tunangan (Kadék Arya Darsana

Satua Cutet

tunangan

Girang nyingakin yén suba marérod ajaka dadua, mula sakadi

Ratih lan Samara, solah lan parilaksana nganutin ané madan

sesana, dabdab baan mamunyi, alus baan paras miwah demen masih

manyama braya, kanti sakancan anak ané ajaka nau tur makita

sabilang wai bareng tekén Luh Panti lan Putu Adi.

Kadék Arya Darsana

Luh Panti sareng Putu Adi suba paak saking dumun, daweg I Luh Panti dados mahasisya. Ia sasai bareng-bareng ngamargiang swadharma napi malih wénten parikrama, galah punika sané mula kaarepangnyané mangdané polih kacunduk yadiastun wantah nyidayang mabaosan manten, nanging ento suba ngaranayang timpal-timpalné iri baan adungné punika.

Polih baosanga sampun matunangan I Luh Panti tekén Putu Adi ajak timpalné kanti angob pituduh lan sasimbingnyané, napi mawinan sakadi punika, napi punika sané kabaosang “gosip” nénten ja ngawag timpalné mamunyi, duaning solah miwah parilaksana ia ajaka dadua suba cingakina nyiriang sakadi anak sané sampun matunangan.

Luh Panti sareng Putu Adi tusing ja éngal-énggalan lakar matunangan, duaning ia nyingakin galah sané becik ngenehang masih saja tusing ia ajak dadua seken tekén samaya, mangdané nénten ja sawates munyi manten, mangdané wénten cihna ia ngamargiang tresna.

Sampun mawasta sué ngamargiang pendekatan nuju rahina Valentiné Luh Panti sareng Putu Adi malali ka pasisi ajaka dadua masambilan ngalimurang manah, ditu lantas ia ngadungang rasa lan pikayun sané jagi ngamargiang tresna. Rasa bangga nimpalin kenehné ajaka dadua sangkaning ia suba nyidayang matunangan.

Wayan Jengki Sunarta

Tan sida baan maosang, tan sida baan ngenehang, sasukat ia matunanan ritatkala ngamargiang swadharma miwah ngamargiang parikrama saian nincap punika duaning ia sasai marérod bareng-bareng ajaka dadua, rasa bagia satata manimpalin manah Luh Panti lan Putu adi.

Luh Panti sareng Putu Adi sané pateh kari ngamargiang swadharma dados mahasisya, punika tusing ja sebet baan maosang yadiastun Luh Panti dumunan tamat ring Perguruan Tinggi nanging Putu Adi kari ngamargiang swadarma

dados mahasisya semester tiga sané silih sinunggil Perguruan Tinggi ring Buléléng.

Sausan tamat ia gangsar pisan ngarereh karya, sasukat makarya punika ia nénten nyidayang sesai matemu ajak tunangané nanging tresnané ipun tetep mamargi, yéning sakadi mangkin chating ring WhatsApp, nelpon miwah vidio call punika sasian kanggén ngubadin isengné. Ritatkala wénten galah sané lebihan ditu mara ia nyempatang raga mangdané polih matemu ajak tunangané.

Sasampuné matemu sareng tunangané saget suba tusing cara biasané. Luh Panti ngarasayang ada ané malénan sagétan makadua bengang-bengong tusing pesu saut. Makadua cara badogol. Makadua nguntul tanah mabalih abu ané kaberanga tekén angin.

“Hmmm Bli… tiang masih tusing ngerti tekén unduké ané jani,” kéto Luh Panti makaengan.

Luh Panti makeneh dumadak ja tresnaé tusing cara kéné. Dumun iraga satata adung pakedék pakenyum, pedih ritatkala nemu pikobet, ngeling yéning suba tusing nyidayang nanggehang sebet, suka, duka, lara, pati karasa suba ngidayang liwatin iraga.

“Nah yén kéto Luh, bli ngidih pelih ngaénang iraga buka kéné. Nah Luh dadiké Bli matakon tekén I Luh, tuturang apa ané ngaranayang unduké buka Janiné?” Sambilang nlektekang paningalané Luh Panti.

“Duuuh Bli sampunang ngaraos sakadi punika, Bli tan wénten kaiwangan sareng tiang, tiang puniki sujatiné ngaturang suksama tekén Bli sawiréh sampun dabdab nasarin tiang, sampun prasida nerima jelé melah lan kakirangan tiang, sai ngorain yéning tiang wénten kaiwangan. Nanging sané pedih tiang ngorahang sasukat mangkin makarya tiang saian kenjel tur galahé masandekan punika kaanggén ngaryanin karya sané patut kakaryanin. Ampurayang déwék tiang sané tan prasida masadu ajeng miwah sai matemu Bli,” cawis Luh Panti sambilanga ngisiang limané Putu Adi.

