De plaat en zien verhaal

Deur Roy Verheij Jaor: 2016 Titel: Ich hab ’nen deckel Deur: Kazzematje Teks: Remi Derksen Orzjineel van: De Bläck Fööss

Now bietje bi-j bietje de eerste contoure ontstaon van “Ons lokaal” aan de Kastanjelaan 20, op de heilige grond van één van de nostalgieste kroege uut de Stökkumse geschiedenis: café Bonepad, gif dit 'n mooie geleageheid um dizze keer stil te staon bi-j 'n nummer van Kazzematje dat amper 5 jaor old is, maor ’n geschiedenis het van bi-jnao 100 jaor: " Ich hab 'nen deckel.."

’T was in 1927 dat café Bonepad wier gebouwd deur Hent Hakfoort en Dien Huenders. In 1950 oaverleed de olde eigenaar van ’t café en kreeg schoonzoon Gert Jansen (getrouwd met Stien Hakfoort) ’t op zien naam. De drukste dage in de gloriedage van café Bonepad, dat de deure in 1976 definitief veur de letste keer sloat, ware altied eerste Kerst- en Pinksterdag (Umdat ’t dan de enigste kroeg in de umgeaving was dén oape was en dan stonge de leage bierkiste neave de kroeg net zo hoog as de schossteen.) Waor da’j tiggewoordig afreakent met de pinpas of de creditcard, ging dat toendertied ietskes anders; A-j de knip niet bi-j ow had, dan schreef-ie ’t aan de lat. ’T Aantal genuttigde consumpsies wed niet op ’n tablet bi-jgeholde, maor aangestreep op de bierdeckel (bierviltje) onder ’t glas. A-j dan aan ’t end um de reakening vroeg dan kreegie vaspandoer van Gert te heure: 12,80! (En dan miek ’t niet uut of de werkelukke reakening bv. 10 of 15 gulde was.. Gert had toendertied nooit kunne bevroedde dat veertig jaor later de deckel en 12,80 bezonge zolle wodde in ’n lied dat veurkwam in de Prinsprissentatie van 2014, toen Bas I (Koster) as Prins wed geprissenteerd deur de groep Kazzematje. In dizze prissentatie dén zich afspolde in Kölle bezingk frontman Henning Krautmacher van Die Höhner (gespöld deur Ap, de zoon van Gert Bonepad) zogenaamp dizze Stökkumse kroeg, waor volges ’t verhaal niet alleen nog ’n deckel van 12,80, maor óók zien roets zolle ligge.. Wat de olde kroegbaas Gert Bonepad vroeger nooit veurmekaar gekrege het, is um ’n officiële vergunning veur starke drank te kriege. De ni-je eigenare André en Freddy hemme gelukkig wél veurmekaar gekrege

dat ze binneköt op ’t tuinterras bi-j “Ons Lokaal” gewoon ’n legale borrel kunne servere. A-j daor dan heerluk geniet van dén borrel en van de andere streekprodukte, laot dan in gedachte de strofe van dit mooie nummer nog ’s deur ow kop hengaon… Bun trouwes now al beni-jd wie de eerste klant zal wodde dén as eerste bi-j André en Freddy prezies ‘t bedrag van 12,80 af mag reakene..

Ich hab 'nen deckel, met 12,80 aan de lat der lit in Stökkum, in minner kneip, bi-j Bonepad Ich han daormaols nit dran jedaag ging d'r vandeur nog in dezelfde nach und ich fuhr naor Kölle mit der bahn daor ving ich, aleine, ne neue arbeit an

Kölle is ne grossstadt So steht in die prospekte drinn hier ku-j pas leave komm hier naor uns Kölle is inn Daorveur gaoj dán allein von hoes und es nachts jon de lampe niemaols oes Drum bin ich jet hier in de stad doch mie fehlt, jet irgentwie, ich wet neet wat

Ich het niemaols, niemaols jedaag dat ich so oft an Stökkum denke muss Ich hab' hier freunde, und alles, 't jeet me ook nit schlech evver trotsdem da komme ich hier nit zurech.. Ich han 'nen deckel, met 12,80 aan de lat der lit in Stökkum, in minner Kneip, bi-j Bonepad... Im nächsten sommer fahr ich heimlich dann und hoffe dat ich dann, daor anjonn kann und treff dann den lieber mann der mich 'ne neue deckel maache kann

Ich het niemaols, niemaols jedaag daaaat ich Stökkum so jern maaaach den Stökkum dat is dat gat Wo ich gross jewodde bin und irgendwann-muss ich dann, wenn ich kann.. wieder hinn...