Introduction of the Holy sites & Temples of Yalang Gewog, Tashi Yangtse District.
i བཀྲ་ཤིས་གཡང་རྩེ་རྫོང་ཁག་ ཡ་ལང་རྒེད་འོག་གི་གཡུས་ཚན་ཁག་ཚུ་ནང་ ཡོད་པའི་ གནས་དང་ལྷ་ཁང་ཚུ་གི་ངོ་སྤྲོད། ཞིབ་འཚོལ་དང་རྩོམ་བྲིསཿ བསྟན་འཛིན་ནོར་བུ།
རབ་གསལ་མེ་ལོང་། ❀❀❀
ii པར་ཐེངས་དང་པ། སྤྱི་ལོ་ ༢༠༢༡ ལུ། པར་དབང་© ཡ་ལང་རྒེད་འོག་བདག་སྐྱོང་ལུ་ཡོད། གྲོས་སྟོན་པ། ཆོས་སྲུང་དབང་འདུས། ཡ་ལང་རྒེད་འོག་གི་རྒཔོ། རྫོང་ཁག་ཚོགས་འདུའི་འཁྲི་འཛིན། བཀྲ་ཤིས་གཡང་རྩེ་རྫོང་ཁག། ཞིབ་འཚོལ་དང་རྩོམ་བྲིས། བསྟན་འཛིན་ནོར་བུ། མཐའ་དཔྱད་ཞུན་དག། སློབ་དཔོན་ཀུན་བཟང་ཕྲིནལས། ཀེ་ཨེམ་ཀྲི་ལས་སྡེ། བསོད་ནམས་བསྟན་འཛིན། ཀེ་ཨེམ་ཀྲི་ལས་སྡེ། བཟོ་བཀོད། བསོད་ནམས་བསྟན་འཛིན། ISBN 978-99980-970-0-1 BICMA No. 100000862
རྒྱལ་ཀུན་སྙིང་རྗེའི་རང་གཟུགས་པད་དཀར་འཆང་། །རྣམ་འཕྲུལ་ལྗོངས་འདིར་སྲིད་པ་ཉེར་བཟུང་ནས།། མངའ་འབངས་བུ་གཅིག་མ་བཞིན་བརྩེར་མཛད་པ། །མི་དབང་ཆོས་རྒྱལ་སྐུ་ཚེ་བརྟན་གྱུར་ཅིག།
ལྗོངས་འདིའི་མི་མང་བསོད་ནམས་ལས་གྲུབ་པའི། །པདྨའི་ལུང་གིས་རབ་བསྔགས་མི་ཡི་དབང་།། འཇིགས་མེད་སེངྒེ་དབང་ཕྱུག་མཚན་ཅན་མཆོག །སྐུ་ཚེ་ཡུན་བརྟན་མཛད་ཕྲིན་དཔལ་འབར་ཤོག།
དཔལ་ལྡན་འབྲུག་པའི་ཆོས་ཀྱི་རིང་ལུགས་ཆེ། །ཞིང་འདིར་ཡར་ཟླའི་མཆེད་པོར་སྤེལ་མཛད་པ།། ངག་དབང་འཇིགས་མེད་ཆོས་ཀྱི་གྲགས་པ་མཆོག །ཆོས་ཁྲིར་བརླིང་ཞིང་མཛད་བཟང་མཐར་རྒྱས་ཤོག།
ཆེད་བརྗོད། ༈ ད་ལན་ ངོམ་བསྟན་འཛིན་ནོར་བུ་གིས་ བཀྲ་ཤིས་གཡང་རྩེ་རྫོང་ཁག་ ཡ་ལང་རྒེད་ འོག་མངའ་ཁོངས་ཀྱི་གཡུས་ཚན་ཁག་ཚུ་ནང་ཡོད་པའི་ གནས་རྩ་ཅན་དང་ ལྷ་ཁང་དགོན་ སྡེའི་ལོ་རྒྱུས་ཚུ་ ཞིབ་འཚོལ་མཐིལ་ཕྱིན་འབད་དེ་ པར་རི་དང་བཅསཔ་སྦེ་ དཔེ་དེབ་པར་སྐྲུན་ འབད་མི་འདི་ལུ་ ང་ལས་ ཡིད་ཆེས་ངལ་རང་དང་བཅས་པའི་སྒོ་ལས་ བཀའ་དྲིན་ལེགས་སོའི་ གཟེངས་བསྟོད་ཡོད། དཔེ་དེབ་འདི་གིས་ རྒེད་འོག་འདི་ནང་ཡོད་པའི་ དམ་པའི་ཆོས་དང་འབྲེལ་བའི་ལོ་རྒྱུས་ཚུ་ ཁུངས་སྐྱེལ་ཚུགསཔ་མ་ཚད་ ལྷག་མི་ཚུ་གི་རྒྱུད་ལུ་ཡིད་ཆེས་དང་ དད་མོས་ལྷག་པར་འཕེལ་ ཏེ་ དགེ་བའི་བྱ་བ་ལུ་ཡང་ ལྷག་བསམ་རྣམ་དག་གི་སྒོ་ལས་ ངམ་ངམ་ཤུགས་ཀྱིས་ཞུགས་ ཚུགས་ནིའི་ ཁེ་ཕན་སྦོམ་འདུག། མཇུག་ར་ དཔེ་དེབ་ལྷག་མི་ཡོངས་ཀྱི་རྒྱུད་ལུ་ ཤེས་ཡོན་གསརཔ་ཐོབ་སྟེ་ ཇི་སྲིད་བསྐལ་པ་ མ་སྟོང་གི་བར་དུ་ རྒྱལ་ཁབ་ཀྱི་ནང་རྟེན་དེ་ཚུ་ ཡར་བསྐྱེད་དང་ཉམས་བསྲུང་འབད་ཚུགས་ནི་དང་ གཅིག་ཁར་ ང་བཅས་རའི་ འབྲུག་རྒྱལ་ཁབ་ཀྱི་གལ་ཆེ་བའི་ སྲོལ་ཁྱུན་བཟང་པོ་འདི་ལུ་ཞུགས་ ཏེ་ དམ་པའི་ཆོས་ཕྱོགས་ཀྱི་འགྲོ་དོན་རྒྱས་ནི་དང་ འབྲུག་མི་ཆ་མཉམ་ དགའ་སྐྱིད་དཔལ་ འཛོམས་ལུ་ ལོངས་སྤྱོད་ཚུགས་པའི་ སྨོན་འདེབས་ཞུ་ནི་ཨིན། ཤེས་རབ་རྒྱལ་མཚན། སྤྱི་ཚེས་ ༡༩།༣།༢༠༢༡ ལུ། ནང་སྲིད་དང་སྲོལ་འཛིན་བློན་པོ།
རབ་གསལ་མེ་ལོང་། 85 ༼དྲུག་པ། རོ་ལམ་གཡུས་ཚན་ནང་ཡོད་པའི་༽ གནས་དགོན། ༦.༡ རོ་ལམ་གཡུས་ཚན་གྱི་སྐོར། གཡུས་ཚན་ ༩ གི་གྲལ་ལས་ རོ་ལམ་གཡུས་ཚན་དེ་ རྒེད་འོག་ལྟེ་བ་ ལས་ དུས་ཡུན་ཆུ་ཚོད་ཕྱེད་ལྷགཔ་ཅིག་ རྐང་ཐང་འབད་འགྱོ་བའི་སྐབས་ ས་གནས་ཆུ་མདའ་ཟེར་ས་ ལྷོདཔ་མས། ད་རུང་ དེ་ཁ་ལས་ཡར་ ཁ་ གྱེན་འཛེགས་ཏེ་ དུས་ཡུན་སྐར་མ་ ༣༠ དེ་ཅིག་གི་རྩིས་འགྱོ་དགོ་པའི་ ས་ཁར་ཆགས་ཏེ་འདུག། རྒེད་འོག་བདག་སྐྱོང་ཡིག་ཚང་ནང་ཡོད་པའི་ རོ་ལམ་གཡུས་ཀྱི་མཐོང་སྣང་།
