surat muani sing bisa nyurat (I Gusti Lanang Sutéja Naréndra

Isin Gumi

surat muani sing bisa nyurat

I Gusti Lanang Sutéja Naréndra

Ratu Ayu kamemegan. Ida nampi surat mawarna barak nguda, mambu miik sumirit. Pasti surat cinta! Nyén ya mirib ada kayun, ada keneh tekén Ida? Mara munggah aném, caya listu ayuné nedeng masunar galang.

Ngetor tangan Idané mesuang suraté uli kantong rok biruné. Ngebit lantas ngawacén.

“Ratu Ayu, tiang demen ring Ratu. Kayun Ratu dados tunangan tiangé?”

Kéto dogén isiné. Sing misi rayuan, sing misi basa basita ané lengut. Bablakasan dogénan. Sada tulisané... Déwa ratu... Kéhkéh siap lumbih bangkung! Tulisan murid SMP nénénan?

Ida bengong, nelektek kertas suraté ento. Sagét Ida ica engkel.

“Hahahaha...I Baglug ngirimin surat. Hahaha...” kéto Ida icané tan pepegatan.

I Baglug parekan Idané uli SD. Ngiringang kangin kauh, kaséréh kéné kéto. Awakné siteng welikas, mawanan sing ada anak juari. Ia dadi body guard né Ratu Ayu. Sing ada nak bani ngéndah tekén Ida di sekolah, wiréh I Baglug galak pesaja. Sakéwala belogné I Baglug madugal. Kanti tambis truna di SD, tondén masi bisa nulis, mamaca miwah ngitung. Lulus SD, ulian jambotné maténgténg, bisa masi ulian guruné suba med nepukin ia di sekolah.

“Ratu Ayu, tulungin ja tiang mangda polih nilai ji lima manten. Ampunang lebih. Nyanan nénten guguna tiang nué pakaryané!” Taén kéto pinunasné I Baglug tekén Ida dugasé ulangan. Ida arsa ngicén jawaban. Piiiihhh... suud ento, nikaina ngujang ja, karsaina apa ja, jag ésrég ia majalan. Ratu Ayu, lédang. Nué parekan buka I Baglug, sujati andel. Kija ja Ida, ngujang ja, pastika I Baglug ngiringang.

Jani suba pada SMP, sagét I Baglug ngirim surat cinta tekén Ida. Juari pasaja! Miribké uli SD sujatiné ia ada keneh, mawanan nyak dadi body guard Idané? Ah... Ento sing penting. Patakoné ané penting: nyén ané nulisang ia surat? Suba wikanin Ida ia sing bisa nulis.

Buin telektekang Ida suraté ento. Tulisané péngsang péngsong, hurufné sing mapinda. Béh pastika suba ené tulisané I Baglug.

Tresna mula buka tuaké semedah. Ia nyidang ngawinang wanén, ngawinang lagas, ngawinang anaké marasa dueg. Mirib kéto ané rasananga tekén I Baglug. Ia punyahang tresna! Mawanan sing nyikutang déwék. Nulis sing kaduman, jani pangkah cumangkah nulis surat cinta. Sidaké pabesen trenané lakar neked, ulian tulisan kéhkéh siap buka kéto? Joh para!

Di ajeng idané liwat I Baglug. Peluh pidit, kabilbil liatné baag jengah. Ida nelektek paningalané I Baglug. I Baglug nguntul.

“Yan... saja né?” kéto Ida matakén. I Baglug manggutan, ngetor tan sipi. Ida sing nganika buin, metangi lantas mamargi ngalahin I Baglug bengong

puyung.

Betén punyan jepuné Ida mararian. Nekep dada, buka ngamel papusuhé tambis kelés.

Ah... Dadi tumbén Ida ngarasayang buka jani. I Baglug bagus pasaja!

(Macang Rumah Cinta Seribu Jendéla)

I Gusti Lanang Sutéja Naréndra

magenah ring Macang, Bebandem, Karangasem. Satuanyané prasida kawacén ring facebooknyané.