Za dušu za spomenek Pajdašuvanje po trsja

Vincekove je za nami. Hnogi naši Zagorci od vajkada su se raduvalji svojem trsiču. Kut tud su gledelji da h trsiču napraviju i kakvu klječurku. Klječurke su največ put bile od drieva. Bila je te jedna veča prostorija h tere su bilji gvanteri, a na gvantere lagvi i biednji. Na zidu na kljine veselje je se one kaj je pri trsju i kljieti trebalje. Pak su tuj bile obiešene pute, lakovnice, škafeci, greštaljke i pocedilke. Na prsnica med roženičkami je bila prebita deska na tere bi bile trsne škare, klupčeci preje, malje loja i mišalofka. Mišalofka je bila za miše teri bi skosalji preju i pojelji loj. Unda se h kljiete pri malje bolje gazde znalje najti suhuga špeka, trepanoga sira ilji prgic, gde kakva klobasička. Oni teri su bilji malje jači gazdi, pred kletju za strehu su imelji drvenu prešu i klupičičku. Hu ta kljetja i poklje branja i pospravljenoga vina, čez se cajte hodil je gazda kljeti i trsja, pregledal i sprobaval vine i čakal e bu gdoj po putu išel kaj bi ga pozval da si ž njim malje pogutne. Da bi za čem bilje piti, pri sake klječurke je bilje i nekaj domačuga za prigristi kaj je bilje h kljieti ilji je pak gazda donesel sobu. "Nigdar nie dobre piti na prazni želudec. Če piješ na prazni želudec, mam te vine more "hloviti", znalji su reči selski muži i radi toga pri ruke imelji nekaj za deti h "kljun". Kljeti se nie išlje same unda gda je zapal veljiki snieg, a negda ga je bilje prec. Za par dane gda je zapal ljudi bi napravilji tiri, pak je unda gazda išel h kljiet gled da mu se nej vine zmrzlje. Če se je zmrzlje h lagvu nie smel rezbiti led, odzgor, na vinu h lagvu jer bi se finoča vina pošamierila. Oni fejst šteči znalji su zakuriti vanje, h lončeku restopulji snieg i zvručalji vodu i poljievalji po pipe kaj bi se odmrzla. Sljine su počele cureti onem teri su bilji pri kljieti gda je na tenjki mlaz počelje cureti vine z pipe. Klječurke su unda znale biti pune muže, teri su išlji jeden k drugomu. Tak se je reklje da su za bieluga dana došlji h kljiet, a za trduga mraka išlji od kljeti dima. Kupica za kupicu, nekaj pregrizlji, malje pospominalji i mesec je za čas počel plavati po nebu z zvezdicami, gda bi išlji k doma. Babe su znale reči, gda su čule da muži ideju k domu z piesmu, da su si prec vina h rit hitilji. Kak je išel kraj meseca siečnja tak su več i dani bilji dukši i počelje se gruntati o poslije tere se bu trebalje započeti. Vinogradari su si zelji Vincekove, za sve- tek, gda se ide h trsje i po prvi put orieže trsiče. Zelji bi malje vinčeka i zaljejalji oriezani trsek i pri tomu moljilji trske da čez ljete dobre rodi z Božju pomočju. Odrezalji su tri trsove šibe, a saka je morala imeti tri pupe i odneslji dima. Doma su te tri šibe delji h kupicu z vodu. Pratilje se kak se te šibe i pupi ponašaju. Če si potiraju bil je te znak dobruga roda i ploda h trsiju za to ljete. Gda su orezalji trsje unda su se rezale i male šibice bekovine ilji obične vrbe, kaj se je ž njimi vezal trsek za kol, Da se nej šibe posušile takaj su se metale h vodu dok jih nie bilje trieba. Ljudi su negda pratilji i kakve je vrieme na Vincekove. Če se je vrabec kupal h mlake vode na putu, bude dosta pijače. Če sunčece svetlji bu vina pri kljeti. Če sunčece peče, h lagva vine teče.. Ak je dobre sunce za Vincekove i vine bide fine. Kak je za Vincekove negda bilje snega i ak se z krova počelje na Vincekove prek strehe cediti i snieg topiti, bude duge z lagve teklje. I na kraju se velji: "Dragi Sveti Vinko, pokaži Svietu Kakvuga bu roda h ovem ljetu. Denes su drugački cajti. Več je malje trsiča jer su ljudi pociepalji radi toga kaj se nečeju mučiti ilji radi toga kaj je na trsiče došel beteg. Rietke gde je i kakva drvena klječurka. Zdej su po mesta gde je negdea bilje trsiče ilji negde još je, ljiepe zidanje. Se jedna ljepša od druge. One kaj je vriedne spomenuti kaj je dobre, da se bar za vinske gode, kak su Vincekove i Martinje z tie ljiepe zdanju čuje smieh i pesma. Gazda pozove pajdaše, počne orezavati svoje trsiče. Da bi trsiče bolje rodilje zaljieju ga starem vinem i obiesuju klobasice, bunceke, prezbušte i kaj česa druguga, da bude dober rod. Z piemu i bogatu koštu, z mužiku fišta se i pajdašuje za Vincekove, prvi vinski svetek h ljetu. Te je za saku pohvalu, jer hu ovem "zgužvanem i brzem življenju" sake pajdašuvanje je za pohvalu, tak i ove za Vincekove. Z hnoge kljeti ove par dane čula se ona ljiepa vinska moljitva: Očuvaj nas Vincek od hude zime i mraza, paklenske vručine, dežđevnog leta, pirike i sakojačkog drača, peronospore hude, od tuče ledene, od strele nebeske, od ognja žarečega, od žulof krvave, od napasnih mejašnike, od praznih lagvof i od malih prihodof. Za nadati se da bu vinare Sveti Vincek posluhnul i donesel dober rod za pajdašuvanje, bar za Martinje i Vincekove, pri kletja.

U sklopu projekta "Odrasli čujte naš glas, dječja su prava bitna za nas" i programa Dječjega gradskog vijeća DND-a Zabok