Introduction of the Holy sites & Temples of Yalang Gewog, Tashi Yangtse District.
i བཀྲ་ཤིས་གཡང་རྩེ་རྫོང་ཁག་ ཡ་ལང་རྒེད་འོག་གི་གཡུས་ཚན་ཁག་ཚུ་ནང་ ཡོད་པའི་ གནས་དང་ལྷ་ཁང་ཚུ་གི་ངོ་སྤྲོད། ཞིབ་འཚོལ་དང་རྩོམ་བྲིསཿ བསྟན་འཛིན་ནོར་བུ།
རབ་གསལ་མེ་ལོང་། ❀❀❀
ii པར་ཐེངས་དང་པ། སྤྱི་ལོ་ ༢༠༢༡ ལུ། པར་དབང་© ཡ་ལང་རྒེད་འོག་བདག་སྐྱོང་ལུ་ཡོད། གྲོས་སྟོན་པ། ཆོས་སྲུང་དབང་འདུས། ཡ་ལང་རྒེད་འོག་གི་རྒཔོ། རྫོང་ཁག་ཚོགས་འདུའི་འཁྲི་འཛིན། བཀྲ་ཤིས་གཡང་རྩེ་རྫོང་ཁག། ཞིབ་འཚོལ་དང་རྩོམ་བྲིས། བསྟན་འཛིན་ནོར་བུ། མཐའ་དཔྱད་ཞུན་དག། སློབ་དཔོན་ཀུན་བཟང་ཕྲིནལས། ཀེ་ཨེམ་ཀྲི་ལས་སྡེ། བསོད་ནམས་བསྟན་འཛིན། ཀེ་ཨེམ་ཀྲི་ལས་སྡེ། བཟོ་བཀོད། བསོད་ནམས་བསྟན་འཛིན། ISBN 978-99980-970-0-1 BICMA No. 100000862
རྒྱལ་ཀུན་སྙིང་རྗེའི་རང་གཟུགས་པད་དཀར་འཆང་། །རྣམ་འཕྲུལ་ལྗོངས་འདིར་སྲིད་པ་ཉེར་བཟུང་ནས།། མངའ་འབངས་བུ་གཅིག་མ་བཞིན་བརྩེར་མཛད་པ། །མི་དབང་ཆོས་རྒྱལ་སྐུ་ཚེ་བརྟན་གྱུར་ཅིག།
ལྗོངས་འདིའི་མི་མང་བསོད་ནམས་ལས་གྲུབ་པའི། །པདྨའི་ལུང་གིས་རབ་བསྔགས་མི་ཡི་དབང་།། འཇིགས་མེད་སེངྒེ་དབང་ཕྱུག་མཚན་ཅན་མཆོག །སྐུ་ཚེ་ཡུན་བརྟན་མཛད་ཕྲིན་དཔལ་འབར་ཤོག།
དཔལ་ལྡན་འབྲུག་པའི་ཆོས་ཀྱི་རིང་ལུགས་ཆེ། །ཞིང་འདིར་ཡར་ཟླའི་མཆེད་པོར་སྤེལ་མཛད་པ།། ངག་དབང་འཇིགས་མེད་ཆོས་ཀྱི་གྲགས་པ་མཆོག །ཆོས་ཁྲིར་བརླིང་ཞིང་མཛད་བཟང་མཐར་རྒྱས་ཤོག།
ཆེད་བརྗོད། ༈ ད་ལན་ ངོམ་བསྟན་འཛིན་ནོར་བུ་གིས་ བཀྲ་ཤིས་གཡང་རྩེ་རྫོང་ཁག་ ཡ་ལང་རྒེད་ འོག་མངའ་ཁོངས་ཀྱི་གཡུས་ཚན་ཁག་ཚུ་ནང་ཡོད་པའི་ གནས་རྩ་ཅན་དང་ ལྷ་ཁང་དགོན་ སྡེའི་ལོ་རྒྱུས་ཚུ་ ཞིབ་འཚོལ་མཐིལ་ཕྱིན་འབད་དེ་ པར་རི་དང་བཅསཔ་སྦེ་ དཔེ་དེབ་པར་སྐྲུན་ འབད་མི་འདི་ལུ་ ང་ལས་ ཡིད་ཆེས་ངལ་རང་དང་བཅས་པའི་སྒོ་ལས་ བཀའ་དྲིན་ལེགས་སོའི་ གཟེངས་བསྟོད་ཡོད། དཔེ་དེབ་འདི་གིས་ རྒེད་འོག་འདི་ནང་ཡོད་པའི་ དམ་པའི་ཆོས་དང་འབྲེལ་བའི་ལོ་རྒྱུས་ཚུ་ ཁུངས་སྐྱེལ་ཚུགསཔ་མ་ཚད་ ལྷག་མི་ཚུ་གི་རྒྱུད་ལུ་ཡིད་ཆེས་དང་ དད་མོས་ལྷག་པར་འཕེལ་ ཏེ་ དགེ་བའི་བྱ་བ་ལུ་ཡང་ ལྷག་བསམ་རྣམ་དག་གི་སྒོ་ལས་ ངམ་ངམ་ཤུགས་ཀྱིས་ཞུགས་ ཚུགས་ནིའི་ ཁེ་ཕན་སྦོམ་འདུག། མཇུག་ར་ དཔེ་དེབ་ལྷག་མི་ཡོངས་ཀྱི་རྒྱུད་ལུ་ ཤེས་ཡོན་གསརཔ་ཐོབ་སྟེ་ ཇི་སྲིད་བསྐལ་པ་ མ་སྟོང་གི་བར་དུ་ རྒྱལ་ཁབ་ཀྱི་ནང་རྟེན་དེ་ཚུ་ ཡར་བསྐྱེད་དང་ཉམས་བསྲུང་འབད་ཚུགས་ནི་དང་ གཅིག་ཁར་ ང་བཅས་རའི་ འབྲུག་རྒྱལ་ཁབ་ཀྱི་གལ་ཆེ་བའི་ སྲོལ་ཁྱུན་བཟང་པོ་འདི་ལུ་ཞུགས་ ཏེ་ དམ་པའི་ཆོས་ཕྱོགས་ཀྱི་འགྲོ་དོན་རྒྱས་ནི་དང་ འབྲུག་མི་ཆ་མཉམ་ དགའ་སྐྱིད་དཔལ་ འཛོམས་ལུ་ ལོངས་སྤྱོད་ཚུགས་པའི་ སྨོན་འདེབས་ཞུ་ནི་ཨིན། ཤེས་རབ་རྒྱལ་མཚན། སྤྱི་ཚེས་ ༡༩།༣།༢༠༢༡ ལུ། ནང་སྲིད་དང་སྲོལ་འཛིན་བློན་པོ།
རབ་གསལ་མེ་ལོང་། 57 ༼བཞི་པ། ཡེར་འཕེལ་(ཡར་འཕེལ)གཡུས་ཚན་༽ ནང་ཡོད་པའི་གནས་དགོན། ༤.༡ ཡེར་འཕེལ་གཡུས་ཚན་གྱི་སྐོར། ཡེར་འཕེལ་གཡུས་ཚན་དེ་ རྒེད་འོག་ལྟེ་བ་ལས་ རྐང་ཐང་སྦེ་ དུས་ཡུན་ ཆུ་ཚོད་ ༣.༣༠ ལྷགཔ་ཅིག་ འགྲོ་འགྲུལ་འཐབ་པའི་ཤུལ་ལུ་ལྷོད་སར་ ཆགས་ཏེ་འདུག། རྒེད་འོག་བདག་སྐྱོང་ ཡིག་ཚང་ནང་ཡོད་པའི་ མི་རློབས་དང་ཁྱིམ་གྱི་ གྲངས་རྩིས་ ༢༠༡༩ ཅན་མ་དང་འཁྲིལ་བ་ ཅིན་ གཡུས་ཚན་འདི་ ནང་ལུ་ ཁྱིམ་གུང་པ་ ཡེར་འཕེལ་གཡུས་ཚན་གྱི་མཐོང་སྣང་།
