6. William Booth, Sipai hmasa ber chu - Vanlalduhsaka

WILLIAM BOOTH, SIPAI HMASA BER CHU - Vanlalduhsaka, ECM CNDC

William Booth - a hi April 10, 1829 khan Nottingham, England-ah a lo piang a. A pa chu Juda thlah Samuel Booth a ni. Kum 13 mi a nihin a pung awma pawisa puktirna (Pawnbroker) hmunah a thawk a. A hna thawh chu tha ti vaklo chungin a thawk reng a. Pathian thu te zira, piantharna a chan hnu chuan a hna chu bansanin Reformed Methodist Church-a Pastor hna thawk turin chawlhkar khata pound khat hlawh tura rawih a ni.

William Booth-a chu Pastor a ni miau si a, bial bik neiin a bial chhung rawngbawlna chu a tha hle a. A bial thar Gateshead kohhran biak in mi 1200 lengah mi 130 vel chauh an inkhawm thin kha William Bootha’n a bial atang chuan Biak Ina leng lo khawp an inkhawm ta mai a. An biak in chu ‘PIANTHARNA DAWR’ tiin an sawi hial a ni. William-a chuan Pathianin chanchintha hril turin a ko niin a inhria a, chu chu nasa takin a ngaihtuah a. Bial khat chauh vawntir a nih avangin hmun hrang hrangah a thawk thei ta lo. William-a leh Catherine-i te chu Pathian duhdan zawngin an tawngtai ta a. An pahnih chuan mipui tam tak hnena chanchintha hril tur niin an inhre ta ber a. Pathian hruai turin a kutah an inpe lut vek mai a ni. William Booth-a chuan Methodist New Connection Conference President hnenah Krista tana thlarau hnehna hna thawk tura inhman zawh vek phalsak turin a dil a. Conference chuan Williama chuan kohhran enkawl bik nei sela, chanchintha theh darh hna chu a hun awlah thawk rawh se a ti a ni. Chu thuthlukna chu a dilna hnial nen thu hmun reng a ni. Methodist Kohhrana a hna duh tak chu a bansan a lo ngai ta a ni.

CHHANDAMNA SIPAI PAWL A PIANG TA

William Booth-a te nupa chuan hlawh nei lovin Pathian rawng an bawl chhunzawm zel a, a nupuiin London vengthlang lam a chang a, William Booth-a’n vengchhak lam a chang thung a, Vengchhak lam chu mi rethei chhumchhiate chenna bik deuh a ni a, chutiang hmun ngei chu Williama thawh chakna hmun a ni. Zan khat chu tlai deuh tawh takah Williama a lo haw a, a nupui hnenah, “Heng mirethei thlarau bote tan thawk turin Pathianin min duhin ka hria” a ti ta phawng mai a. Catherine-i chhanna a ropui teh asin! “Kan khawsakna atan Pathian kan lo ring tawh thin a, Engvangin nge kan rin zel mai loh ang? Kan ring zel mai tur alawm! A ti hmiah mai a ni.

Zu rui leh misualte, mi rethei rimchhe tak tak te, Biak in thleng phak ngai reng reng lo te chuan chhandamna changin an lo piangthar ta a. Vawikhat chu, chung mi piangthar Biak in pawh la thleng ngai lote chu biak inah a hruai a, thutna thaah a thuttir a. Chuta an Kohhran hruaitute chuan William Booth-a thiltih dan chu an ngaithei ta hauh lo mai a, chung mi piangthar hlim te lah chuan hreawm an ti hle mai bawk si a. William Booth-a harsatna tawh hmasak ber chu mi piangtharte enkawl hi a ni. A tir takah chuan pawl thar din emaw, kohhran thar din tumna a nei lo. Amah ngeiin a sawi dan chuan, “Ka tum hmasak ber chu m i p u i t e chhandam a, chumi hnuah

kohhran hrang hranga hnim phum mai hi a ni” a ti a ni.

Kum 1865 July Ni 2 a lo nih chuan “The East London Christian Mission” an invuah ta a ni. Hmun hrang hrangah inkhawmna tur an buatsaih a, thusawitu tur pawh an insem darh thin. Kum 3 a ral meuh chuan Preaching Station pawh 13 lai an nei hman a ni. An rawngbawlna chuan London vengchhak lai ni lo hmun dangte a kang kai ta zel a, a hming pawh Christian Mission tiin an thlak ta a ni. An Mission hmunpui atan White Chapel an hmang a. William Bootha’n lehkhabu pakhat a ziak a, “How to reach the masses with Gospel”(Mite hnena chanchintha thlen dan) tih a ni. Chu lehkhabu chu Methodist Pastor fapa lehkhathiam George Scott Railton-an a lo chhiar a, a rilru a hneh hle a, Christian Mission a zawm ve ta a, William Booth-a kut ke ber a lo ni ta a ni.

Railton-a chuan Christian Mission hi mahni duhna ngei a inpe sipai pawl, Volunteer Army a ni tiin William Booth-a a hrilh a, William Booth-a erawh chuan mahni duhna ngei a inpe, Volunteer Army tih thu chu a lawm mang lova, hun awl chauhva rawngbawlna a kawh avangin. Tichuan a lo harh thut a, Volunteer tih chu thai chhiain ‘Chhandamna’ Salvation tiin a thlak ta a. Chu veleh ring takin Christian Mission chu The Salvation Army (Chhandamna Sipai Pawl) a ni ta tiin a chhiar chhuak a ni. ‘Christian Mission’ tih atanga ‘The Salvation Army’ tih kan put kum hi Kum 1878 a ni. Salvation Army bultantu atan khawvel ah Pathianin William Booth-a chu a lo ruat a, William Booth-a chuan mi rethei zawkte leh misual awm tha duhlote chu a hmangaih em em a. An tan theihtawp chhuahin rawng a bawl sak thin a ni. A rawngbawlna avang hian mi tam tak an lo piangthar a, chung mi piangthar hlim te tan chuan Kohhran thar din a lo ngaih tak avangin Salvation Army hi a lo piang a ni.

Khawvel puma Chhandamna Sipaite Mission Statement :

“CHHANDAMNA SIPAI hi Kristian Kohhran, khawvel huapa Chanchin Tha hrila thawk a ni. A thuchah chu Bible - ah a innghat a. A rawngbawlna chu Pathian hmangaihnaa tih nun a ni. A hnapui ber chu Chanchin Tha hril leh hleih nei hauh lova Isua Krista hminga mi hring mamawh phuhruk hi a ni.”

• International Statistics :

Dinna Ram - 131 Sipai Puitling - 12,12,181 Naupang Sipai - 4,06,140 Songsters - 123,082 Adherent - 1,74,473 Thawktu (Employees) - 112,203 Corps/Society/Outpost - 14,528 Active Officers - 26,753 Naupang home - 232 Upa enkawlna - 160 Mother & baby Home - 43 Women’s & men’s refuge centres -114 Chênna neilo tana hostel - 495 Day Care Centre - 661 General Hospital - 30

[Statistic Source : 2019 Year Book]

SAY SUNDAY PUAL TAWNGTAI RUAL NEI

Territorial Headquarters remruatna leh ruahmanna in a hnuaia thupui te hmang hian June Ni 28, 2020(Sun) zan dar 8:00pm khan SAY Sunday pual a Territory pum SAY te mahni remchan dan leh awm hmun theuhah tawngtai rualna neih a ni.