O Mirallo

O MIRALLO RecopilaciĂłn d'articlos publicaus por Trobada - Vivir en AragonĂŠs" en a revista dichital Ronda Somontano

Ronda Somontano 2017

O MIRALLO Recopilación d'articlos publicaus por Trobada Vivir en aragonés en a revista dichital Ronda Somontano, en a sección Ronda de Relatos de chunio de 2016 a chunio de 2017

TROBADA – VIVIR EN ARAGONÉS

Copyright © texto: Trobada, 2017.

Copyright © portalada: Trobada, 2017.

Copyright © d'as fotografías d'as pachinas: l'autor.

Copyright © d'ista edición: Ronda Somontano, 2017.

O Mirallo.

Trobada – Vivir en Aragonés

Publicau en agosto de 2017 Obra de distribución gratuita

Depósito legal: exento

Ye viedada, salvo excepción prevista en a lei, a transformación de ista obra sin contar con l'autorización d'os titulars d'a propiedat intelectual. A infracción d'os dreitos mencionaus puet estar constitutiva de delito cuentra la propiedat intelectual.

I.

A metamorfosi politica

II.

Han de tener moral as maquinas?

III.

A emigración t'a tierra plana

IV.

Antonier

V.

Mensaches d'as piedras

VI.

Discapacidat intelectual, treballo social y alternativas d'emplego

VII.

Chaminera

VIII.

¿Realment no bi ha opción?

IX.

Es mitos chistabins

X.

A fin como ha quedau a montanya y o sentimiento d'o entorno

XI.

A muller en a sociedá actual: a muller con discapacidá en o patriarcau

XII.

La voz que no deixam morir

“En o prencipio yera o Verbo, y o Verbo yera con Dios, y Dios yera o Verbo”.

Chuan 1:1. Asinas escomencipia o primer versiclo de l'Evanchelio de Chuan. O Verbo, o Logos, a Parola. Somos parola. Somos as parolas que os nuestros debantpasaus prenuncioron, parolas cutianas que han configurau o nuestro mundo machico, o nuestro imachinario colectivo en do nos desembolicamos como personas y como sociedat.

O poder machico d'a parola ye innegable. Pero as parolas, como los antigos maldaus, corren o risgo de cayer en l'ixupliu u de no estar que a l'alcanz d'a man de bels pocos eruditos.

Parolas u expresions como; laminero, camandulero, bai, bella cosa, moler, confite, baruca, trachinar, dar ferrete, ir de propio, desustanciau, zagal u misache… Ixas y otras muitas, prenunciadas por os mios yayos, han configurau o mio universo domestico y a mia personalidat.

En casa mia no se charra aragonés, pero ixas parolas son muit comunas.

Desgraciadament, os mios yayos ya no viven pero sí tiengo muit present a suya memoria y o mio compromís por seguir emplegando ixas parolas día sin otro. Ye uno d'os millors homenaches que puedo fer-les. Con ellos, sinto como que encara viven, y lo mas important, que a nuestra sociedat ancestral encara pervive de bella manera. Porque o mayor legau que nos deixan os nuestros debantpasaus ye o nuestro yo individual y común, a traviés d'as suyas expresions, afectos y amostranzas. Con o Verbo.

Como periodista siempre he teniu bien present iste compromís con a mia tierra y a mia memoria, con a fabla, que miré d'aprender sin exito anque comprendo.

Considero que os meyos de comunicación han de tener o compromís moral con a sociedat en que viven y estar o suyo espiello. Por ixo nunca no he entendiu por qué laragonés no tien mas presencia en os meyos de comunicación y mas que mas en os meyos publicos. Soi conscient que a realidat lingüistica aragonesa no ye a vasca, a catalana u a gallega, con meyos que s'expresan en ixas luengas.

Como diría Arthur Miller: “Un buen periodico ye una sociedat charrándo-se a ella mesma”. Por ixo creigo que a sociedat aragonesa, por a suya historia, puet charrar en castellano, catalán y prau que sí, aragonés en totz os suyos dialectos.

Ye de todas ixas luengas, l'aragonesa, a que mas periglo corre d'extinción. Por

5

ixo dende Ronda Somontano nos hemos proposau dende a suya creyación fa mas d'once anyos l'obchectivo d'ubrir una finestra t'o mundo pa que tot qui lo deseye pueda expresar as suyas opinions en ista luenga.

Bells autors l'han feito ya, como se podrá leyer en a nuestra hemeroteca, escribindo articlos apegaus a l'actualidat (fa falta desenradigar o topico que l'aragonés no fa honra que pa charrar d'etnolochía u folclore). Y dende fa un anyo, os amigos de Trobada vivir en aragonés s'han sumau a la familia de Ronda Somontano y han adquiriu tamién o compromís d'escribir articlos, uno cada mes, sobre temas d'o mas variau: politica, literatura, historia, tradicions, articlos intimos u de relevancia social. O primer anyo de vida d'ixa colaboración ha orichinau a publicación d'iste documento, en formato de libro electrónico, que remanirá en a sección de publicacions d'a revista dichital y que a suya descarga ye franca. Recomendamos que lo descarguen, lo leigan y lo compartan porque nomás nos mueve l'animo, tanto a Trobada vivir en aragonés como a Ronda Somontano, de que ixas beroyas parolas que aprendiemos en a cuna no mueran nunca.

Somos Parolas.

José Luis Pano Cuello, periodista, fundador y director de Ronda Somontano.

6

A metamorfosi politica Por primer vegada dende que empecipiemos a transición, o 20 d'aviento d'o ya pasau anyo 2015 ocurrió una cosa que fació tremolar a os dos partius politicos mayoritarios en Espanya, o PP y o PSOE: L'aparición de nuevos partius que han convenciu a buena cosa de chent. A resultas d'ixo, bi ha toda mena d'opinions entre os eslectors, dende os que se piensan que isto ye una barrenada de tot porque practicament no ye fesable fer gubierno, dica os que se piensan que iste ye o camín que cal seguir pa acotolar as imposicions unipartidistas. D'ixa traza, y dimpués d'o fracaso que o feito de no haber puesto formar gubierno suposa pa totz os partius, mas que mas pa os que dica agora teneban o poder, o día 26 de chunyo tornaremos a tener unatra vegada eslecions chenerals.

D'una man, a chent que piensan que si no hese emerchiu partius como Podemos y Ciudadanos a cosa iría millor porque levaríanos ya bells meses con un equipo de gubierno, charran d'estabilidat politica y d'o camín d'a moderación pa continar entadebant con a chestión d'o país. D'atra man, a chent que piensan que l'aparición d'os dos nuevos partius debantditos va bien a lo país, charran d'alcuerdos politicos pa plegar en una situación beneficiosa a traviés d'o dialogo.

En ixa busca de l'equilibrio entre a opinión d'os extremistas d'un costau y os d l'atro son estaus os politicos de totz os partius pa no veyer-sen compromesos con unas declaracions que podesen restar-les votos, y ye que os politicos han sufierto bella cosa parellana a una metamorfosi como pasa en totz os periodos de campanya eslectoral; Antis d'a campanya s'adedican a fer as suyas chestions cadagún por a suya cuenta, respetando-sen entre ells en a mida d'o posible anque siempre caiga bell estralazo dende un costau ta l'atro y viceversa. Sin d'embargo, en plegar o periodo de campanya eslectoral, ixa chent que amaneixen en os cartels de totz os puestos d'o territorio con una riseta aforzada y con uellos de corderet pa demandar-nos o voto, esdevienen en un contino charrar d'os atros, criticar tot o posible a chestión d'a resta sin mirar-sen ni sisquiera lo que ells han feito. Prometen a saber-las de cosas que muitas vegadas mesmo ells saben que no meterán en marcha, tractan de desbancar constantment a l'adversario, y mesmo bellas vegadas, fan fateras como mirar d'acercar-sen a la población deixando-sen veyer fendo una gambada solos, caminando u en bicicleta, como si ixo lo fesen totz os días d'a suya vida y a todas horas.

Malas que remata la campanya, ixa chent tornan a sacar-sen a mascareta y a metamorfosi se desfá a escape, tant a prisa como venió; tornan a ficar a bicicleta

7

en o garache, no tornan a fer-sen un paseyo tranquilos sin a companyía d'os suyos escoltas, y prou que sí, se sacan os claus que les tienen o riso de traza constant en a cara. A pregunta ye clara, ¿En veras piensan que fendo ixas cosas a chent va a ir a votar-les?. A respuesta tamién en ye: Sí, lo piensan, y no nomás lo piensan sino que amás en bells casos l'aconsiguen, a memoria d'os sers humans ye muit curta y selectiva como pa alcordar-sen d'o que facioron mal a o prencipio d'a lechislatura, que ye quan os politicos aproveitan a fer as accions mas dolentas pa que dimpués se nos ixuplide quan fagan cosas menos furas en acercar-sen as eslecions chenerals, y no charro de garra partiu concreto, ixo fa parti d'a estratechia de totz.

