32
Local
Diamars 17 di December 2013
AWEMainta.com
Exitoso SETAR Mobile Bazaar 2013
E prome clientenan a drenta 12or di merdia diadomingo di Mobile Bazaar 2013 y empleadonan di SETAR a ricibi nan cu un aplauso. Nan a ricibi nan compra completamente gratis
como premio. Esaki ta manera cu SETAR a finalisa su celebracion di 10 aña como NV. Apesar cu e diadomingo a cuminsa cu algun nubia, esaki no a stroba e fanaticonan di
SETAR Mobile Bazaar di acudi masalmente pa nan haya un bon deal riba nan compranan pa fin di aña riba telefonnan celular smartphones y tablets cu a predomina e aña aki.
Manera semper e actividad anual SETAR Mobile Bazaar 2013 tabatin ofertanan special y ademas a reparti diferente premio den diferente sorteo pa tur cliente durante henter dia di e actividad. Cu e SETAR Mobile Bazaar, SETAR ta brinda e comunidad di Aruba hunto cu tur su clientenan y nan famia un dia den cual nan por pasa un dia agradabel yena cu actividad y ta duna oportunidad di haci nan compra durante di e dia na prijsnan hopi atractivo y ofertanan special riba tur su servicionan, finalisando cu un
show espectacular di vuurwerk pa un y tur. E actividadnan di SETAR Mobile Bazaar 2013 a cuminsa di 12or di merdia e aña aki y a bai te cu 10or y mey di anochi, y e benta a bay te cu 7’or di anochi. Tabatin tin show di diferente agrupacion di Gaita, tent di cuminda, acesorio, informacion di Mi-Fi, Kids Corner, facepainting etc. SETAR a cera SETAR Mobile Bazaar cu e banda Youth Xtreme y un show di vuurwerk espectacular acompaña pa musica.