rikala gering agung (Ketut Sugiartha

Satua Cutet

rikala gering agung

Sumingkin liu anaké katularan Covid-19 Mita sumingkin degdegan.

Suba bakat baana narka yéning tongosné ngalih pangupa jiwa tuah

ngantiang galah lakar sumurup. Eda-eda bisa jelékan tekén

bancana Bom Baliné ané suba liwat.

Ketut Sugiartha

Suba takeha tusing ja buin makelo pegawé-pegawéné lakar marérén magaé patuh buka pegawé di hotél-hotél ané lénan. Ia nyapnyap meték dina buin pidan ya lakar kena giliran marérén magaé. Tamiu ané nginep di hotél tongosné magaé sayan ngamedikang. Tusing kuangan masi ané buung mesen kamar.

Sebet ia ngenehang lakar ngalahin Bali. Suba telung tiban ia marasa sanget bagia. Tusing ja tuah ulian maan gaé di nusa ané tan péndah swargaloka di gumi, nanging masi mapan ia sida kacunduk ajak Baskara, teruna ané aptianga lakar ajaka bareng-bareng natakin tis-panes idupé. ***

Angayubagia ia sida selamet neked jumahné di Tangerang satondén PPSB kajalanang. Ia lega sida mapupul buin ajak méméné ané kaukina Mama lan

Rangga, adiné ané nu kuliah. Sakéwala sayan makelo, ngoyong jumah dogén karasa ngemedin. Gering agung ané sedeng nglambuk tusing buungan ngaé keneh osah. Mama, ané biasané ijek madagang roti di tokoné di mal, jani iteh di paon ngaé jaja buka ipidan dugas nu madagang jaja di malun umahné. Rangga ané suba lakar tamat uli kuliahné di Fakultas Ilmu Komputer sadinadina pragat negak di malun laptopné. Lan Mita, mapan tusing kapineh baana lakar nyemak gaé apa, tusing kenyel-kenyel mamaca novel daring di hapéné.

Petengé ento Mama, Mita lan Rangga negak bengong ngarepin meja yadiastun piringné suba pada puyung. Suba pada suud madaaran. Makatelu marasa nyapnyap mapan suba abulan tusing ngudiang-ngudiang. Kénkén ya panadiané yéning makelo sajan lakar buka kéto? Telung bulan, enem bulan, nyén nawang bisa lebih?

Mama nyapnyap krana tabungané sayan ngamedikang. Sasukat tokoné manutup sinah tusing ada sekaya buin. Mita tusing sanget ngenehang mapan ia nu maan bayahan uli hotél yadin tusing patuh tekén gajihné. Rangga tuah bisa mendep nerima kahanan ané tusing bakat baana ngitungang.

“Mama sing kal ngaé jaja buin,” Mama macempléng.

“Adi kéto?” Mita matakon.

“Lakaré telah.”

“Ngudiang mara ngorahang?”

“Mama suba ngekoh. Jaja ané gantung Mama di malun umahé tileh. Mirib

suba pada med naar jaja.”

Mita prihatin nepukin semun méméné urem. Suba kapineh baana Mama lakar stres yéning tusing ngudiang-ngudiang. Ento pastika lakar makada bayuné enduk lan aluh katularan virus.

“Mama eda suud ngaé jaja,” Mita mapangidih.

“Kadén Mama suba ngorahang, lakaré telah. Buina yén terus ngaé jaja

nyén lakar naar?”

“Iraga jak makejang.”

“To gén jajané nu matumpuk sing ada nak ngrunguang.”

Mita dadi inget ajak Papa ané suba ngalahin makudang warsa ané suba liwat ulian sakit jantung. Aget Papa liu maan pertanggungan asuransi. Yén tusing kéto sinah kahanané jelék sajan. Bisa dogén baas lakar jakan buin mani tusing ngelah. Angayubagia sajan ia mapan nu ngelah simpenan pipis.

“Eda ngambul kéto, Ma. Papa kadén taén ngorahang, nak makejang lakar

melah dadiné yéning iraga jemet ngrastiti tur setata mapineh ané melah.”

Suud ngaraos buka kéto Mita matingtingan uli kursiné. Piring lan cawan di duur méjané makejang punduhanga tur abana ka paon laut umbaha.

Ngantiang kiap, buka ané suba-suba, Mama negak di kursi di malun tipiné lan Rangga buin mukak laptopné. Mita ané suba macelep ka kamarné di lanté dua laut ngerékang kordén jendélané meled nepukin kahanané diwang.

Di langité ba dangin ngenah bulané buka nglangi duur ambuné ané putih tipis. Nadaksara Mita inget tekén wawengkon Sun Set Road, tongos ia ajak Baskara taén ngrasanin renyahné bé bébék di restoran ané ada ditu rikala bulané masunar galang. Tongosé ento tusing ja lakar taén engsapanga sakayang-kayang mapan ditu panyumuné Baskara ngorahang tresna tekén paukudané.

“Sedeng ngudiang ya Baskara jani? Mirib tusing ja kija-kija.” Kéto Mita

ngaraos ajak déwékné padidi. Ia nawang kénkén sima krama di nusa tongosné magaé. Yén tusing ada ané sarat sajan, makejang pastika sumuyud ngoyong jumah nganutin protokol kesehatan. Baskara ulesné tusing marasa wadih mapan kulawargané ngelah karang umah linggah. Lén sajan ajak umah kulawargané Mita di kompleks perumahan di kota ané karangné cupit sajan. Yéning kahanané normal sinah Mita suba malali ka mal utawi nyinggahin umah timpal-timpalné. Jani ia tusing nyidang kija-kija mapan kahanané jelék sajan. Gering Agung Covid-19 sedeng nglambuk.

Rikala Mita sedeng mecik-micik hapénné, nadaksara ada anak nélpun. Lan kabenengan Baskara ané nélpun.

Wayan Jengki Sunarta