CATALOG SIOE GRADDEDIGION
Croeso i
YR
YSGOL GELF WRECSAM
Sioe Graddedigion 2025
Yr Athro Anne Nortcliffe
DEON CYFADRAN Y CELFYDDYDAU, CYFRIFIADURA A PHEIRIANNEG
Prifysgol Wrecsam
Croeso i Arddangosfa Haf Ysgol Gelf
Prifysgol Wrecsam 2025!
Unwaith eto, rydym yn dod â’n
Harddangosfa Gelf Myfyrwyr
Graddedig i galon cymuned Wrecsam. Yn unol â thraddodiadau artistig Wrecsam – sy’n dyddio’n ôl i Arddangosfa Trysorau Celf Wrecsam yn 1876 ac yn parhau hyd at lwybrau celf murluniau diweddar Wrecsam –ein nod yw gwneud celf yn hygyrch i gynulleidfa ehangach er budd pawb mewn cymdeithas.
Mae Arddangosfa’r Ysgol Gelf yn ein galluogi i arddangos a rhannu doniau artistig rhyfeddol ac amrywiol ein myfyrwyr, gan gwmpasu arferion o waith gof arian i gelfyddyd gain.
Mae’r Arddangosfa Haf hon hefyd yn helpu i greu cysylltiadau diwylliannol gwell rhwng ein myfyrwyr gwych a chymuned ehangach Wrecsam.
Pwysleisiodd John Dewey, sylfaenydd addysg fodern, bwysigrwydd profi celf fel cyfrwng cyfathrebu sy’n galluogi pobl i gysylltu ar draws gwahanol gefndiroedd a diwylliannau.
Estynnwn groeso cynnes i chi fwynhau ein Harddangosfa Gelf yr Haf yn Nôl yr Eryrod. Fe’ch anogir hefyd i ymweld
â’r Ysgol Gelf ar Stryd y Rhaglaw i archwilio’r rhaglen arddangos yn Oriel Gosod/Insert Gallery, mwynhau coffi yng nghaffi’r cyntedd, a phori drwy’r siop gelf.
BODRHYDDAN HALL
POTS, PLANTS & FOOD FESTIVAL ‘25
10AM - 4:30PM SAT 14 JUNE - SUN 15 JUNE 2025
• 80 CERAMIC MAKERS
• PLANT SELLERS
• FOOD VENDERS
• HAVE A GO
• LIVE KILN FIRINGS
•£5 ENTRY
(FREE UNDER 16)
• DOG FRIENDLY
• ENTERTAINMENT
Abergele
to Llandudno Anglesey Caernarfon
BODRHYDDAN HALL
POTS, PLANTS & FOOD FESTIVAL ‘25
10AM - 4:30PM SAT 14 JUNE - SUN 15 JUNE 2025
Bodrhyddan Hall Bodrhyddan Hall
A55
to Chester Wrexham Liverpool
Navigation:
What Three Words: /// chess.collects.heals Sat Nav: LL18 5SB
Bodrhyddan Hall, Dyserth Road, Rhuddlan, Rhyl Denbighshire LL18 5SB
bodrhyddan.co.uk ceramicwales.com
Ceramic Wales was founded by three ceramic artists with the intention of sharing all things clay, showcasing national and international ceramicists. The event began in 2016 at Wrexham University, with three subsequent annual shows, before moving to it’s present location, Bodrhyddan Hall, in 2022.
Bodrhyddan Hall is a grade 1 Listed home that features picturesque gardens, fine art, antique furniture and treasures from Wales to Ancient Egypt. We are delighted to welcome Ceramic Wales back once again, which is one of our favourite events.
SCAN TO BUY YOUR TICKETS
SCAN FOR CERAMIC WALES WEBSITE
Prestatyn
Liverpool Bay
St Asaph
Rhyl
Sash Bugeja
BA(ANRH) ANIMEIDDIO
Wrth dyfu i fyny mewn cartref dwyieithog ym Malta, canfu Sash fod cartwnau yn bont rhwng ieithoedd, gan eu galluogi i gysylltu â theulu a ffrindiau ar ôl symud i Ganada yn ifanc. Roedd eu gwerthfawrogiad o adrodd straeon gweledol yn parhau i’w hysbrydoli pan yn oedolyn, gan eu gwthio i greu animeiddiadau sy’n mynd y tu hwnt i rwystrau iaith.
Daw llawer o ysbrydoliaeth Sash o brofiad bywyd o ddydd i ddydd ynghyd â’u cariad at ffantasi. Mae eu hamser yn y brifysgol wedi caniatáu iddynt roi cynnig ar sawl math o animeiddio fel 2D a stopio a symud, sydd wedi helpu i ddatblygu sylfaen gref mewn
adrodd straeon gweledol a gwaith sy’n cael ei yrru gan gymeriadau. Boed hynny’n cael ei ysbrydoli gan eu cariad at Dungeons a Dragons neu naratifau teimladwy Steven Universe, mae Sash yn ymdrechu i greu gwaith sy’n cyfuno’r rhyfeddol â’r personol iawn.
Ar gyfer eu prosiect olaf, mae Sash yn camu y tu hwnt i’w ffiniau cyfforddus drwy archwilio graffeg symudiad – her anghyfarwydd ond cyffrous. Amlygodd prosiectau blaenorol eu cariad at waith cefndirol, ac mae’r prosiect hwn yn dangos hynny ymhellach wrth iddynt gyfuno hyn ag angerdd am gelf gysyniadol i greu delweddau trawiadol.
Rhys Conde-Wood BA(ANRH) ANIMEIDDIO
Mae Rhys yn animeiddiwr angerddol sy’n arbenigo mewn animeiddio 2D a stopio a symud. Ers pan oedd Rhys yn ifanc, mae’r cysyniad o ddod â chymeriadau a gwrthrychau’n fyw drwy animeiddio wedi ennyn ei chwilfrydedd. Dechreuodd ymarfer drwy gyda stopio a symud ar gyfrifiadur ei dad. Arweiniodd hyn yn y pen draw at ymarfer fformatau a dulliau eraill yn ogystal â chael yr uchelgais i ddilyn animeiddio fel gyrfa.
Mae Rhys yn credu bod Animeiddio yn ddull unigryw o adrodd straeon gweledol sy’n galluogi crewyr i adrodd straeon anhygoel ac ymgysylltu â chynulleidfaoedd mewn byd newydd sbon; drwy
ddefnyddio arddull weledol gref ac unigryw ac esthetig, mae animeiddwyr yn gallu creu math o fynegiant drwy symudiad, sy’n gallu dylanwadu ar deimlad ac emosiwn gwylwyr.
Mae Rhys hefyd yn cael ei ysbrydoli drwy wylio casgliad mawr o ffilmiau nodwedd wedi’u hanimeiddio a ffilmiau byr wedi’u gwneud gan wahanol animeiddwyr ledled y byd o wahanol wledydd a chefndiroedd. Dyma rai o hoff ffilmiau animeiddiedig Rhys: The Hand gan Jiří Trnka, The Man Who Planted Trees gan Frédéric Back, Fantastic planet gan René Laloux, a Bubble Bath gan György Kovásznai.
Faith Darlington
BA(ANRH) ANIMEIDDIO
Mae Faith yn animeiddiwr digidol sy’n defnyddio amrywiaeth o feddalwedd sy’n cynnig llawer iawn o greadigrwydd i greu animeiddiadau gafaelgar a llawn dychymyg. Ar ddechrau ei chwrs prifysgol dair blynedd yn ôl, maen nhw wedi gallu edrych ar wahanol dechnegau a disgyblaethau fel dylunio graffig a darlunio, ond wedi canfod bod ganddyn nhw angerdd am animeiddio. Mae eu gwaith yn defnyddio dull trefnus, gan fraslunio’r fframiau a’r cefndiroedd allweddol ar wahân i wneud y broses animeiddio’n syml ac yn effeithlon.