Amás d'ixo, ye o factor d'a parcialidat que cadagún desembolicamos d'as noticias que amaneixen en os medios de comunicación seguntes os nuestros criterios y as nuestras opinions, y as conclusions que ixo nos fa quitar-ne. ,Soi bien seguro que si os medios de comunicación metesen as declaracions d'os politicos menos conoixius sin decir quí ye o politico u a qué partiu perteneix, totz seríanos mas imparcials y as reunions entre partius serían mas politicas y menos sensacionalistas, y deixaríanos a un costau os sinyals pa centrar-nos en resolver entre totz unicament os problemas que pueda surtir, sin pensar si qui proposa la solución ye d'o PP, d'o PSOE, de Podemos, de Ciudadanos, d'Izquierda Unida, de CHA, d'o PAR u de qualsiquier atro partiu, y sin fer variar a nuestra opinión seguntes ixa condición.

Difuera d'ixe tema, si bella cosa nos han permitiu as eslecions chenerals fallidas, prou que ye o poder veyer a totz os politicos en todas as fases d'a metamorfosi, ye por ixo que yo en tiengo una opinión muit clara: Si privasenos ista vegada a campanya electoral, ya que ya conoixemos a os politicos que bi ha, os ideyals que tienen y as mutacions que les ocurren con ixas cosas, no malfurriaríanos os diners que costa, privaríanos haber d'escuitar os autos con mensaches subliminals por as carreras, veyer os cartels con as caras d'ixas personas, y, de paso, les cabidaríanos tamién a ells haber de metamorfosiar unatra vegada, que de semellant poder que han de fer pa mantener a riseta ben d'estar ya muit cansos, y total, pa la honra que ixo les ha de fer...

Chorche Pérez.

8

Han de tener moral as maquinas?

En as zagueras decadas no son estadas pocas as peliculas que as maquinas i pillaban prou autonomía u mesmo se rebelaban contra os humanos: dende Blade Runner dica Artificial Intelligence, pasando por Robocop, Forbidden Planet, Biccentenial Man, I Robot u 2001: A Space Odissey (nombrando-ne nomás unas poquetas). Agora bien, os escenarios mesmo apoliticos que s'entrefilan en istas peliculas, ¿son motivaus? ¿pueden plegar as maquinas a fer-nos mal a esprés? Y si ye asinas, ¿cómo hemos de actuar y programar-las?

Antis d'entrar en istas custions, cal repasar una mica o que ye a moral a traviés d'un d'os suyos dilemas clasicos: ideyalismo vs. utilitarismo. Una moral ideyalista estableix bells principios basicos y universals, bellas normas u ideyas que toda persona -u ser con consciencia- ha de cumplir. Por cuentra, a moral utilitarista ye muito más flexible, y por un regular no sigue que un regle: fer o más gran bien t'o más gran numero de personas, encara que isto supose poder fer muito mal a minorías. Ta un utilitarista podríanos construyir un entivo que afogue y engarone as tierras y lugars de 5.000 personas si ye t'o beneficio de 1.000.000 de personas; ta un ideyalista, isto sería una esferra inasumible.

Si pensamos en bell prencipio que haiga d'estar universal, una posibilidat fesable ye o prencipio de "no matarás a garra persona". Muitos, en primeras, agafaríanos iste prencipio y lo feríanos nuestro, comportando-nos asinas d'una traza ideyalista. Manimenos, l'utilitarista tiene fácil o contraargumento: si una persona va a matar a atras cinco personas, y nusatros tenemos a posibilidat de matar a ista persona salvando asinas cinco vidas, ¿qué hemos de fer? Muitos d'os que en primeras nos decíbanos ideyalistas y prenébanos o prencipio de "no matarás a garra persona" dandaliamos allora, y mesmo pillamos posturas ideyalistas: si ye ta salvar cinco vidas, alavez sí que podríanos plegar a matar a una persona. Pero l'utilitarista encara no puet cantar victoria. L'ideyalista tamién puet ufrir-le contraargumentos: si matar a una persona ta salvar-ne cinco ye bien, ¿por qué no matamos a una persona sana ta sacar-le os suyos organos y asinas poder salvar a vida de cinco personas que amenistan ixe corazón, ixos rinyons u ixos livianos? Asinas asinas, mientras a historia d'a filosofía o debat ideyalismo-utilitarismo s'ha enreligau y s'ha embolicau en dilemas sin solución, si bien as posturas son claras: os ideyalistas creyen que bi ha bells prencipios basicos, os utilitaristas simplement s'achustan a las situacions.

Tornando t'as maquinas, a posibilidat de que istas se faigan más y más sofisticadas ha ubierto a puerta a la posibilidat de que puedan fer-nos mal. Y

9

debant d'ixo, muitas vegadas s'ha esborrallau en as peliculas a necesidat d'una programación "ideyalista", ixo ye, a necesidat d'implementar-les bells prencipios, normas u ideyas basicas que no puedan violar. Talment l'eixemplo más famoso d'una propuesta de programación ideyalista sigan as leis d'Asimov, basada en tres regles que iste literato amostró en muitas d'as suyas novelas, y que apareixen en a saber-lo de peliculas: 1. Un robot no puet fer mal a un humano u, a traviés d'a suya inacción, permitir que un humano se faiga mal.

2. Un robot ha de obedeixer as ordens que les dan os humanos, fueras de quan isto supose incumplir a primera lei.

3. Un robot ha de proteixer a suya propia existencia, siempre que ista protección no s'enfrontine a las leis primera y segunda.

Parixe que, mientras istas leis se cumplan, no bi habrá garra problema con as maquinas, por muito intelichents que puedan plegar a estar-ne.

Manimenos, no ye tan fácil como ficar-les ista programación ideyalista.

Esmaixinemos que somos indo por o Monrepós en l'auto automatico de Google y que de bote y voleyo una gran piedra caye debant de nusatros. L'auto de Google tiene dos opcions: (a) continar dreito y chocar-se, con a posibilidat de fer muito mal y mesmo de matar a os suyos ocupants, (b) chirar t'a zurda, an que pasa una colla de scouts con a posibilidat d'atropellar-los, de fer-les mal y mesmo de matar-los. ¿Qué ha de fer l'auto de Google? Si a l'auto de Google no le hésenos meso que os regles d'Asimov -u una programación ideyalista parellanahabría de responder a la primera lei: l'auto no puet fer mal a garra humano. Sin d'embargo, por a situación fortuita ha de fer-lo -a uns u a atros, pero no puet eslampar de fer mal a bellas personas. Como l'auto no ye disenyau ni presto ta istos casos, a suya acción podría estar qualsiquiera.

Iste eixemplo, popular y factible, ya nos amuestra una d'as primeras conclusions d'os estudios de moral en intelichencia artificial: as maquinas son cada vegada más presents en as nuestras vidas y cada vegada son más compleixas, y isto suposará que sin querer istas maquinas tiengan situacions án se veigan obligadas a fer mal a las personas.

Ta resolver ista situación, se puet proposar cambiar a ideya de programación de prencipios morals en as maquinas: ya no se trata de ficar-les bellas normas, ideyas u prencipios -ya que no podrán responder siempre a todas as situacionssino d'achustar o suyo comportamiento seguntes a situación concreta. Se pasa

10

d'una "programación ideyalista" a una "programación utilitarista". Asinas, l'auto de Google, en cuentas de responder a bells prencipios como as leis d'Asimov, ha de buscar en una base de datos de situacions parellanas (en velocidat, estau d'a carretera, etc.) y trobar a solución más optima ta fer o menos mal posible a la menor cantidat de chent. En atras parolas, ya que bellas personas han de salir feridas -u mesmo muertas-, a lo menos que'n sigan as menos posibles: "si cal que a maquina mate, a lo menos que mate bien". Iste tema ye muito delicau t'os incheniers y filosofos implicaus en ista mena de programación (por eixemplo: ¿han de tener a mesma valura as personas si as que son dentro de l'auto tienen 90 anyadas y os scouts que pasan por a zurda en tienen 10?).

Manimenos, ista "programación utilitarista" basada en pillar a información de casos particlars tampoco no ye buena de tot. Metendo atro eixemplo, Microsoft lanzó una cuenta de twitter d'intelichencia artificial que feba servir ista mena de programación: estió lo 24 de marzo d'iste anyo 2016 y se deciba Tay. A ista cuenta se le podeba fer qualsiquier demanda, y ista respondeba pillando a información d'o conchunto d'o rete social Twitter. En menos de 24 horas Microsoft habió de trancar Tay, dimpués de que beluna d'as suyas respuestas estase: "Hitler no fació cosa mala", "Hitler teneba razón. Odio a los chodigos" u que as feministas "arderían en l'infierno". Parixe pues, que tampoco no se puet dixar trigar a la intelichencia artificial d'una traza utilitarista seguntes as experiencias previas.

