Edicion 7 #LOGRANDO (Mei 2024)

CONSTRUCCION DI HOTEL SECRETS TA AVANSANDO HOPI LIHE

PROME MINISTER A HACI UN RECORIDO RIBA E TERENO DI REFINERIA DI ARUBA

PARLAMENTO A RICIBI E NOTA DI COMIENSO DI AÑA 2024 DEN CUAL TA INDICA E CAMBIONAN DEN MANEHO CU A PRESENTA

MINISTER MADURO DI FINANSA A RICIBI BISHITA DI EXECUTIVE DIRECTOR DI IMF SR. PAUL HILBERS

MEHORANDO ACCESIBILIDAD, CUIDO Y SERVICIO

MINISTER DANGUI ODUBER CONHUNTAMENTE CU

MINISTER ENDY CROES A BISHITA PARKE JABURIBARI PA SONDEA E POSIBILIDADNAN PA CONSTRUI CANCHANAN PA HACI DIFERENTE DEPORTE.

MINISTER ENDY CROES A RICIBI E CONSEHO FINAL DI E COMISION CU A TRATA E STRUCTURA DI SALARIO DI E DOCENTENAN

ENSEÑANSA PA EMPLEO TA CRUCIAL PA YUDA NOS HOBENNAN DRENTA MERCADO LABORAL

TRAYECTO ‘BUITEN PROJECTEN’ NA NOS

INSTITUTO CORECCIONAL KIA A ININCIA

A REUNI CU PAHO DEN CUADRO DI E AVANSENAN PA CU SALUD MENTAL NA ARUBA

FRACCION DI MEP

SIN MIEDO

CONECTA CU NOS

#LOGRANDO

“Meta ta pa habri e prome 300 cambernan pa fin di aña”

CONSTRUCCION DI HOTEL SECRETS TA AVANSANDO HOPI LIHE

Diaranson mainta 15 di mei, Prome Minister Evelyn Wever-Croes hunto cu representantenan di DOW, a bishita e sitio unda cu Hotel Secrets ta wordo construi na San Nicolas. Motibo di su bishita tawata pa observa con e proyecto ta avansando.

For di e repesentantenan di Hotel Secrets, Prome Minister a haya splicacion amplio di e diferente fasenan di e proyecto. Tambe nan a notifica Prome Minister cu pa fin di 2024, nan lo kier keda cla cu e construccion di e prome 300 cambernan y habri esakinan prome cu aña caba.

Prome Minister a indica cu e Proyecto ta progresando bastante bon y ta mustra cu lo logra nan meta pa fin di aña. Apesar cu e Proyecto aki a sufri hopi tardansa pa motibo di e diferente discusionnan cu tawata tin su rond, mester a coregi varios asunto na caminda pa asina acapara e preocupacionnan di tur hende.

“Sinceramente, Hotel Secrets na San Nicolas ta un proyecto sumamente grandi pa Aruba en general pero specialmente pa San Nicolas. Cu e inversionistanan priva a mira un luga pa nan pone nan riesgo, inversion y

nan placa pa trece un desaroyo pa Aruba, ta algo cu nos ta aprecia hopi, especialmente pasobra esaki ta bay trece e progreso y bienestar pa esnan cu ta biba paribi’brug, cu ta algo cu ta haci ami hopi contento. Mi ta hopi impresiona con lihe e construccion ta bayendo y mi ta sigur tambe cu pa fin di aña e hotel ta keda cla pa habri su prome 300 camber”, Prome Minister a expresa.

“Refineria ta mustra e historia di nos pais y awor nos mester concentra riba e futuro di Aruba”.

PROME MINISTER A HACI UN RECORIDO RIBA E TERENO DI REFINERIA DI ARUBA

Diaranson mainta 15 di mei, Prome Minister Evelyn Wever-Croes a haci un recorido riba e tereno di RDA (Refineria di Aruba) pa mira asina diferente aspectonan di e refineria y proyectonan cu ta wordo planifica door di DOW.

Un di e proyectonan ta un caretera cu a wordo proyecta ya un par di aña pasa. E caretera lo pasa a traves di e tereno di e refineria y yega na e area di Colony, Baby Beach y Rodgers Beach y na Secrets Hotel mas lihe.

Prome Minister diaranson mainta a haci un ‘site visit’ pa asina haya splicacion amplio di e Proyecto aki.

