AWEMainta.com
Local 25
Diahuebs 4 di Augustus 2011
Art Rules Aruba ta confirma cu Aruba tin talento
E showcase final di Art Rules Aruba a produci un tremendo spectaculo di tres ora cual a cuminsa cu un show di moda y un exhibicion di arte y a culmina cu un produccion di teatro di escala grandi, ademas di demostracionnan di video y film, baile y poesia. Mas di 200 hoben local a participa den e edicion di Art Rules Aruba di e aña aki, produci pa Ira & Ayra Kip di e Pancake Gallery Foundation. Nan a experiencia dos siman intenso di tayer den shete disciplina creativo cu Baile, Pintamento, Film, Fotografia, Moda & Diseño, Rap & Poesia y DJing riba e curiculo. E lesnan a tuma luga na Atelier 89 na Oranjestad y na Scol di Arte na San Nicolas. Art Rules Aruba a gradici e mayornan cu a permiti nan yiunan pa participa y habri nan halanan artistico sin critica of husgamento, dunando nan asina e oportunidad pa expresa nan mes y desaroya un voz independiente riba nan mes. E show di moda a wordo ricibi cu gran entusi-
asmo ora cu modelonan profesional a mustra e creacionnan di e diseñadornan hoben, di cual portretnan a wordo saca door di e klas di fotografia. Den e auditorio completamente yen na Cas Di Cultura, e publico a gosa di un serie di pelicula inteligente y sorprendentemente honesto, y monologonan profundo y revelador, combina cu piesanan teatral serio, ademas di segmentonan di baile anima sin inhibicionnan, como tambe un tributo na e artista Arubiano Bobby Farrell q.e.p.d., e famoso Eurodisco frontliner di BonnyM. Pabien ta bai na e ekipo di maestronan internacional, kendenan cu hopi habilidad a yuda desaroya e hobennan talentoso di Aruba y a inspira nan pa logra un nivel impresionante di creatividad, originalidad y invencion. Na nomber di e Pancake Gallery Foundation, danki na tur e sponsornan generoso cu a haci e dos simannan fantastico posibel, ya caba plantando e simiñanan pa otro aña y e di tres edicion di e programa.