16
Local
Diahuebs 11 di October 2012
AWEMainta.com
Brindando un servicio profesional y unico pa oido
Oduber & Kan ta lansa su studio di oido pa comunidad di Aruba PERDIDA of reduccion di
oido ta un enfermedad cu ta bin segun cu e edad di un persona ta avansa y na Aruba tin indicacion cu 1 di cada 10 hende, lo sufri di cierto reduccion di oido. E compania Oduber & Kan, conoci pa 57 aña caba den nos comunidad pa nan excelente servicio relaciona cu bista, awor ta expande nan servicio cu un studio di oido cu un specialista den dicho area. Pa haya un aparato di oido tin un proceso cu mester cana y primeramente e cliente mester bay su dokter di cas pa haya un carta di referencia pa bay Oduber & Kan. Despues di esey, e cliente ta haci un cita na e studio di oido di Oduber & Kan pa ehecuta su test di oido. A base di e resultado, e specialista di oido STAR lo duna un splicacion amplio tocante e diferente opcionnan di escogencia di un producto. E studio di oido Oduber & Kan ta traha solamente cu e aparatonan reconoci y di bon calidad, pues hunto cu e specialista di oido STAR, lo evalua cua ta e aparato cu ta pas miho cu e cliente. E duracion di henter e proceso aki lo ta di 6 pa 8 siman. AZV ta cubri te cu un maximo di 750 florin pa e prome biaha cu haya un aparato di oido. Tambe nan ta paga ora di reemplasa e aparato di oido despues di 5 aña. E aparatonan di oido ta existi pa hopi aña caba y debi na e avancenan di tecnologia, e aparatonan di oido awendia ta traha na un manera mas duradero y confortabel. E
fabricantenan ta traha nan mas chikito y facil pa uza y nan ta provee un miho calidad di zonido. Oduber & Kan ta cla pa ricibi tur e clientenan cu tin mester di un test di oido specialisa, brindando servicio y informacion adecuado prome cu scoge pa un aparato di oido. E demanda ta asina grandi, como tambe e innovacionnan tecnologico, locual ta haci cu awendia tin un cantidad di caracteristica disponibel den e aparatonan di oido, cu sigur lo satisface e necesidad di cada cliente. Minister dr. Richard Visser tambe tabata presente y tabatin e gran honor di corta e cinta di e studio di Oido, di Oduber &Kan, situa na Cayena Mall. Minister Visser ta hopi contento cu e iniciativa cu e compania a dicidi di tuma, ya cu e servicio lo ta uno tremendo y sigur lo beneficia e area medico pa nos comunidad. “Esaki ta algo hopi bon mes, ya cu e servicio aki lo yuda nos specialistanan y lo ta un tremendo partnership pa salubridad publico. Nan a sinta hunto cu AZV y e KNO-artsen pa wak ki parti di screening nan lo por haci pa facilita y señala e pashent na e specialista concerni,” e mandatario a splica. Riba e fotonan adhunto por aprecia momento cu gerencia di Oduber & Kan ta presenta e servicionan nobo di solucion pa problemanan di oido, durante un conferencia di prensa. Ey a haci un demostracion tambe di tur e servicionan cu e studio moderno di Oduber & Kan ta ofrece awendia.