Prayle

Lectio Divina

An asin mahalaga sa pagtaong namit sa kakanon. Ginagamit man ining pampalawig kan buhay kan sira o karne. Asin dawa ngani mahaldat, nakakatabang ini sa pagpapila nin lugad. Bilang mga Kristyano, an satong mga gibo nakakadarang namit sa banwaan. Nakakapalawig asin nakakapadanay man kita kan iribanan. Asin nakakapila nin mga lugad sa paagi kan satong mga mahaldat na mga pagirumdom sa mga napapasala.

Sa pànong paagi ako nagigin asin kan kinaban?

“Kamo an ilaw kan kinaban.”

Dawa sadit an liwanag, an bituon nakakataong liwanag sa kinaban. An bulan nakakataong liwanag sa kabanggihan. An pagtukdo ta, pagpaliwanag, asin paghulit— gabos ini nakakataong liwanag sa kalag kan satong kapwa. Nawawara an satong pagigin liwanag kun dai kita nagtataram, dai naghihiras kan satong mga nanunudan sa Kagurangnan. An satong marhay na padara nakakatao man nin Liwanag.

Sa pànong paagi ako nagigin ilaw kan kinaban?

“Ibinubugtak ini sa patugmadan tanganing magdarang liwanag sa bilog na harong.”

Sayang an pagtukdo kun ini yaon sa salang lugar, sa dai nahihiling o nadadangog. Sayang kan dunong kun ini natatakupan nin takot asin supog. Mahalaga na masabutan tang marhay kun sain mapapakinabangan an satong mga katukduan. An mga propeta nagtaram. Si Juan nagtaram. Asin dawa sinda hinulitan nin kagadanan, dai sinda natakot na ibugtak an katukduan sa tamang lugar—sa lugar na sinda madadangog kan kinaban.

Sain ko nagampanan an pagigin propeta para sa sakong pamilya asin banwaan? Ano si sakong kasakitan? h Fr.

W.J.S. Tria

ngunyan sa telebisyon nadadalan nyato an Maria Clara at Ibarra na susog sa mga nobela ni sinurat ni Jose Rizal, ang Noli Me Tangere asin El Filibusterismo. Sa istorya kaini, kadakol kitang nahihiling na mga prayle, na sa kadaklaan na oras satuyang binibisto na kontrabida, arog ni Padre Damaso asin Padre Salvi. Alagad kun hihilingon na an gabos na prayle siring sa duwang ini, kita nasasalang maray, ta ugwang mga prayle na marahay asin saro na dyan si San Pedro Bautista.

Sya iyo an patron kan satuyang Arkidyosesis. Sya nagmukna nin mga simbahan asin banwaan arog kan Quipayo saka Baao. Iyan ginibo nya bako sana sa Bikol kundi sa manlain-lain pang lugar. Nagbilog sya nin komunidad, nagtukdo, asin urog, sa gabos sya nagmakulog.

PAGHUROPHUROP

Saro sa mga hilang na lakop ngunyan sa sosyudad iyo an pagigin mayong pakiaram. Dawa may nahihiling nang sala o maraot, mayong pakilabot. Iyan sarong makamundo na realidad ngunyan sa kinaban, asin iyan nagtatao nin pagsakit asin pagtios.

Saro siguro sa rason kun tano iyan nangyayari iyo an kaisipan na dai makiaram para dai maapektaran. Takot magdutdot ta takot maatian, takot magtaram ta takot mataraman. Kun arog kaiyan an pag isip ni San Pedro Bautista, siguro an mga agta sa Zambales na saiyang tinabangan, urobos na. Siguro, an mga banwaan sa Bulakan, Morong, asin Laguna, dai na mukna.

Marhay na sana si San Pedro Bautista may totoong pagmakulog asin ini an nagdara saiya para gibuhon an gabos na mga bagay para sa karahayan kan gabos asin kaumawan sa Dyos. Kung kaya dawa an saiyang sadiring buhay saiyang idinusay para sa Dyos asin sa saiyang Simbahan.

Iyan si San Pedro Bautista, bida, bakong kontrabida. Asin inaagyat kita na maging siring saiya. May pagkamuot para sa kapwa asin para sa Dyos, pagkamuot na nahihiling sa gibo arualdaw, pagkamuot na nagbubukas kan mata para mahiling an pangangaipo kan iba, asin pagkamuot na nag-uunat kan kamot para tumabang sa mga na ngangaipo.

Kaya kung gusto nyato magin bida, aruga si San Pedro Bautista, para makaiba kita saiya sa Kahadian nin Dyos. Amen. h Rev. Dominic Llaguno sa isyung ini kan Pailihan, paghuruphurupan ta na may mapagpasalamat na puso an mga tawong nagigin burabod kan satuyang kaugmahan. Sa tabang kan mga hurup-hurop na ini nin mga hoben na kaayon kan satuyang parokya, lugod madara kita gabos sa pagpagimaaw kan satuyang sadiri sa mga tawong nagin sagurong nin pagkamuot, pagmakulog, kaugmahan na mga balaog nin Kagurangnan.