Mae hi wastad wedi bod wrth ei bodd yn bod yn greadigol, ond yn rhywle ar hyd y ffordd daeth lluniadu gyda chyfryngau fel pensiliau neu feiros yn llai a llai
apelgar. Mae gallu ychwanegu symudiad at ei chymeriadau yn ogystal â chael y rhyddid creadigol i greu ei chelf yn ddigidol wedi dod â’r cariad hwnnw yn ôl iddi. Mae ei gwaith yn archwilio themâu’r amgylchedd, fel bywyd gwyllt a bioamrywiaeth, gyda’r prosiect diweddaraf yn edrych ar yr anifeiliaid sy’n cael eu heffeithio gan ddatgoedwigo yn y DU. Nod yr animeiddiad yw addysgu pobl am yr hyn y gallem ei wneud yn wahanol i helpu’r amgylchedd a chadw bywyd gwyllt y DU i ffynnu. Mae eu hanimeiddiadau’n defnyddio arddull weledol syml ond bywiog wedi’i nodweddu gan linellau beiddgar a lliwiau llachar sy’n ceisio creu gwaith celf hwyliog a thwymgalon sy’n gwneud i bobl eraill wenu.
Seren Modwenna Hughes
BA(ANRH) ANIMEIDDIO
Mae Seren yn animeiddiwr sydd â diddordeb mawr mewn dylunio cymeriadau a dod â chymeriadau’n fyw drwy adrodd straeon. Mae’r gallu hwn i greu cymeriadau a chreu bydoedd ffuglennol yn gweithio fel ffordd o ddianc. Mae hi’n tueddu i ddefnyddio cyfryngau digidol ar gyfer ei gwaith celf sy’n ei galluogi i archwilio ei sgiliau, ei thechnegau a’r broses greadigol yn ei chyfanrwydd ymhellach – mae defnyddio amrywiaeth o feddalwedd wahanol wedi ei helpu i benderfynu lle mae ei chryfderau animeiddio’n cael eu cyflwyno i’r eithaf.
Ers pan oedd hi’n ifanc, mae hi wedi bod â diddordeb mawr mewn animeiddiadau sy’n cynnwys
dylunio cymeriadau ac adrodd straeon diddorol, ac mae hi wedi bod yn awyddus i gynhyrchu prosiectau tebyg eu natur sy’n cynnwys ei chymeriadau a’i straeon ei hun. Mae hi hefyd yn chwilio am ysbrydoliaeth o’r ffilmiau nodwedd animeiddiedig a gynhyrchwyd yn y 1960au a’r 1970au. Fe wnaeth y defnydd o liwiau llachar a straeon rhyfedd ei denu’n syth at y syniad o gynhyrchu ffilmiau nodwedd wedi’u hanimeiddio mewn ffordd debyg. Mae Seren yn gweld dyfodol disglair i animeiddio ac mae’n gobeithio manteisio ar y cyfle i chwarae rhan fawr yn nyfodol y ffurf gelfyddydol.
David Moreira
BA(ANRH) ANIMEIDDIO
Mae David yn animeiddiwr 2D angerddol a medrus, gyda rhywfaint o brofiad mewn animeiddio 3D a dylunio graffeg. Ers iddo fod yn saith oed, mae wedi bod yn frwd iawn dros animeiddio, wedi’i ysbrydoli gan adrodd straeon anhygoel a byd hudol Disney ac anime.
Dros y blynyddoedd, mae wedi perffeithio ei grefft, gan ddysgu technegau newydd a gwella ei weledigaeth artistig.
Mae David yn creu dyluniadau o gymeriadau gafaelgar a straeon trochol sy’n cysylltu â’r gynulleidfa.
Mae ei ddychymyg bob amser yn esblygu, ac mae’n mwynhau
darganfod ffyrdd newydd o wella ei waith presennol. Mae’n gwerthfawrogi twf cyson ac yn ymdrechu i fireinio ei arddull artistig unigryw, gan sicrhau bod ei waith yn sefyll allan.
Yn dilyn ei astudiaethau gradd, mae’n gobeithio sefydlu ei hun yn y diwydiant animeiddio a datblygu ei hun fel gweithiwr proffesiynol uchel ei barch. Ei freuddwyd yw creu animeiddiadau sy’n symud pobl, yn adrodd straeon ystyrlon, ac yn creu argraff gref. Drwy ei arddull unigryw a’i ddull creadigol o adrodd straeon, ei nod yw dod â gwreiddioldeb a syniadau ffres i’r diwydiant.
Molly Morris
BA(ANRH) ANIMEIDDIO
Dechreuodd angerdd Molly dros animeiddio pan oedd yn ifanc iawn, yn gwylio cartwnau 2D wedi’u hanimeiddio fel Tom a Jerry, Looney Tunes a SpongeBob. Yn y fformat penodol hwn o’r ffurf gelfyddydol, cafodd ei thynnu i mewn gan yr amlinellau trwchus beiddgar ochr yn ochr â’r lliwiau llachar cyferbyniol a’r dyluniad anturus y cymeriadau. Yn ei dro, fe wnaeth hyn danio cysylltiad a chariad am fod eisiau creu ei ffilmiau byr animeiddiedig ei hun, gan gael ei hysbrydoli gan yr arddull hon.
Mae gwaith Molly yn adlewyrchu ei chariad at gartwnau comedi,
gan ddangos ymroddiad i wneud i’r gynulleidfa chwerthin, yn ogystal â chaniatáu iddynt uniaethu’n hawdd â’i chynnwys drwy ddod o hyd i hwyl mewn sefyllfaoedd cyffredin bob dydd.
Drwy gydol ei hamser ym Mhrifysgol Wrecsam, mae hi wedi gallu dod o hyd i’w datblygiadau creadigol ac mae hi wrth ei bodd yn adrodd straeon a dylunio cymeriadau yn benodol. Mae hyn wedi creu angerdd tanbaid dros gymryd llun wedi’i dynnu a’i ddod yn fyw gyda symudiadau wyneb hylifol ac effeithiau sain wedi’u cysoni’n dda.
Efan Owen
BA(ANRH) ANIMEIDDIO
Ers pan oedd Efan yn ifanc, roedd yn mwynhau gwylio ffilmiau wedi’u hanimeiddio yn fawr iawn. Cafodd un, yn benodol, ddylanwad mawr ar ei ddiddordeb cychwynnol mewn animeiddio fel gyrfa, y cyntaf yn saga ffilmiau “Curious George” (2006).
Gyda’r defnydd o animeiddio traddodiadol syfrdanol wedi’i wneud â llaw, a chymysgedd o gynlluniau lliw llachar a chymeriadau’n llawn personoliaeth, llwyddodd i gyfleu awyrgylch gweledol a chwareus ar yr un pryd â chael islais difrifol
yma ac acw drwyddi draw. Roedd y ffilm animeiddiedig hon yn ysbrydoliaeth i Efan fynd ar drywydd ac arbenigo mewn Animeiddio 2D drwy gydol ei gyfnod ym Mhrifysgol Wrecsam. Mae’n ymdrechu i dynnu sylw at emosiynau’r cymeriadau yn ei brosiectau i ddangos pa mor swynol a diddorol y gallant fod. Drwy wneud hynny, mae’n gobeithio y bydd ei straeon animeiddiedig yr un mor gyfareddol â’r ffilm animeiddiedig honno a wyliodd wrth dyfu i fyny.
Megan Williams
BA(ANRH) ANIMEIDDIO
Mae Megan yn animeiddiwr 2D uchelgeisiol sy’n gweithio’n bennaf drwy ddefnyddio meddalwedd celf ddigidol a’i alluoedd niferus. Mae’r math hwn o adrodd straeon drwy symudiad wedi ei swyno ers iddi ei ddarganfod am y tro cyntaf yn ei harddegau cynnar.
Mae lluniadu bob amser wedi bod yn rhan bwysig o fywyd Megan ers pan oedd hi’n ifanc iawn ac mae wedi bod yn ffordd bwysig iddi ddefnyddio ei dychymyg i’r eithaf. O ran prosiectau personol, mae hi fel arfer yn cael ei dylanwadu gan ffantasi a’r goruwchnaturiol, gan ei galluogi i archwilio cysyniadau cyffrous a rhyfedd.
Mae Megan yn gobeithio defnyddio ei gwaith i sbarduno trafodaethau am bynciau difrifol a chymhleth, fel trafferthion ffitio i mewn a bywyd ar ôl marwolaeth.
Mae’n cyflawni’r nodau hyn drwy
blethu syniadau i straeon trochol, llawn dychymyg sy’n cynnwys cast o gymeriadau sydd wedi’u cynllunio’n dda, sy’n ddeniadol ac y gellir uniaethu â nhw.