རབ་གསལ་མེ་ལོང་། 86 མི་རློབས་དང་ཁྱིམ་གྱི་གྲངས་རྩིས་ ༢༠༡༩ ཅན་མ་དང་འཁྲིལ་བ་ཅིན་ གཡུས་ཚན་འདི་ནང་ལུ་ ཁྱིམ་གུང་པ་ ༦༦ དང་། མི་གྲངས་བསྡོམས་ ༥༥༡ ལྷགཔ་ཅིག་ཡོད་ལུགས་ ཐོ་བཀོད་འབད་དེ་འདུག། ༦.༢ རོ་ལམ་གཡུས་ཚན་གྱི་མིང་གནས་སྐོར། གཡུས་ཚན་དེ་གི་མིང་ རོ་ལམ་ ཟེར་སླབ་དགོ་པའི་ར་ཁུངས་དེ་ ངག་རྒྱུན་ ཅིག་ལས་ ཧེ་མ་མོན་རྟ་དབང་ལས་ཨིན་མི་ མི་ངོམ་རིག་འཛིན་ཟེར་མི་ དང་། ས་གནས་ཁྲག་སྒོམ་ལས་ཨིན་མི་ མི་ངོམ་བོ་དྷི་ ཟེར་མི་གཉིས་ མ་འགྲིགས་པར་ ཕྱོགས་བཟུང་སྟེ་ དམག་རྐྱབ་ད་ རིག་འཛིན་གྱི་དམག་ ཕམ་སྟེ་ མགྱོགས་འགྱོ་བའི་སྐབས་ ས་གནས་དེ་ཁར་ལྷོདཔ་ད་ རིག་ འཛིན་དེ་གྱོངས་ཏེ་ རོ་སྦེ་ འབག་དགོཔ་ཐོན་ཡོད་ནི་འདི་གིས་ རོ་ལམ་ ཟེར་བཏགས་པའི་ ལོ་རྒྱུས་འདུག། ངག་རྒྱུན་གཞན་ཅིག་བཤད་མི་དང་འཁྲིལ་བ་ཅིན་ གཡུས་ཚན་གྱི་ཟུར་ ཁར་ དང་ཕུ་རོ་ཆེན་དངོས་གྲུབ་བཟང་པོ་ རྡོ་ལུ་བྱིན་གྱིས་བརླབས་བཞག་ མི་རྡོའི་བཟོ་རྣམ་ མིའི་ཕུངམོ་ཅོག་འཐདཔ་ཡོད་མི་དེ་ མི་ཚུ་གིས་ཁྱིམ་
རབ་གསལ་མེ་ལོང་། 87 རྐྱབ་སྐབས་ སྤོག་སྟེ་མེདཔ་བཏང་ཡོདཔ་ལུགས་བཤད་པའི་ཁར་ རྡོ་ འདི་ལས་རྟ་དྲངས་ཏེ་ གཡུས་ཚན་གྱི་མིང་ཡང་རོ་ལམ་ཟེར་བཏགས་ཡོད་ ལུགས་ཀྱི་ཁུངས་བཤད་ནི་འདུག་ཟེར་ཨིན་པས། ཨིན་རུང་ གནད་དོན་དེ་གི་སྐོར་ལས་ ཁུངས་ལྡན་ཡིག་ཆ་རེ་ཡོད་པ་ཅིན་ མཁས་པ་ཚུ་གིས་ དཔྱད་པ་གནང་སྟེ་ བཀའ་དྲིན་བསྐྱང་གནང་ ཟེར་ཞུ་ ནི་དང་གཅིག་ཁར། སྤྱི་ལོ་ ༢༠༡༩ ལོར་ རྫོང་ཁ་གོང་འཕེལ་ལྷན་ཚོགས་ ཀྱིས་ རྩོམ་སྒྲིག་དང་ པར་སྐྲུན་འབད་ཡོད་མི་ མིང་གནས་གསལ་བའི་ འོད་ཟེར་ནང་ལུ་ཡང་ དེ་སྦེ་ར་ བཀོད་དེ་འདུག། ༦.༣ གཡུས་ཚན་དེ་ནང་སྔོན་མ་ལས་ ལྷ་ཁང་གཉིས་ཡོད་ཚུལ། སྔོན་མ་རིག་འཛིན་འཇིགས་མེད་གླིང་པའི་རྣམ་ཐར་ནང་ རོ་ལམ་ལས་ ཆོས་མཐུན་གྱི་སློབ་མ་ ལེ་ཤ་ཡོད་ལུགས་བཀོད་དེ་འདུག། རོ་ལམ་ གཡུས་ཚན་ནང་ ལྷ་ཁང་སྦོམ་ཆུང་གཉིས་ཡོད་པའི་ ར་ཁུངས་དེ་ཡང་ དཔལ་འབྲུག་ཞིབ་འཇུག་ལྟེ་བ་གིས་ པར་སྐྲུན་འབད་ཡོད་པའི་ རྗེ་ ཡོནཏན་མཐའ་ཡས་དང་། རྗེ་ཀུན་དགའ་རྒྱ་མཚོ་གཉིས་ཀྱིས་མཛད་
རབ་གསལ་མེ་ལོང་། 88 པའི་ འབྲུག་གི་སྡེ་སྲིད་ཁྲི་རབས་ ༡༣ པ་ ཆོས་རྗེ་ཤེས་རབ་དབང་ཕྱུག་ ༼༡༦༩༧_༡༧༦༥༽ གི་དགེ་བའི་ཆོ་ག་རབ་ཏུ་གསལ་བའི་གཏམ་ མུ་ཏིག་དོ་ཤལ་ ཟེར་མི་ནང༌ལུ་རོ་ལམ་དགོན་པའི་ལྷ་ཁང་ཆེ་ཆུང་གཉིས་ ཟེར་ཐོ་བཀོད་གནང་སྟེ་ཡོདཔ་ལས་ དུས་རབས་ ༡༨ པའི་སྔ་གོང་ལས་ ཡོད་པའི་ ལྷ་ཁང་རྙིངམ་ཅིག་འོང་ནི་ཨིན་པས། ཨིན་རུང་ ད་རེས་ལོ་ རྒྱུས་ཤེས་མི་ག་ཡང་མེད་པའི་ཁར་ ད་ལྟོ་ཡོད་མི་ལྷ་ཁང་གཉིསཔོ་འདི་ ཤུལ་ལས་བཞེངས་པའི་ ལོ་རྒྱུས་འདུག། ༦.༤ རོ་ལམ་སྤང་སྟོད་ཆོས་གླིང་ལྷ་ཁང་གི་ལོ་རྒྱུས། གཡུས་ཚན་དེ་ནང་ ཤུལ་ལས་བཞེངས་ཡོད་མི་ ལྷ་ཁང་གཉིས་ཀྱི་གྲལ་ ལས་ སྤང་སྟོད་ཆོས་གླིང་ལྷ་ཁང་དེ་ བཙན་ཆེན་སྐོར་ཕུ་གི་མཇུག་ལུ་ དང་། གཡུས་ཚན་འདི་གི་མགུ་ལུ་ ག་ནི་བ་མཛེས་ཆ་དང་ལྡན་པའི་ ས་ གོ་ཅིག་ནང་ ཆགས་ཏེ་འདུག། གཡུས་ཚན་དེ་ནང་ ལོ་ངོ་ལེ་ཤ་ཅིག་གི་ ཧེ་མ་ལས་ ཆོས་ཕྱོགས་ཀྱི་ལས་རིམ་འགོ་འདྲེན་འཐབ་སྟེ་བཞུགས་མི་ སློབ་དཔོན་གྲུབ་པ་གིས་ བཤད་དོ་བཟུམ་འབད་བ་ཅིན་ ལྷ་ཁང་དེ་ སྤྱི་ལོ་ ༡༩༡༦ མེ་ཕོ་འབྲུག་ལོ་ལུ་ དགེ་སློང་ཁོ་ཙ་ཟེར་མི་གིས་ བཞེངས་ཡོདཔ་
རབ་གསལ་མེ་ལོང་། 89 སྤང་སྟོད་ཆོས་གླིང་ལྷ་ཁང་། དང་ ད་ཚུན་ ལྷ་ཁང་དེ་བཞེངས་ཏེ་ ལོ་ངོ་ ༡༠༥ ལྷགཔ་ཅིག་སོང་ཡོད་ ལུགས་ཀྱི་ ལོ་རྒྱུས་བཤད་ནི་འདུག། ༦.༥ ལྷ་ཁང་བཞེངས་མི་བླམ་གི་ལོ་རྒྱུས། སློབ་དཔོན་གྲུབ་པ་གིས་བཤད་མི་ ལོ་རྒྱུས་དང་འཁྲིལ་བ་ཅིན་ དགེ་ སློང་ཁོ་ཙ་དེ་ གཡུས་དེ་ནང་ལས་ཨིན་པས། ཁོ་གིས་ བལ་པོ་ལུ་སོང་
རབ་གསལ་མེ་ལོང་། 90 སྦེ་ མཆོད་རྟེན་བྱ་རུང་ཁ་ཤོར་གྱི་རྩ་བར་ འཕགསཔ་ཐུགས་རྗེ་ཆེན་པོའི་ གསུང་། སྨྱུང་གནས་གནང་སྟེ་ སྟོང་ཐོན་པའི་ཤུལ་ལུ་ ལོག་སྟེ་ར་ གཡུས་ ཚན་དེ་ནང་འོང་ཞིན་ན་ ད་ལྟོ་ཡོད་པའི་སྤང་སྟོད་ཆོས་གླིང་ལྷ་ཁང་དེ་ གསར་ བཞེངས་འབད་ཡོད་པའི་ ལོ་རྒྱུས་བཤད་ནི་འདུག། ༦.༦ རྟེན་གསུམ་གྱི་སྐོར། སྤང་སྟོད་ཆོས་གླིང་ལྷ་ཁང་དེ་ནང་ ནང་རྟེན་གཙོ་བོ་ གུ་རུ་སྣང་སྲིད་གཟིལ་ གནོན་དང་། ཆོས་ལོངས་སྤྲུལ་གསུམ་གྱི་སྐུ་འདྲ་ཚུ་མཇལ་ནི་ཡོད་མི་ཚུ་ ཡང་ ཡོངས་གྲགས་ལུ་ མེས་མེས་ཚོང་ཚོང་རིན་པོ་ཆེ་ ཟེར་ཞུ་མི་དེ་གིས་ ཕྱག་བཟོ་ཙང་ཙ་ཨིནམ་སྦེ་བཤད་ནི་འདུག། ཤུལ་ལས་ མི་རློབས་ཡར་ རྒྱས་འགྱོ་མི་དང་བསྟུན་ ལྷ་ཁང་དེ་ རྒྱ་བསྐྱེད་འབད་ནིའི་ ལོ་རྒྱུས་སླབ་ ཡོད་རུང་ རྒྱ་བསྐྱེད་འབད་སའི་ ས་གོ་ལངམ་སྦེ་མེདཔ་ལས་བརྟེན་ ད་ལྟོ་ ཡོད་སའི་ ལྷ་ཁང་གསརཔ་དེ་ བཞེངས་དགོཔ་ཐོན་ནུག། དམངས་ཀྱི་ལྷ་ཁང་ གསར་བཞེངས་འབད་ཡོད་མི་དང་འབྲེལ་ སྤང་སྟོད་ ཆོས་གླིང་ལྷ་ཁང་དེ་ སྒེར་གྱི་ལྷ་ཁང་ཅིག་ལུ་གྱུར་ཡོདཔ་དང་། ད་རེས་
