Skip to main content

ROM_2026_10_27_MM Breil glischa

Page 1

Surselva Tourismus AG Glennerstrasse 22a 7130 Ilanz Schweiz

Tel. 0041 81 920 11 00 Fax 0041 81 920 11 01 info@surselva.info www.surselva.info

Communicaziun allas medias dils 27 d’october 2026

Breil glischa festivescha questa jamna premiera Breil, ils 27 d'october 2026 Venderdis entscheiva a Breil il niev festival da glisch ed art «Breil glischa – festival d’illu ed art», presentau dalla Banca Raiffeisen Surselva. Duront quater seras vegn il vitg animaus cun projecziuns da glisch, objects d'art, musica live, shows da fiug ed ulteriuras producziuns culturalas. In dils puncts culminonts vegn ad esser ina projecziun che scolar:as da Breil han creau per illuminar la fassada dalla Banca Raiffeisen Surselva. Projecziun sin la fassada dalla Banca Raiffeisen Surselva Affons dalla vischnaunca da Breil han creau las graficas per la projecziun. Duront il festival vegnan lur ovras projectadas sin la fassada dalla Banca Raiffeisen Surselva, aschia ch’il baghetg famigliar el center dil vitg cumpara en tut ina nova glisch. «Nus havein grond plascher dalla collaboraziun cun la scola da Breil e selegrein da veser las differentas creaziuns. Scolars:as san contribuir lur atgnas ideas e daventan aschia part dil festival», di Bettina Seiser da Breil glischa. La collaboraziun cun la scola da Breil creescha el medem mument ina colligiaziun denter il festival ed il vitg. Affons e giuvenils survegnan la pusseivladad da gidar a formar il spazi public e da presentar lur lavurs ad in vast publicum. Art da glisch, musica e sentupadas el vitg Sper l‘illuminaziun dalla Banca Raiffeisen Surselva dat ei aunc bia auter da scuvierer e far smarvegls duront las quater seras da festival. Denter auter vegnan la baselgia, il plaz da scola ed ulterius loghens animai cun projecziuns ed objects d'art. Cumpletaus vegn il gir tras il vitg d’ina sculptura da lenn da Michel Pfister e la sculptura glischonta «Pialeto». Ils differents posts laian reviver loghens enconuschents a moda nunusitada ed extraordinaria ed envidan da schlendergiar tras streglias illuminadas e da scuvierer il vitg ord ina nova perspectiva. Vinavon procura il program da rama per muments supplementars da sentupada. Sper il fiug da camp sil plaz Pundual sunan Wesan, Argent Vif, Mattiu e JSO Crescendo. Leutier vegn ina show da fiug da «Herzfeuer», praulas cun Anna Cathomas, las sculpturas da fiug da «Nair Art» sco era in luvratori da teater per affons cun David Flepp. Ils concerts, las historias e las producziuns cumpleteschan las ovras d’art e creeschan in liug cunscient da restar e smarvegliar. Suenter ina spassegiada tras las gassas illuminadas san ils visitaders:as sescaldar sper il fiug cun ina bubronda caulda e guder la sera da cumpignia. Premiera per Breil/Brigels Cun «Breil glischa – festival d’illu ed art» nescha a Breil in niev festival che duei duront quater seras far la punt denter art, glisch e cultura el vitg. Las differentas staziuns envidan da scuvierer, star e s'entupar. «Nus lein crear cun Breil glischa in'occurrenza che reunescha indigens, secundindigens e hosps e che lai cumparer nies vitg en ina nova glisch», di Silvan Gabriel da Surselva Turissem. Datas ed informaziuns per representants:as dallas medias Il festival «Breil glischa – festival d’illu ed art» ha liug ils 30 e 31 d'october sco era ils 6 e 7 da november 2026 mintgamai il venderdis e la sonda dallas 17.30 entochen las 22.00. Las visitadras ed ils visitaders da Breil glischa san selegrar sin projecziuns da glisch, objects d'art, musica live, shows da fiug ed ulteriuras producziuns culturalas en differents loghens accessibels publicamein el vitg da Breil. Il program cumplet ei publicaus sin www.breilglischa.ch.


Surselva Tourismus AG Glennerstrasse 22a 7130 Ilanz Schweiz

Tel. 0041 81 920 11 00 Fax 0041 81 920 11 01 info@surselva.info www.surselva.info

Contact per medias: ● Marina Morgenthaler | Breil glischa – Festival d’illu ed art 079 818 58 56, marina@marinamorgenthaler.ch ● Ann-Cathrin Uhl, Leitung Kommunikation & PR 081 920 11 03, ann-cathrin.uhl@surselva.info

Dapli maletgs: cheu Fontauna dils maletgs: Surselva Tourismus AG

La Surselva: Ina destinaziun turistica dominanta dallas Alps orientalas duront igl entir onn. La destinaziun turistica Surselva ha da porscher bia: in mund alpin impressiunont, attractivs territoris da skis e plazzas da golf, la spectaculara Ruinaulta cun in dils pli bials segments dalla Viafier retica, l'enconuschenta planira aulta dalla Greina, la Val Frisal, la vasta cultura, il lungatg romontsch sursilvan ed il tudestg dils gualsers, uniuns activas, las grondas occurrenzas culturalas open air Lumnezia ed opera viva, ils bials vitgs autentics ed intacts cun perlas architectonicas, il center regiunal da cumpra a Glion cun siu marcau vegl particular sco er ina populaziun hospiteivla. www.surselva.info


Turn static files into dynamic content formats.

Create a flipbook