Mae prosiect diweddaraf Megan, “Seasonal Beverage,” yn amrywio o ran fformat a phwrpas o’i gymharu â’i gweithiau blaenorol, ond mae’n dal i ddangos ei chariad at ddylunio cymeriadau. Allbwn y prosiect yw casgliad o ddilyniannau ar gyfer ymgyrch hysbysebu cadwyn o dai coffi sy’n addas ar gyfer cynulleidfa fodern gynhwysol. Mae’n cynnwys cast amrywiol o gymeriadau, pob un yn seiliedig ar ddiodydd coffi gwahanol, sy’n cymryd rhan mewn gweithgareddau amrywiol ym mhob un o’r pedwar tymor. Y fideo cerddoriaeth ar gyfer “Coffi a Theledu” gan Blur a ysbrydolodd ei dull o weithio ar y prosiect hwn.
Celf Gymhwysol
Matilda Bethelford
BA(ANRH) CELF GYMHWYSOL
Rwy’n cyfuno technegau gof arian traddodiadol gyda thechneg mewnosod wedi’i asio yr wyf wedi’i datblygu o ddulliau gof metel ‘mokume gane’ traddodiadol. Gan greu patrymau a dyluniadau arlunio unigryw mewn dalennau copr a phres, rydw i wedyn yn ffurfio ac yn adeiladu gwrthrychau gwag 3D sy’n gallu cael eu defnyddio mewn ffordd amlbwrpas ac sy’n hardd pan yn llonydd.
Mae hydeimledd yn hanfodol i’m gwaith a’m prif nod yw creu gwrthrychau sy’n gwahodd chwilfrydedd a rhyngweithio.
Tina Blom
BA(ANRH) CELF GYMHWYSOL
Rwy’n artist o Sweden gyda saith mlynedd o addysg gelf ffurfiol, ac rwyf wedi byw ac astudio yn y DU am y tair blynedd diwethaf. Dechreuodd fy nhaith greadigol gyda darlunio portreadau realistig pan oeddwn yn fy arddegau, gan ehangu’n ddiweddarach i baentio, a serameg erbyn hyn –fy mhrif ffocws dros y pedair blynedd diwethaf. Mae fy ngwaith cerfluniol yn archwilio ffurfiau haniaethol wedi’u hysbrydoli gan esgyrn cefn dynol, siapiau tapro ailadroddus, a chromliniau sy’n llifo. Rwy’n ymgorffori patrymau organig a geir
ym myd natur, gan chwarae ar y ffin denau rhwng y cyfarwydd a’r haniaethol. Mae pob cerflun wedi’i ddylunio i ymgysylltu’n weledol o bob ongl, gan wahodd y gwyliwr i archwilio ei bresenoldeb tri dimensiwn.
Ochr yn ochr â’m hymarfer fy hun, rwy’n addysgu serameg, yn cynnal cyrsiau adeiladu â llaw ac yn arwain sesiynau blasu llunio. Creu yw fy angerdd mwyaf – mae’n fyfyriol ac yn foddhaus. Rydw i’n breuddwydio am greu gofod lle gall artistiaid ddod at ei gilydd, rhannu eu hangerdd, ac ysbrydoli ei gilydd.
Remy Comer BA(ANRH) CELF GYMHWYSOL
Mae fy ngwaith wedi cael ei ysbrydoli gan ddinasluniau a phensaernïaeth fodernaidd. Rwyf wedi creu cyfres o lestri bach gan ddefnyddio technegau traddodiadol gof arian, sef sgorio a sodro dalen gopr. Gan fy mod yn canolbwyntio’n bennaf ar adeiladau ag arwynebau crwm, wedi’i teilsio, ysgythrais fy nyluniad i arwyneb y metel cyn ychwanegu lliw. Gelwir y dechneg hon yn enamlo gwydrol, lle mae gwydr mâl yn cael ei gynhesu i dymheredd toddi er mwyn glynu wrth arwyneb y metel.
Samantha Edwards BA(ANRH) CELF GYMHWYSOL
Fel artist eclectig, rwy’n gwerthfawrogi’r rhyngweithio rhwng mannau cadarnhaol a negyddol drwy gyfryngau cymysg. Mae fy ngwaith yn cwmpasu’r gwrthgyferbyniad rhwng ffurf a gwead, gan greu diddordeb gweledol sy’n herio canfyddiadau ac yn gwahodd myfyrio. Drwy haenu deunyddiau a thechnegau, rwy’n gwthio ffiniau i ysgogi tensiwn a chytgord. Mae fy nghelfyddyd yn archwilio cydbwysedd, rhwng anhrefn a threfn, golau a chysgod, gan annog gwylwyr i ymgysylltu â’r anweledig gymaint â’r gweledol, a’u gwahodd i ddarganfod ystyron newydd yn y gofodau rhyngddynt.
Ceri Jones
BA(ANRH) CELF GYMHWYSOL
Mae Ceri Jones yn artist sy’n frwd dros greu serameg cerfluniol unigryw a hardd wedi’i wneud â llaw wedi’u hysbrydoli gan yr arfordir. Mae ei ffocws ar ddod â chelf serameg ac ysbryd yr arfordir at ei gilydd, drwy ei dyluniadau penodol a phwrpasol.
Gan weithio o’i stiwdio fach gartref yng nghefn gwlad Swydd Gaer, mae Ceri yn gweithio gyda chlai crochenwaith, gan archwilio gwead a lliw, gyda ffocws ar gyrff clai, staeniau ac ocsidau, gan ddod â’r cyfuniadau gweadog at ei gilydd, gan gael ei hysbrydoli gan yr holl ddiffygion perffaith sydd gan natur i’w cynnig; ac mae’r rhin hwnnw yn adleisio drwy ei gwaith.
Nic Stace
BA(ANRH) CELF GYMHWYSOL
Drwy ffurfiau ceramig wedi’u hadeiladu â llaw, rwy’n archwilio’r tirweddau emosiynol newidiol sy’n gysylltiedig â heneiddio – yr anghysondebau, yr ansicrwydd, a’r gwytnwch tawel. O un ongl, efallai y byddant yn ymddangos yn betrus neu’n fregus, ac o ongl arall gallant fod ag elfen o gryfder neu herfeiddiwch. Mae’r ddeuoliaeth hon yn adlewyrchu natur newidiol sut rydyn ni’n teimlo a sut rydyn ni’n cyflwyno ein hunain i’r byd. Rwy’n creu pennau cyfnewidiadwy sy’n eistedd ar y ffurfiau. Maen nhw’n fwriadol heb fynegiant,
gan roi lle i’r gwyliwr feddwl am ei ddehongliadau ei hun. Wedi fy ysbrydoli gan atgofion hiraethus, teithiau cerdded myfyriol, a hiwmor, mae fy mhroses yn reddfol ac yn fyfyriol. Rwy’n cyfuno technegau adeiladu â llaw a thechnegau castio slip i wneud y pennau. Rydw i’n aml yn ymgorffori gweadau a marciau i arwynebau fy ngwaith sy’n ymateb yn syth i sut rydw i’n teimlo ar y pryd. Mae cyfosod gweadau llyfn a garw yn adlewyrchu cymhlethdodau emosiwn dynol a natur amlochrog hunaniaeth.
Connor Townley BA(ANRH) CELF GYMHWYSOL
Yn fy ngwaith rwy’n arbrofi gyda thechnegau crochenwaith traddodiadol, rwy’n ceisio defnyddio’r technegau hyn, fel llunio, cerfio a gwydro, a’u cyfuno mewn ffyrdd sy’n arddangos cyferbyniad unigryw o liw a gwead. Ar hyn o bryd, rwyf wedi bod yn gweithio ar syniadau sy’n cynnwys llunio llestri ar olwyn crochenydd a’u cyfuno â sylfeini cerfluniol i
greu darnau sy’n swyddogaethol yn ogystal ag addurnol. Cefais fy ysbrydoli i ddechrau gan sut mae pryfed yn creu cocynau cywrain a manwl mewn amgylcheddau garw ac anfaddeugar. Arweiniodd hyn at greu ffurfiau meddal, syml ar sylfeini caled a chymhleth i efelychu’r syniad hwn
Madeleine Vale
BA(ANRH) CELF GYMHWYSOL
Rwy’n defnyddio fy mhrofiad fel perfformiwr bwrlesg. Mae crefft bwrlesg yn gyfuniad chwareus o synwyrusrwydd, hiwmor a naratif, a dyma sy’n tanio fy angerdd i fynegi’r straeon y tu ôl i’r perfformiad.