E mandatario a remarca cu tawata un mainta cu hopi informacion interesante. Por a mira tur e posibilidadnan y lo sigui traha y studia e proyecto aki y mira si tin necesidad di un caretera asina pa conecta e centro di San Nicolas mas lihe y mas efectivamente cu e area turistico cu ta den desaroyo aworaki.

“Mi por bisa cu ta momentonan di melancolia ora pasa door di e refineria y wak con esaki a decai. Pero tambe esey ta mustra e historia di nos pais y awor nos mester concentra riba e futuro di Aruba. Mi ta gradici tur e profesionalnan pa nan tempo y pa tur e informacion cu nan a trece padilanti awe mainta”, Prome Minister a expresa.

PRONTO LO PRESENTA UN CAMBIO DI LEY DI PRESUPUESTO 2024

Recientemente Minister Maduro di Finansa a haci entrega di e 'Nota di Comienso di Aña 2024' na Parlamento. E Nota aki ta duna Parlamento un bista mas tempran di e cambionan den maneho cu a tuma luga y cu lo tin mester aprobacion di Parlamento. Esaki ta e di dos biaha cu Minister Maduro ta presenta un Nota di Comienso di Aña na Parlamento.

NOTA DI COMIENSO DI AÑA

Na aña 2023 tabata prome biaha cu Minister Maduro di Finansa a haci entrega di un Nota di Comienso di Aña na Parlamento.

• ‘NAJAARSNOTA’:

Te cu aña 2022, Aruba tabata conoce solamente un 'Najaarsnota' cu ta un 'Nota di Fin di Aña' den cual Parlamento despues di mita di e aña coriente ta wordo informa di e cambionan den su Presupuesto aproba y basa riba esaki Minister di Finansa ta presenta un Presupuesto Suppletorio den cual ta pidi Parlamento pa duna aprobacion si tin cambionan cu a tuma luga.

• VOORJAARSNOTA:

Desde 2023, Minister di Finansa ta presenta tambe un 'Voorjaarsnota' den cual na comienso di aña caba ta presenta e cambionan den e Nota di Comienso di Aña y hunto cu esaki ta presenta un Presupuesto Suppletorio pa Parlamento por aproba.

CAMBIONAN PROPONI

• CIFRANAN DI ENTRADA:

Den e Nota di Comienso di Aña 2024 presenta na Parlamento di Aruba, Gobierno ta adapta e cifranan di entrada na e ultimo crecemento economico conforme e ultimo prognosis haci pa Departamento Economico cu ta indica cu e economia di Aruba lo crece cu 3% den aña 2024.

• CAMBIONAN DEN MINISTERIONAN:

Banda di esaki, den e Nota por mira pa cada ministerio kico ta e cambionan den maneho ta encera y ki cambio den e cifranan mester tuma luga pa haci esaki posibel.

• SUMA EXTRA DI IMPUESTO:

Den e Nota por mira cu tin un suma extra di impuesto cu a wordo genera cu por wordo destina pa realisa proyectonan manera, entre otro, Delta Plan Ouderen, trabounan na Parke Curason, Palo Marga, Stadion Guillermo Prospero Trinidad, Leerorkest, Loket Plan di Mayor, Indexering pa empleado publico, y pa renobacion di Cas di Cultura.

• FONDONAN DI HULANDA:

Tambe tin fondonan cu Aruba ta haya di Hulanda pa asina por hiba acabo proyectonan di Landspakket, manera e Huisartsenopleiding, cu tambe mester keda integra den Presupuesto 2024.

PRESUPUESTO SUPPLETORIO 2024

E mandatario di finansa ta informa cu mientrastanto Conseho di Minister a bay di acuerdo pa e cambionan proponi den e Nota di Comienso di Aña 2024, wordo hinca den un Presupuesto Suppletorio cu a wordo manda pa Raad van Advies pa conseho despues cu CAFT a duna su opinion.

Di eynan e Ley lo sigui cana su caminda pa por keda presenta na Parlamento di Aruba pa su tratamento y aprobacion.

MAS TRANSPARENCIA PRESUPUESTARIO

Minister Maduro ta acentua cu e uzo di e 'Voorjaarsnota' of 'Nota di Comienso di Aña' den e ciclo presupuestario di nos Pais, ta brinda Parlamento informacion presupuestario na mas momento den un aña.

Di e manera aki Parlamento por sigui e desaroyo di gasto y entradanan durante aña mas di cerca. Esaki sigur ta yuda Parlamento di Aruba den su derecho di 'budgetrecht' y ademas ta brinda mas transparencia na Pueblo riba con e fondonan publico ta keda uza pa Gobierno.

