Communicaziun allas medias dils 08 da settember 2025
Culla Via Glion atras vischnaunca
Glion, ils 08 da settember 2025
Tgei colligia las 13 fracziuns dalla vischnaunca dad Ilanz/Glion e co san ins percepir lur historias?
La Via Glion ei ina senda da viandar d'etappa che scaffescha precis quella colligiaziun. Sin siat etappas meina ella tras tuttas fracziuns dalla vischnaunca dad Ilanz/Glion. Per che la colligiaziun gartegi meinan las sendas da viandar era tras las vischnauncas vischinontas da Breil e Lumnezia. Da niev ei l'emprema etappa Glion-Ruschein-Ladir-Siat vegnida munida cun tablas informativas. Ellas rendan buca mo vesiblas la Via Glion, mobein fan quella era evidenta.
Ina via che metta ils vitgs el center
La Via Glion meina buca sillas sendas sper ils vitgs ora, mobein sapientivamein atras las differentas fracziuns. La finamira ei d'augmentar la valur dils singuls loghens, d'accentuar lur particularitads e da rinforzar medemamein l'unitad dall'entira vischnaunca. La ruta colligia vias enconuschentas cun perspectivas surprendentas e possibilitescha aschia in eveniment da viandar cumplessiv tras la cuntrada culturala variada dalla Surselva.
Novas tablas raquentan historias veglias e novas
Sill'emprema etappa denter Glion, Ruschein, Ladir e Siat envidan novas tablas d'informaziun da sefermar e scuvierer. Mintgina dallas tredisch tablas intermediescha caussas interessantas davart l'historia, la cultura ni las atgnadads localas. Anna Catrina, la feglia fictiva da Glion, accumpogna ils viandonts cun historias scharmantas per tudestg e romontsch. Cun ils codes da QR san ins activar contribuziuns auditivas ch'informeschan a moda divertenta davart loghens, edifecis e persunas perliung il tschancun. Duas tablas panoramicas cumpletteschan igl eveniment cun vestas e decleraziuns impressiunontas davart la cuntrada circumdonta.
La visiun daventa realitad
La Via Glion ei concepida sco project sur plirs onns. Igl ei planisau da cumplettar mintg'onn in'ulteriura etappa cun tablas d'informaziun. Aschia resulta ina reit da sendas ch’envida ton indigens sco era hosps da scuvrir la vischnaunca a moda viandonta e da veser quella cun novs egls. L'emprema inspecziun ufficiala dall'etappa nova ha liug sonda, ils 13 da settember 2025 el rom dall'occurrenza "aktiv a Glion". L'Uniun “a Glion” organisescha quei di d'aventuras cun activitads multifaras el contuorn dalla vischnaunca dad Ilanz/Glion. La spassegiada sill'emprema etappa dalla Via Glion ei in punct central dil program e porscha la caschun da scuvierer communablamein las tablas, las historias e l'idea davostier.
In project cun bia cor ed olma
Alice Bertogg, responsabla per la cultura tier Surselva Turissem SA, ei satisfatga dalla nova senda culturala: «Culla Via Glion creein nus ina nova moda d'experimentar nossa regiun, datier allas persunas, alla historia ed amiez ils loghens. Ils viandonts van da fracziun a fracziun e scuvieran aschia la diversitad culturala da nossa vischnaunca. Il project colligia, captivescha e fa marveglias sin dapli." Alice Bertogg ha concepiu tut ils cuntegns dallas tredisch tablas e meina era vinavon il project dalla Via Glion. Quella senda contribuescha al svilup turistic e cultural dalla regiun e scaffescha ina schientscha per la diversitad e per las atgnadads dils vitgs che fuorman communablamain la vischnanca dad Ilanz/Glion.
Contacts per medias:
● Alice Bertogg, menadra biro d’informaziun e responsabla per la cultura Surselva Turissem Glion, 081 920 11 05, alice.bertogg@surselva.info
● Ann-Cathrin Uhl, communicaziun Surselva Turissem SA 081 552 02 03, ann-cathrin.uhl@surselva.info
Ulteriuras fotografias
fontauna: Surselva Tourismus AG
La Surselva: Ina destinaziun turistica dominanta dallas Alps orientalas duront igl entir onn
La destinaziun turistica Surselva ha da porscher bia: In bellezia mund alpin, territoris da skis attractivs, plazzas da golf, la Ruinaulta cun in dils tschancuns ils pli attractivs dalla Viafier retica, l'enconuschenta planira aulta dalla Greina, la Val Frisal, la cultura viva ed ils lungatgs singulars dil romontsch sursilvan ed il tudestg dils gualsers, uniuns activas, las grondas occurrenzas culturalas open air Lumnezia ed opera viva, ils bials vitgs autentics ed intacts cun perlas architectonicas, il center regiunal da cumpra a Glion cun siu marcau vegl particular sco er ina populaziun hospiteivla, tier la quala appartegnan ton ils indigens sco era ils segundindigens.
www.surselva.info