རབ་གསལ་མེ་ལོང་། 58 ༥༥ དེ་ཅིག་དང་། མི་རློབས་གྲངས་ ༣༨༩ ལྷགཔ་ཅིག་ ཐོ་བཀོད་འབད་ དེ་འདུག། ༤.༢ ཡེར་འཕེལ་གཡུས་ཚན་གྱི་མིང་གནས་སྐོར། དཔལ་འབྲུག་ཞིབ་འཇུག་ལྟེ་བ་གིས་ པར་སྐྲུན་འབད་ཡོད་མི་ རྗེ་ ཡོནཏན་མཐའ་ཡས་དང་། རྗེ་ཀུན་དགའ་རྒྱ་མཚོ་གཉིས་ཀྱིས་མཛད་ པའི་ འབྲུག་གི་སྡེ་སྲིད་ཁྲི་རབས་༡༣ པ་ཆོས་རྗེ་ཤེས་རབ་དབང་ཕྱུག་ ༼༡༦༩༧_༡༧༦༥༽ གི་དགེ་བའི་ཆོ་ག་རབ་ཏུ་གསལ་བའི་གཏམ་ མུ་ཏིག་དོ་ཤལ་ ཟེར་མི་ནང༌ལུ་འབད་བ་ཅིན་ གཡུས་ཚན་དེ་གི་མིང་ ཡས་འཕེལ་དགོན་པ་ ཟེར་ཐོ་བཀོད་འབད་དེ་འདུག། ཨིན་རུང་ ད་རེས་ནངས་པ་ གཡུས་ཀྱི་མིང་སྡེབ་ཡེར་འཕེལ་ ཟེར་འབྲི་ སྲོལ་དར་ཏེ་ཡོདཔ་མ་ཚད་ སྤྱི་ལོ་ ༢༠༡༩ ལོར་རྫོང་ཁ་གོང་འཕེལ་ལྷན་ ཚོགས་ཀྱིས་ རྩོམ་སྒྲིག་དང་ པར་སྐྲུན་འབད་ཡོད་མི་ མིང་གནས་གསལ་ བའི་འོད་ཟེར་ནང་ལུ་ཡང་ ཡེར་འཕེལ་ ཟེར་ཐོ་བཀོད་འབད་དེ་འདུག།
རབ་གསལ་མེ་ལོང་། 59 ༤.༣ ཡེར་འཕེལ་བཀྲ་ཤིས་མཐོང་རྒྱ་དགོན་པའི་ལོ་རྒྱུས། ཡེར་འཕེལ་བཀྲ་ཤིས་མཐོང་རྒྱ་གླིང་དགོན་པ་འདི་ ག་ནི་བ་མཐོང་གསལ་ ཆེ་བའི་ ས་གནས་སྤོ་ཏོག་ཅིག་གུ་ བཞེངས་ཏེ་འདུག། གཡུས་ཚན་དེ་ནང་ ལུ་ རྒན་ཤོས་ཅིག་ཨིན་མི་ བཟོ་བོ་ཨཔ་ཚེ་དབང་རྡོ་རྗེ་གིས་བཤད་མི་ ངག་ རྒྱུན་གྱི་ལོ་རྒྱུས་དང་འཁྲིལ་བ་ཅིན་ ལྷ་ཁང་དེ་ གཡུས་ཚན་དེ་ནང་ལས་ར་ ཨིན་མི་ ཡོངས་གྲགས་ལུ་ བསྐང་གསོལ་བླ་མ་ཟེར་ཞུ་མི་ དགེ་སློང་ངག་ དབང་གིས་ འགོ་འདྲེན་འཐབ་ཐོག་ལུ་ སྤྱི་ལོ་ ༡༩༦༡ ལོར་ ཡ་ལང་རྒེད་ འོག་གི་ མི་སེར་དམངས་ཀྱིས་ བཞེངས་ཡོད་ལུགས་ བཤད་ནི་འདུག། བཀྲ་ཤིས་མཐོང་རྒྱ་དགོན་པའི་ལྷ་ཁང་།
རབ་གསལ་མེ་ལོང་། 60 ༤.༤ ལྷ་ཁང་གདན་ས་བཏབ་མིའི་ལོ་རྒྱུས། ད་རུང་ བཟོ་བོ་ཨཔ་ཚེ་དབང་རྡོ་རྗེ་གིས་བཤད་མི་ ངག་རྒྱུན་ལོ་རྒྱུས་དང་ འཁྲིལ་བ་ཅིན་ དགེ་སློང་ངག་དབང་ ཁོ་ར་ གཡུས་ཚན་དེ་ནང་ལས་ཨིན་ ཁུངས་དང་། ཁོ་གིས་ བོད་ལུ་བསེ་ར་གྲྭ་ཚང་ཆེན་མོ་ནང་འཛུལ་ཏེ་ འཆད་ རྩོད་རྩོམ་གསུམ་གྱི་བྱ་བ་ཚུ་ག་ར་མཐར་ཕྱིནམ་སྦེ་ སྦྱངས་བརྩོན་འབད་ ཡོདཔ་མ་ཚད་ གྲྭ་ཚང་ཆེན་མོ་འདི་ནང་ མཁས་པ་སྟོང་ཕྲག་ ༦ ལྷགཔ་ ཅིག་དང་ དོ་འགྲན་འབད་དེ་ བསྐང་རྒྱུན་པའི་ཕྱག་འགན་ཡང་ བཞེས་ གནང་པའི་ ལོ་རྒྱུས་བཤད་ནི་འདུག། ཨིན་རུང་ ཤུལ་ལས་ ཁོ་ར་ རྒྱ་ནག་བོད་གཉིས་ཀྱི་བར་ན་ སྟབས་མ་ བདེ་བའི་གནད་ལས་བརྟེན་ཏེ་ ལོག་གཡུས་ཚན་དེ་ནང་བྱོན་ཡོད་ལུགས་ དང་། བསྟན་པ་དང་འགྲོ་བ་སེམས་ཅན་གྱི་དོན་ལུ་ ཆོས་ཕྱོགས་ཀྱི་བྱ་བ་ ཡང་ འཕྲོ་མཐུད་མཛད་གནང་ཡོད་པའི་ ལོ་རྒྱུས་འདུག།
རབ་གསལ་མེ་ལོང་། 61 ༤.༥ གཡུས་ཚན་དེ་ནང་ སྔོན་མ་ལས་ ལྷ་ཁང་ཅིག་ཡོད་ཚུལ། ད་རུང་ ལོ་རྒྱུས་གཞན་ཅིག་ལས་ རིག་འཛིན་འཇིགས་མེད་གླིང་པའི་སློབ་ མ་ བཀའ་རྙིང་བཟུང་འབྲེལ་གྱི་ནང་ལུ་ མཁས་པའི་གྲུབ་པ་ཐོབ་པའི་ འཇིགས་མེད་ཀུན་གྲོལ་མཆོག་གིས་ཡང་ ཡོངས་ལེགས་དགོན་པ་ལས་ ཡར་བོད་ལུ་བྱོནམ་ད་ གཡུས་ཚན་དེ་ནང་ ཞབས་ཀྱིས་བཅག །བྱིན་གྱིས་ རླབས་གནང་པའི་ ལོ་རྒྱུས་འདུག། དཔལ་འབྲུག་ཞིབ་འཇུག་ལྟེ་བ་གིས་ པར་སྐྲུན་འབད་ཡོད་མི་ རྗེ་ ཡོནཏན་མཐའ་ཡས་དང་། རྗེ་ཀུན་དགའ་རྒྱ་མཚོ་གཉིས་ཀྱིས་མཛད་ པའི་ འབྲུག་གི་སྡེ་སྲིད་ཁྲི་རབས་ ༡༣ པ་ ཆོས་རྗེ་ཤེས་རབ་དབང་ཕྱུག་ ༼༡༦༩༧_༡༧༦༥༽ གི་དགེ་བའི་ཆོ་ག་རབ་ཏུ་གསལ་བའི་གཏམ་ མུ་ཏིག་དོ་ཤལ་ ཟེར་མི་ནང༌ལུ་ ཡས་འཕེལ་དགོན་པ་ཟེར་ ཐོ་བཀོད་ གནང་མི་དང་འཁྲིལ་བ་ཅིན་ ལྷ་ཁང་དེ་ དུས་རབས་༡༨ པའི་སྔ་གོང་ལས་ ར་ཡོད་པའི་ ལྷ་ཁང་རྙིངམ་ཅིག་ཨིན་པས། དུས་རབས་༡༨ པའི་ནང་ཡོད་ མི་ལྷ་ཁང་་དེ་ བདག་འཛིན་འཐབ་མི་མེད་པར་ ཉམས་ཆག་ཤོར་ཞིནམ་ ལས་ ད་ལྟོ་ཡོད་མི་ ལྷ་ཁང་དེ་བཞེངས་པའི་ཚོད་འདུག།
རབ་གསལ་མེ་ལོང་། 62 ༤.༦ རྟེན་གསུམ་གྱི་སྐོར། ལྷ་ཁང་དེ་ནང་ ནང་རྟེན་གཙོ་བོ་ ཆོས་ལོངས་སྤྲུལ་གསུམ་གྱི་སྐུ་འདྲ་དང་། རྗེ་བཙུན་འཇམ་དཔལ་དབྱངས་ཀྱི་སྐུ་འདྲ། དེ་ལས་རྗེ་བཙུན་སྒྲོལ་མའི་ སྐུ་འདྲ་དང་། ཞབས་དྲུང་རིན་པོ་ཆེའི་སྐུ་འདྲ་ཚུ་མཇལ་ནི་ཡོདཔ་མ་ཚད། ཞབས་དྲུང་ཕུན་སུམ་ཚོགས་པའི་ལྡེབས་རིས་ཚུ་ཡང་ མཇལ་ནི་འདུག། ༤.༧ དུས་མཆོད་འབུམ་སྡེའི་སྐོར། ད་རེས་ནངས་པ་ ལྷ་ཁང་དེ་ནང་ ལོ་བསྟར་བཞིན་དུ་ རང་ཟླ་བཞི་པའི་ ས་ག་ཟླ་བའི་ དུས་ཆེན་ཁྱད་པར་ཅན་དང་འབྲེལ་ ཚོགས་འཁོར་ཉིནམ་ གཅིག་དང་། རང་ཟླ་དྲུག་པའི་ནང་ ཆོས་འབུམ་ཉིནམ་གཉིས་ལྷག་གནང་ དོ་ཡོདཔ་མ་ཚད། མཇུག་ལུ་གཏེར་འཆམ་གྱི་མཇལ་ཁ་གནང་སྲོལ་ དང་། ཉིནམ་གསུམ་པའི་སྐབས་ གཏང་རག་གི་ཚོགས་འཁོར། དེ་ལས་ རང་ཟླ་བརྒྱད་པའི་ནང་ བཀའ་འགྱུར་དག་ཚར་ལྷག་མཇུག་ལུ་ཆོས་སྐོར་ དང། རང་ཟླ་བཅུ་པའི་ནང་ སྨྱུང་གནས་དཀརཔོ་ཆ་གཉིས་བརྩི་སྲུང་ཞུ་ སྲོལ་འདུག།
