Issuu

Plattdütsch Blaumen – Bauk XII

PLATTDÜTSCH BLAUMEN Bauk XII Herausgegeben vom

Bund Niederdeutscher Autoren e. V.

Schibri-Verlag

Strasburg • Milow

Plattdütsch Blaumen – Bauk XII

Bibliografische Information der Deutschen Bibliothek Die Deutsche Bibliothek verzeichnet diese Publikation in der Deutschen Nationalbibliografie; detaillierte bibliografische Daten sind im Internet und über http://dnb.de abrufbar © 2016 by Schibri-Verlag • Milow 60 • 17337 Uckerland Tel.: 039753/22757, Fax 039753/22583 E-Mail: info@schibri.de http://www.schibri.de Alle Rechte vorbehalten. Dieses Buch darf nur nach vorheriger schriftlicher Zustimmung des Verlages vollständig oder teilweise vervielfältigt werden. Das gilt auch für die Speicherung in einem Datenerfassungssystem und die Weiterverarbeitung mit elektronischen oder mechanischen Hilfsmitteln, wie Fotokopierer und andere Aufzeichnungsgeräte. Insbesondere die Übersetzung und Verwendung in Schulungsunterlagen bedürfen der Genehmigung. Alle Rechte vorbehalten Printed in Germany ISBN 978-3-86863-175-3

Plattdütsch Blaumen – Bauk XII

WAT IN DIT BAUK STEIHT ’n Wurt vörweg Festvördrag – 25 Johr Plattschriewerbund Wolfgang Mahnke Hellmut Hillmann Hellmut Hillmann Edeltraud Richter Dieter Lockenvitz Dieter Lockenvitz Edeltraud Richter Edeltraud Richter Edeltraud Richter Horst Gädert Hans Wilken Uwe Snopkowski Siegmund Olm Siegmund Olm Jens Völter Jens Völter Siegmund Olm Jürgen Rogge Ilse Frentz Wolfgang Mahnke Jürgen Rogge Helmut Hillmann Bernd Lubs Bernd Lubs Bernd Lubs

All wedder ’n Einigungsparteidag? 15 Kurschatten 18 Täuw man so lang’! 19 Schummerstunn’ 22 Dat Begriepen 23 Een süll keen’n draugen 24 Dei föfte Streich 26 Botterblaum un Puusterblaum 28 Drahnen un Drahnen 30 Dat Windspill up’t Dack vun de Kinnerkripp 32 Ein Zickenlamm von Lieschen 34 Lihren, lihren, dat is wichtig 36 Mien’ niege Melodie 38 Tiedig Frühjohr 39 Wennt ’t manig Minschen grisselt, kümmt ’ne tweite Turnbüx gaut taupass 40 Dat gifft väl tau’n Grienen 42 Up de Goornbänk 43 De König 44 De iersten Sünnenstrahlen 45 Ein ganz vernünftig Kierl 46 Trizophrenie – Wor is, wat ’n glöwt 47 De Entschuldigung 51 Utsett 52 Dat Experiment 58 De olle Leif 60

Plattdütsch Blaumen – Bauk XII

Dat nächste Mol hür ik up Mudders Fru Utpadel in Japan De Lüs’ Ein stille Stunn’? Twei Bräuder De Sprüttenhus-Anbu vun de Friewillig’ Füerwehr Hans Wilken De Wulf mank de Schaap Edeltraud Richter Friedag, dei Dürteihnste Dieter Lockenvitz Dat Wunner an’n Häben Siegmund Olm Gräsig Edeltraud Richter Scheiw’ Geschäften Inge Kohls Dat Gewitter Edeltraud Richter Striet Edeltraud Richter Nix is unmoeglich Siegmund Olm Mankkaaktäten Dieter Lockenvitz Wur is blot de Vagel Jürgen Pump Is dor intwischen Krut oewer wussen? Uwe Snopkowski Ein Navy har hei noch nich Uwe Snopkowski Lütt bäten wat oewer Rädensorden Heinrich Roß (†) Teigelstein in dei Stuw Karsten Steckling To Besäuk bi Tucholsky Karsten Steckling Dat langt! Frei nach Heinrich Böll Jens Völter ’ne Geschicht von Stiernackenguschi Günter Schmedemann Klimawannel all 2015? Jürgen Rogge Ein Radels? Inge Kohls De vierte Johrestied Uwe Snopkowski Freud as Geschenk Ilse Frentz Schneiglöckchen Jürgen Rogge In ’ne Kark Helmut Hillmann De oll Regulater Inge Kohls Schwatt un witt