རབ་གསལ་མེ་ལོང་། 91 ནངས་པ་ ལྷ་ཁང་དེ་ དགེ་སློང་ཁོ་ཙ་ཁོ་རའི་ མི་རབས་རིམ་འབྱུང་ཚུ་ གིས་ བདག་འཛིན་འཐབ་ཡོད་ལུགས་བཤད་ནི་འདུག། ༦.༧ དུས་མཆོད་འབུམ་སྡེའི་སྐོར། ལྷ་ཁང་དེ་ནང་ དུས་མཆོད་འབུམ་སྡེ་གི་ཐད་ཁར་ རང་ཟླ་ལྔ་པའི་ནང་ སྤྲེལ་ཟླ་ཚེས་བཅུ་དང་། དད་མོས་ཅན་གྱི་སྦྱིན་བདག་རེ་ཐོན་པའི་སྐབས་ སྨྱུང་གནས་དཀརཔོ་ཆ་གསུམ་རྐྱངམ་གཅིག་ལས་བརྒལ་ གཞན་ཚུ་ ག་ར་ ད་ལྟོ་ཡོད་སའི་ དམངས་ཀྱི་ལྷ་ཁང་གསརཔ་ནང་ འགོ་འདྲེན་ འཐབ་ཨིན་པས། ལྷ་ཁང་དེ་བཞེངས་ཏེ་ ལོ་ངོ་ལེ་ཤ་སོང་ཡོད་ནི་འདི་གིས་ ཉམས་ཆག་ཤོར་ཡོད་མི་དང་བསྟུན་ ཤུལ་ལས་ དགེ་སློང་ཁོ་ཙ་ ཁོ་རའི་ མི་རབས་རིམ་བྱུང་ཚུ་གིས་ ཉམས་གསོ་ཞུ་ནུག། ༦.༨ ཨོ་རྒྱན་ཆོས་གླིང་ལྷ་ཁང་གི་ལོ་རྒྱུས། སྤྱི་ལོ་༡༩༨༥ ཤིང་གླང་ལོ་ལུ་ བཞེངས་ཡོད་མི་ ཐོག་ཚད་གཉིས་འབད་ མི་ ཨོ་རྒྱན་ཆོས་གླིང་ལྷ་ཁང་དེ་ ག་ནི་བ་མཛེས་པའི་ གཡུས་ཚན་སྦུག་ ལུ་ ས་ཆ་ཉམས་དགའ་ཏོག་ཏོ་ཅིག་གི་ནང་ ཆགས་ཏེ་འདུག།
རབ་གསལ་མེ་ལོང་། 92 ༦.༩ ལྷ་ཁང་བཞེངས་གནས་ཀྱི་སྐོར། ས་ཆ་དེ་ གཡུས་ཚན་དེ་ནང་ལས་ར་ཨིན་མི་ ཨམ་ཨུ་སིན་དང་ ཨཔ་ཞོག་ པོ་ ཁོང་བཟའ་ཚང་གཉིས་ཀྱིས་ སྤྱིར་ཁམས་གསུམ་འཁོར་བ་འདི་ནང་ ཡོད་པའི་ སེམས་ཅན་ཐམས་ཅད་གཏན་གྱི་བདེ་བ་ བླ་ན་མེད་པ་ཡང་དག་ པར་རྫོགས་པའི་ སངས་རྒྱས་ཀྱི་གོ་འཕང་ཐོབ་ཐབས་ཀྱི་དོན་ལུ་ དང་། ལྷག་པར་དུ་ གཡུས་ཚན་དེ་ནང་ ཆོས་ཕྱོགས་དང་འབྲེལ་བའི་ ལས་རིམ་ ཚུ་འགོ་འདྲེན་འཐབ་སའི་ རྟེན་ལྷ་ཁང་ཁྱད་པར་ཅན་ཅིག་ བཞེངས་ཐབས་ ལུ་དམིགས་ཏེ་ ཕུལ་ནུག། ཨོ་རྒྱན་ཆོས་གླིང་ལྷ་ཁང་།
རབ་གསལ་མེ་ལོང་། 93 དེ་གི་ཤུལ་ལས་ སློབ་དཔོན་གྲུབ་པ་གིས་ འགོ་འདྲེན་འཐབ་སྟེ་ མི་ སེར་དམངས་ཀྱིས་ ཅི་ཤེས་གང་ལྕོགས་ཀྱི་སྒོ་ལས་ རྒྱབ་སྐྱོར་ཧྲིལ་པོའི་ ཐོག་བཞེངས་ཡོད་ཟེར་ཨིན་པས། སློབ་དཔོན་གྲུབ་པ་གིས་གསུངས་མི་ ལོ་རྒྱུས་དང་འཁྲིལ་བ་ཅིན་ ད་ཚུན་ ལྷ་ཁང་དེ་བཞེངས་ཏེ་ མི་ལོ་ ༣༦ ལྷགཔ་ཅིག་སོང་ཡོད་པའི་ ལོ་རྒྱུས་འདུག། ད་ལྟོ་ དམངས་ཀྱི་ལྷ་ཁང་སྦེ་ ལག་ལེན་འཐབ་མི་ ཨོ་རྒྱན་ཆོས་གླིང་ལྷ་ ཁང་དེ་ བཞེངས་དགོ་པའི་དམིགས་ཡུལ་གཙོ་བོ་ར་ སྤང་སྟོད་ཆོས་གླིང་ ལྷ་ཁང་དེ་ ས་གོ་ཆུང་ནི་འདི་གིས་ ཆོས་ཕྱོགས་དང་འབྲེལ་བའི་ ལས་ རིམ་ཚུ་ འགོ་འདྲེན་འཐབ་པའི་སྐབས་ བྱ་སྟབས་མ་བདེཝ་ལས་བརྟེན་ ཏེ་ བཞེངས་དགོཔ་ཐོན་ཡོད་ལུགས་བཤདཔ་ཨིན་པས། ༦.༡༠ རྟེན་གསུམ་གྱི་སྐོར། ལྷ་ཁང་དེ་ནང་ ནང་རྟེན་གཙོ་བོ་ སངས་རྒྱས་དཀོན་མཆོག་གི་ཚབ་ལུ་ ཆོས་ལོངས་སྤྲུལ་གསུམ་གྱི་སྐུ་འདྲ་དང་། རིགས་གསུམ་མགོན་པོའི་སྐུ་ འདྲ། དེ་ལས་ཕུར་པའི་སྐུ་འདྲ་དང་། སྐྱེས་བཙན་སྐོར་ཕུག་པའི་སྐུ་འདྲ་ཚུ་
རབ་གསལ་མེ་ལོང་། 94 བཞུགས་སུ་གསོལ་ཡོད་པའི་ཁར་ དེ་ལས་ཆོས་དཀོན་མཆོག་གི་ཚབ་ ལུ་ བཀའ་འགྱུར་ཚར་གཅིག་དང་། ཆོས་འབུམ་ཚར་གཅིག། དེ་ལས་གུ་ རུ་མཚན་བརྒྱད་ཀྱི་མཐོང་འགྲོལ་ཆེན་མོ་དང་ དགེ་འདུན་དཀོན་མཆོག་ གི་ཚབ་ལུ་ སློབ་དཔོན་གྲུབ་པ་གིས་གཙོས་པའི་ སྒོམ་ཆེན་ ༡༥ ལྷགཔ་ ཅིག་བཞུགས་ཏེ་འདུག། ༦.༡༡ དུས་མཆོད་འབུམ་སྡེའི་སྐོར། ལྷ་ཁང་དེ་ མི་སེར་ཚུ་གིས་ ལྷག་བསམ་དཀར་པོའི་སྒོ་ལས་ བཞེངས་ ནི་འགོ་བཙུགས་ཡོད་ནི་འདི་གིས་ ད་རེས་ནངས་པ་ ལྷ་ཁང་དེ་གིས་ ང་ བཅས་རའི་ ནང་པ་སངས་རྒྱས་ཀྱི་བསྟན་པ་ཚུ་ མི་ཉམས་གོང་འཕེལ་ དང་། ཉམས་པ་སོར་ཆུད་འབད་ནི་ལུ་ ཕན་ཐོགས་སྦོམ་བྱུང་ཏེ་ཡོདཔ་ མ་ཚད། ལྷག་པར་དུ་ གཡུས་ཚན་འདི་ནང་གི་ མི་སེར་ཚུ་ལུ་ ཚོགས་ བསགས་སྒྲིབ་བྱང་གི་དོན་ལུ་ ཕན་སྦོམ་ཐོགས་ཏེ་འདུག། རང་ཟླ་དང་པའི་ནང་ སྨོན་ལམ་ཆེན་མོ་ཉིནམ་གཉིས་དང་། རང་ཟླ་ལྔ་པའི་ ནང་ སྤྲེལ་ཟླ་ཚེས་བཅུ་དང་། རང་ཟླ་དྲུག་པའི་ནང་ བཀའ་འགྱུར་དག་ཚར་