རབ་གསལ་མེ་ལོང་། 63 ༤.༨ ལྷ་ཁང་གི་བདག་དབང་། ད་རེས་ ལྷ་ཁང་དེ་ ནང་སྲིད་དང་སྲོལ་འཛིན་ལྷན་ཁག་ སྲོལ་འཛིན་ལས་ ཁུངས་ཀྱིས་པར་སྐྲུན་འབད་ཡོད་མི་ འབྲུག་གི་རྫོང་གཞིས་དང་ལྷ་ཁང་ དགོན་སྡེའི་ཐོ་ཡིག་ཟེར་མི་ དཔེ་དེབ་དང་འཁྲིལ་བ་ཅིན་ ལྷ་ཁང་གི་ བདག་དབང་ཧྲིལ་བུམ་ དམངས་ལུ་ཡོདཔ་སྦེ་ ཐོ་བཀོད་འབད་དེ་འདུག། ༤.༩ གཡུསཚན་དེ་ནང་ཡོད་པའི་ མདོ་མང་ཕུག་གི་སྐོར། ལྷ་ཁང་འདི་ཁ་ལས་ཡར་ ཁ་འགྱེན་འཛེགས་ཏེ་ དུས་ཡུན་སྐར་མ་ ༡༠ དེ་ཅིག་འགྱོ་དགོ་པའི་ས་གནས་ཁར་ མདོ་མང་ཕུག་༼གཡུས་སྐད་ལས་ མདོ་མང་ཕུང་༽ ཟེར་བའི་བྱག་ཕུག་ཅིག་མཇལ་ནི་འདུག། བྱག་ཕུག་ འདི་ནང་ རྡོ་རང་བྱུང་གི་མཆོད་ཁྲི་གུ་ དཔེ་ཆ་མདོ་མང་དང་ཅོག་འཐད་པའི་ གླེགས་བམ་པོ་ཏི་ ཡ་མཚན་ཆེ་ཏོག་ཏོ་ཅིག་མཇལ་ནི་ཡོད་རུང་། འདི་གི་ སྐོར་ལས་ ཁ་གསལ་སྦེ་ཤེས་མི་ག་ཡང་མིན་འདུག། ༤.༡༠ གཡུསཚན་དེ་ནང་ཡོད་པའི་ གནས་ཕུག་གི་སྐོར། དེ་བཟུམ་སྦེ་ར་ ད་རུང་ ལྷ་ཁང་འདི་ཁ་ལས་ གཡས་ཁ་ཐུག་ དུས་ཡུན་
རབ་གསལ་མེ་ལོང་། 64 སྐར་མ་༡༥ དེ་ཅིག་འགྱོ་དགོ་པའི་ས་ཁར་ གནས་ཕུག་ ༼གཡུས་སྐད་ ལས་གནས་ཕུང་༽ ཟེར་བའི་གནས་ཅིག་ མཇལ་ནི་འདུག། འདི་ཁར་ བླམ་འདི་གི་གྲུབ་ཆུ་ཨིན་ ཟེར་བའི་ལོ་རྒྱུས་མེད་རུང་ བྱག་ཕུག་འདི་ནང་ ལས་ ཆུའི་རྐ་ག་ཏེ་ཡང་མེད་པའི་ རྡོ་ཕུག་གཉིས་ཀྱི་སྦུག་ནང་ལས་ ཆུ་ཡ་ མཚན་ཆེ་ཏོག་ཏོ་འཐོན་ནི་འདུག། བྱག་ཕུག་འདི་ནང་ ཨ་ལོ་གི་དངོས་གྲུབ་ཞུ་ས་ཡོདཔ་མ་ཚད། གཡུས་ ཚན་འདི་ནང་ ཆརཔ་མ་རྐྱབ་པར་ཡུན་རིངམོ་འགྱོ་བ་ཅིན་ བྱག་ཕུག་དེ་ ཁར་སོང་སྟེ་ གསོལ་ཁ་འགོ་བཙུགསཔ་ཅི་ ཆརཔ་རྐྱབ་ཨིན་ ཟེར་བཤད་ ནི་འདུག། ༤.༡༡ རྟགས་མཚན་ལྟ་སའི་རྡོ་དང་བཞུགས་ཁྲི། ཆེ་མ་གཡུས་ཚན་ལས་ མེ་ལོང་མཁར་འགྱོ་སའི་ དང་ཕུའི་གཞུང་ལམ་ གྱི་ལྟག་ལུ་ རྡོ་ལེབ་ཅིག་ཡོད་མི་འདི་ གཡུས་ཚན་ནང་ ནད་ཡམས་འཆི་ རྐྱེན་ལ་སོགས་པ་འོང་ནི་ཨིན་པ་ཅིན་ བཀྱག་དམརཔོ་འགྱུར་ནི་ཡོད་ཚུལ་ དང་ དགའ་སྐྱིད་དང་ཞི་བདེ་འོང་ནི་ཨིན་པ་ཅིན་ རྡོ་བཀྱག་དཀརཔོ་འགྱུར་
རབ་གསལ་མེ་ལོང་། 65 ནི་ཡོད་ཟེར་བཤད་རུང་ ད་རེས་ རྡོ་ལེབ་འདི་གུ་ ས་ཀ་ར་བཏང་བཞག་ནུག། འདི་ཁ་ལས་ཚུར་ གནམ་ཐིག་ལུ་འོང་སའི་ལམ་ཁར་ རྡོའི་བཞུགས་ཁྲི་ རྒྱབ་ཡོལ་དང་བཅས་པ་ཅིག་འདུག། རྒོཔ་ཆོས་སྲུང་དབང་འདུས་ཀྱིས་ ངག་རྒྱུན་བཤད་པའི་ནང་གསལ་ སྔོན་མ་གྲུབ་ཐོབ་ཅིག་བྱོན་ཏེ་བཞུགས་ པའི་བཞུགས་ཁྲི་ཨིན་ཁུངས་དང་ དེ་ལས་ རྒྱབ་ཡོལ་གྱི་བོངས་ཚད་འདི་ བླ་མའི་སྐུ་ཚད་དང་འདྲ་མཉམ་ཨིན་པའི་ཁར་ བསྐལ་པའི་གནས་ཚད་ རྟགས་མཚན་ལྟ་སའི་རྡོ།
རབ་གསལ་མེ་ལོང་། 66 སྟོན་ནིའི་ལོ་རྒྱུས་བཤད་རུང་ གྲུབ་ཐོབ་ཀྱི་ལོ་རྒྱུས་ཁ་གསལ་ཤེས་མི་ག་ ཡང་མིན་འདུག་ཟེར་ཨིན་པས། ཨིན་རུང་ ཞིབ་འཚོལ་པ་རང་གི་བསམ་ འཆར་ལུ་འབད་བ་ཅིན་ གྲུབ་ཐོབ་ཁི་བཞེས་སམ་གྲུབ་དབང་གྲགས་པ་ རྒྱལ་མཚན་འདི་ མིན་ནམ་མནོ་བའི་དོགས་གཞི་འདུག། རྡོའི་བཞུགས་ཁྲི།
རབ་གསལ་མེ་ལོང་། 67 ཟུར་སྦྲགས། ༄༅། །ཡེར་འཕེལ་གཡུས་ཚན་གྱི་ཡུལ་ལྷ་ སྐྱེན་ཕུག་པའི་གསོལ་ མཆོད། ཨོཾ་བཛྲ་ཨ་མྲི་ཏ་ཞེས་པ། ཨོཾ་སྭ་བྷཱ་ཝ་ཤུདྡྷཱ་སརྦ་དྷརྨ་སྭ་བྷཱཝ་ཤུདྡྷོ྅་ ཧཾ༔ གནས་ཡུལ་སྐྱེན་ཕུག་གི་གསེར་སྐྱེམས་ཟག་པ་མེད་པ་ཡེ་ཤེས་ཀྱི་ བདུད་རྩི་རྒྱ་མཚོ་ཆེན་པོར་གྱུར་ཅིག །ཨོཾཨཱ༔ཧཱུྃ༔ ཀྱཻ༑ ཕུན་ཚོགས་འདོད་ རྒུ་ཚང་བའི་དཔལ་གྱི་ཡུལ། །ཆུ་ཕྲན་ལྟིང་ཀ་ལུ་མ་འབབ་པའི་སྟེང༌།། གོར་མོ་བྲག་རི་བརྩེགས་པའི་ཤར་ལྷོ་མཚམས། །ནགས་ཚལ་སྐྱེད་མོས་ ཙན་དན་འཁྲིགས་པའི་གནས། །འདོད་ཡོན་འབྱོར་པ་སྤེལ་བའི་ཁང་བཟང་ ནང་། །སྐུ་མདོག་སྨུག་ནག་རྟ་མཆོག་ངང་དཀར་ཆིབས། །ང་རྒྱལ་རལ་ གྲི་ཕྲག་དོག་དུག་སྦྲུལ་འཛིན། །སྐྱེན་ཕུག་དགེ་བསྙེན་ཆོས་འཕེལ་མཚན་ ཡང་གསོལ། །གཡས་སུ་སྲས་མཆོག་སྐུ་མདོག་སྔོ་དམར་དང༌། །གཡོན་ དུ་ཡུམ་མཆོག་སྐུ་མདོག་སྔོ་མཐིང་མ། །མདུན་རྒྱབ་ཐམས་ཅན་ཀླུ་བདུད་ བཙན་སྣ་ཚོགས། །དད་དང་འབོད་པའི་དབྱངས་ཀྱིས་སྤྱན་འདྲེན་ན།། དགའ་དང་གུས་པའི་ཚུལ་གྱིས་ཞལ་སྟོན་ནས། །སངས་རྒྱས་བསྟན་ སྲུང་དགོན་སྡེ་སྐྱོང་ཕྱིར་དུ། །རླུང་ལྟར་མགྱོགས་པའི་ཐུགས་དང་རྫུ་ འཕྲུལ་གྱིས། །མཆོད་པའི་གནས་འདིར་སྤྱན་འདྲེན་གཤེགས་སུ་
