Pfimi Interlaken

Vom Rüebli zum Sehnärv

Oder wie Buechstabe lebändig wärde uds Härz verändere

Rots Fleisch isch guet fürs Bluet. Grüens Gmües hilft gäge Chrebs. Bewegig haltet üs fit u gsund. Hirntraining verhinderet Alzheimer. Rüebli mache, dass me guet gseht. Bibel läse veränderet üsers Härz.

Isch das würklech wahr? Wie viel Rüebli hani scho gässe i mim Läbe, u doch hani geng no e Brülle. Isches am Ändi wahr u üsi Läbesmittel hei gar nüm gnue Nährstoffe, für üs gsund zhalte u gnue zversorge mit allem, wo üse Körper brucht? De machts Sinn, we mir e ganzi Palette vo Vitamine u Mineralstoffe zu üs näme! Es schadet nüt, we mir üs guet ernähre u gnue bewege. Es schadet ou nid, we mir Rätsel löse, rächne u Sprache lehre, um zHirni ztrainiere.

U was isch mit üsem Härz, üser Seel? Mit üsem Mönsch si, mit de Frage u Verletzige. Mit de Prägige u Ängscht. Bible, wo vieli tuusig Jahr alt isch, schiint für die hütegi Zyt nid Antworte zha. Aber hei mirs de scho mal probiert? Hei mir die Wort gno, Gott u Mösche iglade, se üs zerkläre? Wage mirs, es Verständnis zentwickle, wo nüt mit üsem IQ ztue het? Sondern mit me Härz ure Seel, wo sech ihrem Schöpfer anechere u öffne, wo der Heilig Geist ilade, die Buechstabe znä u dermit öpis zbewürke, wo mängisch üsers dänke überstigt. Übernatürlich.

Frage si vielech geng no nid alli beantwortet. Aber Friede het Izug drüber. Verletzige wärde nid ungscheh. Aber Vergäbig laht geng meh heil wärde. Prägige falle nid eifach ab. Aber es git anderi Wäge, wo sichtbar wärde ud Chance uf Richtigswächsel. Ängscht wei nid losla. Aber es git Gwüssheit, dass für di u mi e guete Plan git. Egal, i welne Umständ mir läbe. U dass mir bedingigslos gliebt si! Gliebt, will mir Gottes Gschöpf si. Nid will mir folge u leischte. Ir Bible entdecke mir, dass Gott Vater sech nach Beziehig u Fründschaft mit üs sehnt. Wenn dir no nie im Läbe öper het derna gfragt, darfsch ir Bible läse, dass Jesus Christus alles het gä, um dir u mir dBeziehig zum himmlische Vater zermögliche. Es eifachs Ja längt. Es Ja zu Beziehig u Fründschaft. Une Iladig, er mögi üs sis Wort – Bible – geng meh verständlech mache u üsers Härz verändere. Das wird meh Würkig ha als Rüebli uf üsi Ouge! D Wahl ligt bi üs: Gäbe mir däm Ruum u Zyt, wo üs stercht, Muet macht u Säge bringt? I wünsches üs vo Härze!

Daniela Francioli-von Allmen

www.pfimi-interlaken.ch