Pagina 32
Diarazon 29 Mei 2013
Pre-seleccion di Weganan Hubenil Suramericano 2013 a haya media training STA. CRUZ -- Un factor hopi importante, banda di e prestacion deportivo di cada atleta, ta pa un comunidad henter sa kende ta su representantenan of miho bisa su embahadornan den exterior. Diasabra mainta, e pre-seleccion cu ta preparando pa e Weganan Hubenil Suramericano 2013 a bini hunto pa asina haya un media training con pa papia cu prensa. Un total di 23 atleta di 9 deporte a haya e training for di e conocido personahe di television, Sra. Cherryldine BuckleyMuller. Prome cu e inicio di e mainta, Secretaria General di COA, Sra. Nicole Hoevertsz, hunto cu miembronan di e Comision di PR di COA, Sr. Seever Krozendijk y Sr. Noel Werleman, a papia un poco riba e intencion di e media training. Manera Sra. Hoevertsz a cuminza na bisa cu periodistanan den exterior semper tin interes pa sera conoci cu un atleta excepcional, sigur uno selecciona cu ta representa Aruba den exterior. Tur hende kier sa ken e atleta ta. Kier sa con el’a prepara pa su competencia. E atleta mester fungi como un ehempel pa otronan, principalmente esnan mas jong pero tambe e grandinan, cu otro palabra e ta un "role model" pa otronan den su comunidad. Experiencia ta mustra cu ora un atleta bay competi den exterior, e ta haye cu un of mas medio di comunicacion, sea ta televisa, skirbi y scucha, cu ta masha interesa pa sa algo di e atleta y su deporte, pero sigur tambe di e pais di unda e ta bini. Aki e atleta mester por elabora riba esakinan, paso alo largo e ta e representante di
e pais den exterior e momento ey. Mester bisa cu e mainta a bira uno fructifero y interactivo, unda e participacion di atletanan tabata bisto. Despues di a haya algun tip valioso for di Sra. BuckleyMuller riba e ramo di comunicacion, a realiza entrevista cu tur e
atletanan. Mayoria di e atletanan a surpasa e expectativa, awor nan ta cla pa duna un entrevista na Prensa. Ta invita pueblo pa bishita e website di COA (www. olympicaruba.com) of e pagina di Facebook (Comite Olimpico Arubano), pa mira con e deportistanan aki a comparti nan experiencia