Heinrich Roß (†) Karsten Steckling Helmut Hillmann Helmut Hillmann Bernd Lubs Horst Gädert

65 66 68 71 72 78 82 84 86 87 88 91 92 94 96 97 98 103 104 106 108 110 112 114 115 116 117 119 120 122 124

Plattdütsch Blaumen – Bauk XII

Pannkauken 125 Lat em man! 128 So kenn ik em … mienen Unkel Willi! 129 Dat Rasseln vun Panzerkäden 132 Dröm 135 Nah ein Reis giw’t ümmer wat tau vertell’n 136 Horst Gädert Dat Tüüchhus as Gedenkstäd 138 Edeltraud Richter Den Dezembermaand wiet vörut 140 Siegmund Olm Licht 142 Horst Gädert Ik bün ’nen ollen Beddelmann 143 Uwe Snopkowski Taufräden 146 Bernd Lubs Bustellnvertellers (Auszug) 147 Dieter Lockenvitz Råt an öll’re Minschen 150 Edeltraud Richter Vörklang 151 Dieter Lockenvitz Afscheed von’t Arbeitsläben 152 Helmut Hillmann Tau Enn’! 154 Wolfgang Mahnke Mäkelborger Dörpkarken 155 Karsten Steckling Schöne Grüße 156 Ilse Frentz Wenn’t Wihnachten ward 158 Inge Kohls Wat all passiert 159 Helmut Hillmann Allens ännert sick 160 Uwe Snopkowski Ihrlich wohrt an’n längsten 162 Günter Schmedemann Wi sünd Uckermärker 164 Uwe Snopkowski Leiwer Gott un Herr! 165

Bernd Lubs Wolfgang Mahnke Helmut Hillmann Horst Gädert Edeltraud Richter Wolfgang Mahnke

’n Wurt achteran Autorenverzeichnis

166 167

Plattdütsch Blaumen – Bauk XII

Wolfgang Mahnke

’N WURT VÖRWEG FESTVÖRDRAG – 25 JOHR PLATTSCHRIEWERBUND För 25 Johr is dei „Bund Niederdeutscher Autoren“ (BNA) – för Mäkelborg-Vörpommern und dei Uckermark – gründ’t worden un hei wier dei ierst Verein, dei in uns’ Bundesland nah dei Wend ein bedüdent Upgaw in sien Satzung verankert hett: Dei Pläg von uns’ Muddersprak. Dei Idee, einen Plattschriewerbund in’t Läwen tau ropen, harr Gerhard Diekelmann ut Verchen. Wat’s dat för’n Kierl, dei up so’n Idee kümmt? Gerd Diekelmann, dei hüt 85 Johr olt is, füng all 1946 mit dei Schrieweri an. Dei kriggt em mit dei Tiet so tau faten, dat hei 1979 sien Daun as Fischer an’n Nagel hängt un statt mit Boot un Netten mit Bliefedder un Popier tau Wark geiht. Wat hei mit dit nieg Handwarkstüg makt, hett Hand un Faut. Sien Bäuker sünd fix vergräpen! Dei Ursak dorför is: Gerd Diekelmann schriwt oewer Minschen, dei üm em rüm läwen. Wat hei denn’ Läser vörsett’t, is nich ut dei Luft gräpen, sonnern hett ein real Grundlag. Dortau kümmt, dat hei ein Plattdütsch schriwt, wat dei Lüd läsen könn’n! Tau so einen hebben anner Autoren Vertrugen un dorüm hett hei dat ok fardig krägen, bekannte Plattschriewer tau oewertügen, in’t Schriewerboot tau kamen. An’n 22. Februor 1990 begründt hei mit acht Autoren denn’ BNA. Tau dei ierst Johresversammlung, an’n 1. September 1990 up dei Tetrowsch Burgwallinsel, kemen all 22 Maaten. Dor mank wiern namhafte Autoren as Ilse Kletzin (†) ut Ueckermünn, Günter Schmedemann

