32
Local
Diabierna 9 di Mei 2014
AWEMainta.com
Exposicion Rudyomar Leysner na UNOCA
ACTUALMENTE ta tumando luga na UNOCA un exposicion di e hoben artista Rudyomar Leysner. For di chikito Rudyomar ta gusta pinta na cas, na scol y tabata cana cu un schrift of schetsboek y unda cu e bay cu e haya un inspiracion e ta pone ariba papel. Den e exposicion por mira su material for di tempo cu e tabata mucha te cu obranan mas recien. Rudyomar ta hopi specialisa den tecnica di inkt y ta pinta cuadranan chikito cu masha hopi detaye. Su temanan ta varia di tur locual e ta experiencia diariamente den bida. El a studia na Colombia y a bishita varioas pais pa haya inspiracion di pintornan grandi manera Salvador Dali, van Gogh, Pablo Picasso y otronan. E exposicion ta habri di dialuna te cu diabierna durante ora di trabou di UNOCA den Caya Hubert Booi 21 te cu diabierna 16 di mei 2014. UNOCA ta contribui cu artistanan local, specialmente e hoben-
nan, pa exhibi nan coleccion pa comparti cu pueblo. Bishitando un exposicion tin diferente nificacion pa un persona: e ta algo recreativo, si単a conoce y aprecia e artista y su obranan, si単a conoce tecnicanan di arte, profundisa bo mes mas den diferente aspecto di nos cultura. Naturalmente tin e oportunidad pa cumpra un obra pa pone sea na cas of na trabou. Cu compra di un obra bo ta yuda e artista, pero tambe bo ta amplia bo propio amor pa arte. Pa e proximo lunanan UNOCA tin varios peticion di artistanan local pa exhibi nan obranan den e sala di exposicion di UNOCA y esey ta un muestra cu na Aruba nos tin talentonan tanto hoben como adulto cu kier comparti nan sentimento cu e publico. Un y tur ta cordialmente invita pa bishita e exposicion di Rudyomar Leysner den sala di exposicion di UNOCA. Bishitando UNOCA, bo tin oportunidad tambe pa cumpra buki di autornan local tanto pa hoben como adulto.