Pagina 8
Irritacion den Santa Cruz
STA. CRUZ -- Tin biaha ta djis algo chikito cu sa irita hende. Ta na Valero Santa Cruz, reportero di Solo di Pueblo a ripara cu tin un bunita lugar traha pa bo por yena bo tirenan di auto cu aire. Sinembargo ora di bay pa yena bo tire, bo ta ripara cu ta bira dificil pa yega cerca. E motibo? Algun chauffeur cu apesar cu tin asina grandi marca riba caminda NP (No Parkeer) asina mes algun ta parkeer nan auto di tal manera cu ta casi haci imposible pa bo yega cerca pa yena bo tire. Shonnan, ta algo chikito...pero si bo haci un tiki esfuerzo pa parkeer bo auto un tiki mas leu, bo a evita hopi iritacion cerca un otro.
Dialuna 14 Februari, 2011
Grupo di homber cu problema haya cu droga STA. CRUZ -- Un polis durante patruya diasabra 3’or di atardi, ta mira un auto di huur tabata haci maniobra riba caminda. Polis a para e auto V852, y e chauffeur a baha hopi altera. El’a bisa polis cu un rato prome el’a wordo menaza pa un grupo di hoben na Santa Cruz, cu un arma di candela. Mirando cu tabatin mas hende den e auto, Polis a pidi pa refuerzo, ora cu e otro polisnan a yega na e sitio, nan a cuminsa controla e sospechosonan. Nan a mira cu riba e stoel banda di e chauffeur tabatin un saco cu diferente bulto cu ta parce na marihuana. Tur cuatro sospechoso a wordo saca for di e auto. Durante cu polis tabata tuma nomber di e sospechosonan, nan a mira tambe cu tras di e rij di e sospechosonan, den e matanan, tabata tin un saco chikito lora den cual tabatin bolita. E chauffeur y e otro cuatro sospechosonan a wordo deteni y hiba pa warda di Noord.
Hoben maltrata cu botter STA. CRUZ --Asistencia di polis a wordo pidi diasabra pa 4’or di madruga, na un establecimento pa un caso di maltrato. Eynan polis a topa cu un homber cu un herida tras di su cabez. El’a bisa polis cu el’a wordo maltrata pa diferente. El’a mustra polis e grupo di hoben y e dosnan cu a dale cu botter. Polis a detene e dos hombernan y a hibanan warda di Shaba.