Yn fy ngwaith rwy’n defnyddio clai terracotta, slipiau lliw a gwydro. Ar fy mhlatiau rwy’n tynnu llun gan ddefnyddio sgraffito i gerfio siapiau siapus fy nawnsiwr a gwau haenau cywrain bwrlesg at ei gilydd, gan ddefnyddio haenau
o slip, fel dyfrlliw, i adlewyrchu’r coreograffi gyda symudiad a gwead. Mae defnyddio olrheinwr slip yn creu llinellau ysgubol a manylion cywrain gan ddefnyddio dotiau o slip fel iaith weledol sy’n efelychu’r angerdd a’r egni ar y llwyfan. Ar ôl treulio blynyddoedd lawer ar deithiau braslunio gyda fy nhad, rwy’n ymgorffori’r sgiliau gwneud marciau hyn yn fy ngwaith gydag ymdeimlad o symud a chydbwysedd, gan ddefnyddio clai fel cynfas.
Elena Vasileva BA(ANRH) CELF GYMHWYSOL
Mae gwaith Elena yn archwilio cyferbyniad drwy gyfuniad o wahanol fetelau, arian sterling, pres a chopr yn bennaf. Drwy sodro’r deunyddiau hyn gyda’i gilydd, mae hi’n tynnu sylw at eu gwahaniaethau lliw cynhenid, gan wella’r effaith ymhellach drwy driniaethau arwyneb fel sandio, llathru a phatinio. Y tu hwnt i wrthgyferbyniadau o ran deunyddiau, mae ei gwaith wedi’i wreiddio’n ddwfn yn y syniad o ganfyddiad. Mae siapiau ei darnau, sydd wedi cael eu hystyried yn ofalus, yn creu rhithdybiau symudol wrth edrych arnynt o wahanol onglau, gan herio edrychiad y gwyliwr. Mae’r archwiliad hwn yn deillio o’i diddordeb mewn deuoliaeth ac ymddygiad dynol – sut y gellir ystyried yr un gwrthrych yn wahanol yn dibynnu ar bersbectif. Drwy ei gwaith, mae Elena yn gwahodd y gynulleidfa i ailystyried natur canfyddiad a rhwyddineb dehongli.
Will Whitmore BA(ANRH) CELF GYMHWYSOL
Mae fy ngwaith yn archwilio arddull amrwd a geometrig pensaernïaeth Brwtaliaeth. Rwy’n cael fy ysbrydoli gan faint aruthrol ac arwynebau diaddurn Brwtaliaeth. Fy nod yw cyfleu ei rin drwy ganolbwyntio ar onestrwydd materol, ffurfiau strwythurol a’r rhyngweithio rhwng mas a gwead. Mae’r dechneg adeiladu slabiau wedi bod yn ganolog yn yr archwiliad hwn, nid yn unig am ei aliniad pensaernïol ag egwyddorion Brwtaliaeth ond hefyd am ei hygyrchedd. Mae byw gydag arthritis gwynegol wedi dylanwadu ar fy newis o dechneg, gan fy arwain at ddull sy’n addas ar gyfer arwynebau mawr, gwastad ac ymylon miniog heb straen corfforol prosesau eraill. Mae’r dull addasol hwn wedi fy ngalluogi i gynnal rheolaeth greadigol wrth weithio o fewn cyfyngiadau corfforol personol. Yn y corff hwn
o waith drwyddo draw, rwy’n ymchwilio i’r berthynas rhwng ffurf, swyddogaeth a deunydd. Mae rhai darnau’n gwyro tuag at lestri-serameg a strwythurau gweithredol a allai fodoli mewn mannau iwtilitaraidd – tra bod eraill yn cofleidio presenoldeb cerfluniol yn unig. Mae’r cyferbyniad rhwng ffurfiau anhyblyg, geometrig ac ansawdd organig clai yn gweithredu fel trosiad ar gyfer y tensiwn rhwng natur urddasol pensaernïaeth a’r profiad dynol yn y mannau hyn. Drwy ail-ddehongli Brwtaliaeth mewn clai, mae fy ngwaith yn gwahodd gwylwyr i ailystyried pensaernïaeth a serameg gan gwestiynu sut mae deunydd, ffurf a swyddogaeth yn croestorri mewn celf a dylunio. Mae’n ddeialog rhwng cryfder a bregusrwydd, sefydlogrwydd a dadfeiliad, a’r personol a’r pensaer.
Celfyddyd Gain
Tracey Arnold
BA(ANRH) CELFYDDYD GAIN
Rwy’n gwneud gosodiadau cerfluniol sy’n tyfu o broses lle mae ffurfiau sy’n debyg i fowlen yn cael eu gwneud o slip porslen a’u cyflwyno ochr yn ochr â’r arteffactau atodol sydd hefyd yn deillio; y mowldiau, y darnau o glai, y gorchuddion llawr a’r standiau a ddefnyddir wrth gastio.
Rwy’n manteisio ar y tensiwn rhwng y broses drefnus, fyfyriol o wneud y castiau, a’r penderfyniadau digymell a wneir wrth eu rhyddhau o’u
mowldiau tebyg i gocŵn. Gan ddefnyddio Skyscapes James Turrell fel ysbrydoliaeth, mae fy ngosodiadau’n defnyddio golau naturiol i animeiddio’r ffurfiau sy’n dod i’r amlwg.
Rwy’n gweld fy mhroses greadigol fel cylch. Wrth i bob darn ddod i fodolaeth, mae cyfoeth o bosibiliadau’n cael eu hawgrymu gan y darnau a’r deunyddiau dros ben; tir ffrwythlon i’r ffurf nesaf gael ei greu.
Grace Davies
BA(ANRH) CELFYDDYD GAIN
Rwy’n gwneud paentiadau acrylig a darluniau pensil sy’n darlunio lliwiau a siapiau a phatrymau ailadroddus. Mae gan y delweddau rwy’n eu creu ansawdd myfyriol iddyn nhw, rwy’n cael fy ysbrydoli gan artistiaid fel Hilma af Klint, Agnes Martin a Lindsey Way. Mae gan y gwaith celf rwy’n ei wneud natur dawel oherwydd ei fod yn rhagweladwy, ond mae hefyd yn llethol oherwydd ei natur ddi-ildio.
Rosy Davis
BA(ANRH) CELFYDDYD GAIN
“The Embrace”
Mae’r gwaith hwn yn archwilio’r croestoriad rhwng ecoffeministiaeth a chryfder y fam, gan ddefnyddio’r rhinweddau meithringar, amddiffynnol ac adferol sy’n gysylltiedig â’r Fam Ddaear. Rwy’n defnyddio dull rhyngddisgyblaethol sy’n cofleidio paent acrylig ac olew, ffyn pigment, wadin ac elfennau pwytho. Mae’r elfennau hyn yn helpu i ysgogi meddalrwydd cofleidio mamol.
Mae’r weithred o bwytho yn dwyn
i gof lafur domestig traddodiadol, a’r gofal sydd wedi’i wreiddio mewn creu ar gyfer eraill. Mae rhannau o rwyg ac atgyweirio yn cyfleu dygnwch tawel y ffigur mamol – y rhoi parhaus drwy aberth, traul a straen. Mae’r gwaith yn amgylchedd trwythol, cofleidiol a myfyriol. Drwy ystum, ffurf a deunydd, mae’r darn hwn yn ystyried rôl y fenyw mewn adferiad ecolegol ac emosiynol.
Molly Evans
BA(ANRH) CELFYDDYD GAIN
Mae’r gwaith yn yr arddangosfa hon yn archwilio fy niddordeb a’m cydnawsedd â ffurf a lliw gwrthrychau penodol yn y cartref. Rwy’n cyfuno gwrthrychau gwydr sydd wedi’u canfod, cerfluniau concrid/ewyn a phaentiadau cyfryngau cymysg i ddatblygu fy nealltwriaeth o’r gwrthrychau hyn; mae’r gwaith yn tyfu o dan densiwn – wedi’i dynnu rhwng ysgogiadau croes fy nghariad at afiaith, wedi’i dymheru gan fy awydd am symlrwydd. Mae’r gwthio a’r tynnu rhwng y grymoedd hyn yn ymddangos fel ystumio, gan ychwanegu cymhlethdod at eitemau’r cartref y gellid eu hanwybyddu fel arall.
