2
AWEMainta.com
Diasabra 31 di Mei 2014
Prome Minister Mike Eman a duna man den bashamento di fundeshi di MFA Noord
Prome cu salida di solo Prome Minister Mike Eman a hisa manga di camisa diaranson ultimo na sitio di construccion di Facilidad Multi-Funcional (MFA) di Noord. Hunto cu trahadonan di Bohama Aruba cual e ta compania local encarga cu e proyecto aki, Premier Eman a
yuda basha e mescla di concret pa loke ta fundeshi di e facilidad multi-funcional. Presente na e momento aki tabata tambe arkitecto ir. Orlando Hoevertsz, Sr. Rene ten Thije di Bohama, Sra. Anky Vrolijk, Director General di MFA y Sr. Omar Harms di Ministerio di
Asuntonan General. Tur a comparti e satisfaccion di ta keda cla cu un parti asina importante di e trabounan. Di awo padilanti lo cuminsa wak con e murayanan ta bay halto. Di parti di Gabinete Mike Eman II mester bisa cu e proyecto ta canando riba bon pia y ta bay
keda cla manera anuncia, na luna di Februari 2015. MFA
Noord ta e prome di e edificionan Multi-funcional pa keda construi. Ubica den curason di Noord na e luz di trafico entre Warda di Polis cu Centro di Bario Noord. MFA ta un concepto cu a keda adopta y adapta na e necesidadnan di comunidad di Aruba y den su forma particular tambe na e necesidadnan di cada districto. Den e facilidad aki Hulpbestuurskantoor di cada districto ta haya nan ubicacion nobo, pero tambe e facilidad ta bay tin mas instancianan publico cu ta bay ofrece nan servicionan mas cerca di e ciudadanonan, manera por ehempel AZV. Tambe a dedica espacio pa organisacion y habitantenan di e bario por reuni, participa na cursonan y actividadnan cultural. Pa Prome Minister Eman esaki tabata un momento importante caminda e por comparti, aporta y principalmente gradici tur obrero y tur envolvi pa e trabou duro cu nan ta haciendo pa pais Aruba. Pronto lo conoce inicio di construccion di MFA Paradera sigui pa Santa Cruz, Savaneta y San Nicolas.