Minister Maduro ta gradici Executive Director di IMF sr. Paul Hilbers pa su bishita y a presenta un bunita recuerdo como muestra di gratitud pa e asistencia continuo ricibi di e staff di IMF. Hunto cu IMF trabounan importante a wordo haci cu ta sigura e stabilidad financiero di Aruba y ta yuda crece e credibilidad financiero di Aruba den wowo di inversionistanan.

MINISTER MADURO

DI FINANSA A RICIBI

BISHITA DI EXECUTIVE DIRECTOR DI IMF SR. PAUL HILBERS

Dialuna merdia Minister Maduro di Finansa a ricibi bishita di e Executive Director di IMF sr. Paul Hilbers kende ta na Aruba pa hiba reunion cu e mandatario encarga cu finansa, Conseho di Minister y ehecutivonan di Banco Central cu ta den contacto cu IMF.

Tabata un reunion ameno den cual a repasa e trabounan cu IMF a bin ta yuda Aruba cu ne den forma di evaluacion financiero y economico den forma di Article IV Mission y asistencia tecnico riba diferente tereno cu a yuda capacita, fortifica y profesionalisa e gobernacion di nos Pais.

E ultimo añanan Aruba a bin ta ricibi hopi asistencia tecnico cu a keda brinda door di IMF via CARTAC cu ta nan centro di asistencia tecnico pa e region di Caribe. Asina por menciona asistencia tecnico na Departamento Economico

pa 'update' e modelo macro economico MARUBA y asistencia tecnico na Departamento di Estadistica pa valida e cifranan di Cuentanan Nacional di Aruba, cu ta proyectonan cu a yuda Aruba grandemente specialmente durante di pandemia pa por a haci calculonan economico hopi aserta cu tabata necesario pa calcula e daño, pero tambe pa por a haci pronosticonan pa e recuperacion economico di nos Pais.

Banda di esaki IMF a yuda cu asistencia tecnico na Departamento di Aduana pa asina por facilita e servicio di carga na comunidad. Desde aña 2019 Departamento di Impuesto tambe a conta cu e yudansa di IMF pa reformanan fiscal cu a tuma luga y dentro di poco lo bolbe ricibi asistencia pa por sigui capacita y profesionalisa e servicio brinda na comunidad. Cu asistencia tecnico di IMF tambe a haci cambionan importante

den e maneho presupuestario di Pais Aruba cu ta hiba cu awe nos ta conoce presupuestonan entrega na ora y cu ta contene surplus. IMF ta yuda Banco Central tambe cu e guia necesario pa sigura e stabilidad monetario y financiero di Aruba.

Minister Maduro na final di e reunion a gradici sr. Hilbers pa su bishita y a presenta un bunita recuerdo como muestra di gratitud pa e asistencia continuo ricibi di e staff di IMF.

Hunto cu IMF trabounan importante a wordo haci cu ta sigura e stabilidad financiero di Aruba y ta yuda crece e credibilidad financiero di Aruba den wowo di inversionistanan.

APERTURA DI HOED

“

H uisartsen Onder Een D ak”

Diamars atardi Minister Dangui Oduber tawata invitado na Imsan pa apertura di HOED na San Nicolas. Ta cu gran placer y entusiasmo Minister Oduber a atende e evento aki pa mustra e compromiso cu e tin pa mehora calidad di cuido y servicio.

HOED lo bay yuda fortifica e prome liña di cuido na Aruba. E ocasion special aki ta significa un paso padilanti den ministerio di salud su compromiso pa mehora e calidad di servicio di cuido di salud disponibel ariba nos pais. Na Juni 2023 a firma un acuerdo di cuido

(zorgakkoord) cual un di e temanan importante tawata pa reenforsa e prome liña di cuido.

HOED lo reenforsa e prome liña di cuido y trece mas accesibilidad na nos pashentnan cu mester di e cuido y lo amplia e capacidad pa sirbi mas pashent.

Asina aki lo demostra cu esfuersonan continuo di tur den salud publico ta pa keda vanguardia e calidad di cuido na Aruba cu innovacion y exelencia medico.

Minister Dangui Oduber tawata tin e oportunidad di hiba palabra unda e la menciona cu pe ta un honor pa como Minister di Salud Publico presencia e logro aki.