En l'actualidat, incheniers y filosofos son mirando de trobar a programación adequada de maquinas compleixas como l'auto de Google -pero tamién de drons automaticos u de maquinas hespitalarias- mirando d'achuntar istas dos menas de programación diferents: a utilitarista -muitas vegadas dita "d'abaixo ent'alto" [bottom-up] ya que parte d'as situacions particlars y casos parellanos- y a ideyalista -muitas vegadas dita "d'alto ent'abaixo" [top-down] ya que parti de principios u normas chenerals que dimpués s'aplican ta casos particlars.

Pero as conclusions que podríanos quitar de tot isto son as siguients: As maquinas son cada vegada más presents en as nuestras vidas y cada vegada son más compleixas. Isto fa que se dé situacions (pocas agora, pero irán a más) que as maquinas "sin querer" habrán de fer-ie mal a las personas.

Ta que isto se regule d'a millor traza posible, ye menester programar actitutz morals en as maquinas. Isto no significa que as maquinas puedan estar morals y con habilidatz tipicament humanas u animals (conciencia, empatía...), como ye

11

leitmotiv en muitas peliculas de sciencia ficción. Isto zaguero podrá estar u no pas, pero somos luent de saber-lo y de plegar-ie.

Con tot y con ixo, no cal fer escenarios apocalipticos. Por meter un eixemplo, l'auto de Google nomás ha teniu un accident por a suya culpa, estió de febrers y chocó contra un autobús a menos de 3 km/h dimpués d'haber feito más de 1 millón de kilometros. Ixo no significa que no haigamos de pillar-nos o tema en serio. Asinas por eixemplo, en mayo o segundo accident d'ista mena d'autos (en iste caso o desenrollau por Tesla) causó la muerte a o suyo ocupant. Tesla argumentó que ye o primer accident d'iste auto suyo dimpués de haber feito 209 millons de kilometros, mientras que a meya d'accidents mortals en autos conducius por personas ye de un por 96 millons de kilometros.

As situacions que han de concarar as maquinas tampoco no son nuevas. A diferencia ye que antis las resolveban por un regular os nuestros instintos, y agora con l'automatización de fainas como a conducción podemos anticipar-nos a istas situacions accidentals, habendo de responder, como contrapartida, a dilemas morals compleixos, como lo tradicional entre ideyalismo y utilitarismo, en a programación d'as maquinas.

En resumen, somos luent de desenrollar maquinas morals, pero ya tenemos a necesidat de programar actitutz y accions morals en as maquinas, habendo de concarar os problemas y dilemas clasicos d'a moral y d'a filosofía.

Marco Antonio Joven-Romero.

12

A emigración t'a tierra plana En Balbastro y otras ciudatz de los somontanos d'Aragón la inmigración montanyesa ha síu historicament prou important. Esto s'ha puesto veyer más que más en los zagueros anyos, con l'espectacular crecimiento poblacional ocurríu en estas ciudatz a mediaus y en la segunda metat d'el sieglo XX (Balbastro teneba 9.381 habitants en l'anyo 1950, 10.227 en el 1960, 13.427 en el 1970 y 15.182 en el 1981). Ye por todas conocida el fenomeno de la migración masiva rural-urbana d'el sieglo pasau. Manimenos, pa explicar bien estos datos cal fer-se cuenta de qu'en istos casos influye la especial afección que van tener estas ciudatz de la migración masiva montanya-tierra plana.

Pa entender el fenomeno de la emigración montanyesa cara ta tierra plana ye muit important parar cuenta primero de cómo funciona el sistema de Casas en la montanya. En la montanya aragonesa la sociedat s'organiza en Casas. La Casa ye una institución, un achent social equivalent alto u baixo a la familia, y totz los suyos miembros pertenecen a ella (igual como el bestiar, los edificios y las tierras). Mesmo hoi, en la sociedat contemporania, en los lugars d'el Pirineo a una persona no se le conoce por los apellíus, sino por de qué Casa ye; y en los tiempos d'antes más la importancia de la Casa en la identidat d'una persona y en el suyo futuro en función de la posicion que ocupaba en ella ha síu mayor.

La montanya ha síu siempre un puesto aspro y de mal estar, a onde yera prou dificil la vida. Allí la chent, pa poder mantener una alta presión demografica sobre el territorio, ha trobau como solución el organizar-se en un sistema de Casas como unidatz autosuficients, capables de mantener con recursos propios a toda la chent que i viviba. La Casa teneba un amo: una persona (buena cosa veces un hombre, pues ixe sistema ye muit patriarcal) que mandaba en ella y en la chent y recursos que le perteneceban, que decidiba quí heredaba, y que con la suya parella yeran las solas personas con drecho a casar-se y tener hijos. L'amo nombraba d'entre los hijos suyos a l'heredero, que faría d'amo en casar-se. La resta d'hermanos y hermanas teneban la opción de marchar de casa (bien a servir t'atra casa más fuerte u bien a la emigración) u de quedar-se-ie de tions (esto ye, a treballar pa la casa tenendo d'amo a'l suyo hermano, sin poder-se casar ni tener hijos) y la Casa teneba obligación de mantener a la chent que s'estimase más de quedar-se-ie de tión, pero nomás que de mantener-los.

Cal fer-se cargo que iste sistema ye a-saber-lo opresor pa toda la chent menos los amos. Ye por ixo que mucha chent que no heredaba s'estimaba más

13

de marchar, más que más si atisbaban que podebar ir a espiocar por bel otro lugar. Si la Casa yera fuerte (en teneba bien de chanfles) los hermanos que no heredaban podeban estudiar pa mosen u pa militar. Si no en teneba pues la chent marchaba a espiocar ta tierra plana. Este sistema de Casas ha síu causa d'una mano la chent que baixaba a l'arreo de la montanya ta las ciudatz, y de la otra de las primeras migracions masivas, quando toda la chent que no iba a heredar marchaba sin pensar-lo brenca.

Amás d'esta tongada emigratoria, fendo parte de la migración masiva de la montanya ta la tierra plana va haber tamién otros ixarabols de chent que va marchar. Va haber-ne una directament relacionada con la Guerra Civil. A lo largo d'este conflicto i habeba a-saber-la chent que va tener que marchar ta Francia fuyindo de la guerra. En bel caso a esta chent les van esbordegar la casa. En hai de casos en Sobrarbe y Ribagorza en que los nacionals, malas qu'entraban en un lugar, arramblaban con lo que podeban de las casas (más que más de las que ya s'en heban íu) y lo que no podeban llevar-se lo aventaban pa que se malmetese y no podese emplear-lo denguno y marchaban cara t'alto. Esta chent qu'heba marchau de los lugars ta Francia, si quando i tornaba ya no teneba ni casa ni cosa, continaban camino ca'pa la emigración.

La zaguera tongada ye la relacionada con los Plans de Desarrollo d'el tiempo tecnocratico d'el Franquismo. Estos Plans incluyiban una estratechia pa fer a la chent marchar de la montanya y otros puestos ta onde que se estaba desarrollando la industria, pa que servisen de mano d'obra. Con esta tongada y en muchos casos, van marchar hasta los amos. En ella ye de buen identificar d'un costau la emigración aforzada de la chent que van expropiar pa reforestar u pa fer pantanos (que valeban p'alimentar d'enerchía la industria y pa colonizar y fer regadíos en tierra plana) y d'otro aquella emigración empentada d'una traza una miqueta más indirecta, a puro de no posar-ie servicios ni infraestructuras hasta que a la chent no le quedase otra que ir-se-ne, mirando de que la necesidat de trobar un futuro que en la montanya no s'atisbaba guaire bueno fese marchar a la chent. Por un regular, en muchos lugars, la zaguera falta de servicios que feba marchar a la chent yera el cierre de la escuela.

Y ye esta zaguera tongada la que va sacar a más chent de la montanya y va causar el movimiento migratorio más gran, no nomás ta las ciudatz de los somontanos, sino ta otras como Zaragoza u Barcelona. En este caso el destino que se triaba seguntes d'aonde se teneba familia u contactos como d'una cuestión cheneracional. La chent más choven por un regular gosaba marchar ta

14

las ciudatz que estasen más lejos y fuesen más grans, tanimientres la chent más gran gosaba triar destinos más cerqueta d'el lugar d'el que saliba.