རབ་གསལ་མེ་ལོང་། 95 ལྷག་སྟེ་ ཉིནམ་མཇུག་ལུ་དམངས་བཟློག་ ཟེར་མི་ཅིག་བཏང་སྟེ་ དེའི་ ནངས་པ་ཆོས་པོ་ཏི་ཚུ་གདན་འདྲེན་ཞུས་ཏེ་ ཆོས་སྐོར་ཟེར་ གཡུས་སྐོར་ ར་རྐྱབ་སྲོལ་འདུག། དེ་ལས་ རང་ཟླ་བཅུ་པའི་ནང་ གསོལ་འདེབས་ཀྱི་ཚེས་བཅུ་གནང་སྲོལ་ ཡོད་པའི་སྐབས་ལུ་ མི་དམངས་ལུ་ བཞེངས་ཤིག་པདྨོའི་འཆམ་དང་། པད་གླིང་གིང་གསུམ་གྱི་འཆམ། དེ་ལས་བར་དོའི་འཆམ་ཚུ་ཡང་ མཇལ་ ཁ་གནང་དོ་ཡོདཔ་ཨིན་པས། ཟླ་རིམ་བཞིན་གྱི་ ཡར་ངོའི་ཚེས་བཅུ་ཐམ་ ལུ་ གུ་རུ་རིན་པོ་ཆེ་་ལུ་གསོལ་བ་བཏབ་སྟེ་ ཚོགས་མཆོད་ཚུ་ཕུལ་སྦེ་ དགེ་བའི་ལཱ་ལུ་བརྩོན་བཞིན་འདུག། ༦.༡༢ ལྷ་ཁང་གི་བདག་དབང་། ནང་སྲིད་དང་སྲོལ་འཛིན་ལྷན་ཁག་ སྲོལ་འཛིན་ལས་ཁུངས་ཀྱིས་པར་ སྐྲུན་འབད་ཡོད་མི་ འབྲུག་གི་རྫོང་གཞིས་དང་ལྷ་ཁང་དགོན་སྡེའི་ཐོ་ཡིག་ ཟེར་མི་ དཔེ་དེབ་དང་འཁྲིལ་བ་ཅིན་ སྤང་སྟོད་ཆོས་གླིང་ལྷ་ཁང་དེ་ སྒེར་ གྱི་ལྷ་ཁང་དང་། ཨོ་རྒྱན་ཆོས་གླིང་དེ་ དམངས་ཀྱི་ལྷ་ཁང་སྦེ་ ཐོ་བཀོད་ འབད་དེ་འདུག།
རབ་གསལ་མེ་ལོང་། 96 ༦.༡༣ རོ་ལམ་གཡུས་ཚན་ནང་ཡོད་པའི་ བཙན་བཀང་སྤོ་ཏོ་གི་སྐོར། སྤང་སྟོད་ཆོས་གླིང་ལྷ་ཁང་ལས་ ཁ་ཡར་འཛེགས་ཏེ་ དུས་ཡུན་སྐར་མ་ ༢༠ ལྷགཔ་ཅིག་འགྱོཝ་ད་ ས་གནས་ཀྱི་མིང་ གཡུས་སྐད་ནང་ལས་ བཙན་བཀང་སྤོ་ཏོག་ ཟེར་སླབ་སྲོལ་ཡོད་མི་ནང་ ལྷོདཔ་ཨིན་པས། སློབ་ དཔོན་གྲུབ་པ་གིས་ བཤད་སྲོལ་ལྟར་དུ་འབད་བ་ཅིན་ ས་གནས་དེ་ཁར་ ལོ་བསྟར་བཞིན་དུ་ རང་ཟླ་ལྔ་པའི་ཚེས་བཅོ་ལྔ་ལུ་ ཆོ་གཔ་ཚུ་དང་གཅིག་ ཁར་ མི་དམངས་ཀྱིས་གསེར་སྐྱེམས་ཆང་དང་ ཚོགས་རྫས་ཚུ་འབག་སྟེ་ དྲོ་པ་རི་བོ་བསང་མཆོད་ལས་འགོ་བཙུགས་ གཡུས་ཚན་དེ་ནངགི་སྐྱེས་ ལྷ་ཡུལ་ལྷ་ཚུ་ལུ་ གསོལ་མཆོད་ཚུ་ཕུལ་སྲོལ་ཡོད་ ཟེར་ཨིན་པས། དེ་སྦེ་ གསོལ་མཆོད་ཕུལ་དགོ་མི་དེ་ཡང་ གཡུས་ཚན་དེ་ནང་ལུ་ ལོ་ གཅིག་གི་རིང་ མི་དང་སེམས་ཅན་ཚུ་ལུ་ ནད་ཡམས་ཚུ་ག་ནི་ཡང་ མ་ བྱུང་པར་ ལོ་ཐོག་ཚུ་ལུ་དགོ་པའི་ ཆར་ཆུ་དུས་སུ་བབས། ལོ་ཕྱུགས་ རྟག་ཏུ་ལེགས་ནིའི་དོན་ལུ་དང་། ལྷག་པར་དུ་ བཙན་གསོལ་དེ་ འབད་ ཚར་ཞིནམ་ལས་ གཡུས་ཚན་དེ་ནང་ལས་ མི་ཕུད་རྡོག་གཅིག་ཡང་ རི་ ཁར་འགྱོ་མི་ཆོག་ ཟེར་བཤདཔ་ཨིན་པས། དེ་ཡང་ གཙོ་བོ་དུས་ཚོད་
རབ་གསལ་མེ་ལོང་། 97 དེམ་ཅིག་ཁ་ལུ་ གཡུས་ཚན་དེ་ནང་ ལོ་ཐོག་ཚུ་རྒྱས་པའི་བསྒང་འབདཝ་ ལས་ རླུང་འཚུབས་ཀྱིས་ལོ་ཐོག་མེདཔ་གཏང་ནིའི་ ཉེན་ཁག་སྦོམ་ཡོད་ མི་ལུ་བརྟེན་ཏེ་ཨིན་པས། ༦.༡༤ རོ་ལམ་གཡུས་ཚན་ནང་ཡོད་པའི་ གྲུབ་ཆུ་སྒང་གནས་ཀྱི་སྐོར། ཨོ་རྒྱན་ཆོས་གླིང་ལྷ་ཁང་ལས་ གཡས་ཁ་ཐུག་ དུས་ཡུན་སྐར་མ་༢༥ ལྷགཔ་ཅིག་འགྱོཝ་ད་ ལུང་གཤོང་གཉིས་ཀྱི་སྦུག་ལུ་ གྲུབ་ཆུ་སྒང་ ཟེར་ མི་གནས་ཅིག་ཡང་ མཇལ་ནི་འདུག། སློབ་དཔོན་གྲུབ་པ་གིས་བཤད་མི་དང་འཁྲིལ་བ་ཅིན་ གནས་དེ་ མོན་རྟ་ དབང་༼ཨ་རུ་ནཱ་ཅཱལ་པར་དཱཤ༽ ལུ་ཡོད་པའི་ རྡོ་རྗེ་ཕག་མོའི་གནས་ བྷ་ག་བྱང་གཏང་ ཟེར་མི་གི་མཇུག་ཨིན་ ཟེར་བཤདཔ་ཨིན་པས། ཧེ་མ་ འབད་བ་ཅིན་ གནས་དེ་ཁ་ལས་ ཨ་ལོ་གི་དངོས་གྲུབ་ཞུ་ནི་ཡོད་ཁུངས་ དང་། དེ་ལས་དངོས་གྲུབ་ཐོབ་མི་ ཨ་ལོ་ཚུ་གི་མིང་ཡང་ གནས་དེ་ ལས་རྟ་དྲང་སྟེ་ གྲུབ་པ། གྲུབ་ཆུ་ ཟེར་བཏགས་ནི་ཡོད་ ཟེར་བཤདཔ་ ཨིན་པས།
