18de jaarlikse veiling VOLSTRUISBOERE BAAT BY VORDERING MET TELING

deur Dr. Anel Engelbrecht

SStudies wat by die Oudtshoorn navorsingsplaas van die Wes-Kaapse Departement van Landbou gedoen word, toon dat jong broeivolstruise ’n volle seisoen vroeër kan begin produseer as wat algemeen aanvaar word.

Tradisioneel word geglo dat volstruise eers van drie-jarige ouderdom af kan begin produseer. Gevolglik word jong broeivolstruise eers in hul derde seisoen ná uitbroei in broeikuddes ingesluit. In die praktyk beteken dit dat hulle drie jaar lank gevoer moet word voordat hulle enige produksie lewer.

Op die Oudtshoorn navorsingsplaas word jong broeivolstruise egter al in hul tweede seisoen ná uitbroei (dus selfs voor tweejarige ouderdom) in die teeltkudde ingesluit – en lewer goeie produksie. Die ouderdom waarteen volstruiswyfies begin eiers lê, het mettertyd verbeter tot ’n gemiddelde van 674 dae (22 maande). Dit is waarskynlik ’n direkte gevolg van die genetiese seleksie vir verhoogde produksie wat sedert die 1990’s by die navorsingsplaas gedoen word.

Die broeivolstruise op die navorsingsplaas word in pare in klein kampies gehou sodat elke volstruis se individuele produksie bepaal kan word. Die broeikampe, eiers en kuikens word gemerk sodat elke kuiken se ouerskap maklik bepaal kan word. Dit maak die seleksie van jong volstruise op grond van hul familie se prestasie moontlik.

Jong broeivolstruise word vervolgens jaarliks te koop aangebied op ’n veiling en bied aan volstruisboere die geleentheid om gebruik te maak van hierdie geselekteerde diere vir hul eie broeikuddes.

Vanjaar se veiling het op 16 Maart plaasgevind en was weer ’n katalogusveiling waarin teeltwaardes vir verskeie eienskappe gegee is, met besigtiging van die volstruise voor die veiling. Altesaam 115 jong volstruise is verkoop teen ’n gemiddelde prys van R7 222. Die hoogste prys vir ’n jong mannetjie was R6 500, terwyl ’n jong wyfie R12 250 behaal het. Jurie Klue van Klaarstroom was die koper van albei en het ook die meeste volstruise gekoop. Tydens verlede jaar se veiling is 77 volwasse voëls aangebied met ’n gemiddelde prys van R4 500 en die hoogste prys behaal was R7 250.

Genetiese vordering en/of die gebruik van goeie teeltmateriaal kan ’n wesenlike bydrae lewer om produksiekoste te verlaag deurdat dit die onproduktiewe tydperk van broeivoëls kan verkort, en doeltreffendheid kan verhoog deur hoër individuele produksie (meer eiers en kuikens).

Produkgehalte kan ook verhoog word omdat eienskappe wat velgehalte beïnvloed, soos die vermindering van haarfollikels, deel uitmaak van die navorsingsplaas se teeltdoelwitte. AP