Ta ciudatz como Balbastro, pues, va acudir chent que veniba de las primeras tongadas migratorias (la chent que no iba a heredar), asinas como chent que va marchar de la montanya de más gran y que ya tenesen familia u chent conocida vivindo allí. Estos montanyeses y montanyesas feban relación (más que más al principio) con otra chent de la montanya, que gosaban venir de las mesmas valles y que i viviban en los mesmos barrios. P'algunos Balbastro no yera que una etapa en un viache más largo ta Zaragoza, Barcelona u mesmo la Guinea, manimenos pa otra chent Balbastro va significar una nueva vida y una nueva casa a onde asentar-se. Ye esta chent que se va quedar la que va fer diasporas más estables de personas de las mesmas valles y redoladas que se relacionaban entr'ellas más que no con las balbastrinos. En estas diasporas la chent que ya i heba vivíu tiempo aduyaba a los que veniban de llegar a trobar casa y faina en la ciudat, fendo-les d'introductor en este campo zancero. Con la vida contino en la ciudat la chent que se'n va baixar ha íu perdendo el contacto con la suya Casa y el suyo lugar como desenchegando a poquetz, pero nunca no pas de todo. Mesmo hoi; manimenos el tiempo, la convivencia y las nuevas cheneracions han puesto ixarrallar l'aislamiento de las inmigrants montanyesas; continan podendo-se identificar estos grupos de chent, collas de montanyeses, que teneban relación en la montanya y la tienen en la ciudat, fendo chicotz grupos socials dentro de la sociedat balbastrina y d'otras ciudatz de la tierra plana.

Iñigo Guitarte.

15

Antonier (Cronica d'una acronía en una d'as vals de Soduruel) Qualques ovellas correban o restollo radendo d'a tierra as bien pocas brancas verdas que agosto no heba puesto sumanciar. O restollo,- fumiando

polvo

blanco, zafumau de luz rusient d'oro-, no yera que un piacet de mirallo encendiu do se miraba fito-fito lo sol.

A tarde tot l'empliba d'un espacio bien platero de claridat a caramuello solo mascarau por ixa soledat preta y funda que se clava en o paisache y en a gargamela de qui se queda. Ixa soledat con o retrai d’una viella zoca d'almendrera bien enradigada, ixe tocón renegriu y terne en que a ormino se trepuza.

La envista gosaba querer recontar-me un mensache viello que me reculliba dende a suya uellada antiga. A escuitetas yo sentiba os sinyals que s'amagan en as piedras, en as botinadas d'aire que pareixeba esbotar-se dende as tripas gorgollosas d'a tierra, en o mormor d'as cicalas... y a la fín en a figura d'Antonio... largo como yera en a mosquera.

As quatro crabas que teneba, morriando marguins u arrepinchadas a o canto d'as barzas cuentra lo fundo azul d'a tarde, guallardas, se me miraban a traviés d'as suyas inquietants ninetas de cascabillo vuedo. No en teneba más , ixe yera o suyo rabanyo que cudiaba con o conque de continar estando o que yera. A resta d'o ganau ya se l'heba sacau, qué hoder…que ya no adubiba a calzoniar pa tantas.

Antonier –Zarrapico le deciban porque yera chicorrón- , o viello pastor d'Anzanigo, dormiba chitau en una marguin de l'esbarre de Centenero con un corderet acoflau entre as suyas mans de chinebro.

Aturau por os cans, o tiempo que tot l'enceta, l'heba acorau un día sin atro mientres uitanta y tantos hibiernos y agora lo convoyaba y amorosiaba con garrampetas de lana blanca.

L'alda teneba plena de vida, blanca y tova, renovada… igual que una mai.….

Cuenta tu qué preixinallos podrían amprar-le os suenios baixo a gorreta verda de jondere. Estoi que gosaba dondiar barafundiando bien frescacho por atros leitos marinos encara por sulsir. Suenios a rebutir d'algas, caracolas, conchetas y carapazons fartos d'augua, sin res d'o polvo d'as de piedra que s'en trobaba por

16

os camins. (Araba, no se creyeba con tot y con ixo, que a suya redolada estió mar).

En ixe mesmo inte dillá d’a zaguera envista qualques mundos enlá, as olas d'a mar terne sobateban as zagueras rallas y cinglas firme enreligadas ya con l'alma d'o mar.

Qué alpartau que yera lo mundo con os suyos lunes y os suyos mares.

Soduruel, que bien cerqueta yeranos d'Ena, lo croxiraba y d’as suyas mans entreveradas , verde y soro, tierra y cielo redamaban a suya desinforme mosta de silencio rasinoso. Tot i consonaba sin que dengún en parase cuenta.

Astí lo deixé, m'en fue en un adiós que s'estirazaba sin crebar-se mica…

Antonier yera enrestindo lo tiempo… soniando-se glera salobrenca debant d’un estranyo ociano prexinau. Debeba d'estar un mar gorgolloso, esgargallando esbruma blanca cuentra lo suyo peito pirinenco, muga bien pincha amerada de tierra y mar .

Dimpués, quan s'espertase repropiando morra la mar, escurruchando a bota, a gargalet veyería atra vegada nantar, bien mandau por o tiempo, lo sol.

Pero agora o tiempo, feba ya ratos ya no bi-yera.

O corderet, que se lo miraba calmudo, se chipió de yodo y de sal.

Nota : Tos traigo tamién de Soduruel a falaguera de dar ferrete pa viyer si nos fan caso pa acotraciar como cal a carretera autonomica A-1205 que escomencipia en Chaca y plega en o pantano* d'A Penya enfilando-se por a costera d'Uruel por ponient. A veyer si s'apanya en trazas y se dixa ya d'atrapaciar-la metendo gudrón en os foratos. Esta carretera que estió nacional dende Zaragoza dica Francia, agora tasament carreterucio,

fa honra pa

comunicar a ciudat de Chaca asinas como os lugars de Bernués, Botaya, Osia, Ena, Centenero, Xabierrelatre, Anzanigo, Rasal, A Penya, Triste y Santa María. *Cudiau no pensetz en recreixer-lo, que de quan en vez s'en sonsonía. Masiada engaronada ye a val con lo maha que yera , y encara en ye. L’esbarre, bien guallardo y poliu, de camins y vals que yera a Gorgocha ya s'afogó fa 102 anyadas, mesmo como a val con o suyo puent medieval digno de mas cudiaus que no se ficioron.

Alifonser Otal.

17

Mensaches d'as piedras Diz que fa milars d'anyos que as chents que viviban en as marguins d'o Río Vero prencipioron a cautivar simients y a criar animals. Abandonoron o suyo nomadismo, dependient d'os ciclos d'a fauna salvachina y a estacionalidat d'as plantas, pa quedar-se aquí. Lo dicen as piedras que conforman as paretz d'as espelungas que, sobrevivindo a o tiempo, nos recontan historias de mullers y hombres que domesticaban remugants y que quedoron immortalizaus pa cutio con uns pigmentos minerals en as profundidatz d'o Somontano.

He de confesar que, encara que siempre he sabiu d'a existencia d'as pinturas rupestres d'o Parque Cultural d'o Río Vero, estió quan descubrié que un d'ixos abrigos plenos de dibuixos se deciba “O tozal de Mallata” y que en ixa Mallata s'heba immortalizau a chent levando con cuerdas a remugants, como imachen d'as primeras domesticacions, quan istas prencipioron a trucar-me l’atención y quan s'afincoron en a mía cabeza.

Diz Wikipedia que “una mallata ye una cabana u un estallo desalpartau d'as zonas pobladas, que sirve pa acubillar a o ganau y a os pastors contra l'orache y en as nueitz que calga que i pasen istes segundos, tot cosirando a os primers”. O feito de que en un puesto clamau asinas se troben refuchiadas as imachens d'as primeras personas que s'adedicoron a la cría de bestiar en a comarca, diz que, encara que haiga pasau milenios, os costumbres d'a zona no han cambiau dica fa poco.

Y ye que, ha estau en as zaguers decadas quan o censo d'ovellas y crabas ha prencipiau a baixar en o Somontano de Balbastro. No ye un feito isolau, o descenso d'a ganadería ye común a toda la Peninsula Iberica, que ye veyendo como los suyos ecosistemas, moldiaus por l'actividat ganadera dende que os nuestros antepasaus neoliticos decidioron d’asentar-se aquí, se van degradando.

Cada vez son mas freqüents os incendios, porque bi ha menos animals controlando a vechetación, y tamién bi ha menos chent vivindo en os lugars.

Manimenos, veyemos a ormino latas, plasticos, y mas vasuera que no fa parte d'o medio, que lo contamina, que lo degrada y que estricalla a maravilla natural que son o Río Vero y o suyo arredol.

Lo cierto ye que una atura a pensar-ie, y ye, como poco, machico, que ni os desastres naturals, ni, mas que mas, os humans, haigan feito desapareixer a historia pintada d'istas tierras. Diz que cal conservar-las y estudiar-las porque,

18

amás d'historia, son obras d'arte, pero... Y si estasen bella cosa mas? Talment sigan un mensache que as chents d'antesmás nos ninvian pa que no oblidemos que cal respectar y admirar o medio en que vivimos, que ye do sale a nuestra virolla, que ye o nuestro refuchio, y que cal deixar a las cheneracions que vienen dezaga un Río Vero plen de vida y de belleza. Que lo solo que puede quedar-ie, son pigmentos minerals que emanan d'a tierra.

Lucía López Marco.