E la menciona cu sigur e resultado lo ta un impacto profundo di un servicio di calidad halto cu lo wordo ofreci na e

MEHORANDO ACCESIBILIDAD, CUIDO Y SERVICIO

aseguradonan pariba di brug. HOED cu ta “Huisartsen Onder Een Dak” lo bai ofrece servicio consistiendo di 5 docter di cas, 3 docter assistant, 1 POH y un VP.

Minister a expresa aprecio profundo pa e dedicacion y contribucion di cada trahado na Imsan.

E compromiso cu ta keda demostra unda cada pashent cu ta pasa door di e portanan di Imsan ta ricibi un tremendo servicio y trato medico ta alinea

perfectamente cu e vision di ministerio di salud, pa un pais mas inclusivo, inovativo y avansando e servicio di cuido.

E apertura di HOED a demostra un otro accion concreto di minister pa introduci algo nobo pa Aruba su cuido medico.

Di e forma aki ImSan ta amplia su servicionan pa nos comunidad. E ultimo 10 simanan a traha hopi duro pa prepara e oficinanan pa nan ta operacional. Un biaha mas minister Oduber a confirma cu accionan concreto e compromiso cu

e tin pa eleva e calidad di cuido medico na Aruba.

Minister Oduber a termina su speech dunando felicitacion na Imsan pa yega na un otro logro impresionante y a desea Imsan hopi exito. Na mes momento Minister a gradici tur e docternan cu ta bay cu pensioen, danki na dr. Geerman-Tromp, dr. Every, dr. Lunchman y dr. Boderie. Un palabra di profundo gradicimento pa nan servicio y dedicacion na tur añanan di trabou.

“Proyecto di construccion di canchanan di deporte lo tin como meta pa trece conscientisacion pa un comunidad cu ta inverti mas den su salud”.

MINISTER DANGUI ODUBER CONHUNTAMENTE CU

MINISTER ENDY CROES

A BISHITA PARKE JABURIBARI PA SONDEA E POSIBILIDADNAN PA CONSTRUI CANCHANAN PA HACI DIFERENTE DEPORTE.

Dialuna mainta, 13 di mei, Minister di Turismo y Salud Publico sr. Dangui Oduber conhuntamente cu Minister di Enseñansa y Deporte, sr. Endy Croes a haci un site visit na Parke Jaburibari. E intencion di e site visit aki tawata pa sondea e posibilidadnan pa construi 2 cancha di tennis y pickle ball pero tambe 2 cancha di beach tennis y volley.

Un colaboracion entre minister Dangui Oduber y minister Endy Croes, cu hunto lo bay financia e proyecto di jaburibari. Prome cu inicia e proyecto aki lo mester haci un test di e suelonan pa asina averigua cu e area ta den bon condicion pa asina por oficialmente anuncia e proyecto aki. Un proyecto asina sigur lo eleva henter e parke y atrae mas persona pa haci movecion.

Minister Oduber hunto cu minister Endy Croes ta bay percura pa e proyecto aki wordo ehecuta cu lo tin como meta trece conscientisacion pa un comunidad cu ta inverti mas den su salud. Movecion ta hopi importante pa tin un bida mas saludabel. Pa e motibo aki Minister Oduber kier promove movecion den nos comunidad.

Minister Oduber ta spera cu pronto lo por anuncia oficialmente e inicio di e proyecto di Jaburibari y ta enfoka riba un comunidad di movecion y un bida cu hopi actividadnan fisico. Un habito chikito cu bo por aplica den bo dia diario por tin un efecto positivo grandi pa bo salud y pa bo isla.

Minister Endy Croes a indica cu pa luna di juni of juli proximo e lo ricibi e conseho final di e “richtlijnen” nobo cu lo regla diferente aspecto den enseñansa na beneficio di e docentenan.

A RICIBI E CONSEHO FINAL

DI E COMISION CU A TRATA E STRUCTURA DI SALARIO

DI E DOCENTENAN

Siman pasa, Minister Endy Croes a atende reunion cu Comision di Restruccion Salarial di e Maestronan. Manera ta conoci, e comision aki a ser estableci na inicio di october 2023 a traves di un Ministeriële Beschikking (MB). E comision ta consisti di un representante di Ministerio di Enseñansa y Deporte y abogado Sr. Milko Baiz, directora di Departamento di Enseñansa Aruba (DEA) Sra. Anne Marie Proveyer, director di Dienst Uitvoering Onderwijssubsidies (DUOS) Hervé Ruiz, presidente di SIMAR Sra. Angelique Quijada y register accountant Sr. Franklin de Kort.

