14
Internacional
Diamars 1 di Februari 2011
AWEMainta.com
Opositornan ta yama un miyon manifestante pa reuni na Egipto
UN coalicion di grupo a haci un yamada pa un miyon hende
tuma caya di Cairo awe pa aumenta e presion pa presidente
Hosni Mubarak baha, mientras lídernan di varios país tambe ta
boga pa un transicion ordena pa un sistema democratico. E coalicion di grupo, cu ta inclui esun clandestino Hermandad Musulman, a laga sa cu nan kier pa e marcha sali di Tahrir, of Plaza di Liberacion, y obliga Mubarak pa renuncia pa diabierna awor. E gruponan tambe a convoca un welga general pa dialuna, aunke Cairo ta sigui grandemente inactivo, ya cu banco, scol y bolsa di valor ta sigui cera. Hendenan a forma filanan largo dilanti panadería den un esfuerzo pa cumpra pan, e principal fuente di alimentacion di hopi egipcio. Waya di sumpiña a cera e principal caretera pa Tahrir, un
plaza central den centro cu e manifestantenan a bin ta ocupa desde diabierna, convirtiendo e lugar den un punto di foco nacional di exigencia pa deroca Mubarak, cu nan ta pone responsabel pa e pobreza, inflacion y indiferencia oficial y brutalidad durante e 30 añanan cu e ta na poder. Miles di hende a aglomera na Tahrir desde mainta. Hopi a drumi riba acera of den e tiendanan. Varios país a manda avion pa evacua nan ciudadanonan di e disturbio, incluyendo Merca, Hulanda y Inglatera, mientras lidernan mundial a urgi Mubarak pa busca un solución pacifico pa e crisis.
Chávez: “Causanan straño” a ocasiona explosion di arma na Venezuela PRESIDENTE di Venezuela, Hugo Chávez, a atribui e candela di gran proporción cu a tuma lugar diadomingo marduga ultimo den un deposito militar den centro di e país na “causanan straño”. Arma y municion di e compañía
estatal ‘Compañía Anónima Venezolana de Industrias Militares’ (CAVIM), a sali skeiro den tur direccion pa causa di un explosion, cu a tuma lugar 4.45 di marduga ora local den e ciudad Maracay, estado Aragua, na como 100 kilometer west di
Caracas. E gobernador di e ciudad, Rafael Isea, a informa cu un persona a fayece pa causa di e incidente. Otro tres a resulta herida y algun di nan a ser gedal den e caos di vehiculo y personan tratando di scapa di e siniestro. E mandatario personalmente a inspecciona e deposito, for di
unda e’la declara cu e incidente lo ser investiga. “Tur cos ta indica cu no tabatin hende na e almacen. E anochi tabata fresco. Nan ta almacen halto y amplio y nan no tin instalacion electrico paden. Pero, tur cos ta posibel y nos no tin ningun teoria”, e’la bisa, segun un comunicacion di Agencia
Venezolana de Noticias. E hefe di Estado a rechaza e critica di esnan cu ta bisa cu e suceso a tuma lugar pa motibo di un “irresponsabilidad” di gobierno, pa mantene un deposito di e naturaleza aki den un centro habita di importancia. E’la bisa cu si tin algo pa siña di esaki, gobierno lo haci’e.