“Nggih yéning sakadi punika bli ngerti tekén unduk adi. Nanging élingang tekéning samaya iraga dumun, sakadi napi pamargi tresna iraga élingang manten magatra duaning nika pinaka benang sané ngaé tetep majalaran sakadi baos sané sampun lintang dumadak tresna iraga tan sakadi unduk puniki mangdané tetep ngalantur sakadi sané kaaptiang,” Putu Adi nimpalin.

Sausan matemu punika rasa lega kenehné I Putu Adi duaning ia sampun polih masatua sareng Luh Panti, nanging jelé baan ngorahang di kenehné enu masih ada ané makada ngaé matanggu di kenehné. Ané makada punika nénten lianan wantah tresnané kapining Luh Panti. Kénkén ja lakar pajalan tresnané, matuuh lantang ja apaké lakaran cutet.

Tan ja kanti dawa satauné I Luh Panti ngajak Putu Adi, napi sané dadosanga pikobet sareng Putu Adi saian nepén duaning Luh Panti sakadi ngelidin Putu Adi, mula manis bibihé mamunyi dugas matemu sareng Putu Adi, mula polos sebengné Luh Panti dugas ngorahang satya lakar masamaya tekéning Putu Adi, polos ngorahang maimbuh ngacepang tresnané puniki mangda ngalantur tur matuuh lantang.

Nanging sebet yéning tuturang, Putu Adi maan orta sané boya kakenehang uli timpalné ané maadan Gilik, Luh Panti kapituduh madué anak muani lén, sangkaning I Gilik puniki nepukin tunangané Putu Adi puniki mafoto bareng ngajak anak muani di Facebook ané ngaranayang ia percaya krana misi saling gisi lan saling gelut punika ané édéngine fotoné ento ka Putu adi tekén I Gilik. Miiiih… prejani kebus tangkahné Putu Adi sausan nyingakin fotoné ento.

Runtag bayuné Putu Adi, sarasa idup tan paguna, sakadi jadma sané keni pastu, napi puniki kabaosang karma, napi puniki sané ngaranayang iraga mangda mabinayan. Yéning sakadi puniki polah palih pamargi trenané ipun lascarya. Yadiastun ja tusing nyidayang masikian sareng Luh Panti, polih matunangan ngajak Luh Panti dogén ia suba marasa bangga duaning Luh Panti anak luh jegég putih kedas, sakancan anak muani maekin ngajakin matunangan krana ia polos.

Aget masi ada I Gilik ané sai nabdabin Putu Adi, mangdané ia tusing nyemak gaé ané tidong-tidong. “Ampura yéning tiang sané ngaranayang pejalan tresnan Putu sakadi puniki. Pedih seken pedih tiang nyambatang undukné ento ka Putu, yéning tan sakadi punika tiang masatua ngajak Putu buin nyangetang sebet tiangé nyingakin timpal pedidi mitraina tekén anak muani ané tusing nawang unduk.”

“Tu… da malu masumangsaya buka kéto, lan tegarang jani alihin apa ané makada Luh Panti mafoto ngajak anak muani lénan,” pidabdab Gilik tekén Putu Adi.

“Kal alihin cara kénkén buin Lik, suba ja ia nyemak gaé ané kéto kan suba tusing rungu dadiné kén raga.”

“Nah apangné maan masekenan tekén Luh Panti saja tusing ia buka kéto.”

“Duuh Gilik, bang suba ia kéto asalké tusing di arepé tepukin,” saut Putu Adi ané karasa tusing buin rungu tekén Luh Panti.

“Cai tusing dadi kéto ngomong, kondén karuan pelih benehné ia buka kéto cai nak suba ngénggalang dogén tusing rungu,” bangras pasautné Gilik.

“Lik… yén dadiké orahang raga nak tusing nu demen tekén Luh Panti, krana demen ragané tuah ngajak Gilik. Raga tresna ajak Gilik,” ucap Putu Adi tekén Gilik.

Gilik makesiab. Putu Adi makenyem tur ngembel liman I Giliké. Makadua saling tolih. Laut….

Kadék Arya Darsana, mahasiswa ring STAHN Mpu Kuturan Singaraja