19

Discapacidat intelectual, treballo social y alternativas d'emplego Quan me proposoron d'escribir un articlo pensé de trigar un tema que me resultase familiar, y qué puede estar más familiar que o treballo que foi un día a l'arreu de l'atro. Con un tema tecnico m'arrisgo a que a persona que ye leyendo faya fuineta en as primeras ringleras d'a lectura, pero soi segura que puede aportar datos interesants y dar rispuesta a preguntas como ¿Qué fa un treballador/a social? ¿en qué consiste a discapacidat intelectual? ¿qué opcions tienen as personas con discapacidat quan plegan en a vida adulta? etc.

A discapacidat intelectual que mas d'antes se deciba “retraso mental”, se gosa entender dende dos plantiamientos, por un costau se tien en cuenta a media d'o coeficient intelectual, en iste caso inferior de 70 u menos; y por atro costau lo marcan os criterios de competencia social, ye decir si a persona tien limitacions significativas en o funcionamiento intelectual (eix: aprender, fer memoria, meter ficancia) y en a conducta adaptativa (eix: vestir-se, ir t'o escusau, comunicar-se adecuadament,

apatrusquiar-se

con

os

diners).

Pa

estar

considerada

discapacidat intelectual ha d'apareixer siempre antis d'os 18 anyos d'edat. Belún d'os sindromes que pueden ir u van acompanyaus de retraso mental son o Sindrome de Klinefelter (lo sufrió Carlos II d'España), Sindrome de X bronce, Sindrome de Williams, Sindrome de Prader-Willi, Distrofia miotonica de Steinert, Sindrome d'Asperger y Sindrome de Down.

O mío puesto de treballo ye un Centro Ocupacional (entadebant CO) y un Centro Especial d'Emplego (entadebán CEE), án se pide como requisito imprescindible que as personas usuarias (CO) u treballadoras (CEE) tiengan reconoixida una discapacidat intelectual. Os dos recursos son pensaus pa personas mayors d'edat, mas que mas con un retraso mental en grau lixero u moderau, y que puedan apatrusquiar-se en as actividatz basicas d'a vida de cada día pa poder apanyar-se de traza autonoma en o centro.

Un CO ye un servicio que ufre programas d'actividat ocupacional (eix: enquadernación, montache de piezas) y de desembolique personal y social (atención por parti de psicolochía, terapia ocupacional y treballo social) a aquellas personas con discapacidat que no pueden integrar-se en una actividat laboral de mercau, ya siga Centro Especial de Empleo u interpresa ordinaria.

Manimenos un CEE ye una interpresa que afirma personas con discapacidat pa fer un treballo productivo y remunerau, adecuau a las suyas caracteristicas

20

personals y que favoreix a suya integración laboral en o mercau ordinario de treballo.

Pa acceder a ista mena de recursos o contacto inicial s'estableix con a figura profesional de Treballo Social, qui informa d'as caracteristicas d'o recurso, os requisitos d'acceso y a decumentación que fa falta pa fer a solicitut de plaza.

Malas que a persona s'ha incorporau s'interviene a nibel individual y familiar (lo que se conoix tradicionalment como actuación de casos) en relación a demandas personals, familiars, de recursos y necesidatz detectadas; y en función d'o suyo momento vital ya que istas personas son en o recurso dica os 65 anyos y as suyas necesidatz van cambiando.

Os casos s'abordan dende una envista integral y se treballa en coordinación contina con l'equipo, formau por profesionals de terapia ocupacional, treballo social y psicolochía, y con o rete de recursos publicos y privaus: Sanidat, chudicial, emplego, servicios socials, etc.

Pa entender cómo actúa un u una profesional d'o treballo social lo millor será emplegar eixemplos de bella intervención que se fa un día sin atro.

Como se tracta de personas adultas ye bien a ormino que se fa de mirar un aloix alternativo –loguero social d'o Concello, Piso tutelau pa personas con discapacidat- porque os pais son personas grans, han falleciu u as propias personas deseyan un proyecto de vida independient; si deseyan continar en a casa propia se les puede dar apoyos a traviés d'o servicio d'atención a domicilio u de programas d'autonomía d'asociacions.

As personas con discapacidat, como tienen limitau l'acceso ta un treballo, gosan tener uns ingresos economicos baixos. Dende treballo social s'ufre información, asesoramiento y tramitación de todas aquellas aduyas a las que puedan tener dreito, como podrían estar a pensión no contributiva d'invalidez, a pensión d'orfandat u l'ingreso aragonés d'inserción, entre atras. Tamién, pa aquellas personas que son treballaderas, igualment se les asesora y aduya en a tramitación d'a Incapacidat Permanent en grau total, absoluta u gran invalidez, y en a suya retreta, que pueden veyer reducida a suya edat de chubilación a partir d'o 45% de discapacidat.

Pa rematar deseyaría meter un zaguer eixemplo. A nibel chudicial, en as personas con discapacidat como con atros colectivos, se puede promover a modificación d'a capacidat d'obrar, lo que s'entiende como incapacitación. En iste caso, a figura de treballo social puede informar a la familia pa que prencipie

21

o procedimiento u estar ella mesma qui lo promueva debant de situacions de risgo y vulnerabilidat, pa ixo s'habrá de presentar una demanda debant d'o Chuzgau, fer informes y presentar decumentación. Malas que se resuelve a incapacidat a persona pasará a estar tutelada bien por una persona física u por una entidat.

En tant breu espacio nomás pueden dar-se-ie unos ixopazos d'o que ye a practica profesional en un sector tant diverso como ye a discapacidad intelectual, pero aspero que s'haiga puesto saber l'augua clara de beluna d'as dubdas plantiadas en l'empecipio y que a o lector y lectora le meta a pulz en a orella sobre istos temas.

Carmen Herguido Traid.

22

Chaminera A celebración d'o Nadal funde as suyas radices muito tiempo antes que no a cristiandat. De feito, ye relacionada con o fenomeno natural d'o ciclo solar, exactament con o solsticio. D'astí o dito “Yes mas curto que no o Día de Nadal”.

Totz os pueblos han celebrau d'una forma u atra os momentos d'equinoccio y solsticio a lo largo d'a historia. Ya os romanos celebraban bellas festividatz chusto antes d'o solsticio d'hibierno y en iste (Saturnalia y Brumalia). Yera un tiempo de goyo por rematar a epoca d'achique d'o día y o empecipie d'o suyo alargamiento. Atros pueblos como os chermanicos, feban festividatz con a mesma intinción en honor a os suyos dioses con o emplego de luces y arbols, d'an que procede l'arbol de Nadal. Istas celebracions relacionadas estreitament con a naturaleza se daban tamién en l'ambito pirinenco, y talment dillá d'iste, ista vegada con o elemento d'a Tronca u Tizón, ye dicir, trallo especial que s’alzaba pa a suya bendición y la d'a casa, y en cremar-se o Día de Nadal, as suyas cenisas se feban servir pa dar suerte a la casa u a os campos.

L'amaneixer d'o cristianismo no puet competir con tradicions fuertement enradigadas en as sociedatz europeas d'a epoca, y se veye obligau a adaptar-seie. Asinas pues, a fiesta romana clamada Natalis Solis Invicti (que desembolicará en a forma aragonesa Nadal) s'aproveita pa a celebración d'a naixencia de Cristo, asumindo os ritos y costumbres romanos y posteriorment chermanicos.

En Aragón no podeba estar d'atra forma, pero en estar un país construyiu en una expansión territorial dende o Pirineu enta o sud, en paralelo a o Principau de Catalunya, os costumbres d'iste s'esparden enta o sud con a suya chent y a suya luenga. De vez que l'aragonés y o catalán s'ixemenan por tot o territorio d'a Corona d'Aragón con as suyas chents, a tradición d'a Tronca lo fa tamién. Ista tradición, probablement enreligada a la folclor, a machia y a mitolochía pirinencas, ye atestiguada en diferents textos, como l'Octavario de Sant Chuan Baptista d'Ana Abarca de Boleya (1679), u en o diccionario aragonés de Sieso de Boleya (1715) an que puet trobar-se a siguient dentrada: nadalero, trallo recio que en as aldeyas alzan pa a Nueit de Nadal.

En primeras ye una tradición tanto aragonesa como catalana, si no mas espardida, pero, igual como a luenga, en Catalunya s'ha conservau con mas exito que no en Aragón, an que dica hue s’ha conservau con vitalidat en as zonas vinculadas con a luenga aragonesa. Pero encara podemos replegar en atros puestos testimonios de personas que se fan alcordanza de diferents practicas

23

quanto a la Tronca. Por eixemplo en a Comarca de Tarazona se reserva o millor trallo pa a Nueit de Nadal, u l'uso d'as cenisas pa bendecir a casa. En amaneixer nuevas tradicions (Reis, Papá Noel, betlems), a perda d'a sociedat tradicional de subsistencia, chunto a la luenga, y a disparición d'os fogarils tradicionals, han desembolicau en a perda d'a tradición.

