega na e facilidad. E aña aki lo ta diferente y e organizadornan a percura pa e aña aki tin extra vigilancia pa garantisa e seguridad di e autonan y e propiedad di e hendenan. E trailernan di cabay tambe tin nan lugar separa pa staciona pa asina nan no ni kita lugar di auto, ni stroba e trafico. A desocupa e stalnan di e cabaynan cu no ta competi, pa asina e cabaynan cu ta bin di otro ranchonan por ta
trankil y relaxed prome cu nan subi e pista di competencia. E organizadornan a prepara tambe un rancho di tent cu ta ofrece un variacion masha grandi di cos. Asina nos por menciona cu lo tin tent pa cocada y otro cosnan dushi, otro pa dino-jump, un cu ta bende raspao, otro pa bende T-shirt y souvenier, un otro lo bende productonan di cuero, un cu lo ofrece biña traha na Aruba, un tent pa saca potret di diferente style, lo tin
pony ride, tent pa popcorn, otro pa catuna di sucu, un pa trampolin, otro tent pa bende pida y finalmente un tent cu lo tin un toro mecanico pa test e habilidad di rodeo cerca e publico. Tin mas tent disponibel pa esnan cu ta interesa den ofrece algo cu no tin, pa asina tin mas variacion. Interpaso ta luciendo atrobe como e atraccion di aña y e evento cu ningun hende lo kier perde.