Harriett Evison
BA(ANRH) CELFYDDYD GAIN
Fel artist gosodiadau, rwy’n cyfuno tecstilau a phlastigau i adeiladu darnau sy’n defnyddio rhinweddau’r deunyddiau rwyf wedi’u dewis ynghyd â golau. Mae gwaith Rebecca Louise Law a Jee Young Lee yn ddylanwad allweddol ar fy awydd i wneud gwaith y mae’r gynulleidfa’n mynd i mewn iddo ac yn dod yn rhan ohono. Rwy’n gwahodd y gwyliwr i greu “byd” adeiledig, sy’n cyd-fynd â ffenomena naturiol
fel twf planhigion a chanfyddiad gweledol gwenyn o flodau. Mae maint a chanfyddiad yn newid o fewn yr amgylchedd meta hwn. Mae’n cyflwyno’r posibilrwydd o gwestiynu pynciau twf a threfn yn y byd naturiol, ac ystyried diffiniadau o beth yw naturiol a gwaith dyn wrth i ni symud ymhellach i gyfnod trychineb amgylcheddol byd-eang ar ffurf hyper-wrthrychau.
Megan Martin
BA(ANRH) CELFYDDYD GAIN
Mae fy ymarfer yn cael ei ysgogi’n bennaf gan
anhyblygrwydd y system addysg a’r hyn y mae fy mhrofiadau a’m hymchwil yn ei ddangos fel diffyg cefnogaeth, cynhwysiant a hyblygrwydd cynhenid i’r rhai ag anghenion ychwanegol.
Yn y corff hwn o waith, mae fy ngherfluniau’n archwilio themâu perffeithrwydd, cydymffurfiaeth ac unigolrwydd, gan ymateb i’r ffordd y mae cymdeithas yn gwthio pobl
i gyd-fynd â mowld penodol a bodloni disgwyliadau a bennwyd ymlaen llaw.
Drwy gydosod â llaw gyda chardfwrdd a’r broses fwy diwydiannol o gastio-slip porslen, rwyf wedi creu ffurfiau sy’n cyferbynnu strwythur ac unffurfiaeth â breuder ac amherffeithrwydd, gan adlewyrchu’r gwrthdaro rhwng pwysau cymdeithasol ac unigoliaeth.
Mya Roberts
BA(ANRH) CELFYDDYD GAIN
Mae fy ymarfer yn cynnwys ymchwilio i safleoedd a dogfennu’r mannau hyn mewn ffordd sy’n eu gwneud yn fwy dirgel, gan agor y posibilrwydd o fwy o ymdeimlad o’r rhyfeddol.
Yna, rwy’n defnyddio paentio i ymchwilio a chreu gofodau trothwyol ffuglennol sy’n archwilio teimladau o anesmwythyd ymhellach. Rwy’n rhyfeddu at allu’r paentiadau a’r delweddau newydd hyn i gymryd lleoliad bob dydd a’i droi’n arteffact hudolus.
Hannah Sadler
BA(ANRH) CELFYDDYD GAIN
Mae fy ngwaith yn archwilio’r genre Gothig, drwy baentio a cherflunio, yn ogystal â dadansoddi testunol ar is-destun ac effaith cymeriadau a naratifau fampirig.
Mae’r delweddau a’r gwrthrychau rwy’n eu creu yn ysgogi gwahanol gymeriadau a throsiadau i archwilio agweddau cymdeithas tuag at awydd a thabŵs. Yn ogystal â’r cyfeiriadau llenyddol,
mae’r paentiadau naratif a’r penddelwau cysylltiedig yn cael dylanwad gan Didier Vermeiren a Hieronymus Bosch. Mae’r darluniau sy’n cyd-fynd â’r testunau’n cyfeirio at weithiau Marcel Dzama sy’n dangos cipluniau o greu byd cymhleth.
Mae’r darnau’n cael eu grwpio mewn gosodiad sy’n annog mwy nag un pwynt mynediad i’r straeon hyn.
Alex Tonks
BA(ANRH) CELFYDDYD GAIN
Rwy’n defnyddio lluniadu fel ffordd o ymchwilio i themâu bywyd a marwolaeth. Rwy’n trin graffit a siarcol, gan ddefnyddio llinellau rheoledig iawn a lefelau amrywiol o dôn i ddelweddu’r ffurfiau cymhleth yr wyf yn eu dymuno. Mae’r diwydiant tatŵs, ynghyd ag artistiaid fel Vlad Gradobyk a Joe Fenton, yn gyfeiriadau allweddol yn fy ymarfer. Yn
ogystal, mae cyseiniannau geometrig a seicolegol esgyrn yn fy nghyfareddu. Rwy’n archwilio’r cyseiniannau hyn drwy gyfansoddiadau manwl, ond syml, lle maent yn cydblethu’n drefniadau o ofod cadarnhaol a negyddol, lle mae’r gofodau hyn yn cynnal cydbwysedd â’i gilydd ac yn agored i ddehongliad y gwylwyr.
Ffion Travis
BA(ANRH) CELFYDDYD GAIN
Artist collage yw Ffion Travis, ac mae ei gwaith yn canolbwyntio ar drawsnewid amlenni â ffenestri sydd wedi cael eu defnyddio yn ddatganiadau gweledol pwerus.
Drwy ail-bwrpasu hen amlenni sydd wedi’u canfod, mae Travis yn creu cyfansoddiadau sy’n herio themâu cyfathrebu, cof, a phwrpas gwrthrychau sydd wedi cael bywyd.
Mae’r amlen, fel cyfrwng cyfathrebu, yn sylfaen lythrennol a throsiadol i’w gwaith.
Drwy ail-bwrpasu deunydd a ganfuwyd, mae Travis yn adeiladu cyfansoddiadau sy’n archwilio themâu cyfathrebu, cof a hanes.
Mae naratifau’n cyfuno ac yn torri wrth i’r broses collage weithredu
ar y deunyddiau a’r delweddau parod hyn.
Mae Travis yn ailddychmygu’r amlen nid yn unig fel gwrthrych swyddogaethol i gyfeirio post at eraill, ond fel cyfrwng i herio’r gwyliwr i ailystyried y deunyddiau sydd wedi dod i ddiwedd eu hoes mewn bywyd bob dydd, gan hefyd ddechrau myfyrio ar sut y gall y weithred bersonol o anfon a derbyn adael effaith barhaol.
Drwy arbrofi, mae Travis yn ymddiddori yn agosatrwydd selio ac agor yr amlen. Mae Travis yn defnyddio motiff y ffenestr cyfeiriad fel dyfais fframio i hoelio sylw’r gwyliwr ar yr haenau o hanes sy’n cronni yn y strwythurau papur syml hyn.
Jan Wear
BA(ANRH) CELFYDDYD GAIN
Rwy’n creu delweddau ffigurol gan ddefnyddio proses sy’n seiliedig ar collage. Dewisais amrywiol bapurau, ffabrigau a chanfod delweddau sydd o ddiddordeb i mi o ran lliw, siâp a gwead. Gan gymryd ysbrydoliaeth o waith Kate Morgan fel man cychwyn, rwy’n defnyddio’r ffigur fel strwythur sy’n fy ngalluogi i archwilio maint a pherthnasedd. Mae’r gwaith sy’n deillio o hyn yn gwahodd y gwyliwr i ymgolli yn y gorlwytho corfforol a synhwyraidd pleserus rwy’n ei brofi wrth ymgolli yn y gwaith o’u creu.
Dylunio Graffig
Kirsty Robinson
BA(ANRH) DYLUNIO GRAFFIG
Mae Kirsty yn fam i bump o blant ac mae ei thaith greadigol wedi cael ei siapio’n ddwfn gan ei phlant. Mae eu dychymyg a’u chwilfrydedd yn parhau i ddylanwadu ar ei dull dylunio, gan roi ymdeimlad clir o bwrpas a chyfeiriad i’w chreadigrwydd.
Ar hyn o bryd mae’n astudio dylunio graffig, ac mae Kirsty yn datblygu ymarfer sy’n canolbwyntio ar frandio, adrodd straeon gweledol, a phrofiadau sy’n ymgysylltu’n emosiynol. Mae ganddi ddiddordeb arbennig mewn dylunio addysgol sy’n canolbwyntio ar y teulu, lle mae creadigrwydd yn dod yn adnodd ar gyfer cysylltu.
Ar gyfer prosiect prifysgol diweddar, creodd Bud, ap sy’n canolbwyntio ar y teulu sy’n annog pobl i archwilio yn yr awyr agored.
