Diabierna, Februari 24, 2012
Pagina 6
Pacient ta sali dorna na boton for di Eerste Hulp direccion dokter di cas
EERSTE HULP TA GEWOONWEG LUBIDA PACIENT Ora cu hende tende con famianan a pasa den amargura formal na Eerste Hulp na hospital, tin biaha remarkenan ta wordo haci encuanto cu e asunto no lo por ta dje malo ey na e dicho departamento di Hospital. Wel pueblo, esun cu a pasa aden por papia y tur otro por bisa kico nan kier, te ora cu e toca na bo porta. Ayera un biaha mas Eerste Hulp di Hospital di Aruba ta briya cu e malisimo servicio cu nan ta duna poniendo bida di hende na peliger. Bo ta bay Eerste Hulp pasobra bo tin un situacion cu ta rekeri tratamento medico urgente, sino bo no ta bay Eerste Hulp. Pero ta pace cu ora un ARUBIANO y mi ta pone esaki cu hoofdletter, pasobra e inhusticia ta wordo haci contra yiunan di tera, yega na Eerste Hulp e no ta haya e mesun trato cu un extranhero di Merca of Europa ta haya. Parando den rij na Eerste Hulp unda cu un solo persona tin cu atende cu e parti administrativo di pacientnan cu a bin pa un caso di emergencia anto tur hende tin cu djis para stoba den rij te ora cu esnan bo dilanti cu tambe a para stoba wordo administra, pa despues personal medico bin waak si bo tin algo urgente si of no. Manera cu e sistema incomprendibel y inhusto ey riba su mes caba no ta algo aceptabel mas den un era moderna unda cu nos ministronan ta invita tur sorto di miyonario y companianan internacional bin djo djo na Aruba riba cuenta di pueblo, ata dos turista di edad avanza tin mester di mas di 15 minuut pa yena papel pa haya trato medico. Mientras tanto tin un otro señora para mi tras cu un criatura di mas o menos 2 aña cu un herida den boca y e mucha tabata saca sanger tras di otro y yora di un dolor inmenso pero esaki no tabata duna e mama ningun derecho pa por haya atencion medico urgente pa su yiu, segun e sistema y e maneho di Hospital. Ora cu e mama no por a soporta mas, mi mes a bise bo sa kico pasa mi dilanti numa, ami ta hende grandi mi por wanta dolor pero e criatura chiquito no por wanta mucho mas. Ni cuanto cu e mama a trata na splica situacion di su yiu, toch e dos Mericanonan mester a wordo atendi prome y tur hende mester a warda te ora cu nan a caba di yena e formulario di Hospital di cual nan logicamente no tabata comprende un pataca di dje y pa cada regel y pida texto nan mester a haya splicacion. E mama di e mucha cihiquito den su desesperacion a core bay cu su yiu pa busca ayudo otro caminda. Mi mes a pensa Dios acompaña boso, sin sa den kico mi mes pa ta bay pasa aden. Despues di a warda un tempo basta largo porfin cu intermediacion di e security guard mi a logra drenta. Paden un persona cu ta papia Hulandes cu parecido di Hindu a duna mi man y tuma presion y haci algun pregunta sin cu mi sa den ki funcion e tin. Despues di X pregunta, mi mes a punter: mi shon, loke bo ta puntra tin den mi file, pero el’a duna di conoce cu nan no tin file di pacient na Eerste Hulp!! Wel, señores, pakico bo tin registracion cu kaarchi di AZV, bo a drumi un siman den Hospital, a atende diferente biaha na Eerste Hulp y ainda boso no tin file? Of por ta
asina cu esun cu a bin di Hulanda no sa un pataca con pa traha cu e sistema? Ruben supuestamente no tabata suficiente bon pa e director Hulandes pero den un frega di wowo Ruben ta tover file di cualkier pacient cu a yega di wordo trata na Hospital. Despues di esey ban laga haci un ECG pa check curazon pa despues dokter bin atende cu pacient pero tanto meneer, como dokter a lubida por completo cu pacient a sinta den e camber manera idiota ta warda y ora ta coriendo y pacient ta tende con dokter ta Chalala na grandi cu un pareha Mericano cu for di basta rato caba ta duna e dokter indicacion cu ya ta basta y cu nan kier bay. Ora cu mi a dicid di bay puntra ta con a para, mi ta bin topa personal ta Chalala na e balie di personal pasobra ya caba tabata tin Wisseling van de wacht’ y ora cu shon verpleeger a ripara cu mi a sali di e camber, el’a spanta y ora cu mi a reclame cu nan a lubida mi, su contesta tabata; Eh, eh. eh ik niet, pa despues core bay sconde de su oficina dilanti. Supuesto madam dokter despues ta pasa dilanti di e kamber y ta dal cortina cera demostrativamente den cara di pacient cu e mes y su colega a laga keda stoba den kamber y nan a lubida. Ora cu fuse di hende bula y bo sali bay pa reclama dilanti bo ta haya di tende cu ta paden bo tin cu bay reclama cerca e mesun hendenan cu a neglisha pa duna atencion medico pa cual nan ta wordo paga. Enfin, mi a haya mi mes ta sali cu hala di boton pega na curpa bay na mi dokter di cas kende a atende mi mesora aunke cu tabata tin hopi otro pacient Arubiano dilanti mi, pero tur hende eyden por a compronde e situacion aunke cu nan tur a keda asombra cu un pacient ta sali tur na boton for di Eerste Hulp pa bay dokter di cas pa haya cuido medico pasobra Eerste Hulp simplemente a lubida pacient y lague pa su cuenta.(pa di dos biaha!!) Despues Eerste Hulp ta laga sa cu ta e pacient no tabata tin pasenshi!! Wel esun cu a bisa esey, si e ta Arubiano of Macamba, Hulandes of whatever cu bo kier yame, si ta bo mama nan a trata asina boso lo gusta? Si ta mama di Richard Visser tabata sinta den e kamber ey tambe boso lo a trata asina? Biaha pasa boso a laga un pacient cu atake di curason sinta tres ora y mey den wachtkamer y si no tabata pa dokter Vallejo cu a drenta y haya e pacient, awe kizas e lo ta dera y su famia lo a sali perhudica. Sigui gasta placa di pueblo numa cu viahenan luhoso rond mundo y sigui invita deportistanan miyonario bin keda na Aruba riba cuenta di pueblo te dia cu boso mama tin cu wordo hiba cu urgencia Eerste Hulp. Pa colmo de los colmos e dos pachi bieunan Mericano di cual uno a bin pa atende cu problema di wowo, a bin resulta cu e tabata tin un stof den wowo y no kier a ni keda pa haya tratamento medico y nan a baha na awa. Nomber y fam: Vale Hart