Skip to main content

ROM_2026_11_10_MM Breil glischa

Page 1

Surselva Tourismus AG Glennerstrasse 22a 7130 Ilanz Schweiz

Tel. 0041 81 920 11 00 Fax 0041 81 920 11 01 info@surselva.info www.surselva.info

Communicaziun allas medias dils 10 da november 2026

Breil glischa beneventa varga 3'500 persunas Breil, ils 10 da november 2026 Il niev festival da glisch ed art «Breil glischa – festival d’illu ed art» presentaus dalla Banca Raiffeisen Surselva mira anavos sin ina premiera da success. Las quater seras da festival dils 30 e 31 d'october e dils 6 e 7 da november 2026 han dapli che 3'500 visitadras e visitaders visitau il vitg da Breil/Brigels. Projecziuns da glisch, installaziuns d'art, musica live e differentas producziuns culturalas han transformau il vitg en ina cuntrada d'art plein atmosfera. Cunzun las projecziuns impressiunontas vid la baselgia ed ina sculptura dalla glina han procurau per muments specials. In vitg ell'enzenna da glisch ed art Duront quater seras han visitadras e visitaders saviu scuvierer en differents loghens accessibels al public ovras d'art da glisch, projecziuns ed installaziuns. Plazs, baghetgs e streglias enconuschentas ein cumparidas en ina nova glisch ed han envidau da contemplar il vitg ord ina perspectiva nunusitada. Il grond resun ha survargau las spetgas dallas organisturas e dils organisaturs. Indigens, secundindigens e hosps dalla regiun han procurau per in’experientscha communabla. «Igl ei bellezia da veser conta glieud che ha dau suatientscha a nies invit e visitau il festival. Grond plascher havein nus che persunas da differentas vegliadetgnas ein vegnidas ensemen ed han scuviert communablamein las installaziuns. Ils biars resuns positivs muossan a nus che Breil glischa ha anflau in plaz special a Breil», di Marina Morgenthaler da Breil glischa. La baselgia sco liug particular digl art dalla glisch Tier ina dallas staziuns las pli impressiunontas udeva la baselgia da Breil. Las projecziuns da glisch han colligiau architectura, glisch e moviment ed han aviert novas perspectivas sil spazi sacral. In'ulteriura attracziun ei ina sculptura dalla glina installada aposta pil festival stada. Cumpletaus ei il gir vegnius entras la sculptura da lenn digl artist indigen Michel Pfister, la sculptura glischonta «Pialeto» sco era projecziuns vid la baselgia, sin plaz scola e vid ulteriurs baghetgs. Musica, fiug e historias sper il fiug Era il program accumpignont ha contribuiu essenzialmein all'atmosfera da festival. Sil plaz Pundual ei il fiug daventaus il liug da sentupada. Las presentaziuns musicalas da Wesan, Argent Vif, Mattiu e JSO Crescendo han procurau per muments da concert varionts. Cumpletau il program han la show da fiug da Herzfeuer, las sculpturas da fiug da Nair Art, las praulas cun Anna Cathomas ed il luvratori da trer schibettas dall’uniun da giuventetgna Danis/Tavanasa. In luvratori da teater cun David Flepp ha plinavon purschiu als affons la pusseivladad da vegnir sezs creativs. Aschia ha Breil glischa cumbinau art da glisch cun musica, fiug e historias e ha scaffiu in liug da sentupada per grond e pign. In festival che reunescha il vitg L'emprema ediziun ha mussau tgei potenzial cultural ch'il spazi public da Breil/Brigels porscha. Significant ei cunzun la collaboraziun denter artists, acturs locals, la scola e la populaziun stada. In exempel special ei il project cullas scolar:as da Breil staus. Els han creau atgnas graficas per ina projecziun da glisch silla fatschada dalla Banca Raiffeisen Surselva. Lur lavurs ein vegnidas projectadas duront omisduas fins d'jamna dil festival sil baghetg silla plazza cumin ed han fatg accessiblas las ideas creativas dils affons e giuvenils ad in publicum vast. Cun pli che 3'500 visitaders e visitadras, contribuziuns artisticas multifaras ed in'atmosfera speciala ei la premiera da «Breil glischa – festival d’illu ed art» gartegiada. Il festival ha mussau co art da glisch e cultura san animar il spazi public e metter ensemen carstgauns.


Surselva Tourismus AG Glennerstrasse 22a 7130 Ilanz Schweiz

Tel. 0041 81 920 11 00 Fax 0041 81 920 11 01 info@surselva.info www.surselva.info

Contact per medias: ● Marina Morgenthaler | Breil glischa – Festival d’illu ed art 079 818 58 56, marina@marinamorgenthaler.ch ● Ann-Cathrin Uhl, Leitung Kommunikation & PR 081 920 11 03, ann-cathrin.uhl@surselva.info

Dapli maletgs: cheu Fontauna dils maletgs: Breil glischa, Larissa Cathomen

La Surselva: Ina destinaziun turistica dominanta dallas Alps orientalas duront igl entir onn. La destinaziun turistica Surselva ha da porscher bia: in mund alpin impressiunont, attractivs territoris da skis e plazzas da golf, la spectaculara Ruinaulta cun in dils pli bials segments dalla Viafier retica, l'enconuschenta planira aulta dalla Greina, la Val Frisal, la vasta cultura, il lungatg romontsch sursilvan ed il tudestg dils gualsers, uniuns activas, las grondas occurrenzas culturalas open air Lumnezia ed opera viva, ils bials vitgs autentics ed intacts cun perlas architectonicas, il center regiunal da cumpra a Glion cun siu marcau vegl particular sco er ina populaziun hospiteivla. www.surselva.info


Turn static files into dynamic content formats.

Create a flipbook