Wedi’i hysbrydoli gan egwyddorion
Montessori a Reggio Emilia, mae’r ap yn adlewyrchu ei hangerdd am ddysgu sy’n seiliedig ar natur ac yn cynnig llwyfan i arddangos ei sgiliau o ran hunaniaeth brand a phersonoliaeth.
Mae Kirsty hefyd wedi cael profiad ymarferol drwy waith llawrydd, creu logos, gwefannau a hunaniaethau brand ar gyfer busnesau bach. Un o’i phrosiectau mwyaf gwerth chweil oedd helpu i ddatblygu hunaniaeth brand ysgol feithrin yn y goedwig.
Mae’r profiadau hyn yn y byd go iawn wedi ei helpu i fireinio ei gallu i adrodd straeon, meithrin perthnasoedd ystyrlon â chleientiaid, a dod â syniadau unigryw yn fyw drwy ddylunio meddylgar.
Darlunio
Theo Coulson
BA(ANRH) COMICS
Mae Theo yn artist comics sy’n canolbwyntio’n bennaf ar ysgrifennu straeon sy’n cynnwys cymeriadau LGBT+ a niwroamrywiol. Mae’r straeon hyn yn aml wedi’u gosod yng Nghymru ac yn adlewyrchu ei ddiddordeb mewn natur.
Dechreuodd darlunio ac adrodd straeon fel ffordd i Theo fynegi a deall ei deimladau’n greadigol fel dyn traws awtistig. Maent bellach yn fodd iddo rannu ei gariad at nofelau graffig ag eraill ac yn rhoi cyfle iddo greu straeon sy’n cynrychioli cymunedau y mae’n dymuno y byddai wedi eu gweld ar y cyfryngau wrth dyfu i fyny.
Mae Theo yn creu ei dudalennau
comig gan ddefnyddio meddalwedd ddigidol, sy’n ei alluogi i arbrofi gyda thechnegau ac arddulliau sy’n mynegi ei syniadau orau. Mae’n mwynhau creu comics gan ei fod yn ei alluogi i gyfuno llawer o’i ddiddordebau artistig mewn un prosiect, gan fod cynllunio a chreu comic yn gofyn am ymchwil, ysgrifennu creadigol, adeiladu byd, a dylunio cymeriad cyn dechrau tynnu llun.
Mae prosiect presennol Theo yn ddyfyniad comig o stori hirach am chwaraewr hoci iâ traws sy’n dod allan ac yn dysgu i ddod o hyd i gefnogaeth gan aelodau ei dîm a’r gymuned o’i gwmpas.
Emily Morgan
BA(ANRH) COMICS
Artist digidol a darlunydd yw Emily Morgan sy’n canolbwyntio ar gomics. Mae nifer o’i gweithiau wedi’u hysbrydoli gan ei threftadaeth Gymreig a’i diddordeb mewn portreadu bywydau bob dydd pobl. Mae hi wedi archwilio amrywiaeth o genres, gan gynnwys sleisen o fywyd, drama, hanesyddol, ffuglen wyddonol, ffantasi ac addysgol. Mae Emily yn awyddus i arbrofi gyda gwahanol genres a’i nod yw creu casgliad amrywiol o straeon sy’n cwmpasu sawl arddull a thema. Mae dylunio cymeriadau yn chwarae rhan bwysig yn y straeon mae hi’n eu hadrodd, gan roi sylw gofalus i bersonoliaethau
a deinameg ei chymeriadau. Ar ôl darganfod gwe-gomics, datblygodd Emily angerdd dros y cyfrwng a chafodd ei hysbrydoli i greu rhai ei hun. Drwy bob comic y mae wedi’i greu, mae Emily wedi mireinio ei sgiliau’n barhaus ac wedi dysgu sut i wella ei thechnegau adrodd straeon a darlunio. Mae hi wedi ymrwymo o hyd i ddatblygu ei galluoedd artistig a chynhyrchu gwaith y mae hi’n falch ohono.
Ei nod yn y pen draw yw creu gwaith celf a naratifau sy’n atseinio gyda’i chynulleidfa, ac mae’n gobeithio y byddant yn ymuno â hi ar ei thaith i’r diwydiant a thu hwnt.
Leon Taylor-Lynch
BA(ANRH) COMICS
Fel awdur comics a darlunydd, mae
Leon yn cael ei ysbrydoli gan y straeon maen nhw’n eu cynnwys, yn bennaf ffuglen ffurf hir, ffantasi a thrasiedi. Maen nhw’n cyfuno’r dylanwadau hyn â chredoau, profiadau a throsiadau personol i greu naratifau y bydden nhw wrth eu bodd yn eu darllen eu hunain.
Mae llawer o waith Leon yn canolbwyntio ar bâr o gymeriadau a’u trafferthion rhyngbersonol wrth iddynt effeithio ar fyd ehangach eu straeon, a chael eu heffeithio ganddynt. Thema sy’n codi dro ar ôl tro yn eu straeon yw ffrindiau plentyndod yn trawsnewid i fod yn wrthwynebwyr, sy’n aml yn cael eu gyrru ar wahân gan wahaniaethau na ellir eu cymodi, neu ddylanwadau sy’n eu gosod ar y naill ochr a’r llall mewn gwrthdaro.
Mae dull gweithio dewisol Leon
yn cynnwys tynnu lluniau ohonynt eu hunain neu eu cyfoedion yn yr ystumiau gofynnol, ac yna rotosgopio’n ddigidol dros y delweddau. Maent yn ychwanegu cefndiroedd ac effeithiau at y darluniau yn ôl yr angen. Mae’r broses hon wedi cael ei mireinio’n ofalus ar draws nifer o brosiectau i symud oddi wrth y rhyfeddol a thuag at estheteg fynegiannol fwy arddulliedig.
Yn ystod eu cyfnod yn y brifysgol, ysgrifennodd Leon y rhifynnau cyntaf o ddau gomig gwreiddiol: Of Redbirds and Nests, naratif ffantasi, ac Ad Nauseum, gwaith ffuglen a dirgelwch.
Ar ôl y brifysgol, nod Leon yw parhau i ddatblygu Ad Nauseum nes iddo ddod i ben, cyn dychwelyd at Of Redbirds and Nests gyda sgiliau newydd a safbwynt newydd.
Oliver Clarkson
BA(ANRH) DARLUNIO
Ar hyn o bryd mae Oliver yn astudio Darlunio ym Mhrifysgol Wrecsam ac yn canolbwyntio ar greu gwaith mewn gwahanol gyfryngau, fel paent, print ac inc. Yr elfen sy’n uno ar draws ei waith yw cyfres o gymeriadau colomennod unigryw a phersonol, y mae’n eu defnyddio i baratoi agweddau ar ddiwylliant poblogaidd neu i greu darnau a chartwnau gwreiddiol mewn fformatau inc a digidol. Mae’r gweithiau hyn i’w gweld ar ei wefan, www.pigey.art,
ac ar Instagram yn @pigey_art. Cwblhawyd ei brosiect diweddaraf mewn ymateb i frîff gan Amgueddfa Rheilffordd Didcot yn Rhydychen, a gomisiynodd arddangosfa fawr ar newid yn yr hinsawdd ac allyriadau glo, a gynlluniwyd i fod yn ddiddorol ac yn hygyrch i blant. Yn ogystal â hyn, mae Oliver hefyd wedi bod yn cynhyrchu gwaith ar gyfer arddangosfa allanol yn Oriel HIVE yn Amwythig, fel rhan o’r modiwl Dyfodol Creadigol.
Bunni Gigante
BA(ANRH) DARLUNIO
Mae Bunni yn ddarlunydd sydd wedi bod yn frwd dros ddarlunio ers cyn hired ag y gall gofio. O oedran cynnar, cafodd ei hudo gan gelf Japaneaidd, yn enwedig anime, sydd wedi cael dylanwad parhaol ar ei harddull artistig. Dros y blynyddoedd, mae hi wedi mireinio ei sgiliau wrth symud o gelf draddodiadol i gelf ddigidol, gan ddatblygu llais unigryw sy’n cyfuno swyn anime ac estheteg ciwt â’i phersbectif unigryw ei hun. Mae Bunni, sy’n cael ei sbarduno gan ei chariad at greadigrwydd, yn rhannu ei thaith artistig ag eraill. Fel darlunydd llawrydd, mae hi wedi meithrin cymuned sy’n tyfu
o amgylch ei gwaith, gan gysylltu â chyd-arlunwyr a phobl sy’n frwd dros gelf. Drwy lwyfannau fel Twitch, Pinterest, a sianeli cyfryngau cymdeithasol eraill, ei nod yw ysbrydoli eraill i archwilio eu creadigrwydd eu hunain ac annog eraill i wella eu sgiliau. Uchelgais fwyaf Bunni yw parhau i greu celf sy’n dod â llawenydd ac ysbrydoliaeth i eraill, gan feithrin cymuned gadarnhaol a chefnogol lle gall pobl ddysgu, tyfu a chreu gyda’i gilydd. Iddi hi, mae creu celf yn golygu mwy nag estheteg yn unig, mae’n golygu rhannu hapusrwydd ac adeiladu rhywbeth ystyrlon ar hyd y ffordd.