Pero encara bi ha un repui pa conservar-la, y partiremos d'o que hue se tien. A tradición d'a Tronca u Tizón de Nadal se basa en a elección d'o millor trallo pa a Nueit de Nadal, o qual se bendiz pedindo a protección d'a casa pa dimpués cremar-la en Nadal y fer servir as suyas cenisas pa enriquir os campos u a casa.

Ixa tradición, con as consabidas variants, sirve de base pa tot o territorio, encá que en a zona mas oriental se le anyade un ritual; se le fa cagar a o tizón diferents presents pa os ninos, tradicionalment lamins, lulos u mandarinas. Ista zaguer tradición no se sabe si estió cheneral de tot o territorio en o suyo día, estando substituyiu por as estrenas y atras tradicions, u no plegó a practicar-sene como tal.

24

En l’actualidat, quantos colectivos y asociacions miran de conservar y fomentar a suya celebración por tot Aragón.

Qualcunas d'as formulas de bendición (de vez que o mas viello u l’amo d’a casa ruixia con un porrón a tronca con un sinyalín de vin), u de fer cagar a tronca (fotendo-le trucazos os ninos pa que cague) son:

Buen tizón

Bebe tizón

buena casa

bebe porrón

buena brasa

tu por a boca

conserva a os amos d’ista casa.

y yo por o garganchón.

Tizón de Navidat

Buen tizón, buen varón

tu yes o tronco d’a casa

buena casa, buena brasa

por ixo yo bendizco

mantiene a paz en ista casa

con vin ista troncada.

y en totz os que i son.

O primer trallo pa Tu

Tronca, tronca de Nadal

que tot lo navegas.

caga turrons i pixa vin blanc.

O segundo por nusatros que nos des salut a espuertas.

Tronca de Nadal

O tercer pa que nieve

pixa vin blanc

y se críen as cosechas.

y caga turrón de marzapán.

O quarteno pa que as reses

Tizón, caga turrón…

no se desgracien ni mueran.

Y o cinqueno pa que a paz nos espante toda guerra.

Cherardo Callejón.

25

¿Realment no bi ha opción?

Bi ha un problema que se repite en Aragón, más que más en as zonas rurals. A chent choven marcha a estudiar u a triballar t’atros puestos y dimpués no i torna. Son muitas as razons que fan que a chent no tienga un esdevenidero digno en a suya zona: a falta de centros de formación superior en o meyo rural, a falta d’oportunidatz laborals difuera de l’agricultura y a ganadería, a falta d’ufierta ludica y cultural etc. Ye un problema compleixo que tien asaber-las lecturas, pero yo querría reflexionar sobre un aspecto concreto que a yo me pareix clau.

Quan marché de Chaca a estudiar una carrera universitaria me pensaba que ixa yera la sola opción, que pa trobar un buen triballo y una vida digna nomás podeba trobar-la luen de casa mía. O mío caso no yera l’unico, sino que la mayoría d’os mios companyers de l’instituto marchoron enta atra ciudat a estudiar. Una parti no’n hopó porque heba deixau os estudios u porque se estimaba más de triballar, pero muitos no por haber-lo eslexiu sino porque no teneban a oportunidat de marchar. Quan charras con chent d’atras redoladas y lugars aragoneses te trobas con as mesmas historias.

Ye muit grieu que no se pueda pensar ni sisquiera en a opción de vivir dignament en o tuyo lugar. Refuerzo ista ideya, no ye pensable, y no’n ye porque no s’en charra. As opcións validas y correctas pa “vivir bien” parixe que son siempre a bells kilometros de distancia en una ciudat gran. Y agora a mía cheneración s’ha trobau que no ye asinas, ya que a crisi economica nos ha trancau una ripa de puertas que se suposaba que yeran amplas bataleras.

O primer paso pa revertir a situgación ye prencipiar a pensar y a charrar de os nuestros lugars y redoladas. Cal fer pensable que vivir y triballar en o país ye fesable. Triballar y vivir bien. Y cal fer-lo chuntas, porque han mirau de que cadaguno faigamos a guerra por o nuestro costau mirando siempre enta difuera.

Por ixo estoi que o primer paso pa rematar con a despoblación y l’aviellamiento d’a población en Aragón ye pensar en Aragón y fer cosas en Aragón.

A chicota experiencia que tiengo ye que a población d’os nuestros lugars y redoladas ye deseyando que a chent choven faigamos prochectos e innovemos en o país. Quan he prencipiau a fer cosas y a pensar en as necesidatz de Chaca y d’o Viello Aragón me he trobau siempre con as puertas ubiertas y con asaber-la rispuesta d’a chent. Por ixo animo a la resta d’a chovenalla a que faiga un poder por pensar en o suyo lugar y que mire de aplicar lo millor de lo que ha aprendiu

25

difuera en a suya redolada. Fendo-lo talment podamos prencipiar a fer pensable que se puet vivir bien en o meyo rural aragonĂŠs, y que prencipie a estar atractivo pa las nuevas cheneracions.

Anchel Reyes.

26

Es mitos chistabins Tiempo habe, que no i heba luz, ni internet, ni TV, ni an, i heba tanta carretera como en i hai agora, la chent se guiaba pe’l sol, la luna yera bela cosa más que una pastera blanca en el cielo, y la chent teneba igual como agora, miedos y asperanzas, suenios, ilusions, langarias, tarranturas, y en ixe mundo an que complegan sentimientos y naturaleza chunto con es ballestros del pasau ye an que fan el suyo chacillón es mitos, criyencias que han perdurau transmitidas de boca ta orella, perque más d’antes vba criyer-ie la chent como si verdat fesen.

Estas criyencias son elementos que con chicotas diferencias han traquetiau en todas las culturas y per ixo nos acercan a la universalidat, per ixo fan que lo propio, lo intimo nos achunte con el mundo enlá.

La Valle Chistau ha gosau estar una de las que más en ha conservau, encá que es mitos, a l’igual que el zaguer follamen de l’agüerro cay fendo-se follarasca, tamién buena ripa mitos ha perviviu en las mentes d’es güelos más güelos. Y belatra, ya perdida, per decumentos y toponimia.

El mito ixemenau per tot el mundo, sobre un hombre granizo, cerrudo, que vive en es boscaches y montes, que tramena per albarosas y fabars, que se caciega y s’enfeixona per entuixanos y cillars, pero sin fer mal a dengún, ha arribau en nusatros en la figura de Chuanralla u Chanrualla, gracias a es cuentos que feban fer uellos de caparra a borches y borchas… viyendo u entrefilando-se a Marieta engalzada per Chanrualla u Chuanralla. Ye el mesmo ser que l’hombre de Mataire, hombre cerrudo y salvache que viviba per part del Pacín de Llerga, yera amigo d’es onsos y si s’espiguardaba bel pastor le zorruspaba la leche del braguer a bela craba u bela uella, s’alaminaba a la leche, pero sin fer mal a dengún. Ye la mesma representación del granizo Rancapins de la Comuna.

Si gran yera Chuanralla u Chanrualla, chicotz yeran es duendes, criyaturetas nombradas per tot el mundo enlá y a qui les empoderan toda clase de cosas inexplicables: zalicatreo d’objetos, tarramoteras incomprensibles, cosas que han diu a perdiguera sin saber cómo, basta la posibilidat d’entrar en casas y mesmo en la mente y el cuerpo de la chent. Dengún no ha puisto apercazar-ne garra, ni an viyer-los, ni saber-ne l’augua clara, pero totz saben que Es Galleguetz baixan per la chuminera, agarrapizando-se a es carrals, dimpués al chambrol y acucutando, ta viyer qui baixa es uellos y aduenyar-se d’es suyos suenios, d’es suyos pensamientos. U l’hojalater, un duende que fa más d’una cincuentona d’anyos, va fer pasar buena cerola y miedo a las chents de la Comuna fendo escatapurcios inexplicables per las falsas, igual como Es Micaletz, duendes

27

dolents y malfiaus, que viviban en un forau chunto a la fuent de Foricón y saliban a l’escureciu a fer mal y afocinar a es chistabins esminchaus y de buena voluntat.

U es diaplerons, duendes chicotz como pulces que s’acubillaban en canyutos, despertaban la noche Sant Chuan, solsticio de verano y qui es trobaba, teneba la suerte que troballaban ta él, fochaban sin reblar n’as fayenas de la facienda, fendo creixer el patrimonio sin guaire esfuerzo. ¿Y aguarda qué son las moras? Sino fadas d’augua. ¿No nos ricuerda esto al mito de la sirenas?. Encá i hai chent que ricuerda y cuenta que una muller beroya de tot con coda de pez y cuerpo de fembra saliba entre es lemos de las auguas de l’ibón de Plan. Y en i hai bel atro qui diz que no teneban coda de pescau sino patas planas con un telo entre es didos como es patos, ixe ye el mesmo mito que las Lamias. Atro mito que gosa repetir-se ye la culebra con poders, una representación terrenal d’es dioses que ya es egipcios la teneban y se repite en todas las culturas. Aquí en Chistau tenén el mito de Es Diamantes, culebrotas que teneban una piedra en mel medio la cabeza que esturdiba a qui se las miraba u Es Lacuercos, culebras cerrudas que campaban per entuixanos y que embabiecaban a las mullers tetaderas ta zorruspar la suya leche. Estes culebrucios podeban allegar a ixambrar y empestuciar lugars anters.