Durante e encuentro cu e comision aki a trata posibel modelonan y structura moderno di salario pa e docentenan y otro temanan importante riba e veld di enseñansa. E mandatario di Enseñansa a indica cu el a ricibi e conseho final

firma cu ta conta cu sosten di tur cinco (5) miembro di e comision esta, SIMAR, Departamento di Enseñansa, abogado, DUOS y register accountant. Minister Endy Croes a enfatisa cu manera a atende cu indexering asina e ta desea di atende cu cuestion aki.

E mandatario di Enseñansa ta cauteloso y no a bay den detaye di e conseho cu el a ricibi. E conseho tin un proceso pa cana, e siguiente paso ta pa pidi conseho di Departamento Recurso Humano (DRH). Minister Endy Croes a indica cu mester busca espacio financiero y despues lo presenta esaki na Conseho di Minister.

“Ohala cu dia trata e Presupuesto di Pais Aruba pa aña 2025 na luna di december proximo, por tin algo concreto y tin un espacio adicional banda di 11.7% di indexering cu e docentenan a ricibi”,

Minister Endy Croes a expresa.

Banda di esaki, Departamento di Enseñansa tin un comision cu ta trahando riba e “richtlijnen” nobo pa enseñansa den su totalidad. Un ehempel ta e deseo pa baha e cantidad di mucha den klas di 28 pa muy probablemente 24 mucha den klas.

Minister Endy Croes a indica cu pa luna di juni of juli proximo e lo ricibi e conseho final di e “richtlijnen” nobo cu lo regla diferente aspecto den enseñansa na beneficio di e docentenan. Minister Endy Croes a subraya un bes mas cu e ta aprecia e gran trabou cu e docentenan ta haci den nos comunidad. Pa conclui, minister di Enseñansa a indica cu e ta trahando duro pa mehora diferente aspecto den enseñansa.

“

Nos a habri e posibilidad pa nos hobennan por sigui cursonan dirigi riba demanda laboral, ampliando asina nan posibilidad pa un entrada mas facil den mercado laboral.

ENSEÑANSA PA EMPLEO TA CRUCIAL PA YUDA NOS HOBENNAN DRENTA MERCADO LABORAL

Recientemente Minister Glenbert Croes a anuncia cu a baha e exigencia di edad pa 16 aña pa por sigui cursonan na Enseñansa pa Empleo.

Locual cu a conduci e mandatario na e decision aki ta specialmente nos hobennan cu a/ta termina SPO pero cu no por ‘stroom door’ pa EPB y igual pa nos graduadonan di EPB cu no ta bin na remarca pa por sigui studia na EPI.

Specialmente pa e hobennan aki: “Nos a habri e posibilidad pa nos hobennan por sigui cursonan dirigi riba demanda laboral, ampliando asina nan posibilidad pa un entrada mas facil den mercado laboral.” Hobennan por sigui (re)capacita nan mes cu diferente cursonan pa amplia nan conocemento. Dje forma aki e transicion ta bira mas facil pa por haya un empleo pasobra trabou tin.

CURSONAN:

Minister Croes a presenta cifranan di e cantidad di cursonan ofreci pa EPE. Durante e prome tanda di 2023, EPE tabata ofrece 23 diferente curso. A subi esaki den e di dos tanda pa 27 curso, y actualmente pa e prome tanda di 2024 tin un total di 34 curso cu miras cu esaki ta bay amplia cu diversificacion di cursonan.

EPE ta un fuente di enseñansa hopi popular den comunidad bou di esnan cu kier prepara nan mes pa drenta e mercado laboral.

E cursonan cu tin disponibel ta entre otro: Computer for Beginners, MS Word, Excel, Office Skills, Bartender, Casino, Waiter, Customer Service, Human Resources, diferente idiomanan

manera Ingles, Hulandes y Spaño, Marketing, Supervisory Management, Kleinvaarbewijs, y Horticultura, ta algun cu EPE ta ofrece.

Ademas di e diverso cursonan, Enseñansa pa Empleo ta brinda e cursista un areglo di pago y na un prijs socialisa. Loke cu nos kier ta pa nos hobennan haya trabou, pa tur nos hendenan haya un bon trabou. Dje forma aki Ministerio di Labor ta contribui y apoya e diferente posibilidadnan di (re)capacitacionnan di nos hendenan.