Anya Lewis
BA(ANRH) DARLUNIO
Mae Anya Lewis yn artist traddodiadol sy’n gweithio’n bennaf gyda dyfrlliw, er ei bod weithiau’n archwilio celf ddigidol i ehangu ei hymarfer creadigol. Mae ei harddull yn gwyro tuag at y mympwyol a’r plentynnaidd, sy’n cynnwys lliwiau llachar, cymeriadau chwareus, a golygfeydd clyd sy’n teimlo eu bod wedi cael eu codi o dudalennau llyfr stori. Mae hi’n mwynhau creu gwaith celf sy’n ysgogi ymdeimlad o hud a hiraeth, darnau sy’n atgoffa gwylwyr o lawenydd plentyndod neu freuddwydion dydd a anghofiwyd ers amser maith.
Dyfrlliw yw ei hoff gyfrwng oherwydd y ffordd y mae’n adeiladu golygfa’n raddol, gan ganiatáu ar gyfer haenau ysgafn a thrawsnewidiadau cynnil. Mae
hi’n teimlo bod cyfuniad a hylifedd y lliwiau’n mesmereiddio ac yn tawelu. Er bod gan Anya frwsh yn ei llaw y rhan fwyaf o’r amser pan mae hi gartref, mae hefyd yn croesawu offer digidol fel ffordd o arbrofi a dod â’i syniadau’n fyw mewn ffyrdd newydd a chyffrous. Wrth wraidd ei hymarfer mae awydd i gyfleu ymdeimlad o ryfeddod. Boed hi’n darlunio creaduriaid bach iawn y goedwig, angenfilod chwedlonol Cymru, neu dirweddau tawel, breuddwydiol, mae Anya yn gobeithio y bydd ei gwaith yn cynnig cyfle i wylwyr ddianc, rhywbeth bach i’w hatgoffa i gadw mewn cysylltiad â’r chwilfrydedd plentynnaidd sydd gan bob un ohonom. Yn anad dim, ei nod yw creu celf sy’n llawen, yn llawn dychymyg ac yn hwyl.
Kaylea Louise Lewis-Furini
BA(ANRH) DARLUNIO
Mae Kaylea yn ddarlunydd sydd wedi’i hysbrydoli gan amrywiaeth eang o genres celf, yn rhai traddodiadol a digidol. Mae hi’n frwd dros greu awyrgylch ar gyfer ei chynulleidfa drwy densiwn ac effaith emosiynol. Yn ystod ei chyfnod yn Wrecsam, mae Kaylea nid yn unig wedi ennill sgiliau newydd ond hefyd wedi gweithio i fireinio rhai presennol, fel gweithio gyda chyfryngau amrywiol ar gyfer celf draddodiadol a dysgu sut i ddefnyddio meddalwedd dechnegol. Mae gan Kaylea ddiddordeb arbennig mewn arswyd, drama gyffrous, ffuglen wyddonol, ffantasi a dirgelwch. Mae’n gweld yr anhysbys yn ddiddorol, gan ei fod
yn herio ei chynulleidfa i feddwl yn wahanol ac ystyried syniadau na fyddent fel arfer yn eu hystyried. Mae hi’n cael ei hysbrydoli gan lawer o artistiaid manga yn y diwydiant, gyda dau ddylanwad diweddar yn cynnwys Haro Aso, mangaka pos-gyffro, a Junji Ito, mangaka arswyd enwog. Nod gyrfa Kaylea yn y pen draw yw dod yn artist cysyniadol ar gyfer cwmni gemau, gan ganolbwyntio ar ddylunio cymeriadau, rendro terfynol a thirweddau. Mae ganddi hefyd angerdd mawr am greaduriaid ac mae hi’n gobeithio cyhoeddi ei chomig ei hun un diwrnod, o’r enw Indifference.
Chloe-Louise Mills
BA(ANRH) DARLUNIO
Mae Chloe-Lou yn ddarlunydd sydd ag angerdd am liw, siâp a gwead. Gyda blynyddoedd o brofiad mewn cefndir Celfyddyd Gain, maen nhw’n credu y dylai artistiaid gael eu hysbrydoli gan bob rhan o’r byd creadigol, gan ddefnyddio sgiliau a ddysgwyd mewn sectorau creadigol eraill ar wahân i’r diwydiant dylunio. Fel dylunydd, mae Chloe-Lou wedi datblygu gwerthfawrogiad dwfn o frandio a dylunio cynnyrch, gan ymgorffori techneg ddangosol fwy rhydd a mynegiannol yn eu gwaith graffeg a dylunio patrymau. Maen nhw hefyd yn angerddol iawn am
greu printiau, gan arbenigo mewn technegau traddodiadol fel cerfio leino ac ysgythru. Mae’r dulliau hyn wedi eu galluogi i greu ystod amrywiol o ddelweddau, o ffurfiau naturiol i ddarluniau cymeriadau ar gyfer cyhoeddiadau cylchgrawn yn ystod eu hamser yn y brifysgol. Mae lliw a manylion bob amser yn ganolog i ymarfer Chloe-Lou, gan sicrhau bod pob darn yn ddeniadol yn weledol ac yn bleserus. Yn anad dim, maent yn ymdrechu i greu gwaith sydd nid yn unig yn ddeniadol yn esthetig ond hefyd yn ystyrlon.
Lydia Popland-Wheeler
BA(ANRH) DARLUNIO
Mae Lydia yn ddarlunydd sy’n dod i’r amlwg sydd ar hyn o bryd yn astudio Darlunio ym Mhrifysgol Wrecsam. Mae hi’n frwd iawn dros bob math o ddarlunio, ac mae ganddi ddiddordeb arbennig mewn dylunio cymeriadau ac adrodd straeon. Gyda mynediad at amrywiaeth eang o feddalwedd greadigol, fel Procreate, Adobe Illustrator, Adobe Fresco, a Clip Studio Paint, mae Lydia wedi magu hyder wrth lywio’r offer a ddefnyddir yn gyffredin yn y diwydiant heddiw.
Mae ei pharodrwydd i arbrofi gyda thechnegau a llwyfannau newydd wedi caniatáu iddi wthio y tu hwnt i’w man cyfforddus,
archwilio amrywiaeth o arddulliau celf ac addasu ei gwaith ar gyfer cynulleidfaoedd gwahanol. Dechreuodd angerdd Lydia am ddarlunio pan oedd yn ifanc, wedi’i sbarduno gan gariad at greu bydoedd a chymeriadau newydd sy’n teimlo’n fyw, hyd yn oed mewn delweddau llonydd. Ymhlith y prif ysbrydoliaethau ar ei thaith greadigol mae anime, Webtoons, a nofelau - cyfryngau a ffurfiodd ei dychymyg ac a’i hanogodd i gredu mewn adrodd straeon heb gyfyngiadau.
Mae’r angerdd hwn wedi parhau i dyfu, gan barhau i sbarduno ei datblygiad artistig a’i brwdfrydedd i greu.
Evie Roberts
BA(ANRH) DARLUNIO
Mae Evie yn ddarlunydd sydd wedi ymrwymo i greu gwaith celf a dyluniadau deniadol o gymeriadau sy’n weledol apelgar. Gan weithio’n bennaf yn y cyfrwng digidol, mae ei ffocws ar ddarnau sy’n canolbwyntio ar gyfansoddiad a chymeriad. Mae’n cael ei hysbrydoli gan gelf a ffasiwn Japan, yn ogystal â’i chariad cyffredinol at estheteg fywiog, hwyliog a lliwgar.
