Diabierna, Januari 20, 2012
Pagina 5
MR. EVELYN WEVER-CROES DI MEP:
MIKE EMAN MESTER SPLICA PUEBLO PAKICO E MESTER DI 20 MIYON FLORIN PA PAGA COORDINADOR?
STA. CRUZ -Parlamentario sra. Evelyn Wever-Croes a duna di conoce cu e presupuesto 2012 atrobe ta manera un grabbelton. Mas bo studi’e, mas sorpresa bo ta topa cune. E post di coordinadornan tabata 10 miyon dos aña pasa. Den apenas dos aña, nan a redobla e suma aki y pa 2012 den presupuesto tin 20 miyon florin pa cooridnadornan! Pa esnan cu kier verifica pa
nan mes, den begroting di e ministerionan, totalisa e postnan 4100 y 4300 di cada minister. KICO TA E TAREA DI UN COORDINADOR? “Indudablemente tin algun coordinador cu ta necesario. Tur minister mester di su conseheronan di confianza. Entre 5 pa 7 consehero mester ta mas cu suficiente a cada minister. E restonan, ta kico nan ta haci? Algun nos sa cu ta
solamente yama radio henter dia y ta wordo paga cu placa di pueblo. Otronan ta wordo paga pa campaña pa AVP y tin e grupo cu semper mester bin sinta den sala di parlamento pa bati man pa nan ministernan. En todo caso e gran mayoria di e coordinadornan no ta haci net net nada pa e placa cu nan ta wordo paga pe. Nos prome minister tin al rededor di 60 coordinador y Minister Michelle Hooyboer tin casi 50! Esey ta un abuso. Na
mi opinion, e ta ilustra tambe cu e minister mes no por pensa ni planea, si e mester di asina tanto hende pa yud’e pensa. Mi ta conseha tur mi coleganan parlamentario pa studia e presupuesto bon, pa nan no djis core aproba un presupuesto sin studi’e. Y si nan haci nan huiswerk bon, ta imposibel pa nan djis acepta e post aki di 20 miyon florin pa coordinador. Ningun representante di pueblo por drumi cu un consenshi trankil,
sabiendo cu tanto famia no por paga nan cuenta di awa y coriente, tanto famia ta wordo forza di cobra onderstand, tanto famia ta haya nan forza pa bay e Voedselbank pa busca cuminda. Pero pa esnan cerca di e ministernan, si tin 20 miyon. Mi ta urgi Minister Presidente Mike Eman pa duna pueblo un splicacion debido pakico el'a redobla e suma pa coordinador y awor mester di 20 miyon florin!