རབ་གསལ་མེ་ལོང་། 68 གསོལ། །བཛྲ་ཨངྐུ་ཤ་ཡ་ཛ། །དམ་བཞག་ནི། ཀྱཻ༑ སྔོན་ཚེ་ཀུན་བཟང་སྣང་ མཐའ་འོད་མགོན་དང་། །རིག་འཛིན་པད་འབྱུང་དཔལ་ལྡན་འབྲུག་པ་ ཡིས། །བཀའ་བསྒོ་དམ་ཚིག་གཉན་ལས་མ་འདའ་བར། །བཅོལ་ བའི་ཕྲིན་ལས་གཉན་པོ་བསྲུང་བར་མཛོད། །དེ་བཞིན་ཁས་བླངས་དགེ་ བསྙེན་འཁོར་གཡོག་བཅས། །གཞན་ལ་བསམ་སྦྱོར་དུག་རྩུབ་ངན་པ་ ཞི། །ཕན་བདེ་བསྐྱེད་པའི་འབྲས་བུ་རྗེས་སུ་འབྲང་། །སྡུག་བསྔལ་རྒྱུན་ གཅོད་ཐར་ཐོབ་རྒྱལ་བའི་བཀའ། །དེ་ལས་འདས་ན་བསྐལ་ཆེན་བཅུ་ ཡི་བར། །དམྱལ་ཁམས་བཅོ་བརྒྱད་བཟོད་མེད་གཡང་གཏིང་དུ། །ལས་ ཀྱི་འབྲས་བུ་འདིར་ནས་འཕོས་པའི་དུས། །ཡན་ལག་མགོ་གཅོད་སྡུག་ བསྔལ་གཏོང༌ཏ་རེ།། མཆོད་པ་ནི། ཀྱཻ༑ དཀར་སེར་དམར་ལྗང་གཡོ་བའི་མེ་ ཏོག་རིགས། །ཙན་དན་ཨ་དུར་སྦྱར་བའི་དུག་སྤོས་དང་། །མུན་སེལ་མར་ མེ་ཡན་ལག་བརྒྱད་ལྡན་དྲི། །རོ་བཅུད་ཞལ་ཟས་དགའ་སྟོན་སྒྲ་དབྱངས་ འབུལ། །ཤ་ཆེན་ལྔ་ཡི་རཀྟ་རྦ་ཀློང་འཁྲུགས། །དྲི་ཆེན་ལྔ་ཡི་བདུད་རྩི་ མཚོ་ལྟར་འཁྱིལ། །ཏིང་འཛིན་དམིགས་དང་ལྷ་པ་དྲོད་ཀྱིས་མཆོད། །སྐྱེན་ ཕུག་དགེ་བསྙེན་ཁྱོད་ལ་མཆོད་པ་བཞེས། །གཡས་སུ་སྲས་དང་གཡོན་དུ་ ཡུམ་མཆོག་གཉིས། །ནང་དུ་དགེ་སློང་བརྒྱ་དང་སྟོང་དུ་ཚོགས། །ཕྱི་རོལ་
གཞན་ཕན་བྱང་སེམས་བསྐྱེད་པའི་མཆོད་གཏོར་བཞེས།
རབ་གསལ་མེ་ལོང་། 69 ལྷ་སྲིན་བྱེ་བ་འབུམ་གྱིས་བསྐོར། །མ་ཐོགས་རིངས་པས་གནས་འདིར་ད་ ཚུར་བྱོན། །ཁྱི་གཙང་ཡན་ཆད་སྐྱེན་ཕུག་མན་ཆད་ནི། །ལྷ་ཀླུ་བདུད་བཙན་
།རུ་ང་ཕྲག་དོག་ཞི་བའི་མཆོད་པ་བཞེས།།
ཞི་བདག་མཐུ་ཆེན་རྣམས།
།སྦྱངས་སྟོབས་ འབར་བའི་མཆོད་པ་འདི་བཞེས་ལ། །འདིར་གཤེགས་རྒྱན་གྱི་གཏོར་མ་ འདི་བཞེས་ལ། །ཛམྦུ་ཏི་བའི་ཞལ་ཟས་འདི་བཞེས་ཤིག །སྨན་དང་རཀྟ་ མཆོད་པ་འདི་བཞེས་ཤིག །ཛ་གད་དཔའ་བོའི་སྨན་ཕུད་འདི་བཞེས་ཤིག། སྔར་བཅོལ་ལེགས་པའི་གཏང་རག་གཉན་པོ་གཏོང་། །ད་བཅོལ་ལེགས་ པའི་གསོལ་འདེབས་གཉན་པོ་བཞེས། །ཕུན་ཚོགས་དཔལ་གྱི་སྦྱོར་བའི་ གདན་ས་རུ། །གཏན་བཞུགས་སྦྱིན་བདག་དགོན་སྡེའི་འཁོར་བཅས་ལ།། ཚེ་དང་བསོད་ནམས་བཤད་སྒྲུབ་འབྱོར་པ་སོགས། །ཡར་ངོའི་ཟླ་བ་བཞིན་ དུ་འཕེལ་བར་མཛོད། །གཏོར་བསྔོ་ནི། ཀྱཻ༑ ༀ་སྭ་བྷ་ཝས་སྦྱངས། གཏོར་རྫས་ རྣམས་མི་དམིགས་ཏེ་སྟོང་པ་ཉིད་དུ་འགྱུར། སྟོང་པའི་ངང་ལས་གཏོར་ སྣོད་ཐོད་པ་ཡངས་ཤིང་རྒྱ་ཆེ་བའི་ནང་དུ། །ཨོྃ་ཨཱ༔ཧཱུྃ་འོད་དུ་ཞུ་བ་ལས་ བྱུང་བའི་དགྲ་བགེགས་ཀྱི་ཤ་ཁྲག་རུས་པའི་ཚོགས་བསམ་གྱིས་མི་ ཁྱབ་པ་ཐམས་ཅད་གཏོར་མ་དཀར་གསུམ་མངར་གསུམ་འདོད་པའི་ཡོན་
རབ་གསལ་མེ་ལོང་། 70 ཏན་ལྔ་དང་ལྡན་པ་རི་རབ་ཀྱི་གཏོས་དང་མཉམ་པར་འགྱུར། །ཨོཾ་ཨཱ༔ཧཱུྃ་ ཧོ། ལན་གསུམ། བདེ་གཤེགས་མཚན་ལྔ་ལན་གསུམ་བརྗོད། ཨ་ཀཱ་རོ་སོགས་ལན་གསུམ་བརྗོད། མཆོད་སྦྱིན་གྱི་གཏོར་མ་གཟུགས་སྒྲ་དྲི་རོ་རེག་བྱ་འདོད་པའི་ཡོན་ཏན་ལྔ་ དང་ལྡན་པ་འདི་ཉིད། སྐྱེན་ཕུག་དགེ་བསྙེན་ཆོས་འཕེལ་འཁོར་དང་བཅས་ པ་རྣམས་ལ་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་ཚིམ་ཞིང་དགྱེས་ པར་བཞེས་ལ། སྤྱིར་སངས་རྒྱས་ཀྱི་བསྟན་པ་སྲུངས། དཀོན་མཆོག་ གི་དབུ་འཕང་བསྟོད། དཔལ་ལྡན་བླ་མའི་སྐུ་ཚེ་སྲིངས། དགེ་བདུན་གྱི་ སྡེ་སྐྱོངས། འདོད་པའི་སྦྱིན་བདག་ཆོས་སྐྱོང་རྒྱལ་བློན་ཐམས་ཅད་ཆབ་ སྲིད་རྒྱས་ཤིང་། ཆོས་མཐུན་འབྱོར་པ་སྤེལ་བ་དང་། ཁྱད་པར་དུ་དཔལ་
