puisi-puisi i kadék widiantana

Tusta Citta Manemu Pati

idup boya unduk déwék padidi nénten yukti ngantosang pati patiné sulur anemu widhi widhi widya bekelang sasai yasa kérti satmaka titi maduluran laksana luih salami maurip angawé tusta swagotra sami ring suargan unggwani sang kapati yadian kulawarga duhkita tan sinipi mangiring pajalan sang anemu pati sahananing panes matemahan tis ring kasukan masenetan duhkita pasti sahananing maurip mawastu pati pati tan urungan panelasing titi mugi rowangku tusta citta manunggaling Gusti

Pangaksaman Sang Palatra

tan kawasa angiket sang hyang atma matulak wali anemu panyamania anggapati, prajapati, banaspati, wanaspati raja angatad anyambut sang palatra kadi hima manyaputin sang katilar sungsutnia sang katilar sinaput antuk magirang manyanggra atiti swagotra sang palatra aturnia banban matampih ban duhkita atur pangampura I Dambha ngangganin sang palatra nglungsur luput iwang ring atiti ramia pradé iwang i sang palatra asung lédang mangampura

Sungsutnia Sang Palatra

sang lampus mamanah mabaos nanging sané mangkin sampun bina tongos wénten jihwa panyamaan sané kagentos mangda sida matur ring anak tios panyamaané karangsukin anggén jalaran nyanggra para atiti wénten baos yadian acuil pangenjuh atur i lara tuwi atur sang atma sada banban mémé bapannya nangis sinambi manimbal durus mamarga antuk kalascaryan sampunang lupa ngaton pianak saking kadituan

Dedauhan Pati Urip

suka duka lara pati tan sida manungkalikang tan sida manangkis yadian manyadang dedauhan pati urip tuna ban nglidang i wwang daridra amung sida manyalanang lantang tuwuh kadirgayusan pangaptiné sami wateking manusa punika taler I Dhamba tuna kénak rahayu banget katunas guna sadu sané utama gamel setata sampunang lupa yasa kerti dahat buatang mangda sida nemu bagia

Pangacep Sang Katilar

mamarga jwa mamarga angungsi jagat sunialaya wiréh titahé tan sida manulak

kasanggra kairing panyamania acep-acepan sang katilar atilar i lacur mamangguh rahayu rahayu genah praya katur katur tustha citta jeroning manah anuntun laksana gotrannyané kantun maurip mangedohang wisya rowang wéci wanging nindra turu angajap atangi moga tan malupa ring sanak panyamania sami