རབ་གསལ་མེ་ལོང་། 98 ༦.༡༥ ཨ་བརྒྱ་བླམ་ཤར་ཅུང་གི་བཞུགས་གནས་སྣག་ཚང་གི་སྐོར། ད་རུང་ ཨོ་རྒྱན་ཆོས་གླིང་ལྷ་ཁང་ལས་ ཁ་མར་ལྟ་སྟེ་ དུས་ཡུན་སྐར་མ་ ༡༥ དེ་ཅིག་འགྱོཝ་ད་ ཧེ་མ་དེ་ཁར་སྣག་ཚང་སྡོད་སྡོདཔ་ཨིན་ ཟེར་བའི་ རྩིག་ཤུལ་ཅིག་ མཐོང་ཚུགས་པས། དེ་མ་ཚད་ རྩིག་ཤུལ་དེ་ནང་ལས་ རྐ་ ག་ཏེ་ཡང་མེད་པའི་ ཆུ་ཅིག་ཡང་ འཐོན་ནི་འདུག། སློབ་དཔོན་གྲུབ་པ་ཀྱིས་བཤད་མི་ ངག་རྒྱུན་ལྟར་དུ་འབད་བ་ཅིན་ རྩིག་ ཤུལ་དེ་ ཧེ་མ་ཨ་བརྒྱ་བླ་མ་ཤར་ཅུང་མཆོག་ རོ་ལམ་ལུ་ གདན་ས་ བཅགས་ཏེ་ བཞུགས་པའི་སྐབས་ཀྱི་ཤུལ་ཨིན་ཟེར་ བཤད་ནི་ཡོད་རུང་ ཨ་བརྒྱ་བླ་མ་ཤར་ཅུང་མཆོག་གི་ཕྱག་བྲིས།
རབ་གསལ་མེ་ལོང་། 99 ཁ་གསལ་སྦེ་ཤེས་མི་ཚུགས་པས། ཨིན་རུང་ ཨ་རིང་དེ་ནང་ རྡོ་ལེབ་ ཅིག་གུ་ ཨ་བརྒྱ་བླམ་གིས་ཕྱག་གིས་བརྐོ་གནང་བའི་ མ་ཎི་ཡ་མཚན་ཆེ་ ཏོག་ཏོ་སྦེ་ མཇལ་ནི་འདུག། ༦.༡༦ རིག་འཛིན་སྟན་པང་ཚོགས་ཁང་གི་ལོ་རྒྱུས། ས་གནས་ རིག་འཛིན་སྟན་པང་ལུ་ཡོད་པའི་ ཡོངས་གྲགས་ལུ་ རིག་ འཛིན་བསྟན་སྤང་ཚོགས་ཁང་ ཟེར་ཞུ་མི་ལྷ་ཁང་དེ་ སྤྱི་ལོ་༡༩༨༦ ལོར་ རིག་འཛིན་སྟན་པང་ཚོགས་ཁང་།
རབ་གསལ་མེ་ལོང་། 100 ཁྲག་སྒོམ་དང་། བམ་ལྕང་། སྟོང་ཀ་ན་དང་། རིག་འཛིན་སྟན་པང་ ཟེར་ མི་ཚོགས་ཁག་གསུམ་གྱིས་ མི་སེར་ཚུ་གིས་ ཚོགས་བསག་སྒྲིབ་བྱང་ འབད་སའི་རྟེན་སྦེ་ བཞེངས་ཡོད་ལུགས་བཤད་ནི་འདུག། ༦.༡༧ རྟེན་གསུམ་གྱི་སྐོར། ལྷ་ཁང་དེ་ནང་ ནང་རྟེན་གཙོ་བོ་ སངས་རྒྱས་དཀོན་མཆོག་གི་ཚབ་ ཆོས་ ལོངས་སྤྲུལ་གསུམ། ཆོས་སྐུ་སངས་རྒྱས་ཤཱཀྱ་ཐུབ་པའི་སྐུ་འདྲ་དང་། ལོངས་སྐུ་སྤྱན་རས་གཟིགས་ཀྱི་སྐུ་འདྲ། དེ་ལས་ སྤྲུལ་སྐུ་པདྨ་འབྱུང་ གནས་ཀྱི་སྐུ་འདྲ་ཚུ་མཇལ་ནི་ཡོདཔ་མ་ཚད་ དཔལ་ལྡན་འབྲུག་པའི་ རྒྱལ་ཁབ་འདི་ནང་གི་ སྐྱབས་མགོན་བླ་ན་མེད་པའི་ ཞབས་དྲུང་ངག་ དབང་རྣམ་རྒྱལ་གྱི་སྐུ་འདྲ་དང་། བར་དོ་ཐོས་གྲོལ་གྱི་ལྡེབས་རིས་ཚུ་ ཡང་ མཇལ་ནི་འདུག། དེ་བཟུམ་སྦེ་ ཆོས་དཀོན་མཆོག་གི་ཚབ་ལུ་ བཀའ་འགྱུར་དང་། འབུམ་པོ་ཏི་བཅུ་གཉིས། ཉི་ཁྲི། བརྒྱད་སྟོང་དང་བཅས་ བཞུགས་སུ་གསོལ་ཡོདཔ་ཨིན་པས།
རབ་གསལ་མེ་ལོང་། 101 ༦.༡༨ དུས་མཆོད་འབུམ་སྡེའི་སྐོར། ད་རེས་ནངས་པ་ ལྷ་ཁང་དེ་ནང་ གཡུས་ཚན་དེ་ནང་གི་མི་སེར་ཚུ་གིས་ ལུས་ངག་ཡིད་གསུམ་གྱི་ལས་སྒྲིབ་ཚུ་ འདག་ནིའི་དོན་ལུ་ རང་ཟླ་བཞི་ པའི་ནང་ ཆོས་འབུམ་དག་ཚར་དང་། རང་ཟླ་དགུ་པའི་ནང་ ལྷ་བབས་ དུས་ཆེན། དེ་ལས་ཟླ་རིམ་བཞིན་གྱི་ཚེས་བཅུ་ཐམ་ལུ་ ཨོ་རྒྱན་གུ་རུ་རིན་ པོ་ཆེ་ལུ་ ཚོགས་མཆོད་ཚུ་ཕུལ་ཏེ་ ཚོགས་བསགས་སྒྲིབ་བྱང་གི་བྱ་བ་ལུ་ བརྩོན་བཞིན་འདུག། ༦.༡༩ ལྷ་ཁང་གི་བདག་དབང་། ལྷ་ཁང་དེ་ ནང་སྲིད་དང་སྲོལ་འཛིན་ལྷན་ཁག་ སྲོལ་འཛིན་ལས་ཁུངས་ ཀྱིས་པར་སྐྲུན་འབད་ཡོད་མི་ འབྲུག་གི་རྫོང་གཞིས་དང་ལྷ་ཁང་དགོན་ སྡེའི་ཐོ་ཡིག་ཟེར་མི་ དཔེ་དེབ་དང་འཁྲིལ་བ་ཅིན་ ལྷ་ཁང་དེ་གི་བདག་ དབང་ཧྲིལ་བུམ་ དམངས་ལུ་ཡོདཔ་སྦེ་ ཐོ་བཀོད་འབད་དེ་འདུག།
རབ་གསལ་མེ་ལོང་། 102 ཟུར་སྦྲགས། ༄༅། །ནམ་ཐིག་དང་། རོ་ལམ་གཡུས་ཚན་གཉིས་ཀྱི་ཡུལ་ལྷའི་གནས་ པོ་བསྐོར་ཕུ་པའི་གསོལ་ཁ་རྒྱས་པ་བཞུགས། སྤྱན་འདྲེན་ནི། ཀྱཻ༑ ཕུན་ཚོགས་ ལྷ་ཡི་འབྱོར་པས་བརྒྱན་པའི་ཡུལ། །བཀྲ་ཤིས་མཛེས་པའི་ནགས་ཚལ་ བསྐོར་བའི་ཞིང་། །ཆུ་འཛིན་ཁུག་རྣའི་འདྲ་བས་བརྒྱན་པའི་གནས། །རང་ བཞིན་ལྷུན་ཆགས་ལྗོན་ཤིང་རྭ་བས་བསྐོར། །ལྷོ་མོན་མཚམས་ཀྱི་བཙན་ གོད་བསྐོར་ཕུ་པ། །འཁོར་བཅས་མ་ལུས་མཆོད་པའི་གནས་འདིར་ འབྱོན། །རང་རྩལ་འགག་མེད་སྤྲུལ་བསྒྱུར་བསམ་ཡས་ཀྱིས། །སངས་ རྒྱས་བསྟན་པ་སྡེ་འཛིན་བསྲུང་པའི་ཕྱིར། །རླུང་ལྟར་མགྱོགས་པའི་རྫུ་ འཕྲུལ་བསྟན་ནས་སུ། །འཁོར་བཅས་མཐུན་རྫས་ཚོགས་སར་གཤེགས་ སུ་གསོལ། །བཛྲ་ས་མ་ཡ་ཛ༔ ཀྱཻ། སྔོན་ཚེ་ཨོ་རྒྱན་པདྨའི་སྤྱན་སྔ་རུ།། ཇི་ལྟར་ཁས་བླངས་དམ་བཅས་ཇི་བཞིན་དུ། །སྒྲུབ་པའི་རྗེས་འཇུག་རྣལ་ འབྱོར་བདག་ཅག་གིས། །རང་གསལ་དོན་གྱི་སེམས་ལ་ངོ་སྤྲོད་པས།། གཉན་པོ་དམ་ཚིག་ཅན་གྱི་མདུན་བདར་ནས། །བསམ་སྦྱོར་གདུག་ རྩུབ་ངན་པ་ཞི་ནས་ཀྱང་། །ནག་ཕྱོགས་བཏུལ་ནས་དཀར་ཕྱོགས་སྐྱོང་ བ་ཡིས། །འཕྲིན་ལས་གཉན་པོ་ཁྱེད་ཀྱིས་འགྲུབ་པར་མཛོད།། མཆོད་