Pa informacion y/of pa por inscribi pa cualkier curso, por subi e website di EPE cu ta www.epearuba.com

Esaki ta un di e pasonan pa asina e re-socialisacion y e re-integracion di e detenidonan por ta uno exitoso.

TRAYECTO ‘BUITEN PROJECTEN’ NA NOS INSTITUTO

CORECCIONAL KIA A ININCIA

Esaki ta nifica cu detenidonan ta haya e oportunidad pa traha pafo di KIA.

Un colaboracion cu Ministerio di Esneñansa y Deporte, caminda detenidonan lo percura pa trabounan di mantencion y otro trabounan na diferente facilidadnan deportivo, como tambe na scolnan.

A inicia na stadion Guillermo Prospero Trinidad na Dakota, cual lo mester ta cla pa su inauguracion dia 8 di juni.

E trabounan ta avansando hopi bon, y nos ta sumamente satisfecho cu loke nos a tuma nota di dje.

Esaki ta un di e pasonan pa asina e re-socialisacion y e reintegracion di e detenidonan por ta uno exitoso.

“

A traha riba diferente palabracion, mirando e desaroyo no solamente na Aruba pero internacionalmente tambe, lo bay evalua e roadmap actual, hunto cu PAHO, pa adapta esaki na tempo, mirando cu ta trata di un plan di maneho pa e dies añanan nos dilanti.

A REUNI CU PAHO DEN CUADRO DI E AVANSENAN PA CU

SALUD MENTAL NA ARUBA

Diaranson 15 di mei a tuma luga un reunion, entre Ministerio di Husticia y Asuntonan Social, directie volksgezondheid como tambe directie buitenlandse betrekkingen y dr. Gabriel Vivas Franccesconi kende ta e representante di PAHO pa nos region, acompaña pa su ekipo. E reunion tawata basa riba e topico di Salud Mental y con Aruba ta atende cu e fenomeno aki.

Manera ta conoci dos aña pasa, PAHO a asisti den diseña e roadmap pa Aruba, di con tin cu bay atende cu e aspecto di Salud Mental, cual ta un plan cu ta core di 2021 te cu 2031. Actualmente Aruba tin su “steering committee” cu ta consisti di tur stakeholders di e veld, pa di e forma ey por traha riba e diferente “building blocks” manera legislacion, financiamento, desaroyo profesional di tur e profesionalnan cu ta traha den e veld, pero tambe tene cuenta cu e parti di prevencion.

A duna un presentacion amplio di tur e pasonan cu Aruba ta tumando, di cual e feedback cu a ricibi for di PAHO tawata uno positivo, caminda nan ta sumamente satisfecho cu con e ehecucion ta bayendo, compara cu otro paisnan den nos region.

A traha riba diferente palabracion, mirando e desaroyo no solamente na Aruba pero internacionalmente tambe, lo bay evalua e roadmap actual, hunto cu PAHO, pa adapta esaki na tempo, mirando cu ta trata di un plan di maneho pa e dies añanan nos dilanti. Banda di esaki, tin un investigacion cu a wordo conduci cu yama “STEPS”, e investigacion aki a tene cuenta cu aspectonan di Salud Mental, y a base di e resultadonan aki, lo bay traha un plan di accion di con Aruba lo bay atende cu e diferente hayazgonan cu a wordo treci padilanti.

Un reunion sumamente positivo caminda a haci palabracion cu PAHO pa sigui asisti Aruba den e parti di desaroyo profesional. Pues, e “steering committee” lo haci un “needs assessment” y a base di esaki lo acudi na PAHO pa asina nan por asisti nos cu diferente otro curso y opleiding pa ful e veld. No solamente pa esunnan cu ta atende cu e parti di Salud Mental, pero manera ta conoci e fenomeno aki ta rekeri un atencion multi-sectoral, pa cual motibo e diferente training lo bay pa e sectornan social, hudicial, salubridad publico y tambe di enseñansa.

FRACCION

FRACCION DI MEP

TEMATICA

DI PROTECCION DI MUCHA SEMPER TABATIN PRIORIDAD PA

FRACCION DI MEP

NOS MUCHANAN

Dia 3 juli 2020 varios Parlamentario y Presidente di Parlamento anterior mr. Ady Thijsen a ricibi e firmanan y e documento un tin diferente punto cu e manifestantenan kier mira adapta riba e tematica di abuso contra mucha.