Bel mito s’ha funiu de tot, como l’hombre que se feba lobo, u es diaples que viviban en las fonduras de la tierra, pero quan la chent deixan morir el mito, tenén la toponimia que nos ricuerda que más d’antes va existir y las personas que nos van visitar fa más de cien anyos van anotar es testimonios de la chent de par d’alabez. Asinas tenén la plana del Diaple, y la exprisión A rebelle el diaple. Y el mito licantropo tamién ye chistabín encá que haiga puisto funir-se de las mentes. El investigador Elcock, en el siglo XIX, teneba decumentau que la chent criyeba en un hombre que se feba lobo y que le deciban Galupa. Yo no he trobau (encara) qui ricuerde esto, pero seguro que no s’entivocaba guaire el güelo que le’n va contar a Elccok alavez, porque hoy tenén dos esprisions que han quedadas fosilizadas: yes más malo que Galupa, y tamién, yes un galupán.

Funix el mito, pero no funix la parola ta recordar-nos que el mito más d’antes va existir.

Y acabar parlando de las Bruixas que heban estau en la mente de las cheneracions d’antes basta no guaire tiempo, mullers que teneban poders, u bien que es teneban, u bien que la chent les empoderaba, per miedo, superstición u per no comprender qualques cosas que pasaban. Las bruixas se tornaban animals, más que más gatos negros, diz que podeban volar, entrar n’as casas a fer mal, dovinaban el futuro, feban maldaus y podeban malcorar a la

28

chent u fer ploramiquiar un criet semanas ta angunia de la suya mai. Diz que podeban aprender es suyos poders en un libro verde u tamién dando la man a una atra bruixa que morise, que tot morindo le pasaba es poders.

Esto ye una chicota lista. Pero en i hai más, y con segurancia, nos percutirín de trobar-ne atros que pocos conoixeban. Es mitos son un sustrato común a todas las culturas, nos fan más universals, son el fil que nos achunta con es antipasaus y son una fuent de la sabiduría popular, tenén que ricordar-los, conservar-los y dar-les la valura que se merixen ta que no funixcan.

Fernando Romanos Hernando.

29

A fin como ha quedau a montanya y o sentimiento d'o entorno Vals, rius, clamors, cultura, tradición, fan que dende antismás no podamos privar tener bell sentimiento, bien siga admiración, pasión u curiosidat por ista tierra.

Mas que mas, aquí en Aragón, a tradición popular, oficios tradicionals, cultura, forma de vida (no pas facil, precisament) han feito dende siempre a las chents creyar una admiración que por ixas envueltas prebaba de chustificar a suya existencia con polidas leyendas.

Magnificas masas rocosas como son os Pirineus.

(En espanyol: Pirineos; Francés: Pyréneés; Catalan: Pirineus; Occitano: Pirenèus; Aragonés: Pireneus/Perinés; Euskera: Pirinioak o Auñamendiak) Un entorno natural unico, que arrocla glaciars, fauna y flora.

Os Pireneus, dende antismás, son estaus punto de referencias pa muitismas leyendas u argumentacions sobre a suya creyación.

Talment por ixo se creiga que o suyo orichen ye o deposito de grandizas penyas por parti d'Hercules sobre o cuerpo d'a polida choven clamada Pyrene dimpues que tenese lugar l'incendio en o bosque an s'amagaba.

30

Atra versión diz que ye un toponimo ancestral, de orichen ibero u vasco.

Seguntes ixa teoría, a cordelera se dició “llene os”, que significa “monts d'a luna” A cordelera pirinenca ye una tierra humanizada dende o Paleolítico Meyo.

O paso d'os romanos y a Edat Meya tamien i deixoron importants vestichios, como son as antigas vias romanas, os grans monesterios y as muitismas ermitas d'estilo romanico que se troba a lo largo d'ista espectacular tierra.

Muitos d'os lugars que hue conoixemos ya feban parti de l'antigo reino d'Aragón, convivencia entre pobres y nobles de vegada. Ye por ixo que en o suyo conchunto o territorio disfruta d'un Patrimonio Historico Artístico abundant.

Como por eixemplo o perteneixient a os Castiellos de Lobarre, Alquezra, Peracense, Monzón, Biel...

Los quals hemos de protecher, esfender y no deixar funir En Aragón bi ha bellas 500 fortificacions que se devantoron a lo largo d'o suyo territorio de carácter musulmán, romano, ibero u visigodo.

L'actividat trashuant en o Pirineu ye estau o principal meyo de subsistencia dende a prehistoria dica o sieglo pasau. Dende a Edad Meya os ganaders se'n puyaban regularment ent'as Vals pirenencas, dende as planas y faixangas quan plegaba u yera cerca o estiu. Iste proceso anyal dió lugar a la vida y a sociedat d'o Sieglo XIX. Talment por ixo consta leyendas pastorils que arroclan belunos d'os puestos mas reconditos, con pastors como os suyos protagonistas, como por eixemplo Treserols, fuesa baixo tricallons de piedra d'ixe pastor viello d'antismás de carácter agro y furo que dimpués de bella zaragata no querió acubillar a un choven pelegrino d'a zona.

Chunto a ixa vida pastoril acompanyaba a presencia d'os lupos y onsos.

Toponimias y relatos dan fe d'ells. No cal soque veyer l'eixemplo d'a clamor Mascún, totz han sentiu charrar d'o singular Mauro “O pastor d'os lupos” qui no se deixaba veyerque en as nueitz de luna plena.

A la chent naixida de Panzano se les deciba con a embotada de “Loberos”, en Barbenuta u Espierre “luperos” y en Banastón “escaldalobos”

31

Atro personache present en a vida trashuant y pastoril yera l'onso. En a-saber-lo de lugarons o dispertar d'a hibernación de l'onso implicaba o escomencipio d'a primavera y por consiguient l'anyo de biens u fambruna.

Se deciba que si l'onso ubriba os uellos en luna perdida, liberaba a la tierra d'os malos espritos.

Construccions rurals y cubillars acompanyan siempre o paisache d'ista tierra.

Bordas, construccions de piedra ixuta u as increyibles viviendas con grans arcos apuntaus y de meyo punto habituals en a comarca d'o Mayestrazgo.

A la finitiva, o ser humano siempre ha sentiu ixa extrania sensación por l'entorno natural, cultura, tradición, costumbres d'a tierra en que viviba.

Un mezclallo mas que perfecto que ista tierra nos da y una sincusa mas que suficient pa protecher-la, esfender-la y amar-la.

Sí, ista ye a tierra a on queremos vivir y mai no será en venda.

Silvia Orós.

32

A muller en a sociedá actual: a muller con discapacidá en o patriarcau L’atro día leyié que o 70 % d’as mullers con discapacidá en España no tienen un treballo. Cuan muller e discapacidá s’achuntan en un mesmo sintagma, o futuro, a lo menos o d’a muller que vive ixa realidá, ye complicau e incierto. Antimás, dos tercios d’as mullers con discapacidá en edá de treballar se troban en situación inactiva, ye decir, que no treballan.

E isto per qué? Perque bi ha muitos estereotipos e prechudicios: menor rendimiento, más absentismo, más gasto en formación, adaptación d’o puesto de treballo, entre atras.

Todas, u cuasi todas, queremos un treballo (a lo menos queremos fer cosas que nos cuaquen, no m’importa si ye a truca de diners u no pas). Pero... emos pensau sobre qué tipo de treballo queremos? Nos cuaca o nuestro treballo?

Semos felices?

Emos plegau dica un punto en que treballamos per treballar e sin pensar per qué lo femos. Nos han dito que emos de luitar per os nuestros suenios, per o nuestro futuro, pero sin salir-nos-ne de l’orden establiu que ista sociedá normativa nos marca. De bote e voleyo, ixos suenios ya no son tan importans e se desfán mirando de sobrevivir día sin atro. Cualsiquier atisbo de cambios, de prioridaz e de principios que vaigan dillá son secundarios, no pas vitals. A urchencia temporal que imprime o capitalismo en a nuestra sociedá fa que ista nos afogue dica fer-nos creyer que no podemos fer cosa, nomás vivir (per vivir).

Iste ye o mío caso u o d'asaber-las mullers uei en día: yo tiengo a suerte de poder treballar, pero no han estau pocas veces, en entrevistas de treballo, en que he visto cómo o feito de caminar con una garrancha yera una cuestión importán d’a quala tratar en a entrevista.