རབ་གསལ་མེ་ལོང་། 103 པ། ཨོཾ་སྭ་བྷཱས་སྦྱངས། མཆོད་རྫས་རྣམས་མི་དམིགས་ཏེ་སྟོང་པ་ཉིད་དུ་ གྱུར། སྟོང་པའི་ངང་ལས། ཀྱཻ༑ དཀར་དམར་འཛུམ་གྱི་མེ་ཏོག་ལྡིང་ཁང་ དབུས། །དྲི་བཟང་གུར་ཀུམ་ཛ་ཏི་སྦྱར་བ་ཡིས། །ལང་ཚོའི་གཟི་བར་འདོད་ པའི་ལྷ་མོ་མཆོད། །ཁྲུས་ཆབ་གསེར་གྱི་བུམ་བཟང་བཏུད་ནས་སུ། །རོ་ བཅུད་འབྱོར་པ་རྒྱ་མཚོའི་མདུན་བདར་ནས། །གླུ་གར་རོལ་མོའི་རྩེ་བ་སྣ་ ཚོགས་འབུལ། །གཞན་ཡང་ལྷ་རྫས་མཆོད་པ་མ་ལུས་པ། །མི་ཟད་ནམ་ མཁའི་མཛོད་དུ་འབུལ་གྱིས་བཞེས།། གཏོར་བསྔོ་ནི། སྭ་བྷཱ་ཝས་སྦྱངས། གཏོར་ རྫས་རྣམས་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་ཨོཾ་ ལས་བྱུང་བའི་གཏོར་སྣོད་རིན་པོ་ཆེ་སྣོད་ཡངས་ཤིང་རྒྱ་ཆེ་བའི་ནང་དུ།། ཨོཾ་ཨཱཿཧཱུྃ་ཧྲཱི༔ འོད་དུ་ཞུ་བ་ལས་གཏོར་མ་ཟག་པ་མེད་པའི་ཡེ་ཤེས་ཀྱི་ བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱི། ལན་གསུམ། དེ་བཞིན་ གཤེགས་པའི་མཚན་བརྗོད། སམྦྷ་ར་བརྗོད། ཨོཾཨཱ་ཀ་རོ་བརྗོད། མཆོད་སྦྱིན་གྱི་གཏོར་ མ་འདོད་པའི་ལོན་ཏན་ལྔ་དང་ལྡན་པ་དེ་ཉིད། བཙན་རྒོད་ཆེན་པོ་བསྐོར་ ཕུ་པ་འཁོར་མཐའ་ཡས་རྒྱ་མཚོའི་ཚོགས་དང་བཅས་པ། སྔོན་ཚེ་ཨོ་ རྒྱན་ཆེན་པོའི་བཀའ་དང་དམ་ལས་མ་འདའ་བར། སྤྱིར་སངས་རྒྱས་ཀྱི་ བསྟན་པ་སྲུངས། དཀོན་མཆོག་གི་དབུ་འཕངས་བསྟོད། དགེ་འདུན་གྱི་
རབ་གསལ་མེ་ལོང་། 104 སྡེ་སྐྱོངས། སྐྱེས་ཆེན་དམ་པ་རྣམས་ཀྱི་སྐུ་ཚེ་སྲིངས། ཁྱད་པར་དུ་རྣལ་ འབྱོར་པ་བདག་ཅག་དཔོན་སློབ་སྦྱིན་བདག་མི་ནོར་འཁོར་དང་བཅས་ པ། ཉིན་གྱི་བྱ་ར་དང་། མཚན་གྱི་མེལ་ཚེ་མཛོད། ས་ཕྱོགས་ཡུལ་ཕྱོགས་ འདི་ཉིད་ན་གནས་པ་སྒང་བཙན་ས་བདག་སྙན་མོ་ཀླུ་སྲིན་མཚོ་སྨན་མ་ སང་འཁོར་དང་བཅས་པ་རྣམས་ལ་འབུལ་ལོ། །གཞན་ཡང་ཕུ་མདའ་ བར་གསུམ་ན་གནས་པའི་གཞི་བདག་མཐུ་བོ་ཆེ་རྣམས་ཀྱིས་རྟག་ཏུ་བྱ་ ར་མཛད་ནས། ཕ་རོལ་མི་མཐུན་པའི་གདོན་བགེགས་འཁྲུགས་རྩོད་དགྲ་ ཇག་ཆོམ་རྐུན་བར་དུ་གཅོད་པ་ཐམས་ཅད་བསྲུང་བ་དང་། ཞི་བའི་ཕྲིན་
བསྟོད་པ་ནི། ཀྱཻ༑ སྟོབས་ལྡན་དྲེགས་པའི་བཙན་རྒོད་ཆེ། །རིག་འཛིན་སྲུང་མ་མཐུ་རྩལ་ ཅན། །གཞན་གྱིས་མི་ཐུབ་དགྲ་ལྷའི་རྒྱལ། །མཐུ་སྟོབས་རྒྱ་མཚོ་རྣམས་ ལ་བསྟོད། །སྐུ་མདོག་དཀར་དམར་འཛུམ་བག་ཅན། །སྲ་མཁྲེགས་གོ་ ཁྲབ་སྐུ་ལ་གསོལ། །ཕྱག་གཡས་རལ་གྲི་ཕྲག་པར་བཀལ། །གཡོན་ པ་མདུང་དམར་རྒྱལ་མཚན་བསྣམས། །མཛེས་པའི་རྒྱན་གྱི་ན་བཟའ་ གསོལ། །མྱུར་ལ་མགྱོགས་པའི་རྟ་དཀར་ཆིབས། །གསེར་དང་གཡུ་རྒྱན་ སྨན་མོ་འཕྲུལ། །སྐུ་མདོག་ཕྱག་མཚན་མ་ངེས་པར། །ལྷ་བཙན་ཀླུ་བཙན་
ལས་དང་སྟོངས་གྲོགས་རྒྱ་ཆེན་པོར་མཛད་དུ་གསོལ།།
རབ་གསལ་མེ་ལོང་། 105 བདུད་བཙན་དང་། །སྨན་བཙན་ལ་བཙན་ལ་སོགས་པར། །བསྟོད་དོ་རྣལ་ འབྱོར་བདག་ཅག་གིས། །བཅོལ་བའི་འཕྲིན་ལས་འགྲུབ་པར་མཛོད།། བསྐང་བ་ནི། ཀྱཻ༑ བཙན་རྒོདཆེན་པོ་ཐུགས་དང་རྫུ་འཕྲུལ་ཅན། །ཐུགས་དམ་ བསྐང་ངོ་འཕྲིན་ལས་བཅོལ་བ་ནི། །གནོད་བྱེད་དགྲ་བགེགས་བསྒྲལ་བའི་ ཤ་ཁྲག་རུས། །དབང་པོ་མེ་ཏོག་གསུར་ཆེན་བདུག་པའི་སྤོས། །སྙིང་སྣའི་ ཞལ་ཟས་རྐང་གླིང་རོལ་མོའི་སྒྲ། །འབྱོར་པ་རྒྱ་མཚོའི་ཚོགས་གླུས་ཐུགས་ དམ་བསྐང་། །བདུདརྩི་ལྔ་དང་ཤ་ལྔའི་རིགས་བྱེད་ཀྱི། །སོ་སོའི་ཐུགས་ ལ་ཅི་སྨིན་འབྲས་བུ་ཞིང་། །ཐོགས་མེད་རྫུ་འཕྲུལ་ཤུགས་ལྡན་རྟམཆོག་ དང་། །ཚོགས་ཀྱི་མཆོད་པ་ཆེན་པོས་ཐུགས་དམ་བསྐང་། །དེ་ལྟར་བསྐང་ བའི་ཡུལ་ཁམས་འདི་ཉིད་ཀྱི། །མི་མཐུན་ཕྱོགས་རྣམས་རྐྱེན་ངན་ཞི་བ་ དང༌། །ཆོས་མཐུན་ལོངས་སྤྱོད་དཔལ་འབྱོར་རྒྱས་པ་དང་། །ཅི་བསམ་དོན་ རྣམས་མྱུར་དུ་འགྲུབ་པར་མཛོད། །དགེའོ།། །།
རབ་གསལ་མེ་ལོང་། 107 ༼བདུན་པ། ཁྲག་སྒོམ་གཡུས་ཚན་ནང་ཡོད་པའི་༽ གནས་དགོན། ༧.༡ ཁྲག་སྒོམ་གཡུས་ཚན་གྱི་སྐོར། ཁྲག་སྒོམ་གཡུས་ཚན་གྱི་ སའི་ཆགས་ཚུལ་དེ་ སྤོ་ཏོག་ཅིག་གུ་ ཐང་ ཉམས་དགའ་ཏོག་ཏོ་ཅིག་ནང་ ཆགས་ཏེ་འདུག། རྒེད་འོག་བདག་སྐྱོང་ ཡིག་ཚང་ནང་ཡོད་པའི་ མི་རློབས་དང་ཁྱིམ་གྱི་གྲངས་རྩིས་ ༢༠༡༩ ཅན་ ཁྲག་སྒོམ་གཡུས་ཚན་གྱི་མཐོང་སྣང་།
