Skuobiņu keiseļs

200 g skuobiņu, 1 l iudiņa, 160 g cukra, 60 g buļbu cītis, suoļs. Skuobinis sautej nalelā iudiņa daudzumā, daber čipierksneiti (škipsnu) suoļa, izmaisa, skuobinis izberž caur smolku sītu i dalej puorejū iudini, cukru, vuorej 3 minutys. Tūlaik dalej soltā iudinī atjauktu buļbu cīti, aizvuorej, salej bļūdeņuos, dūd atdzist, puorlej ar pīnu.

Rudzu maizis keiseļs

400 g rudzu maizis, 1 l iudiņa, 120 g kaltātu uobeļu, 120 g cukra, 60 g buļbu cītis. Škēlēs sagrīztu kaltātu apcaptu maizi puorlej ar iudini i vuorej, cikom maize izškeiduse, izberž caur sītu, daber cukra, uobeļus (“Antonovka”) bez mizenis i vuorej, cikom uobeli meiksti, tod dalej soltā iudinī atjauktys buļbu cītis, aizvuorej, salej bļūdeņuos. Atdzysušu padūd ar pīnu, putu kriejumu voi saļdiejumu.

Uobeļu saputuojums

1. variants. 400 g uobeļu (“Antonovka”), 400 g iudiņa, 60 g mannys, 100 g cukra. Nūmozguotus uobeļus sagrīž ar vysu myzu i serdi, puorlej ar iudini i vuorej. Tod izberž caur sītu. Bīziņam daber cukra, mannys, ļaun sabrīst, lej bļūdā, atdzysušu saputoj styngruos putuos. Padūd ar pīnu.

2. variants. 500 g soldonskuobu uobeļu, 100 g cukra, 2 ūlu boltonumi. Uobeļus cepeškruosnē izcap, izberž caur sītu, daber cukra, samaisa. Atdzysušai masai dalīk ūlu boltonumus i saputoj styngruos putuos. Padūd ar putukriejumu, vanilis mērci.

Dabasu manna

150 g dzērviņu, 400 g iudiņa, 100 g cukra, 60 g mannys.

Dzērvinis puorlosa, samaiga, izspīž sulu. Mizenis puorlej ar iudini, vuorej 5 minutys, izkuoš. Nūvuorejumam daber cukra, maisūt lieni daber mannu, karsej, cikom manna sabrīst, tod dalej dzērviņu sulys. Masu lej bļūdā, mudri atdzysynoj i putoj, cikom masa palīk gaiša, ierdona, palykuse leluoka sovūs apjūmūs 2–3 reizis. Dabasu mannu līk dziļūs deserta škeivūs, puorlej ar soltu pīnu.