Plattdütsch Blaumen – Bauk XII

ut Templin, Jürgen Pump ut Kirchdörp/Insel Poel, August Wulf (†) ut Grot Godems, Heinz Pantzier (†) ut Rostock, Ilse Mühlbach (†) ut Bad Doberan orer Karl-Hermann Finck (†) ut Laag. Dat Protokoll von disse Johresversammlung giwt uns Utkunft, weckern dei Maaten in’n iersten BNA-Vörstand wählt hebben: Gerhard Diekelmann ut Verchen, Vörsitter, Heinz Vollmann (†) ut Dargun, Schatzmeister, un Ernst Grüttmüller (†) ut Niebramborg, Organisation. Un kein anner, as Erna Taege-Rönisch (†) ut Templin, dei tau dei Gründungsmitglieder von’n BNA hürte un ok up’n Burgwall mit an’n Disch set, is dunnmals Ehrenvörsitter von denn’ niegen Schriewerbund worden! Beschlaten würd ok dei Satzung von’n BNA un dormit sien Upgawen fastschräwen: „Die zukünftige Arbeit des Bundes muss sein, durch Kurzgeschichten, Gedichte und andere Prosaarbeiten zur Bereicherung und Pflege der niederdeutschen Sprache beizutragen. Geplant ist die Herausgabe einer Anthologie.“ Dormit wier dat Ziel klor. Wenn ok bet hüt af un an eins an’t Visier dreiht worden is, üm dei ein orer anner Sak bäder in’t Og faten tau könn’n, dat, wat 1990 beschlaten würd, is ümmer Grundsatz von’n BNA bläben. Nu künn’n je denken, dat von dei BNA-Versammlung, dor up dei lütt Insel in’n Tetrowschen See, keinein wat mitkrägen hett. Nee, gew naug Lüd in Mäkelborg-Vörpommern, dei von wüssten un denn’ „Bund Niederdeutscher Autoren“ e. V. ein grot Taukunft wünschten, tau’n Bispill Dr. Arnold Hückstädt, tau dei Tiet Direkter von’t Fritz-Reuter-Literaturmuseum in Stemhagen. Dei Wünsch sünd in Erfüllung gahn, denn dei Geschicht von’n BNA is dörch siene flietigen Maaten, Vörstänn’ un Vörsitter, in’n Rahmen von Heimatpläg’ un Volkskultur in Mäkelborg-Vörpommern, tau ein Erfolgsgeschicht worden. Dei BNA-Anthologie leggt dorför Tügnis af. All 1991 gäwen dei BNA-Schriewerslüd dat ierst Bauk von disse Anthologie unner denn’ Namen „Plattdütsch Blaumen“ rut! Dei mihrsten Koppweihdag’ hett dorbi woll Gerhard Diekelmann hadd, denn hei müsst dunnmals för denn’ Druck 9.000 DM

Plattdütsch Blaumen – Bauk XII

upbringen. Oewer dei Vörsitter wier rührig. Hei hett nich blot dei Autoren in’t Boot halt, dei dei „Plattdütsch Blaumen“ Bauk I bet Bauk V up’n Weg bröcht hebben, sonnern hett dat Schipp ok mit orrig ’n poor Linen säker in’n Haben fast makt. So’n Linen gew dat tau denn’ Landesheimatverband Mäkelborg-Vörpommern, tau anner Schriewerkrinks, Gesellschaften, Tiedingen, Sponsoren unsowieder. Natürlich harr Gerd Diekelmann up dei Brügg ok gaude Stüerlüd’, oewer hei wier dei Kaptein un dat teigen Johr, von 1990 bet 2000! In’t Johr 2000 müsst Gerd Diekelmann, wieldat sien Gesundheit nich mihr mitspälte, denn’ Vörsitterposten afgäwen. Un as dat sien Ort is, hett hei dat mit Ümsicht dan un soans is dat denn’ niegen Vörsitter nich swor follen, in Diekelmanns Fauttappen tau pedden. Dei Mitglieder wählten Wolfgang Mahnke ut Rostock, dei mit Dieter Lockenvitz ut Berlin, Stellverträder un Apporten, Edeltraud Richter ut Trittelwitz, Schatzmeister, Heidelinde Wulff ut Rostock, Protokoll, un Helmut Hillmann ut Ueckermünn, Archiv, von 2000 bet 2012 denn’ BNA stüert hett. Mit mi as Vörsitter is ok dei Sitz von’n „Bund Niederdeutscher Autoren“ e. V. ut Verchen för 12 Johr in dei Hansestadt Rostock halt worden. Disse niege Vörstand hett mit väl Kraasch up dei oll BNA-Grundmuer orrig ’n poor niege Stein sett, dat heit, mihr Autoren in’n BNA halt, mit noch ein poor mihr Linen dat Schriewerschipp säkerer verankert, dei Bäuker VI bet X „Plattdütsch Blaumen“ up’n Weg bröcht un ok bi Bauk XI noch sien Hänn mit in’t Spill hadd. Dat heit, von 1991 an is dei Anthologie „Plattdütsch Blaumen“ elben Mal rutgäben worden. Dormit is dei plattdütsche Literatur, von BNA-Autoren schräwen, in uns’ Bundesland üm 1.550 Sieden rieker worden. Dörch dei Hülp von uns’ Lektoren Anna-Margarete Zdrenka un Joachim Meier, oewer ok dörch dei Teiknungen von Uwe Gloede, sünd Qualität un Utseihn von Bauk tau Bauk stägen. Wi könn’n up uns’ Anthologie mit Recht stolt sin. Alle twei Johr ein nieg Bauk ruttaugäben, dat hett bether noch kein anner Plattdütschverein in Mäkelborg-Vörpommern fardig krägen!