རབ་གསལ་མེ་ལོང་། 108 མ་དང་འཁྲིལ་བ་ཅིན་ གཡུས་ཚན་དེ་ནང་ལུ་ ཁྱིམ་གུང་པ་༤༣ དང་། མི་ རློབས་༤༡༩ ལྷགཔ་ཅིག་ཡོད་ཁུངས་ ཐོ་བཀོད་འབད་དེ་འདུག། ༧.༢ ཁྲག་སྒོམ་གཡུས་ཚན་གྱི་མིང་གནས་སྐོར། ངག་རྒྱུན་གྱི་ལོ་རྒྱུས་དང་འཁྲིལ་བ་ཅིན་ ས་གནས་འདི་གི་མིང་ལུ་ ཁྲག་ སྒོམ་ཟེར་ སླབ་སྲོལ་གཅིག་དང་། ཕྲ་སྒོམ་ ཟེར་སླབ་སྲོལ་གཉིས་འདུག། དེ་ཡང་ ཁྲག་སྒོམ་ ཟེར་སླབ་སྲོལ་ཡོད་མི་ ར་ཁུངས་དེ། ཧེ་མ་རིག་འཛིན་ དང་བྷོ་དྷི་ཟེར་མི་གཉིས་ མ་འགྲིགས་པར་ རང་སོའི་ཕྱོགས་བཟུང་སྟེ་ དམག་རྐྱབ་པའི་སྐབས་ ས་གནས་དེ་ཁར་ རྨ་བཏོན་ཁྲག་བཏོན་འབྱུང་ ཡོད་ནི་འདི་གིས་ ཁྲག་སྒོམ་ཟེར་ བཏགས་ཡོད་པའི་ ལོ་རྒྱུས་དང་། ལོ་རྒྱུས་གཞན་ཅིག་ལས་འབད་བ་ ཅིན་ སྤོ་ཏོག་དེ་ཁ་ལུ་ ཆུ་ཨོམ་ཏོ་ ཆུང་ཀུ་ཅིག་ཡོད་མི་ལས་བརྟེན་ཏེ་ ཕྲ་སྒོམ་ཟེར་བཏགས་ཡོད་པའི་ ལོ་ རྒྱུས་བཤད་ནི་འདུག། ཁྲག་སྒོམ། ཕྲ་སྒོམ།
རབ་གསལ་མེ་ལོང་། 109 ཨིན་རུང་ སྤྱི་ལོ་ ༢༠༡༩ ལོར་ རྫོང་ཁ་གོང་འཕེལ་ལྷན་ཚོགས་ཀྱིས་ རྩོམ་སྒྲིག་དང་ པར་སྐྲུན་འབད་ཡོད་པའི་ མིང་གནས་གསལ་བའི་འོད་ ཟེར་ནང་ལུ་འབད་བ་ཅིན་ ཁྲག་སྒོམ་ ཟེར་ཐོ་བཀོད་འབད་དེ་འདུག། ༧.༣ ཁྲག་སྒོམ་གཡུས་ཚན་ནང་ཡོད་པའི་ རྡོ་ཟམ་གྱི་ལོ་རྒྱུས། རྒེད་འོག་ལྟེ་བ་ལས་ རྐང་ཐང་སྦེ་ དུས་ཡུན་ཆུ་ཚོད་ཅིག་དང་ཕྱེད་ལྷགཔ་ ཅིག་ ཁ་ཡར་བལྟ་སྟེ་འགྱོཝ་ད་ གཤོང་གཏིང་ཟབ་དྲགས་ འདྲོག་སི་སི་ ཡོད་པའི་ས་གནས་ཅིག་ལུ་ ལྷོདཔ་ཨིན་པས། རྒྱ་མཚོའི་ཁ་ལས་ མཐོ་ ཚད་མི་ཊར་ ༢༡༣༣ དེ་ཅིག་གི་ས་ཁར་ ལྕགས་ཀྱུ་ཟམ་པ་ཟེར་བའི་ རྡོ་ རྡོ་རང་བྱུང་གི་ཟམ་པ།
རབ་གསལ་མེ་ལོང་། 110 རང་བྱུང་གི་ཟམ་པ་ ཡ་མཚན་ཆེ་ཏོག་ཏོ་ཅིག་འདུག། ལོ་རྒྱུས་དང་འཁྲིལ་ བ་ཅིན་ རྡོ་ཟམ་དེ་ ཕར་དང་ཚུར་ རིང་ཚད་ཕིཊ་ ༦༢ དང༌། སྟུག་ཚད་ཕིཊ་ ༨ གཏིང་ཚད་ཕིཊ་ ༦༣ དེ་ཅིག་ཡོད་པའི་ ལོ་རྒྱུས་བཤད་ནི་འདུག། ༧.༤ ཁྲག་སྒོམ་གཡུས་ཚན་ནང་ཡོད་པའི་ རྡོའི་ཀ་ཆེན་གྱི་ལོ་རྒྱུས། རྡོ་རང་བྱུང་གི་ཟམ་པ་ལས་ ཁ་ཡར་བལྟ་སྟེ་ རྐང་ཐང་འབད་ དུས་ཡུན་ ཆུ་ཚོད་༡ དེ་ཅིག་འགྱོཝ་ ད་ རི་མགོར་ ཕོ་གཙང་མོ་ གཙང་གི་མཚོ་གཉིས་ཡོད་ ས་ལས་ མཚོ་ཕོ་ཆགས་ཏེ་ ཡོད་སའི་འོག་ལུ་ ཕོ་གཙང་ དགོན་པ་ཟེར་མི་ ལྷ་ཁང་ ཅིག་ཡོད་ཟེར་ཨིན་པས། ལྷ་ཁང་དེ་ ནམ་བཞེངས་ཡི་ ག་ ཁ་གསལ་བཤད་མི་ རྡོའི་ཀ་ཆེན།
རབ་གསལ་མེ་ལོང་། 111 མེད་རུང་། ལོ་རྒྱུས་དང་འཁྲིལ་བ་ཅིན་ མོན་རྟ་ཝང་གིས་ མི་ངོམ་གཅིག་ གིས་བཞེངས་སྦེ་ མེས་མེས་བོ་དྷི་ཟེར་མི་ལུ་ བརྩིས་སྤྲོད་བཞག་པའི་ ལོ་རྒྱུས་འདུག། ཨིན་རུང་ ད་རེས་ནངས་པ་ ལྷ་ཁང་དེ་ཉམས་ཆག་ཤོར་ ཏེ་ གྱང་ཁོག་ཅིག་ལུ་གྱུར་ཡོད་མི་འདི་ནང་ རྡོའི་ཀ་ཆེན་གཉིས་འདུག། ༧.༥ ཁྲག་སྒོམ་གཡུས་ཚན་ནང་ཡོད་པའི་ གྲུབ་ཕུག་ཡ་མཚན་ཅན་གྱི་སྐོར། ཁྲག་སྒོམ་རྒེད་འོག་ལྟེ་བ་ལས་ཡར་ རྐང་ཐང་སྦེ་ དུས་ཡུན་ཆུ་ཚོད་ཕྱེད་ ལྷགཔ་ཅིག་འགྱོཝ་ད་ རྒྱ་མཚོའི་ཁ་ལས་མཐོ་ཚད་མི་ཊར་༣༡༦༨ ཀྱི་ ས་ཁར་ གསང་ས་མཁར་ཟེར་བའི་ རྡོ་ཕུ་ཅིག་གི་འོག་ལུ་ གྲུབ་ཕུག་ཅིག་ མཇལ་ནི་འདུག། དེ་ནང་ལུ་ བླམ་འདི་དང་འདི་ སྒྲུབ་པ་གནང་སྟེ་བཞུགས་པའི་ ལོ་རྒྱུས་ བཤད་ནི་མེད་རུང་། དེ་ཁར་ ཚེས་བཟང་དུས་བཟང་གི་སྐབས་ལུ་ མཇལ་ བར་འགྱོ་མི་ མི་ཚུ་གིས་བཤད་དོ་བཟུམ་འབད་བ་ཅིན་ སྒྲུབ་ཕུག་འདི་ནང་ ལས་ བདུད་རྩི་འབབ་ནི་ཡོད་ཟེར་སླབ་ཨིན་པས།
