EL KANTONIKO DJUDYO |
El judeoespanyol es mi grande rikeza Mis puntos de vista Djoya Delevi
E
n el Panel del 7 oktubre 2007, myentres 1 las selebrasyones del 60. anyo de muestra gazeta « ŞALOM », noti syertos propozitos. Una partida de los oradores dyeron a entender 2 ke el judeo-espanyol fue la idioma de los « non instruidos » i tambyen Galata syendo el distrikto del sovredicho grupo… Una sorte de « Getto »… Aki, mis puntos de vista, mis objeksyones sovre la « etiketa d’inferyoridad » apegada 3 a muestra lingua ansestral i a este sentro de Estambol ande me engrandesi i bivi asta mis 20 anyos. Nunka me olvidi mis diyas ke pasi ayi. Nunka me aleshi 4 de sus kalejas 5 i par konsekuensa de mis rekuerdos. A kada okazyon esto kontinuando a vijitarlo i eskrivir sovre el Sentro. Afilu eskrivi mis rekuerdos debasho el eslogano « Una ijika de Galata », ke dezeyo arrekojerlos i publikarlos en un livro (si posivle).
Ay anyos ke me estuve rendyendo kuento del estado de las jenerasyones ke mos sigieron 6. Por la mas parte leshos, (siguro ay eksepsyones) de la lingua, de muestra kultura i tradisyones. Realizi antes unos kuantos anyos, ke solo avlar judeoespanyol no abastava para impedir la desparesyon de una lingua ke konservimos mas de 500 anyos… Se empleo muncho el byervo « murir » o « agonizar », konsernando la lingua, lo ke no es enteramente djusto. D’akordo, estuvo en negro estado, diremos « pataleando » 7. Malgrado ke kedimos un poko tadre, estamos azyendo esforsos aki, ansi ke ampeso mas antes en diversos paises. En realidad, esto me parese komo una kontradiksyon. Porke, kon la ekspresyon de syertos, « la agoniya » se sintyo mas demaziya en Turkiya i se puede dizir mas demprano tambien.
1. pendant 2. expliquer 3. coller 4. s’éloigner 5. rue 6. suivre 7. être pris de soubresauts
KAMINANDO I AVLANDO .06 | 25 |