བདག་ཅག་ དཔོན་སློབ་དང་བཅས་པའི་བསམ་དོན་སྒྲུབས། རྒྱལ་བའི་བསྟན་པ་རིན་ པོ་ཆེ་དང་། དཔལ་ལྡན་བླ་མ་དམ་པ་རྣམས་ཀྱི་གདན་ས་ལ་གནོད་པར་ བྱེད་པའི་དགྲ་བགེགས་ཕྱི་དགྲ་ཡིད་ལ་བསམ་པ་གཟུགས་ཅན་དགྲ་དང་། གཟུགས་མེད་དགྲ་བགེགས་འབྱུང་པོའི་རིགས་སུ་གྱུར་པ་ཐམསཅད་ ཐལ་བའི་རྡུལ་ཕྲན་བཞིན་དུ་བརླགས་པའི་འཕྲིན་ལས་སྟོངས་གྲོགས་ དམ་པ་མཛད་དུ་གསོལ། །བསྟོད་པ་ནི། ཀྱཻ༑ སྐྱེས་ལྷ་ཆེན་པོ་དགེ་བསྙེན་
ལྡན་འབྲུག་པའི་རྒྱལ་ཁབ་འདི་ཉིད་ཆོས་ལྡན་དུ་སྐྱོང་བ་དང་།
རབ་གསལ་མེ་ལོང་། 71 ཆོས་འཕེལ་ནི། །སྐུ་མདོག་མ་ངེས་དཀར་སེར་དམར་ལྗངས་ནག །ཞེ་ སྡང་འཇོམས་ཕྱིར་སྡུག་རྩུབ་དུག་སྦྲུལ་བསྟོད། །དགྲ་བགེགས་འདུལ་ ཕྱིར་རལ་འགྲི་འཆར་ལ་བསྟོད། །དཀར་པོ་ཞི་བའི་ཚུལ་དུ་གཟིགས་ པའི་ཚེ། །ཆར་ཆུ་དུས་འབེབས་ལོ་ཕྱུག་རྟག་ཏུ་ལེགས། །འཁྲུག་རྩོད་ ནད་ཡམས་མུ་གེ་ཞི་གྱུར་ནས། །རླུང་འཚུབ་སད་དང་སེར་བ་བསྲུང་ལ་ བསྟོད། །སྐུ་མདོག་སེར་པོ་ཞལ་འཛུམ་སྟོན་པ་ནི། །འཁོར་རྣམས་སྐྱོང་ ཤིང་རྐྱེན་ངན་བཟློག་པ་དང་། །རྒྱས་པའི་ཚེ་དང་བསོད་ནམས་ཟླ་བཞིན་ འཕེལ། །རྒྱུ་ནོར་ལོངས་སྤྱོད་གང་བར་མཛད་ལ་བསྟོད། །དམར་པོ་པདྨའི་ མདོག་གཉེར་མཛེས་པ་ནི། །ཕྱོགས་དེར་གནོད་པའི་འདྲེ་མོ་འདྲེ་ཕོ་ རྣམས། །རྔམ་པའི་ང་རོ་སྲིད་གསུམ་དབང་དུ་བསྡུས། །ཡུལ་ཕྱོགས་གོད་ ཁ་བསྲུང་བར་བདག་བསྟོད་དོ། །ཁྲོས་པའི་མཐོང་སྣང་སྐུ་མདོག་ཐིང་ནག་ གཟིགས། །བསྟན་པའི་དགྲ་བགེགས་དཔུང་ཚོགས་ཐལ་བར་རློགས།། ལྷོ་ལྗོངས་དཔལ་ལྡན་འབྲུག་པའི་རྒྱལ་ཁབ་དེར། །བདེ་སྐྱིད་བཀྲ་ཤིས་ ཕུན་སུམ་ཚོགས་པར་མཛོད། །ཁྱད་པར་ངག་གི་མིང་ཅན་གྲགས་པའི་ ཆོས། །ལུང་དང་རྟོགས་པའི་བསྟན་པ་རིན་པོ་ཆེ། །བསྟན་པའི་བུ་སློབ་ དགེ་འདུན་སྦྱིན་བདག་རྣམས། །ཚེ་དང་བསོད་ནམས་འཕེལ་བའི་ཕྲིན་
རབ་གསལ་མེ་ལོང་། 72 ལས་མཛོད།། གསེར་སྐྱེམས། རཾ་ཡཾ་ཁཾ་ཨོཾ་ཨཱཿཧཱུྃ༑ ཕོ་ལྷ་ཆེན་པོ་སྐྱེན་ཕུག་ བཙན་རྣམས་ལ། །གསེར་སྐྱེམས་གཙང་མ་ཕུད་ཀྱི་མཆོད་པ་བཞེས།།
།བདག་གི་འདོད་དོན་མ་ ལས་གྲུབ་ཏུ་གསོལ། །གཡས་ནས་དགྱེས་ཕུག་བཙན་འཁོར་བཅས་ པ་དང་། །གཡོན་ནས་སྐོར་ཕུག་བཙན་འཁོར་བཅས་པ་ཡིས། །རིན་ཆེན་ གསེར་སྐྱེམས་གཙང་མ་འདི་བཞེས་ལ། །བདག་གི་འདོད་དོན་མ་ལུས་ གྲུབ་ཏུ་གསོལ། །རྒྱབ་ཏུ་སིལ་སི་བཙན་དང་གོ་ཐུག་བཙན། །འཁོར་དུ་ ལྷ་ཀླུ་བཙན་བདུད་འཁོར་བཅས་ཀྱིས། །རིན་ཆེན་གསེར་སྐྱེམས་གཙང་ མ་འདི་བཞེས་ལ། །བདག་གི་འདོད་དོན་མ་ལུས་གྲུབ་ཏུ་གསོལ། །མདུན་ དུ་རྟ་མགྲིན་ལྷ་ཚོགས་འཁོར་བཅས་དང་། །སྐྱེན་ཕུག་ལྷ་ཀླུ་བཙན་བདུད་ འཁོར་བཅས་ཀྱིས། །རིན་ཆེན་གསེར་སྐྱེམས་གཙང་མ་འདི་བཞེས་ལ།། བདག་གི་འདོད་དོན་མ་ལུས་གྲུབ་ཏུ་གསོལ། །ས་ཡུལ་སྐྱེན་ཕུག་འདི་ ནང་གནས་པ་ཡི། །ལྷ་གཉན་ཀླུ་གཉན་བཙན་གཉན་དང་། །དགེ་བསྙེན་ ཆོལ་འཕེལ་ལ་སོགས་ཡུལ་ལྷ་རྣམས། །རིན་ཆེན་གསེར་སྐྱེམས་གཙང་ མ་འདི་བཞེས་ལ། །བདག་གི་འདོད་དོན་མ་ལུས་གྲུབ་ཏུ་གསོལ། །སྔ་མ་ ལེགས་པའི་གཏང་རག་དང༌། །ཕྱི་མ་ལེགས་པའི་ཞུ་སྐྱེམས་འབུལ། །ད་
སྐྱེན་ཕུག་དགེ་སྙེན་ཆོས་འཕེལ་འདི་བཞེས་ལ།
རབ་གསལ་མེ་ལོང་། 73 བཅོལ་ལས་ཀྱི་འཕྲིན་ལས་མཛོད། །བསྐང་བ་ནི། ཀྱཻ༑ སྲིད་གསུམ་གཟིལ་ གནོན་དགེ་བསྙེན་མཐུ་བོ་ཆེ། །དགོས་འདོད་སྩོལ་བའི་བདུད་རྩི་རྒྱུན་དུ་ ཕོབ། །སྐྱེས་ལྷ་ཆེན་པོ་ཕོ་ལྷ་མོ་ལྷ་ནི། །དད་མོས་ཚོགས་དང་གཏོར་མས་ ཐུགས་དམ་བསྐང༌། །མར་ཐུད་ཕྲུམ་དང་འོ་མ་ཞོ་ལ་སོགས། །འདོད་ཡོན་ སྣ་ལྔ་བཀྲ་ཤིས་རྟགས་བརྒྱད་དང༌། །རྒྱལ་སྲིད་སྣ་བདུན་འཕན་དང་བ་ དན་བསྒྲེངས། །དྲི་ཞིམ་བསང་གི་ཐུལ་བས་ཐུགས་དམ་བསྐང༌། །རྫས་ བརྒྱད་ཀུན་བཟང་མཆོད་སྤྲིན་ཡིད་སྤྲུལ་ནས། །དུང་དང་ཐད་རང་མང་པོ་ ཁྲོ་ལོ་ལོ། །མི་རྐང་གླིང་བུ་གསུང་སྙན་ཙེ་རེ་རེ། །རོལ་མོ་བརྡ་དབྱངས་ བསྐུལ་བས་ཐུགས་དམ་བསྐང༌། །ནགས་ཚལ་སྐྱེད་མོས་ཙན་དན་སྡོང་ པོའི་ནང༌། །སྟག་གཟིག་དོམ་དྲེད་ངར་སྐད་འུ་རུ་རུ། །བྱ་སྤྲེའུ་དུར་ཕག་ ནག་པོ་དི་རི་རི། །རྐང་བཞི་དགའ་སྟོན་གླུ་ལེན་ཐུགས་དམ་བསྐང༌། །གོར་ མོ་བྲག་རི་བརྩེགས་པའི་དབུས་ཕྱོགས་སུ། །དཀར་གསེར་དམར་ལྗང་ མེ་ཏོག་སྣ་ཚོགས་སྐྱེས། །ཡུལ་དུ་འབྲུ་སྣ་ལེགས་པས་ཐུགས་དམ་ བསྐང༌། །བདག་ཅག་མ་རིག་འཁྲུལ་པའི་དབང་གྱུར་པས། །མངོན་ཤེས་ རྫུ་འཕྲུལ་མངའ་བ་ཁྱོད་རྣམས་ཀྱིས། །བཟོད་པར་བཞེས་ཤིང་སྟོང་པ་ བཅོལ་དགོངས་ལ། །དོ་ནུབ་བཤགས་སོ་བསྐང་ངོ་ཐུགས་དམ་བསྐང༌།།