རབ་གསལ་མེ་ལོང་། 112 ༧.༦ ཁྲག་སྒོམ་གཡུས་ཚན་ནང་ཡོད་པའི་ བླ་མའི་ལྷ་ཁང་གི་སྐོར། ཡ་ལང་རྒེད་འོག་ལྟེ་བ་ལུ་འགྱོ་སའི་ སྣུམ་འཁོར་ལམ་གྱི་ལྟག་ལུ་ མཐོང་ གསལ་ཆེ་བའི་སྤོ་ཏོག་ཅིག་གུ་ ལྷ་ཁང་ཅིག་འདུག། ཡོངས་གྲགས་ ལུ་ རམ་སྦྱར་བླ་མ་ཟེར་མི་ བཀྲ་ཤིས་སྒང་རྫོང་ནང་གི་དབུ་མཛད་གོ་དང་ པ་མཛད་མི་ དབུ་མཛད་བགྲེས་པ་བླ་མ་བསྟན་འཛིན་ཀུན་ལེགས་ཀྱིས་ མཚམས་ཁང་ཅིག་རྐྱབ་སྟེ་ ཁོ་ར་མཚམས་སྒྲུབ་གནང་ བཞུགས་ཡོད་ ལུགས་བཤདཔ་ཨིན་པས། བླམ་ཞིང་ལུ་བྱོན་པའི་ཤུལ་ལས་ བསོད་ ནམས་ཟེར་མི་གིས་ བླམ་གི་རྗེས་དྲན་གྱི་རྟེན་སྦེ་ ལྷ་ཁང་འདི་བཞེངས་ ཡོད་ལུགས་བཤད་ནི་འདུག། ཟུར་སྦྲགས། ༄༅། །ཁྲག་སྒོམ་གཡུས་ཚན་གྱི་སྐྱེས་ལྷའི་གསོལ་མཆོད་བཞུགས། ཀྱཻ༑ རྩ་གསུམ་རིག་འཛིན་རྒྱ་མཚོ་དང་། །མཆོད་ཡུལ་གོང་མ་ཐམས་ཅད་ཀྱི།། བྱིན་རླབས་འདོད་རྒུའི་སྤྲིན་འཁྲིགས་ནས། །དངོས་གྲུབ་ལེགས་ཚོགས་ ཆར་དུ་བསྙིལ། །ཆོས་དབྱིངས་སྒྱུ་མའི་རོལ་རྩལ་ལས། །འགགས་མེད་ འཆར་བ་སྒྱུ་མའི་སྐུ། །འཇིག་ཉེ་ན་དྲེགས་པའི་ཚུལ་འཆང་བ། །སྐྱེས་བུ་ཀླུ་
རབ་གསལ་མེ་ལོང་། 113 བཙན་གནས་འདིར་གཤེགས། །ཡུལ་ཅིག་དགེ་བཅུ་ཚང་བ་ཡི། །འདོད་ རྒུའི་ཡུལ་ནི་ཁྲག་སྒོམ་ཡུལ། །ཕྱོགས་བཞིར་དཔལ་འབྱོར་འདུ་བའི་ས།། དེ་འདྲའི་གནས་མཆོག་ཉམས་རེ་དགའ། །ཕུ་བཙན་མེད་པའི་གསེར་ཕུ་ བཞུགས། །མདའ་ན་གནས་མཆོག་ཁྱད་འཕགས་ཀྱི། །གཏེར་བདག་ གནས་སྲུང་མ་ལུས་བཞུགས། །བར་ན་སྐྱེས་བུ་ཀླུ་བཙན་ཁྱོད། །སྐུ་མདོག་ དཀར་ལ་འོད་ཟེར་འཕྲོ། །ཕྱག་གཡས་མདུང་དམར་བ་དན་ཐོག །དབུ་ ལ་དར་ཐོད་དཀར་པོ་བཅིངས། །སྐུ་ལ་རིན་ཆེན་རྒྱན་གྱིས་བརྒྱན། །རང་ འདྲའི་འཁོར་ཚོགས་མང་པོས་བསྐོར། །འདི་རིང་གནས་འདིར་གཤེགས་ སུ་གསོལ། །དམ་ཚིག་ལྡན་པའི་རྣལ་འབྱོར་གྱིས། །དངོས་བཤམས་ཡིད་ ཀྱི་སྤྲུལ་པ་ལས། །བྱུང་བའི་མཆོད་སྤྲིན་རྒྱ་མཚོའི་ཚོགས། །མ་ཚང་མེད་ པ་འབུལ་ལགས་ན། །བཞེས་ནས་རྒྱལ་བའི་བསྟན་པ་སྲུངས། །ཁྱད་པར་ བདག་ཅག་ཡོན་མཆོད་ལ། །དངོས་དང་བརྒྱུད་ནས་གནོད་སེམས་འཆང་།། སྡང་དགྲ་གནོད་བྱེད་མ་ལུས་པ། །མིང་ཙམ་ཐལ་བའི་རྡུལ་དུ་རློག། ཡངས་པའི་རྒྱལ་ཁམས་འདིས་མཚོན་པའི། །འཇིག་རྟེན་ཁམས་སུ་ཆར་ ཆུ་དང་། །ལོ་ཕྱུགས་ལེགས་ཤིང་མི་ནད་ཞི། །འཐབ་རྩོད་འཁྲུག་ལོང་མེད་ པར་མཛོད། །ཁྱད་པར་དམ་ཆོས་སྒྲུབ་པ་པོ། །འཕྲིན་ལས་གྲོགས་ལྡན་མི་
རབ་གསལ་མེ་ལོང་། 114 གཡེལ་བར། །མཆོག་ཐུན་དངོས་གྲུབ་དེ་བླག་ཏུ། །མྱུར་དུ་གྲུབ་པའི་མཐུ་ སྐྱེད་ཅིང་། །བཅོལ་བའི་ཕྲིན་ལས་འགྲུབ་པར་མཛོད།།
རབ་གསལ་མེ་ལོང་། 130 ཞིབ་འཚོལ་གྱི་ཁུངས་གཏུགས་ཡིག་ཆ། ༡༽ སྡེ་སྲིད་ཁྲི་རབསས་༡༣ པ་ ཆོས་རྗེ་ཤེས་རབ་དབང་ཕྱུག་གི་ དགེ་བའི་ཆོ་ག་རབ་ཏུ་གསལ་བའི་གཏམ་མུ་ཏིག་དོ་ཤལ། དཔལ་འབྲུག་ཞིབ་འཇུག་ལྟེ་བ། ཐིམ་ཕུག། ༢༽ ཀུན་མཁྱེན་འཇིགས་མེད་གླིང་པའི་རྣམ་ཐར། ཡུལ་ལྷོ་རྒྱུད་དུ་ བྱུང་བའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱི་ རྣམ་ཐར་ལེགས་བྱས་ཡོངས་འདུའི་སྙེ་མ། ༣༽ འབྲུག་གི་རྫོང་གཞིས་དང་ལྷ་ཁང་དགོན་སྡེའི་ཐོ་ཡིག། སྲོལ་འཛིན་ལས་ཁུངས། ༤༽ རྒེད་འོག་བདག་སྐྱོང་ཡིག་ཚང་ནང་ཡོད་པའི་ མི་རློབས་དང་ ཁྱིམ་གྱི་གྲངས་རྩིས་ ༢༠༡༩ ཅན་མ། ༥༽ ཟླ་ལམ་སྙན་ཞུ། དུས་མཆོད་འབུམ་སྡེའི་ཁ་གསལ། རྒེད་འོག་ བདག་སྐྱོང་ཡིག་ཚང་ནང་ལས།
རབ་གསལ་མེ་ལོང་། 131 ༦༽ གཡུས་ཚན་ཁག་གི་སྐྱེ་ལྷ་དང་ཡུལ་ལྷ་དཔེ་ཆ། ༧༽ གནས་ཡིག་ཀུན་ཕན་ལམ་སྟོན། བཀྲ་ཤིས་གཡང་རྩེ་རྫོང་ཁག་ འོག་གི། སྲོལ་འཛིན་ལས་འཁུངས། ༨༽ མིང་གནས་གསལ་བའི་འོད་ཟེར། རྫོང་ཁ་གོང་འཕེལ་ལྷན་ ཚོགས། ༩༽ མཚམས་པ་བློ་གསལ་རྒྱ་མཚོའམ་ བསོད་ནམས་རྡོ་རྗེ། བླམ་དྭགས་ཀོང་གི་མི་བརྒྱུད།
རབ་གསལ་མེ་ལོང་། 132 ངག་རྒྱུན་དྲི་བཀོད་ནང་ བཅའ་མར་གཏོགས་མི་དང་ རྒྱབ་སྣོན་གནང་མི་ ཚུ་གི་མཚན་ཐོ། ༡༽ སློབ་དཔོན་ཀུན་བཟང་ཕྲིན་ལས། ཞིབ་འཚོལ་དང་རྩོམ་སྒྲིག་ མཁས་མཆོག ༢༽ རྒཔོ་ཆོས་སྲུང་དབང་འདུས། ཡ་ལང་རྒེད་འོག། ༣༽ ཀརྨ། མེ་ལོང་མཁར་གཡུས་ཚན་ནང་གི་ཆོསཔ་རྒན་ཤོས། ༤༽ གྲུབ་པ། རོ་ལམ་གཡུས་ཚན་གྱི་གཙོ་འཛིན། ༥༽ དཀོན་མཆོག་ནོར་བུ། གནམ་ཐིག་གཡུས་ཚན་གྱི་གཙོ་འཛིན། ༦༽ ཚེ་དབང་རྡོ་རྗེ། ཡེར་འཕེལ་གཡུས་ཚན་གྱི་མི་རྒན།