Plattdütsch Blaumen – Bauk XII

Möt oewer ok seggt warden, dat dat Kultusministerium in Schwerin denn’ BNA dorbi finanziell unner dei Arm gräpen hett. So’n Hülp kem ok von dei Stiftung Mäkelborg, denn’ Förderverein Reutermuseen in Stemhagen un dat Volkskulturinstitut in Rostock. Dei BNA konzentriert sick oewer nich blot up sien Anthologie, hei hett väle Verbinnungen tau anner Vereine un Institutionen knüppt, so tau’n Landesheimatverband Mäkelborg-Vörpommern in Schwerin, tau’t Fritz-Reuter-Literaturmuseum in Stemhagen, dei Fritz-Reuter-Gesellschaft in Niebramborg, dei John-BrinckmanGesellschaft in Jürgensdörp, dei Johannes-Gillhoff-Gesellschaft in Glaisin, dat Volkskulturinstitut in Rostock un tau väle Redaktionen un Verlage in uns’ Bundesland, oewer ok in Hamborg un Schleswig-Holstein, dei plattdütsche Texte drucken. BNA-Autoren sünd Stammschriewer för: „Heimathefte“, „kikut“, „Voß un HaasKlenner“, „Mecklenburg-Magazin“, „Ostseezeitung“, „Norddeutsche Neueste Nachrichten“, „Schweriner Volkszeitung“, „Platt-net.de“, „Quickborn“, „Lübecker Nachrichten“ un besonners denn’ „Nordkurier“ mit sien Plattdütschsieden „Dit & Dat“. Ok bi all dei groten Plattdütsch-Veranstaltungen, as bispillswies dei „Reuter-Festspiele“ in Stemhagen orer dei „Norddeutschen Tage an der Elbe“ in Döms, maken Schriewerslüd von unsen BNA nich blot mit, sonnern gäben tietwies sogor denn’ Ton mit an. Dortau kamen noch Johr för Johr landup, landaf an 150 Läsungen, wenn BNA-Autoren ut ehr mihr as sösstig sülben schräwen Bäuker läsen. „Die Pflege der niederdeutschen Sprache“ heit för BNA-Mitglieder oewer tau’n Bispill ok: Mitarbeit in’n „Förderverein un Kuratorium Reutermuseen“, bi „Plattdütsch-Wettbewarbe in’e Schaul“, in’t Kultusministerium Mäkelborg-Vörpommern an’n Disch von’n „Niederdeutschbeirat“ orer wat in eigen Sak tau daun, wenn dei Lektoren uns in dei Lihrstunn „Schriew ick orrig Platt?“ up’n Tähn fäuhlen. Tweimal in’t Johr kriegen dei BNA-Mitglieder mit dei „Apporten“, dat Mitdeilungsblatt von’n BNA, niege Informationen oewer dei