Per ixo reivindico aquí a todas ixas mullers, como yo, afogadas en ista sociedá capitalista e patriarcal: perque istas mullers son d’as que pocas veces en sentirez charrar.

Con tot ixo qué quiero decir? Nomás que emos plegau dica un punto en que ye más evidén que no nunca cómo o sistema capitalista nos afoga e o patriarcau nos preta encara más. E cómo ye a situación d’una muller en ista sociedá e más si tien bella discapacidá? Ye de discriminación, multiple e diversa, cuasi tanto como en ye ella. As caracteristicas que s’asocian a una muller e a una

33

discapacidá, e istas chuntas, no fan que agravar os prechudicios de discriminación e opresión.

He emplegau a palabra discapacidá conscienmén en tot l’articlo perque ye o que existe en o imachinario colectivo d’a mayor parti de chen. No sabeba si escribir “minusvalía” u “discapacidá”. Sobre “minusvalía” ya podez imachinar o que significa... asinas que no me cuacaba. Discapacidá parixe que no tien un significau tan negativo porque ye más enmascarau..., pero... Pa prencipiar ye una mala traducción d’o termino inglés disable (con o prefixo dis-, que tendría o suyo eqivalén en castellano con in-): incapacitau u incapacitada ya suena pior, eh?

Finalment, podría aber trigau atro termino sin semantica peyorativa: diversidá funcional. Iste ya me cuaca más.

Iste termino busca ofrir una concepción d’a realidá dillá d’o modelo medico imposau por os terminos anteriors, que tienen a veyer con a malotía e a deficiencia. Terminos creyaus dende a opresión, a discriminación e a segregación. Per ixo diversidá funcional s’achusta a una realidá en que a persona ha de sobrevivir en una sociedá que li discrimina; razón per a quala ha de funcionar de forma diferén u diversa. Una persona xorda charra a traviés d’as mans e os uellos. A lengua de ceños ye una lengua diferén a la lengua oral que charramos todas nusatras pero cumple o mesmo ochetibo: a comunicación.

Mesma función, manera diversa.

Estar mullers e tener bel tipo de diversidá funcional son realidaz que emos feito entrepuces en o camino pa ixas mullers que las cruzan, sin parar cuenta d’o que en realidá significan pa ellas mesmas.

E asinas ye a nuestra sociedá: diversa. Comprender antes con antes tot o que isto puede aportar-nos, dixando a un costau as ideyas monopolizaderas, constrinchents e limitants ye o primer paso pa transformar a realidá e construirla. Perque tamién o lenguache fa ixo, construye realidá.

Andrea Fenero e Maria Torres.

34

La voz que no deixam morir “Mai, mira-me as mans; las trayo buedas, lasas d’amar… son dos alas d’un biello pardal que no puet sisquiera volar…”

Istos bersos que tan familiars mos suenan, per aber-los leiu tantas begadas, u per aber-los sentiu cantar a Gabriel Sopeña, a Labordeta, a Olga y los Ministriles u a nusatros mesmos, ban en un llibret de poesía de fa més de cuarenta años (denguno no el diría per lo frescos que suenan) que agora torna a la bida, si ye que bel día ba morir.

Ixo que a primers de 2016 eban secretos a escuchetes, se ba fer realidat antes de final d’año. A la fin saliba una nueba edizión de “No deixez morir a mía voz”, d’Ánchel Conte, uno d’es llibros seminals de l’aragonés literario moderno. La sorpresa ba tirar entadebant grazias a’l mesmo autor, que en teniba prou ganas, y la editorial de Zaragoza Los libros d’el gato negro (2016), que ya n’eba publlicau una buena repllega de poemas rezients, “Luna que no ye luna”.

Con una repasadeta a bels datos biográficos d’Ánchel Conte tendrem las primeras endrezeras cara ta conoixer es orichens d’el poemario reeditau. Ánchel conte ye naixiu d’Alcoleya de Zinca (Zinca Meya) (1942). Es primers contautos d’Ánchel Conte con la llengua nuestra vienen d’el bagache lingüistico de la suya familia, espezialment d’es suyos lolos. Un Conte ninón y adoleszent descubre parolas sueltas y espresions que reconoixerá dimpués en las fabllas bibas de l’alto Aragón. Fa estudios secundarios y unibersitarios entre Uesca, Barcelona y Zaragoza, y ya como profesor de secundaria marcha destinau a’l nuebo Instituto de Enseñanza Libre Adoptada de l’Aínsa (güe IES Sobrarbe) en 1966.

La suya bisión adelantada de la pedagochía cunde en l’alumnalla. Son zagals y zagalas de la biella capital sobrarbesa y la suya redolada, y un poquet més entallá. Ánchel rezibe d’ells una llengua y una cultura que él achunta con l’erenzio d’es suyos lolos, y fa beyer a estudiants y familias la oportunidat de reibindicar la dinnidá d’el suyo entorno y el suyo bagache soziocultural. Como mos fa alcordar Chusé Raúl Usón en el prelogo de la nueba edizión de “No deixez

35

morir…”, Conte “s’implica en totas e cadaguna de las causas d’aquel País”.

Empllega l’aragonés en las cllases, espienta el grupo folklorico Biello Sobrarbe, recorre toz es mons de la redolada y empeza a atribir-se a escribir cuentez como “A yaya Andresa”, que beyerá publlicaus en rebistas altoaragonesas com o “Argensola”.

Pero chunto a totas istas alegrías combibe la soledat d’el bardo d’Alcoleya, que bibe en el suyo interior el suyo pensamiento politico ya asentau y la suya sexualidat reprimius en aquells tiempos en que “Franchón” (asina le diban en el mío llugar) encara mandaba y muito. Es bersos ban dibuixán las tardes y nueis de calma y tristura en la suya cambra de la fonda Sánchez, bersos que ya ban amanixén en la llengua d’es suyos lolos, d’es suyos bezins y alumnos y d’es poetas d’antesmás, que será ya pa cutio la suya llengua.

Entre 1968 y 1971 Ánchel Conte ya alza cuasi toz es poemas en berso y en prosa que conformaran “No deixez morir a mía boz”, y mientres Francho Nagore (a qui conoixerá lluego y con qui achuntará poders en fabor de l’aragonés) conseguiba publlicar la suya poesía en Uesca (“Sospiros de l’aire”, 1971), Ánchel los fa allegar a José Antonio Labordeta. El en ixos tiempos cantautor nuebo, dimpués de leyerlos d’alto entabaix, ba dir que caleba publlicar-los. Es ba alcanzar a l’editor catalán José Batlló, (més entabant amo de la librería Taifa de Gràcia), que ya eba editau obra d’el y d’el suyo chirmán Miguel. En Pep de Caldes (asina conoixiu en Barcelona per ser naixiu de Caldes de Montbui) ba dezidir ascape incluir-los en la més que prestichiosa colezión de poesía El bardo.

Y, como acostumbran a dir, el resto ye istoria. “No deixez morir a mía voz”, chunto con “Sospiros de l’aire” y “Garba y augua” (Zaragoza, 1976) d’Eduardo Vicente de Vera (que tamé ba brindar la impresionant nobela “As fuellas de París”), marca l’emprenzipie d’una renaixedura literaria de l’aragonés, dende la poesía. Y ixo sin tallar brenca con es antezedents dialectals de la primer metá d’el siegllo XX (Veremundo, Baldomera…), sino que ubre la llengua a totas las posibilidaz d’espresión de sentimientos, dende es més personals dica es més coleutibos, a penar de ser una llengua minorizada y en perigllo de desaparixer.

La reibindicazión de la llengua ba, pues, achuntada con lo més intimo.

Ixa primer edizión d’El bardo ya fa años que ye oixeto de rechiras imposiblles en las llibrerías de colezionismo. La segunda, de 1986 (CFA, Uesca) lleba tamé prou tiempo acotolada. Po que se’n troben encara eixempllars de la terzera, en bersión trilingüe aragonés-castellano-ruso (CFA, 2002). Pero Ánchel, la llengua aragonesa y nusatros que mai no en tenim prou, de la suya poesía, mereixeban

36

ista cuarta edizión. Pinchisma, en bersión bilingüe aragonés-castellano y una portalada polidisma de la zaragozana Cristina Guallart presentán un buen calzero de montañero. L’editor de la primer edizión, José Batlló ba morir chusto cuan ya saliban de la imprenta es primers eixempllars. Per ixo Conte quiere adedicar con emozión el poemario a él y a Labordeta, que tamé se mos n’ha iu.

Cuan Ánchel conte demandaba “No deixez morir a mía voz” ya sabeba que ixa boz eba d’el pero tamé de toz, la llengua aragonesa, la llengua nuestra. Asina, biba, a penar de cansa y meyo acotolada, ha llegau dica aquí. L’hem feit caso a Ánchel y le’n seguirem fen.

Alberto Lamora.

37

O Mirallo Trobada – Vivir en aragonÊs Agosto, 2017

38