Pfimi Interlaken

Vo Vorbilder und Trugbilder

U vor Kunscht, zeinte vom andere zunterscheide

Mönsche, wo öpis zsäge oder Grosses gleischtet hei, mache Idruck, si Vorbilder. Da hets vor über 30 Jahr e Regieriger gä. Vorhär isch är Jugendrichter gsi. Was für ne wunderbare Scheff. Jede Morge het är ds Lehrmeitschi gfragt, wies ihm geit. U es het ne ächt interessiert! Wo das Meitschi dLehr het welle ufgä, wills es Chindli het erwartet, het er alli Hebel i Bewegig gsetzt, damit ou under de nöie Umständ dLehr cha zÄnd bracht wärde. U alli hei mitgholfe. Wills eine het interessiert u ner het wyter gse als nur grad vor dNase. Es Vorbild.

Me chönnt jetz säge, das sig sini Bruefs- u Läbeserfahrig gsi. Aber da isch hüt e junge Scheff. Är chönnt der Sohn vom damalige Lehrmeitschi si. U er isch doch tatsächlech genau sone guete Scheff ir Krise! Es Vorbild.

U da isch das wunderbare Gebäude, wo dPhantasie aregt u anes Schloss erinneret. Me wett necher cho u hofft, e König oder e Prinzässin oder zmindscht e berüehmti Person dert zgseh. Aber das Huus isch marod, läär, verlasse u schier unbruchbar. Der üsser Schiin trügt. U mis Härz wird truurig. Isch e Wiederhärschtellig no möglech? Mir chöme Mönsche i Sinn, wo wie das Huus e wunderschöni u imposanti Fassade hei. Aber ihri Ougo si läär, ihres Härz unruhig. Ihri Wort züge vo Angscht u Hoffnigslosigkeit oder Aggression. Wär het Muet u wott da inveschtiere? Sie all ihri Vorbilder Trugbilder gsi?

Gueti Vorbilder si ächt. Sie si integer u nid bi allne beliebt. Sie verbiege sech nid bi jedem Wind. Sie stöh uf feschtem Grund u hei Wärte, wo d Mitmönsche achte. Sie gseh zgrosse Ganze. U ou ds chliine Unschiinbare. Sie hei ihre Kompass ufe Himmel grichtet, ufd Ewigkeit. Ihres Hie u Jetz isch der Wäg zum Daheim bim himmlische Vater, wo mit offne Arme wartet u wo sech ärnschthaft für üsers Lache u üsi Träne, üseri Siege u üsers Versäge, üsi Sterchi u Schwachheit, üsers Schimpfe u Süfze u alles andere, wo üs betrifft, interessiert u üs bedingigslos liebt. Mit some Vorbild simer geng weniger es Trugbild. Lääri Ouge vö a lüchte, Härze wärde ruhig u fülle sich mit Hoffnig. Will eine alles investiert het, um Wiederhärschtellig zbringe.

Daniela Francioli – von Allmen