Plattdütsch Blaumen – Bauk XII

Schriewerslüd’ un ehr Daun, tau weiten. Intwüschen kickt dei BNA ok oewern Töllerrand un hett gaude Verbinnungen tau Plattspräker un Plattschriewer in uns’ Nahwerlänner. För dei hoge Qualität von ehr Vertellers, Riemels un Bäuker un för ehr grote Mäuh un flietige Arbeit bi dei Pläg’ von uns’ Muddersprak, hebben männig BNA-Mitglieder Priese un Utteiknungen krägen. Babenan Ilse Mühlbach (†) ut Doberan, dei för ehr plattdütsches Läwenswark mit dat „Bundesverdienstkreuz“ ihrt würd. Denn’ „Fritz-Reuter-Literaturpries“ kregen Wolfgang Mahnke ut Rostock 2003, Dietrich Sabban ut Ludwigslust 2008 un Heinz Pantzier (†) ut Templin 2009. Denn’ „Johannes-Glillhoff-Literaturpries“ kregen Karl-Heinz Madauss ut Parchim 2008, Dietrich Sabban ut Ludwigslust 2013 un Jürgen Pump ut Kirchdörp/Insel Poel 2014. Besonners stolt sünd dei Schriewerslüd dorup, dat dei BNA 2011 mit denn’ „FritzReuter-Literaturpries“ utteikent worden is un twors för Bauk X von ehr Anthologie „Plattdütsch Blaumen“, wat up denn’ 200. Geburtsdag von Fritz Reuter tauschnäden is. So ein Utteiknungslist kann kein anner Plattdütsch-Verein in Mäkelborg-Vörpommern vörwiesen! Nah mi is Dr. Jürgen Rogge ut Perleberg-Lübzow tau’n BNAVörsitter wählt worden. Ok in’n Vörstand hett sick wat ännert: Bernd Lubs ut Niebramborg is sien Stellverträder, Dieter Lockenvitz ut Berlin makt Protokoll un Apporten, Edeltraud Richter ut Trittelwitz is Schatzmeister un Helmut Hillmann ut Ueckermünn is för dat Archiv taustännig. Disse Vörsitter un sien Vörstand hebben dat niege Statut verbindlich makt, denn’ niegen Sitz Perleberg-Lübzow in’t Vereinsregister in Neuruppin indragen laten un so dat taukünftig Daun von’n BNA fast in’t Og fat un mit dei Rutgaw von „Plattdütsch Blaumen“, Bauk XI un dat Anpeilen von Bauk XII dei BNA-Tradition wohrt. Dat heit, uns’ Plattschriewerbund is wiederhen up einen gauden Weg un stüert säker up dat nehgst Jubiläum – Dörtig Johr BNA – tau! Wieldat männigweck von dei Gründungsmitglieder nich mihr an Burd sünd un tausamen mit denn’ ein’n orer annern BNA-Autor all

Plattdütsch Blaumen – Bauk XII

von baben up uns’ Daun dalkieken, sünd dei Tahlen von uns’ Maaten twors ’n bäten trügg gahn, oewer ok ümmer wedder niege Autoren in unsen BNA upnahmen worden. Dat künn’n giern ’n poor mihr un besonners mihr Jungsche sin. Ick wünsch uns, dat dat Daun von’n Vörsitter, Vörstand un dei BNA-Maaten wiederhen dortau bidrägt, dat Plattdütsch in uns Land ein wichtig Kulturgaut bliwt, dat dei Kraasch bi’t Schriewen, Läsen orer in’t Ehrenamt nich nahlett un dat’t ok in dei taukamen Johren noch orrig ’n poor niege Bäuker von uns’ Anthologie „Plattdütsch Blaumen“ tau läsen giwt!