Mae Evie bob amser wedi cael ei hudo gan weithiau sy’n cynnwys straeon a naratif cryf, ac mae hi’n mwynhau adrodd straeon drwy ei gwaith celf. Er bod y rhan fwyaf o’i
gwaith yn arddangos arddull fras a rhydd, mae’n mwynhau’r her o greu darnau wedi’u rendro’n llawn i ddatblygu ei sgiliau a’i harbenigedd ymhellach. Er ei bod yn ystyried ei hun yn ddarlunydd, mae gan Evie ddiddordeb eang ym mhob agwedd ar gelf. Mae hi wedi archwilio animeiddio, dylunio graffeg, creu comics, a gwaith 3D, gan gynnwys cerflunio, tecstilau a gwneud doliau. Wrth symud ymlaen, mae hi’n gobeithio parhau i ehangu ei galluoedd creadigol ac, yn y pen draw, datblygu stori lawn i gyd-fynd â’i darluniau.
Ruth Toner
BA(ANRH) DARLUNIO
Mae Ruth Toner yn ddarlunydd sy’n arbenigo mewn celf ffantasi a chelfyddyd sy’n seiliedig ar gymeriadau. Wedi’i ysbrydoli gan lên gwerin a mytholeg, gyda dreigiau fel motiff arbennig o gyffredin, maen nhw’n cyfuno’r themâu hyn â’u profiad o’r byd go iawn i greu cymeriadau sy’n teimlo’n real er gwaethaf eu bydoedd ffantasiol. Gwaith llinellau manwl neu rendro digidol yw ffocws y rhan fwyaf o’u darluniau.
Maent yn aml yn defnyddio eu gwaith llinell a’u harddulliau rendro i archwilio celf fonocromatig a sut y gall palet lliw cyfyngedig wthio gwaith celf yn greadigol, gan ddefnyddio siâp, cysgod a
chyferbyniad, yn hytrach na lliw, i adrodd stori’r darluniau.
Mae prosiect diweddaraf Ruth wedi cynnwys dylunio llewys recordiau, trosi syniadau a straeon cân yn ddelwedd sy’n cynrychioli eu themâu. Nod y trosiadau gweledol ar y llewys recordiau yw archwilio’r defnydd o gynildeb mewn technegau cyfathrebu gweledol, gan gofnodi syniadau haniaethol mewn delweddau beiddgar. Yn y dyfodol, mae Ruth yn anelu at barhau i adrodd straeon sy’n archwilio llên gwerin, ffantasi a hunaniaeth drwy eu darluniau, gyda diddordeb arbennig mewn darluniau llyfrau, dylunio cymeriadau ffantasi, a chomics.
Ffotograffiaeth
Jemma Durr
BA(ANRH) FFOTOGRAFFIAETH
Mae Jemma Durr yn ffotograffydd sy’n arbenigo mewn bywyd llonydd a phortreadau. Mae ei gwaith yn archwilio gwead, lliw a chyfansoddiad, gan gael ysbrydoliaeth yn aml o fyd natur a gwrthrychau bob dydd. Mae hi’n ystyried golau a manylion yn ofalus i greu delweddau sy’n fynegiannol ac yn gytbwys.
Gan weithio’n bennaf gyda ffotograffiaeth ddigidol, mae Jemma’n mwynhau’r gwrthgyferbyniad rhwng arlliwiau du a gwyn ac egni lliwiau beiddgar. Nod ei delweddau yw ennyn emosiwn a dathlu harddwch mewn eiliadau syml sy’n cael eu hanwybyddu’n aml.
Sara Encantado
BA(ANRH) FFOTOGRAFFIAETH
Mae Sara yn ffotograffydd y mae ei gwaith yn archwilio dyfnder emosiynol profiad dynol. Gan weithio’n bennaf gyda ffocws ar ddelweddaeth ddu a gwyn, mae’n defnyddio cydadwaith golau a chyferbyniad i greu awyrgylch ac ysgogi emosiwn. Mae ei hymarfer yn aml yn ymgysylltu â themâu fel iechyd meddwl, trawma, ac effaith barhaol cam-drin domestig. Ymdrinnir â’r pynciau hyn yn ofalus ac yn onest, ar sail profiad personol. Ochr yn ochr â hyn, mae Sara hefyd yn
canfod ystyr wrth gofnodi eiliadau o lawenydd a chysylltiad – o sesiynau babanod newydd-anedig i bortreadau teuluol a mamolaeth – gan gynnig ymdeimlad o gydbwysedd yn ei gwaith.
I Sara, mae ffotograffiaeth yn fwy na chreu delweddau; mae’n ffordd o adrodd straeon a allai fel arall aros yn anweledig. Ei nod yw creu gwaith sy’n teimlo’n ddilys ac yn bersonol, gan wahodd gwylwyr i ymgysylltu â’r emosiynau a’r naratifau sydd wedi’u gwreiddio ym mhob ffrâm.
Lauren Forward
BA(ANRH) FFOTOGRAFFIAETH
Mae Lauren yn ffotograffydd sy’n frwd dros greu delweddau creadigol, ac mae’n defnyddio technegau arbrofol sy’n herio ffiniau ffotograffiaeth draddodiadol. Ysbrydolwyd ei phrosiect Crystals gan ffurfiau beiddgar a phatrymau cymhleth celf haniaethol a geometrig, yn enwedig y defnydd
o siapiau unigryw. I greu’r gyfres, haenodd ddarnau o ffotograffau gweadog, gan eu gosod fel strwythurau sy’n debyg i grisialau. Mae pob darn yn fwriadol unigryw, gan symboleiddio’r unigoliaeth a’r amrywiaeth organig a geir mewn ffurfiannau crisial naturiol.
Fearne Landon
BA(ANRH) FFOTOGRAFFIAETH
Fy enw i yw Fearne ac rwy’n defnyddio ffotograffiaeth fel cyfrwng i archwilio cysyniadau sy’n teimlo’n bersonol i mi a’r gwyliwr. Mae fy mhrosiect Real Me yn cyflwyno cyfres o ddelweddau sy’n adlewyrchu themâu y gellir uniaethu â nhw yn gyffredinol drwy arlliw chwareus i gynnig portreadau unigryw o’r emosiynau y gallwn eu profi drwy gydol bywyd. Wedi’i ysbrydoli gan albwm y rapiwr o Korea, RM, Right Place, Wrong Person, sy’n archwilio
themâu fel teimlo ar goll, hunandderbyn a chysylltiad dynol; a’r cymeriad ffigurol Hirono, a grëwyd gan yr artist cyfoes Lang, sy’n ymgorffori emosiynau a phrofiadau dynol drwy ei ffurfiau artistig – mae Real Me yn ymchwilio i syniadau o berthyn, twf a hunaniaeth yn wyneb newid a disgwyliadau cymdeithasol. Mae’n gwahodd gwylwyr i ddarganfod eu hystyr eu hunain yn y ddelweddaeth – neu i fwynhau ei naratif gweledol.
Mitchell Williams
BA(ANRH) FFOTOGRAFFIAETH
Cyfres ffotograffig yw Gog Grounds sy’n cofnodi meysydd pêl-droed ar lawr gwlad ledled Gogledd Cymru a’r cymunedau sy’n eu cynnal. Mae’r mannau hyn, sy’n aml yn cael eu cynnal gan wirfoddolwyr ac yn cael eu cefnogi gan falchder lleol yn hytrach nag elw, yn fwy na chaeau chwarae yn unig – maen nhw’n fannau ymgynnull sy’n adlewyrchu cymeriad, gwytnwch ac ysbryd eu trefi. Er nad ydynt efallai’n edrych mor ddeniadol â stadia proffesiynol, mae ganddynt gysylltiad dyfnach â lle, traddodiad a chymuned.
Mae’r prosiect yn tynnu sylw at rai o’r caeau mwyaf trawiadol
ac atmosfferig gyfoethog yn y rhanbarth. Ym Mrychdyn, mae taran Beluga Airbus uwchben yn creu cefndir swreal i drefn arferol diwrnod gêm. Ym Mlaenau Ffestiniog, mae mynyddoedd llechi yn taflu eu cysgodion dros y cae, sy’n ein hatgoffa’n syth o dreftadaeth ddiwydiannol y dref. Yng Nghonwy, mae tonnau’r môr yn golchi’r tir wrth ymyl y cae, gan gyfuno chwaraeon â thirwedd mewn lleoliad unigryw Gymreig. Mae’r gyfres hon yn dathlu ac yn cofnodi byd lleol iawn pêl-droed ar lawr gwlad yng Nghymru – lle mae pob cae yn adrodd stori, ac mae pob gêm wedi’i gwreiddio mewn ymdeimlad o le sy’n cael ei rannu.
