Recursos

Ramsés Pérez

REVISTA

Grazas, Planeta Terra. Pantera, somos natureza

Cristina Camarena

Edita: Savana Books

Galego (64 páx.) 2024

ISBN: 3020-7894

A revista Pantera número 13 é a da boa sorte. Logo dun Verkami no que se acadou o obxectivo económico necesario para se manter, xa somos moitas as familias que temos na nosa casa esta marabillosa revista para todas as idades. Quen viñamos gozando dos seus contidos fantasticamente editados, podemos facelo agora tamén en galego, catalán e éuscaro, ademais de en castelán.

A Pantera nº 13, como nos din no editorial, é o número da gratitude, que vén darlle as grazas ao planeta Terra por todo o que recibimos a diario. Nela recóllense multitude de contidos en moi diversas formas: un relato titulado “Vagalume”, un cómic para colorear, unha entrevista a Vanesa Freixa, escritura e debuxo creativo ou un póster co ciclo da gratitude, entre outras moitas propostas.

Máis info e subscricións en: www.savannabooks.org

LIBRO

Livro vermelho dos peixes dulciaquícolas de diádromos de Portugal continental

Magalhães MF, Amaral SD, Sousa M, Alexandre CM, Almeida PR, Alves MJ, Cortes R, Farrobo A, Filipe AF, Franco A, Jesus J, Oliveira JM, Pereira J, Pires D, Reis M, Ribeiro F, Robalo JI, Sá F, Santos CS, Teixeira A, Domingos I. Edita: FCiências. ID & ICNF.I.P. Lisboa Portugués (160 páx.)

2023

ISBN: 978-989-53724-5-4 (versión impresa) 978-989-53724-6-1 (versión dixital)

O Livro Vermelho dos Peixes Dulciaquícolas e Diádromos de Portugal Continental tivo como obxectivo a avaliación do risco de extinción dos 43 taxons nativos que integran este grupo taxonómico, entre os que se inclúen 11 migradores diádromos e 32 residentes, dos cales 10 son endemismos lusitánicos e 17 endemismos ibéricos. Nesta obra son presentados os resultados por especie en fichas individuais que integran información sobre distribución, hábitat, factores de ameaza e medidas de conservación consideradas necesarias para cada unha delas.

A versión dixital do libro pode atoparse aquí.

LIBRO

La grajilla occidental en España y Portugal. Tamaño poblacional, tendencias temporales y conservación

Guillermo Blanco e Javier García (EDS.)

Edita: CSIC

Español (241 páx.) 2023

ISBN: 978 84 00 111177 9

Nesta monografía preséntanse os resultados do primeiro censo de gralla pequena (Corvus monedula) realizado de forma simultánea e localizados en España e Portugal. O obxectivo deste proxecto é determinar a distribución dos durmidoiros de inverno e obter a primeira estimación da poboación a partir de datos reais e verificables, que poidan servir de referencia para establecer a tendencia da especie no futuro.

Ao longo dos capítulos que conforman a monografía móstranse os resultados globais do censo, e posteriormente detállanse os correspondentes a cada Comunidade Autónoma ou rexión de España e Portugal. Cada capítulo repasa a información previa dispoñible sobre a distribución e tamaño da poboación, e analiza as posibles causas da súa tendencia histórica e recente de poboación en cada territorio. Tamén propón unha batería de medidas para a súa conservación.

LIBRO

Gotas

Adela Figueroa Panisse

Tradución: Elena Pérez San Miguel

Edita: Editorial Novembro

Galego e español (106 páx.) 2023

ISBN: 9789893508909

Adela Figueroa ofrece nesta súa obra de dramaturxia infantil unha lección sobre o ciclo da auga e sobre a necesidade de protexer os nosos ecosistemas acuáticos, a través duns personaxes que van da pinga ao lixo, da chuvia aos plásticos e dos peixes ás verteduras. A través deles, Figueroa conduce as crianzas cara á concienciación ecoloxista, o respecto ao medio, o amor pola propia tradición lendaria galega e a xustiza social.

LIBRO

Cento doce viaxes na miña terra

Xoán Colazo Pazó

Edita: Sermos Galiza Galego (492 páx.) 2023

Sermos Galiza editou unha magnífica obra de Xoán Colazo de 492 páxinas e máis de 250 fotografías do propio autor e de Adela Leiro e Celsa Quintas; cun formato manexable que permite levalo en calquera viaxe que decidamos emprender polo noso país.

Cun debuxo do índice de Mon Daporta, a obra de Xoán Colazo é unha descuberta do noso territorio diverso e vivo. Ofrécenos o autor poñer un pé diante do outro e saír camiñar á procura de cada un deses recunchos que todas as persoas temos a carón da nosa casa e nos que moitas veces non reparamos. Quizais, esta, é a mellor forma de valorar o que temos, como primeiro paso para querer e defender a nosa terra das actuais e vindeiras ameazas ambientais coma as que se poden ler nesta revista Cerna. Un paseo pola nosa natureza inseparable do patrimonio histórico, lingüístico e cultural... Todo o amor polo país en cento doce viaxes.