Plattdütsch Blaumen – Bauk XII

Wolfgang Mahnke

ALL WEDDER ’N EINIGUNGSPARTEIDAG? Mien Nahwer un ick stünn’n in Warnemünn’ an’n Oll’n Strom un keken achter dei Möwen an. Ick harr dat Gefäuhl, dat dat bi dei Möwen grad so dörcheinanner geiht as in dei Politik. Miteins dreihte Friedrich sick nah alle Sieden üm, wat keinein in’e Nehg wier, un flusterte mi denn tau: „Hest ok all markt, dat dei Unnerscheid twüschen SPD un CDU ümmer lütter ward? Nee? Na, denn will ick di mal wat in’n Vertrugen vertell’n. Oewer dat bliwt unner uns! Ick weit dat von einen, dei bi’n BND is. Dei SPD-Vörstand sall je vör Johren all Lafontaines Rücktritt gradtau provoziert hebben un nu will’n sei ok all dei annern Linken los warden. Un denn is dei Weg frie för’n Ümschwung. Glöw mi, dor liggt wat in’e Luft. Dat is kort vör’n Einigungsparteidag, grad so as wi dat all eins beläwt hebben. Man blot dat nu dei SPD un dei CDU sick dei Hand gäben!“ „Minsch, dat kann doch nich wohr sin!“ „Doch, dei CSED steiht kort för ehr Gründung.“ „CSED, wat sall dat denn heiten?“ „Dat heit Christlich Sozialdemokrat’sche Einheitspartei Dütschlands!“ „Herregott oewer ok! Man wat ward ut dei annern? Linke, Gräune, FDP un AfD?“ „Je“, säd Friedrich un kek mi bedüdungsvull an, „man künn seggen, dei lihren dei Blockfläut spälen.“ „Blockfläut? Sall dat heiten …?“ „Jewoll, dei warden Blockparteien un hebben nich mihr väl tau seggen, sitten oewer in alle Landesregierungen un ok in’n Bundes-

Plattdütsch Blaumen – Bauk XII

dag. Blot bi dei Gräunen ward dat bäten anners. Dei hürn denn tau dei BBP.“ „Un wat heit dat?“ „Bundes-Buern-Partei. Dei Gräunen könn’n sick dor mank dei Ökohäuhner uttowen un richten keinen groten Schaden mihr an!“ Mi löp dat heit un kolt denn’ Puckel dal. Oewer nu wull ick alls weiten un frög Friedrichen: „Un woans ward dat mit’t Regier’n?“ „Ganz einfach. So, as Pep Guardiola dat bi’n FC Bayern makt: Rotationsprinzip! Kiek, dor sünd denn doch naug Politiker un weckerein von dei grad nich so gaut in Form is, dei sitt up dei Utwesselbänk.“ „Un weckerein is för dat Rotationsprinzip verantwurtlich? So’n ‚Pep Guardiola‘ orer dei Bundesrat?“ „Nee, dei Bundesrat ward afschafft. Dei Vörsitter von dei NBF is denn taustännig.“ „NBF? All wedder wat Nieges?“ „Nee, so nieg nich“, säd Friedrich, „NBF is dei Nationale-Bundes-Front. Ick nähm an, dat sei ierstmal Flinten-Uschi as Vörsitter wählen warden. Je, un dei möt dat denn ok mit dei achtig un twindig Perzent regulier’n.“ „Achtig un twindig Perzent? Wat hett dit tau bedüden?“ „Pst! Pass up: Achtig Perzent von dei NBF-Kannedaten kamen von dei CSED un twindig von dei Blockfläuten. Süh, dat is gaut oewerleggt. Jedein Blockpartei hett denn fief Perzent. Dat heit ümmer in’e Regierung un ümmer Diäten un dorför maken sei alls mit!“ „Denn ward dat je schön oewersichtlich, wenn wi taukünftig dei Kannedaten von dei Nationale-Bundes-Front wählen. Denn kamen wi bestimmt ok wedder up 99,6 Perzent Wahlbeteiligung. Oewer segg eins, Friedrich, giwt dat bi so’n Vereinigung nich ok ‚soziale Härtefälle‘? Tau’n Bispill, wat ward ut Angela Merkel?“

Plattdütsch Blaumen – Bauk XII

„Dor mak di man kein Sorgen üm. Dei sall tausamen mit Alice Schwarzer, so as bi dei Gräunen, dat Duwwelspitzenmodel bi’n BFB oewernähmen.“ „BFB? Lat mi raden. Heit dat woll Bundes-Frugens-Bund?“ Friedrich griente. „Oewer woans sall dat Arbeitslosenproblem löst warden?“ „Arbeitslose giwt tauminnest in’n Osten nich mihr“, flusterte Friedrich. „Kiek eins, dei Nationale-Bundes-Front möt denn je in jedein Stadt un jedein’n Urt ümmer dor sin. Un üm Wahnbezirksutschüsse von dei Nationale-Bundes-Front kümmt denn ok keiner mihr rüm.“ „Un wedder alls ehrenamtlich?“ „Äben nich. Ditmal as Angestellte in’n Öffentlichen Deinst.“ Friedrichs Ogen füngen an tau lüchten. „Ditmal geiht dat annersrüm! Wi sitten an dei Quell un warden uns’ Erfohrungen utnütten bi’t Upbugen von dei Nationale-Bundes-Front in dei Oll’n Bundeslänner!“