Na aña 2017 Aruba a keda confronta cu un caso hopi serio di abuso di mucha unda cu henter pais tawata di luto. No ta un secreto di partido MEP a hereda un situacion social desastroso y for di momento cu nos a drenta parlamento nos tawata sa cu cambionan mester a sosode. Gobierno di su parti a percura pa Sociaal Crisis Plan y nos di parlamento a cuminsa di biaha pa sinta cu tur stakeholders pa nos mira unda y cu kico nos como parlamentario por aporta.

FRACCION DI MEP

E PROCESO:

HOORZITTING DEN PARLAMENTO

Parlamento a tene un total di 13 hoorzitting tocante abuso di mucha. Parlamento a sinta cu entro otro huesnan, Ordo di Abogado, JZP, Centro di Hoben y Famia, Social Crisis Plan, Bureau Sostenemi, Directie Voogdrijraad, Sociaal Psychiatrische Dienst & Slachtofferhulp, Stichting Reclassering & Jeugdbescherming, Fundacion Respetami, Ministerio Publico, Veiligheidshuis y Fundacion Guia Mi pa asina scucha di nan e retonan y adelantonan riba e tematica aki. Durante añanan y te ainda ta reuni diferente departamento/ instancia den comision pa asina scucha di tur e adelantonan riba e tematica di abuso y proteccion di mucha.

AUMENTO DI CASTIGO

DI VARIOS DELITO CONTRA MUCHA

Dia 26 di juni 2020, un siman prome cu e manifestacion, Parlamento di Aruba a aproba algun cambio den e Buki di Codigo Penal (Wetboek van Strafrecht van Aruba). A cambia 27 articulo cu tin di haber cu delito sexual. Algun ehempel ta cu castigo di un delito sexual contra mucha bou di 12 aña a aumenta di 12 pa 15 aña, castigo di un delito sexual contra mucha riba 12 aña pero bou di 16 aña a subi di 8 pa 12 aña. Un otro cambio importante ta cu no tin limite mas pa haci denuncia contra un delito sexual cu a pasa den pasado.

Di e forma aki Fraccion MEP a percura y lo sigui percura pa e siguridad y bienestar di nos muchanan.

#SINMIEDO

#SINMIEDO

Parlamentario Marco Berlis: “ Mansur no ta kere den democracia y tampoco den e libertad di e voto sagrado di cada parlamentario, cual ta hancra den nos constitucion”.

MIGUEL MANSUR SU PACTO SCONDI CU AVP A KEDA EXPONI

Despues di e reunion publico cu a trata e ley di Matrimonio Mesun Sexo riba diaranson 8 di Mei 2024, diferente Parlamentario a expresa nan mes den prensa con e reunion publico a bay. E iniciador di e ley, sr. Miguel Mansur, a sali bon rabia y decepciona pa motibo di e resultado di e votacion. Por bisa cu tur siguridad cu Mansur no a spera cu e ley lo a bay conoce tanto resistencia.

MIGUEL MANSUR TA DIVULGA SU PACTO SCONDI CU AVP

Despues di wak Arthur Dowers vota contra e ley y e reunion a caba, Mansur a sali pafo den un rueda di prensa pa elimina sr.Dowers di su lista di amigonan y posibel futuro colega minister. Mansur no ta kere den democracia y tampoco den e libertad di e voto sagrado di cada parlamentario, cual ta hancra den nos constitucion. Di un forma dictatorial y arogante Mansur a expresa su mes contra Arthur Dowers y a declara cu si e mester drenta den gobierno den e

siguiente eleccion hunto cu AVP, e no kier wak ni ta aproba pa Dowers bira minister den nan coalicion. El a bisa esaki cu un tono menasante y di un forma concreto. Di e forma ey tur hende por a saca som cu AVP y Accion 21 tin un pacto di matrimonio scondi cu otro di basta tempo caba. Mester bisa cu sigur Marisol di MAS tambe ta den touw, mirando cu despues di eleccion 2021 Mansur y Marisol a sinta hunto pa forma un posibel gobierno.

MANSUR A NENGA DI DUNA UN DECLARACION CONTRA E CORUPCION DI AVP

Loke a asombra pueblo ta cu Mansur no a critica Mike Eman pa su vota contra e ley. E ta splica tambe pakico Miguel Mansur, cu ta pretende di ta integro y trahando pa pueblo, hamas a critica e dos casonan di corupcion bergonzoso den AVP. Miguel Mansur ta brasando y aprobando e politica di AVP cu ta celebra corupcion, cual ya tin un minister

sintando den KIA y otro condena caba den corte di prome instancia. Mansur kier mantene su lasonan cu Mike Eman fuerte pa tene e scenario habri pa forma hunto un posibel gobernacion. Miguel Mansur, awo e satelite oficial di AVP a divulga su motibo real pakico e kier inventa storianan riba gobierno actual: “E ta parti di e coalicion di corupcion den oposicion.”

