Diabierna Oktober 5, 2012
Pagina 8
Carlos Britten y Nilo de Cuba a tuma despedida di Laboratorio
STA. CRUZ -Despues di un carera impresionante den servicio di Gobierno, sres. Carlos Britten y Nilo de Cuba ta bay disfruta di nan pensioen. Ambos persona a traha durante nan carera como empleado publico na departamento di Laboratorio. Carlos a cuminsa como leerlinglaborant na 1974 y durante transcurso di añanan, a base di su dedicacion y experiencia el’a ricibi diferente promocion. El’a guia diferente analist y laborant cu a bin traha na e departamento di L a n d sla b o r at o r iu m. E conoce e diferente tipo di instrument cu ta usa na Laboratorio y a yuda den reparacion di ekipo. Tambe el’a siña pa traha cu centrifuge y manda material pa exterior. Despues di 38
aña di servicio, Carlos ta bay cu pensioen, pero su coleganan lo record’e como un persona amabel y semper dispuesto pa yuda otro. Nilo de Cuba tambe ta bay cu pensioen despues di a traha 33 aña den servicio di Gobierno. Nilo a cuminsa su carera como empleado publico na 1979 den seccion di administracion. Durante añanan el’a fungi como bode, atende patient na loket, registra peticion den e sistema di Laboratorio, traha den magazijn y yuda na loket na Oranjestad, Piedra Plat y San Nicolas. Fuera di ta un bon colega, Nilo ta conoci como un persona alegre, chistoso y semper cu atencion pa otronan. Na ocasion di despedida di Carlos Britten y Nilo de Cuba,
hefe di Laboratorio, sr. Lufrido Croes na nomber di Ministerio di Salubridad Publico y Deporte a gradici nan pa nan dedicacion durante tur e añanan di servicio na Landslaboratorium di Aruba. Tambe el’a expresa e deseo pa nan hopi salud y alegria pa nan por goza di nan pensioen. E ceremonia di despedida a tuma lugar den presencia di coleganan y diferente miembro di famia.