རབ་གསལ་མེ་ལོང་། 74 བཤགས་པ་ནི། སྐྱེན་ཕུག་དགེ་བསྙེན་ཆོས་འཕེལ་འཁོར་བཅས་དང་། །མཐོལ་ ལོ་བཤགས་སོ་སྐྱེན་ཕུག་འཁོར་བཅས་ཀྱིས། །ལྷ་ཀླུ་བཙན་བདུད་ཞི་ བདག་འཁོར་བཅས་ཀྱིས། །མཐོལ་ལོ་བཤགས༴ བཟོད་གསོལ་ནི། ཨོཾ་ཁྱེད་ ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ།། སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་ གསོལ། །བཛྲ་མུཾ༔ སངས་རྒྱས་སྐུ་གསུམ་མཉེས་པའི་སོགས། བསྟན་པའི་ དཔལ་གྱུར་བླ་མའི་སོགས། སརྦ་མངྒ་ལཾ༎ །།
རབ་གསལ་མེ་ལོང་། 75 ༼ལྔ་པ། གནམ་ཐིག་གཡུས་ཚན་ནང་ཡོད་པའི་༽ གནས་དགོན། ༥.༡ གནམ་ཐིག་གཡུས་ཚན་གྱི་སྐོར། གནམ་ཐིག་གཡུས་ཚན་དེ་ རྒེད་འོག་ལྟེ་བ་ལས་ དུས་ཡུན་ཆུ་ཚོད་ ༣ ལྷག་ཙམ་ཅིག་ རྐང་ཐང་སྦེ་འགྱོ་བའི་ཤུལ་ལུ་ ལྷོད་པའི་ས་ཁར་ཆགས་ ཏེ་འདུག། གཡུས་ཚན་དེ་ སྡུག་བསྟི་སྤྱི་འོག་དང་། མེ་ལོང་མཁར་ཆེ་མ་ སྤྱི་འོག། དེ་ལས་ཡེར་འཕེལ་གཡུས་ཚན་ཚུ་ནང་ འགྱོ་སའི་གཞུང་ལམ་ གྱི་འོག་ལུ་ ཆགས་ཏེ་འདུག། རྒེད་འོག་བདག་སྐྱོང་ཡིག་ཚང་ནང་ཡོད་ པའི་ མི་རློབས་དང་ཁྱིམ་གྱི་གྲངས་རྩིས་༢༠༡༩ ཅན་མ་དང་འཁྲིལ་བ་ ཅིན་ གཡུས་ཚན་དེ་ནང་ ཁྱིམ་གུང་པ་༢༧ ལྷགཔ་ཅིག་དང་ མི་རློབས་ གྲངས་༡༩༨ ལྷགཔ་ཅིག་ཡོདཔ་སྦེ་ ཐོ་བཀོད་འབད་དེ་འདུག། ༥.༢ གནམ་ཐིག་གཡུས་ཚན་གྱི་མིང་གནས་སྐོར། གནམ་ཐིག་ གཡུས་ཚན་གྱི་མིང་གནས་ ལོ་རྒྱུས་བཤད་སྲོལ་གཉིས་
རབ་གསལ་མེ་ལོང་། 76 ཡོད་པའི་ནང་ལས། གཙོ་འཛིན་དཀོན་མཆོག་ནོར་བུ་གིས་བཤད་མི་ ངག་རྒྱུན་དང་འཁྲིལ་བ་ཅིན་ ཧེ་མ་གཡུས་ཚན་དེ་ནང་ གཞི་ཆགས་པར་ འོང་མི་ཚུ་ ས་ཆ་འདི་གི་མིང་ ག་ཅི་བཏགསཔ་དྲག་ག་ ཟེར་མནོ་བསམ་ གཏང་སྡོདཔ་ད་ གནམ་ཁ་ལུ་ འཇའ་འོད་ཐིག་འཐེན་བཞག་བཞགཔ་ བཟུམ་ ཐད་སྒོར་སྒོར་སྦེ་སྐོར་ས་མཐོང་ཡོདཔ་ལས་ ད་རེས་ནམ་མཁར་ འཇའ་ཐིག་འཐེན་བཞག་བཞགཔ་བཟུམ་ཤར་ནུག་སྨ་རེད། ཟེར་སླབ་པའི་ ཚིག་ལས་ རྟ་དྲངས་ཏེ་ བཏགས་ཡོད་པའི་ལོ་རྒྱུས་དང་། རོ་ལམ་གཡུས་ཚན་ནང་ལས་ཨིན་མི་ རྒན་རབས་སྐྱིད་བུ་གིས་ ངག་ རྒྱུན་བཤད་མི་དང་འཁྲིལ་བ་ཅིན་ ཧེ་མ་བླམ་ཅིག་བསོད་སྙོམས་ལུ་བྱོན་ སྐབས་ ཁྱིམ་རྐྱབ་མི་བཟོ་བོ་གཅིག་དང་ཕྱད་དེ་ བླམ་གིས་བཟོ་བོ་དེ་ལུ་ ཁྱོད་གནམ་ལངསམ་ད་ ལཱ་ག་ཅི་འབདཝ་སྨོ་ཟེར་དྲིཝ་ད་ བཟོ་བོ་དེ་གིས་ ང་གནམ་ལངསམ་ད་ ཤིང་གུ་ཐིག་རྐྱབ་ཞིན་ན་བཞོགཔ་ཨིན་ ཟེར་ཞུ་མི་ ལས་ རྟ་དྲངས་ཏེ་ བཏགས་ཡོད་པའི་ ལོ་རྒྱུས་གཉིས་འདུག། མཁས་པ་ ཚུ་གིས་ དཔྱད་པ་མཛད་དེ་ བཀའ་དྲིན་བསྐྱང་གནང་ ཟེར་ཞུ་ནི་དང་གཅིག་ ཁར་ སྤྱི་ལོ་ ༢༠༡༩ ལོར་ རྫོང་ཁ་གོང་འཕེལ་ལྷན་ཚོགས་ཀྱིས་ རྩོམ་
རབ་གསལ་མེ་ལོང་། 77 སྒྲིག་དང་ པར་སྐྲུན་འབད་ཡོད་མི་ མིང་གནས་གསལ་བའི་འོད་ཟེར་ནང་ ལུ་འབད་རུང་ ཡིག་སྡེབ་གནམ་ཐིག་ ཟེར་རང་ ཐོ་བཀོད་འབད་དེ་འདུག། ༥.༣ གནམ་ཐིག་བཀྲ་ཤིས་ཆོས་གླིང་ལྷ་ཁང་གི་ལོ་རྒྱུས། གཡུས་ཚན་དེ་ནང་ཡོད་པའི་ བཀྲ་ཤིས་ཆོས་གླིང་ལྷ་ཁང་དེ་ སྤྱིར་སངས་ བཀྲ་ཤིས་ཆོས་གླིང་ལྷ་ཁང་།