Plattdütsch Blaumen – Bauk XII

Helmut Hillmann

KURSCHATTEN Dor up de Kur in Warnemünn’, In’n Sommer sick ’t begäben hett, Twei Minschen taueinanner fünn’n, Denn jedein fünn denn’ annern nett. – Sei liggen oft un giern an’n Strand, Sei küssen sick, gahn Hand in Hand Un jedein Hart in ihrlich Freud, As bi de ierst’ Leiw puckern deit. Sei schnacken von Gott un de Welt, Von Politik un ’t leidig Geld, Von’ t grote Glück, dat sei biläwen Un wer weit, wat s’ süss noch räden … Blot von de Heurat spräken s’ nich – Sei sünd taufräden so mit sick, Un fäuhlen hier in all dees Stunn’ Sick in ehr grote Leiw verbunn’. Doch wur ’t so is – de Tiet vergeiht, De Dag is ran – de Stunn’ ehr schleit … Sei möten uteinanner gahn! – In Tranen würd sei em gestahn, Dat sei all lang’n verheurat’t is, Em liekers leiw hett, dat steiht wiss. Hei reikt ehr denn sien Taschendok, Un süfzt: „Nu ror man nich … ik ok!“

Plattdütsch Blaumen – Bauk XII

Helmut Hillmann

TÄUW MAN SO LANG’! Norbert keek werrer eins bi Muddern in. Hier un dor harr hei klor Schipp makt, un wur nödig, ok Saken in Schuß sett’t. So wiern sei denn’ ganzen Dag tausamen wäst, wo sei sick väl tau vertellen hatt harrn. – Nu wier Mudder mäud un wull schlapen gahn. Doch Norbert treckte sick wat oewer un säd, dat hei noch tau Kraug will, wur hüt je ok Danz is. Hei wünscht ehr ein gaude Nacht. Norbert steiht mit ’n Glas Bier in de Hand an de Saaldör un kickt up all de vergnäugten Lüd, de dor danzen un sick unnerhollen. Mit eins süht hei Ingrid de Trepp rupkamen. Sei harrn sick siet de Insägnung nich mihr seihn. „Norbert, du?“ „Ja, Ingrid, ik bünn’t! Wur kümmst du üm disse Tiet her?“ „Ik hew in Dresden denn’ Middagstog verpasst, so dat ik nu mit denn’ letzten ankamen bün. As ik hier vör’n Kraug Lüd’ stahn sehg un Musik hürte, würd ik niegelig. – Segg eins, Norbert: Bliwst du noch, orrer wisst du gahn?“ „Ik bliew. Ik bün ok grad ierst kamen.“ „Täuwst up mi? – Ik möt mi blot bi mien Tanten anmell’n, wieldat ik bi ehr oewer Nacht blieben will. Nah Dagelow mag ik hüt ok nich mihr lopen, un mien Öllern weiten nich, dat ik kamen dau. Täuw man up mi … ik bün fuurts taurügg!“ „Dat maken wi anners! Ik kam mit! Lat mi man denn’ Kuffert drägen!“ Ehr Tanten wahnte glieks üm de Eck. Ehr Hus wier all düster. „Segg blot, dei schlöppt all!“ Ingrid kloppt an de Koekendör … nix rögt sich. Sei gahn rüm up de anner Siet un kloppen an dat Schlapstuwenfinster …