རབ་གསལ་མེ་ལོང་། 78 རྒྱས་ཀྱི་བསྟན་པ་ མི་ཉམས་གོང་འཕེལ་དང་ ཉམས་པ་སོར་ཆུད་འབད་ ཐབས་དང་། ལྷག་པར་དུ་ གཡུས་ཚན་དེ་ནང་ལུ་ ཆོས་ཕྱོགས་ཀྱི་ལས་ རིམ་འགོ་འདྲེན་འཐབ་ནི་དང་ ཤི་གསོན་གྱི་དགེ་རྩ་སྒྲུབ་ས་ཅིག་ཨིན་ པས། གཡུས་ཚན་འདི་ནང་ལས་ར་ཨིན་མི་ གཙོ་འཛིན་དཀོན་མཆོག་ནོར་ བུ་གིས་ ངག་རྒྱུན་བཤད་དོ་བཟུམ་འབད་བ་ཅིན་ ཧེ་མ་གཡུས་ཚན་དེ་ནང་ ལྷ་ཁང་མེད་པའི་སྐབས་ དེ་ཁའི་མི་སེར་ཚུ་ ཤི་གསོན་གྱི་དགེ་རྩ་སྒྲུབ་ནི་ དང་། ཆོས་ཕྱོགས་ཀྱི་ལས་རིམ་ཚུ་ འགོ་འདྲེན་འཐབ་ནི་ལུ་ དཀའ་ངལ་ སྦོམ་ཐོན་སྡོད་ནུག་ཟེར་ཨིན་པས། དེ་ཡང་ འཕྲལ་འཕྲལ་སྒེར་གྱི་ཁྱིམ་ཚུ་བརྙ། འཕྲལ་འཕྲལ་ཞིང་ནང་ལས་ ཕར་ གནས་སྐབས་ཀྱི་གུར་སྤུབས་ཏེ་ འགོ་འདྲེན་འཐབ་སྡོད་ནུག་ ཟེར་ ཨིན་པས། དཀའ་ངལ་དེ་ཚུ་ སེལ་ཐབས་འབད་ནི་གི་དོན་ལུ་ གཡུས་ ཚན་འདི་ནང་ལས་ར་ཨིན་མི་ མཚམས་པ་རྡོ་རྗེ་རྣམ་རྒྱལ་ ཟེར་མི་གིས་ ལྷ་ཁང་ཅིག་གསར་བཞེངས་འབད་ནིའི་ ཐུགས་བཞེད་གནང་ཡོད་རུང་ མི་རློབས་ཉུང་ནི་འདི་གིས་ བཞེངས་མ་ཚུགས་པར་ ལུས་ནུག་ཟེར་ཨིན་ པས།
རབ་གསལ་མེ་ལོང་། 79 ༥.༤ ལྷ་ཁང་བཞེངས་ལོ་དང་། འགོ་འདྲེན་པ། ཨིན་རུང་ ད་ལྟོ་མཇལ་སར་ཡོད་མི་ལྷ་ཁང་དེ་ རང་ལུགས་གནམ་ལོ་ཤིང་ མོ་ལུག་ལོའམ་ སྤྱི་ལོ་ ༡༩༦༧ ལོ་ལུ་ མཚམས་པ་རྡོ་རྗེ་རྣམ་རྒྱལ་གྱིས་ ཐུགས་སྨོན་དང་། གཡུས་འདི་ནང་གི་མི་སེར་ཚུ་གི་ཁ་རྗེ་བསོད་ནམས་ ལས་བརྟེན་ཏེ་ གཡུས་ཚན་དེ་ནང་ལས་ར་ཨིན་མི་ བླམ་ཆོས་སྐྱོང་གྲགས་ པ་ ཟེར་མི་དང་། རྒཔོ་བགྲེསཔོ་བ་ཁུ། དེ་ལས་ཡ་ལང་གཡུས་ཚན་ནང་ ལས་ གཉེན་སྦེ་འོང་མི་ མཚམས་པ་ཤེས་རབ་རྒྱལ་མཚན་གསུམ་གྱིས་ འགོ་འཁྲིད་འབད་དེ་ གཡུས་ཚན་དེ་ནང་མི་སེར་ཚུ་གིས་ རྒྱབ་སྐྱོར་ཐོག་ བཞེངས་ཏེ་ མི་ལོ་༥༢ ལྷག་ཅིག་སོང་ནུག། ༥.༥ རྟེན་གསུམ་གྱི་སྐོར། ལྷ་ཁང་དེ་ནང་ ནང་རྟེན་གཙོ་བོ་ རྒྱུ་སྨན་འདམ་ལས་གྲུབ་པའི་ ཆོས་ ལོངས་སྤྲུལ་གསུམ་ཀྱི་སྐུ་འདྲ་དང་། སྨན་ལྗོངས་འབྲུག་ཡུལ་འདི་ནང་ བཀའ་དྲིན་ཅན་གྱི་བདག་པོ་ ཞབས་དྲུང་ངག་དབང་རྣམ་རྒྱལ། དེ་བཟུམ་ སྦེ་ བུ་ནོར་ཐམས་ཅད་ དར་ཞིང་རྒྱས་པའི་ཐབས་ལུ་ རྗེ་བཙུན་སྒྲོལ་མའི་ སྐུ་འདྲ་དང་། རིགས་གསུམ་མགོན་པོའི་སྐུ་འདྲ། དེ་ལས་ཞི་ཁྲོའི་ལྷ་
རབ་གསལ་མེ་ལོང་། 80 ཚོགས་དང་། གཏེར་གསར་ལྷ་ཚོགས་ཚུ་གི་ལྡེབས་རིས་ཚུ་ མཇལ་ནི་ འདུག། དེ་ལས་བཀའ་འགྱུར་ཚར་གཅིག་དང་། ཆོས་འབུམ། ཉི་ཁྲི། བརྒྱད་སྟོང་ དང་བཅས་པ་ཚར་གཅིག། དེ་བཟུམ་སྦེ་ དགེ་འདུན་དཀོན་མཆོག་གི་ ཚབ་ལུ་ གཙོ་འཛིན་དཀོན་མཆོག་ནོར་བུ་གིས་གཙོས་པའི་ སྒོམ་ཆེན་༡༠ བཅས་བཞུགས་ཏེ་ གཡུས་ཚན་དེ་ནང་ སངས་རྒྱས་ཀྱི་བསྟན་པ་དར་ སྤེལ་ མཛད་བཞིན་འདུག། ༥.༦ དུས་མཆོད་འབུམ་སྡེའི་སྐོར། ལྷ་ཁང་འདི་གིས་ ད་རེས་ནངས་པ་ མི་སེར་ཚུ་གིས་ ཚོགས་བསགས། སྒྲིབ་བྱང་གི་དོན་ལུ་ ཕན་སྦོམ་ཐོགས་ཡོད་མི་དེ་ཡང་། རང་ཟླ་བཞི་པའི་ ནང་ ཆོས་འབུམ་དག་ཚར་དང་ ཆོས་སྐོར། རང་ཟླ་དགུ་པའི་ནང་ བཀའ་ འགྱུར་དག་ཚར་དང་ཆོས་བསྐོར། རང་ཟླ་དགུ་པའི་ནང་ ལྷ་བབས་དུས་ ཆེན་གྱི་ཚེས་བཅུ་དང་། ཟླཝ་བཅུ་གཉིས་པའི་ནང་ སྨྱུང་གནས་དཀརཔོ་ཆ་ གཉིས་ འགོ་འདྲེན་འཐབ་སྲོལ་ཡོདཔ་མ་ཚད།
རབ་གསལ་མེ་ལོང་། 81 ཟླ་རིམ་བཞིན་གྱི་ ཚེས་བཅུ་ཐམ་ལུ་ ཨོ་རྒྱན་གུ་རུ་རིན་པོ་ཆེའི་ དུས་ བཟང་ཁྱད་པར་ཅན་དང་འབྲེལ་ཏེ་ ཆོ་གཔ་ཚུ་གིས་ དྲོ་པ་རི་བོ་བསང་ མཆོད་ལས་འགོ་བཙུགས་ ཉིནམ་གཅིག་གི་རིང་ ཚེས་བཅུ་གནང་པའི་ སྐབས་ གཡུས་ཁའི་མི་ཚུ་ཡང་ དྲོ་པ་ལས་ ལྷ་ཁང་དེ་ནང་འཛོམས་ཏེ་ བཛྲ་གུ་རུ་བགྱངས་སྦེ་ ཉིནམ་གཅིག་གི་རིང་ སྡིག་སྤོང་དགེ་སྒྲུབ་ཀྱི་ལཱ་ ལུ་བརྩོན་བཞིན་འདུག། ༥.༧ ལྷ་ཁང་གི་བདག་དབང་། བཀྲ་ཤིས་ཆོས་གླིང་ལྷ་ཁང་དེ་ ནང་སྲིད་དང་སྲོལ་འཛིན་ལྷན་ཁག་ སྲོལ་ འཛིན་ལས་ཁུངས་ཀྱིས་པར་སྐྲུན་འབད་ཡོད་མི་ འབྲུག་གི་རྫོང་གཞིས་ དང་ལྷ་ཁང་དགོན་སྡེའི་ཐོ་ཡིག་ཟེར་མི་ དཔེ་དེབ་དང་འཁྲིལ་བ་ཅིན་ བདག་དབང་ཧྲིལ་བུམ་ དམངས་ལུ་ཡོདཔ་འབད་ བཀོད་དེ་འདུག། ༥.༨ གདོན་ཕུག་གི་ལོ་རྒྱུས་དང་གཞན། གནམ་ཐིག་གཡུས་ཚན་ནང་འགྱོ་སའི་ལམ་གྱི་ལྟག་ལུ་ གདོན་ཕུག་ཟེར་ བའི་ བྱག་ཕུག་ཅིག་འདུག། སྤྱིར་བཏང་ བྱག་ཕུག་འདི་གི་སྐོར་ལས་