Plattdütsch Blaumen – Bauk XII

Näbenan geiht ein Finster up, ein Taschenlamp blennt un denn hür’n sei de Nahwersch raupen: „Ach, du büst dat, Ingrid! – Dien Tanten is bi ehr Dochter in Stralsund. Ik möt intwischen sogor ehrn Kader faudern. – Sei kümmt ierst Mandag taurügg!“ „Kann ik bet morgen mienen Kuffert hier bi sei laten?“, fröggt Ingrid. „Klor kannst du dat. Täuw, ik kam rüm un schlut de Koekendör up!“ De Bagasch wiern sei losworden un nu güng’t trügg nah ’n Danzsaal. Sei fünn’n noch ’n Platz un Ingrid kreeg ok noch wat tau äten, denn sei wier hungrig. Nahst drünken sei Wien, danzten un freugten sick, dat sei tausamen wiern. De Ümarmungen würden mit de Tiet wat faster un hartlich un denn küssten sei sick sogor. „Bringst mi nahst nah Hus?“, süfzt de Diern. „Bi mien Tanten … na, dat hest’ je hürt!“ As sei dit seggt, hett sei de Ogen halw tau un schult recht leiw von ünner rup, so dat Norbert sien Hart fuurts ’n bäten fixer schlagen ward. Sihr zort klüng sien Antwurd: „Na klor bring ik di! Ik kann di doch nich vier Kilometer allein dörch dat grugelige Holt lopen laten!“ „Danke!“, sei strakt em sacht oewer’t Hoor, „villicht holl ik nahst noch ein Oewerraschung för di prat!“ De oll Kirchturmklock harr all lang’n twölw schlagen, as sei sick up n’ Weg maken. Buten is ’t stickendüster … nich mal de Maand lött sich seihn. Af un an wäderlücht dat, so dat sei denn’ Weg finnen koenen. „Ik glöw, dat giwt bald wat!“, dremmelt Norbert un wiest nah baben, „lat uns man fix taupedden, süss warden wi noch natt … oewer in’n Momang fählt mi hierför noch de nödig Kraasch un de krieg ik blot bi einen richtig heiten Kuss!“ Sei lacht, leggt ehre Arm üm sienen Hals, kuschelt sick an sien Bost un ehre Lippen finn’n sick tau einen langen Säuten. Doch denn driwt sei tau Iel. – Bi ’n Vossbarg wull Norbert unbedingt ’n bäten

Plattdütsch Blaumen – Bauk XII

utraugen. Hei wüsst dor ein Stell mit Moos … so wunnerbor weik! Doch Ingrid höllt em trügg un wiest nu ok nah baben, wur de Blitze intwischen scharp zackten un dat Grummeln luder würd. „Hew ’n bäten Geduld! Ik versprök di doch ein Oewerraschung! Villicht kannst du nahst je noch up ’n lütten Afsacker mit rinnerkamen.“ As sei dit seggt, leggt sei sick besonners leiw un zort in Norbert s’ Arm, un em keem dat nu so vör, as wull de Weg kein End’ nähmen … Denn endlich(!) stahn sei vör ehr Husdör. „Pst!“, mahnt Ingrid, wurbi sei vörsichtig de Dör upschlött. „Ik kiek ierst eins nah, ob de Ollen schlapen un de Luft reiden is. Täuw man so lang’!“ Norbert steiht un täuwt un täuwt … intwischen is de Dunner tämlich lut worden un dat fangt an tau rägen. De Blitze warden greller un de Druppen grötter. Endlich geiht de Husdör up! Ein Arm höllt einen Rägenschirm rut un ein Stimm seggt: „Hier nimm … un schönen Dank för’t Nahhusbringen! Ik versprök di je ein Oewerraschung!“, un de Dör föllt in ’t Schlott. – Dor stünn Norbert in dat Unwäder mit all sien „Weihdaag“, Sähnsüchten un Hoffnungen! – Manning, manning, hett em dit begriesmult! Up disse schäwsche Oewerraschung harr hei giern verzicht – öwer ’t wier em ein Lihr för ’t ganze Läben!

Plattdütsch Blaumen – Bauk XII

Edeltraud Richter

SCHUMMERSTUNN’ Dei Sünn’ beend’t ehr grote Runn’ Un tracht nah ehre Weig’, Ganz sachten kümmt dei Schummerstunn’, Ihr dat dei Dag sick neigt. Schummertiet dörchkrüzt dat Ihlen, Stoppt dei Olldagssorg’ un Hast, Dämmerung lad’t tau ’n Verwielen, Löst för Stunn’n den Druck, dei Last. Kein Strahl mihr an dei Sichtscheid’ gläut, Verschwunnen sünd dor Glanz un Licht, Dei Häben niege Farben streut, Wiest blautrot sien Gesicht. Farben as von ’n Rägenbagen Lüchten an den Himmelsdom, Ierste Stierns von ’n Groten Wagen Führ’n tau Nacht uns in ’n Drom. Bevör an ’n Morgen dei Sünn’ upstiggt, Herrscht wedder Dämmertiet, Un ihr ein Strahl dat Lüchten kriggt, Sing’n Vagels all ehr Lied. Trulich grüßt dei Minsch den Morgen Un beginnt den Dag mit Schwung, Plant sien Arbeit, ok mit Sorgen, All in dei Morgendämmerung.