རབ་གསལ་མེ་ལོང་། 82 ཁུངས་གཏུགས་ཀྱི་ཡིག་ཆ་ ཁ་གསལ་ཅིག་ ག་ནི་ཡང་མེད་རུང་། གཙོ་ འཛིན་དཀོན་མཆོག་ནོར་བུ་གིས་བཤད་མི་ ངག་རྒྱུན་ལྟར་དུ་འབད་བ་ཅིན་ ཧེ་མ་གནམ་ཐིག་གཡུས་ཚན་ མ་ཆགས་པའི་སྔ་གོང་ལུ་ ས་གནས་དེ་ ཁ་ལས་ ཕར་ཚུར་འགྲོ་འགྲུལ་འབད་མི་ཚུ་ལུ་ བྱག་ཕུག་འདི་ནང་གནས་ ཏེ་ཡོད་པའི་འདྲེ་གདོན་ཚུ་ དངོས་སུ་ཐོན་འོང་སྦེ་ གནོདཔ་བཀལ་དོ་ཡོད་ པའི་ལོ་རྒྱུས་ ཕམ་རྒན་ཤོས་ཚུ་གིས་བཤད་ནི་འདུག་ཟེར་ཨིན་པས། ཨིན་རུང་ ལྷ་དང་བླ་མའི་ཐུགས་རྗེ་བྱིན་རླབས་དང་ མི་སེར་ཚུ་གི་ཁ་ རྗེ་བསོད་ནམས་ལས་བརྟེན་ཏེ་ གྲུབ་དབང་གྲགས་པ་རྒྱལ་མཚན་ནམ་ མཚན་ཡོངས་གྲགས་ གྲུབ་ཐོབ་ཁི་བཞེས་ཟེར་མི་འདི་གིས་ ཚོང་ཚོང་ མའི་བདུད་དམ་ལུ་བཏགས་པའི་དུས་མཉམ་ལུ་ ས་གནས་དེ་ཁའི་ བདུད་དེ་ཡང་ དམ་ལུ་བཏགས་ཡོད་པའི་ ལོ་རྒྱུས་བཤདཔ་མ་ཚད། ཧེ་མ་འབད་བ་ཅིན་ བྱག་ཕུག་འདི་ཁར་ བླ་མའི་ཞབས་རྗེས་མཇལ་ནི་ ཡོད་ཟེར་ཨིན་རུང་ ད་རེས་ནངས་པ་ ཞབས་རྗེས་འདི་ མཇལ་མི་ཚུགས་ པས། རྡོ་ཕུ་ཅིག་གུ་ བདུད་དམ་ལུ་བཏགས་པའི་ཕྱག་ཐམ་གནང་བཞག་ མི་འདི་མཇལ་ནི་འདུག།
རབ་གསལ་མེ་ལོང་། 83 གནམ་ཐིག་ལས་རོ་ལམ་འོང་སའི་ ལམ་གྱི་ལྟག་ལུ་ རྡོ་ཕུ་ཅིག་གི་ ལོགས་ ཡེ་ཤེས་པའི་སྤྱན་ཨིན་ཟེར་མི་ཅིག་འདུག། འདི་གི་ལྟག་ལས་ ཡར་ རྡོ་ཕུའི་བཟོ་རྣམ་མ་འདྲཝ་ ཡ་མཚན་ཆེ་ཏོག་ཏོ་ཡོད་རུང་ འདི་གི་ སྐོར་ལས་ཁུངས་དོན་ཚུ་ མི་ག་གིས་ཡང་ ར་སྦྲགས་མི་ཚུགས་པས་ཟེར་ བཤད་ནི་འདུག། གནམ་ཐིག་ལས་རྒེད་འོག་ལྟེ་བ་ལུ་འོངམ་ད་ རོ་ལམ་ལུ་མ་ལྷོདཔ་ཅིག་ གི་ས་ཁར་ ལམ་གྱི་ལྟག་ལུ་རྡོ་ཕུ་གུ་ ལག་མཐིལ་གྱི་པར་དོད་རིལ་རི་ ཅིག་འདུག། རྒཔོ་ཆོས་སྲུང་དབང་འདུས་ཀྱིས་ ངག་རྒྱུན་བཤད་པའི་ ནང་གསལ་ སྔོན་མ་མཁོ་ཆེ་ཅིག་ས་གནས་འདི་ཁར་ལྷོད་སྦེ་ ལམ་ལྟག་ ལས་མར་འབབ་མི་ཆུ་འདི་ ལག་གཡསཔ་གིས་ཆུ་བཟེད་སྦེ་འཐུངམ་ད་ ལགཔ་གཡོནམ་ རྡོ་ཕུ་གུ་བཀལཝ་ད་ ཐོན་པའི་པར་ཨིན་ཟེར་ ཕ་མ་རྒན་ རབས་ཚུ་གིས་ ངག་རྒྱུན་བཤད་ནི་འདུག་ཟེར་ཨིན་པས།
རབ་གསལ་མེ་ལོང་། 84 ཟུར་སྦྲགས། ༄༅། །གནམ་ཐིག་དང་། རོ་ལམ་གཡུས་ཚན་གཉིས་ཀྱི་ཡུལ་ལྷའི་ གནས་པོ་བསྐོར་ཕུ་པའི་གསོལ་ཁ་བསྡུས་པ་ནི། ཀྱེ༑ རི་རབ་གླིང་བཞིས་ བསྐོར་བའི་ནགས་ཚལ་དབུས། །བཙན་རྒོད་ཆེན་པོ་གཞི་བདག་སྐོར་ཕུ་ པ། །གཙོ་འཁོར་བྲན་གཡོག་འཁོར་དང་བཅས་རྣམས་ལ། །གསོལ་ལོ་ མཆོད་དོ་བཅོལ་བའི་ཕྲིན་ལས་མཛོད༎
རབ་གསལ་མེ་ལོང་། 130 ཞིབ་འཚོལ་གྱི་ཁུངས་གཏུགས་ཡིག་ཆ། ༡༽ སྡེ་སྲིད་ཁྲི་རབསས་༡༣ པ་ ཆོས་རྗེ་ཤེས་རབ་དབང་ཕྱུག་གི་ དགེ་བའི་ཆོ་ག་རབ་ཏུ་གསལ་བའི་གཏམ་མུ་ཏིག་དོ་ཤལ། དཔལ་འབྲུག་ཞིབ་འཇུག་ལྟེ་བ། ཐིམ་ཕུག། ༢༽ ཀུན་མཁྱེན་འཇིགས་མེད་གླིང་པའི་རྣམ་ཐར། ཡུལ་ལྷོ་རྒྱུད་དུ་ བྱུང་བའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱི་ རྣམ་ཐར་ལེགས་བྱས་ཡོངས་འདུའི་སྙེ་མ། ༣༽ འབྲུག་གི་རྫོང་གཞིས་དང་ལྷ་ཁང་དགོན་སྡེའི་ཐོ་ཡིག། སྲོལ་འཛིན་ལས་ཁུངས། ༤༽ རྒེད་འོག་བདག་སྐྱོང་ཡིག་ཚང་ནང་ཡོད་པའི་ མི་རློབས་དང་ ཁྱིམ་གྱི་གྲངས་རྩིས་ ༢༠༡༩ ཅན་མ། ༥༽ ཟླ་ལམ་སྙན་ཞུ། དུས་མཆོད་འབུམ་སྡེའི་ཁ་གསལ། རྒེད་འོག་ བདག་སྐྱོང་ཡིག་ཚང་ནང་ལས།
རབ་གསལ་མེ་ལོང་། 131 ༦༽ གཡུས་ཚན་ཁག་གི་སྐྱེ་ལྷ་དང་ཡུལ་ལྷ་དཔེ་ཆ། ༧༽ གནས་ཡིག་ཀུན་ཕན་ལམ་སྟོན། བཀྲ་ཤིས་གཡང་རྩེ་རྫོང་ཁག་ འོག་གི། སྲོལ་འཛིན་ལས་འཁུངས། ༨༽ མིང་གནས་གསལ་བའི་འོད་ཟེར། རྫོང་ཁ་གོང་འཕེལ་ལྷན་ ཚོགས། ༩༽ མཚམས་པ་བློ་གསལ་རྒྱ་མཚོའམ་ བསོད་ནམས་རྡོ་རྗེ། བླམ་དྭགས་ཀོང་གི་མི་བརྒྱུད།
རབ་གསལ་མེ་ལོང་། 132 ངག་རྒྱུན་དྲི་བཀོད་ནང་ བཅའ་མར་གཏོགས་མི་དང་ རྒྱབ་སྣོན་གནང་མི་ ཚུ་གི་མཚན་ཐོ། ༡༽ སློབ་དཔོན་ཀུན་བཟང་ཕྲིན་ལས། ཞིབ་འཚོལ་དང་རྩོམ་སྒྲིག་ མཁས་མཆོག ༢༽ རྒཔོ་ཆོས་སྲུང་དབང་འདུས། ཡ་ལང་རྒེད་འོག། ༣༽ ཀརྨ། མེ་ལོང་མཁར་གཡུས་ཚན་ནང་གི་ཆོསཔ་རྒན་ཤོས། ༤༽ གྲུབ་པ། རོ་ལམ་གཡུས་ཚན་གྱི་གཙོ་འཛིན། ༥༽ དཀོན་མཆོག་ནོར་བུ། གནམ་ཐིག་གཡུས་ཚན་གྱི་གཙོ་འཛིན། ༦༽ ཚེ་དབང་རྡོ་རྗེ། ཡེར་འཕེལ་གཡུས་ཚན་གྱི་མི་རྒན།