HIPOCRESIA DEN DIA CLA DI MIGUEL MANSUR

Mansur cu supuestamente ta gritando contra tur partido tradicional, ta duna un motibo mas pakico hamas por confia y kere den dje! E insinceridad di Mansur a yega un circulo completo. Su maniobranan, mentiranan y actitud arogante a haci’e perde tur credibilidad! E realidad ta cu AVP y Accion 21 a huramenta amor y fieldad te ora morto separa nan! Aruba lo por sobrebibi un aliansa asina den gobierno?

CONECTA CONECTA

E motivacion principal di Evelyn Wever-Croes pa drenta politica ta e amor pa e pueblo di Aruba y su determinacion pa pone e ser humano central creando oportunidad pa tur ciudadano di Aruba sinti e prosperidad y bienestar cu Aruba por brinda tur.

PARTIDO MEP TA FELICITA LIDER DI MEP CU SU 15 AÑA DEN POLITCA

Ban celebra hunto diabierna 31 di mei durante exposicion

Recarga, Relaha y Inspira

15 aña pasa, na aña 2009, Lider di MEP Evelyn Wever Croes a cambia su carera di consehero fiscal y abogacia, pa politica. Den eleccion di e mesun aña, el a saca su mes, y a drenta Parlamento. Na aña 2011, momento cu sr. Nelson Oduber a tuma su retiro di politica, el a postula su mes pa eleccion di lider di partido MEP y a gana e eleccion, y asina Lider di MEP ta lidera e prestigioso partido MEP desde 2011 guiando un ekipo di candidatonan determina pa trece un cambio y haci un diferencia positivo den bida di tur ciudadano di Aruba.

E motivacion principal di Wever-Croes pa drenta politica ta e amor pa e pueblo di Aruba y su determinacion pa pone e ser humano central creando oportunidad pa tur ciudadano di Aruba sinti e prosperidad y bienestar cu Aruba por brinda tur.

Evelyn Wever-Creos a bira e prome lider di MEP femenino na 2011, e prome Minister President Femenino di Aruba na aña 2017, e prome votegetter femenino di Aruba den eleccion 2021 y ta bay den historia pa su bon maneho durante e pandemia cu ta hibando Aruba den recuperacion.

Lider di MEP ta conta cu tur cos a cuminsa cu e vision di nos lider honorario Nel Oduber cu a pidi’e pa drenta den politica na aña 2009. Nel a fungi como lider pa 25 aña cual el a haci den

un forma sublime, logrando ta 4 biaha Prome Minister di Aruba.

Na aña 2011, 28 di augustus, Evelyn Wever – Croes a asumi e reto pa lidera Partido MEP. Durante e periodo aki, tur miembro mester a custuma cu Nel no tey mas y tambe cu e estilo di liderazgo di e prome Lider di MEP femenino. Sinembargo, hunto cu tur miembro, sostenedor y candidatonan di MEP, a uni nos Partido mas y a logra haci MEP e Partido di mas grandi na Aruba. Evelyn a pasa den 4 eleccion di cual 3 como lider di Partido.

For di 2009 te cu 2017, Evelyn Wever-Croes a sirbi pueblo di Aruba como Parlamentario. Despues di eleccion 2017, el a bira e prome Minister President femenino di Aruba. Den e prome periodo di Gobierno di MEP, a logra cosnan grandi pa Aruba gobernando den e pio reto cu nos pais a enfrenta. Ta p’esey tambe, MEP a gana eleccion y pueblo a expresa e gratitud den e votonan haciendo Premier Wever – Croes e prome votegetter femenino di Aruba.

En conexion cu su 15 aniversario como politico na Aruba, Lider di MEP ta organisa un exposicion di su arte, ‘Relaha, Recarga y Inspira’ durante un ‘Wine and Cheese Event’ na Cede di MEP diabierna 31 di mei for di 7or pa 10or di anochi. Partido MEP ta invita pueblo di Aruba na e evento aki pa felicita Lider di MEP cu su 15 aña den politica mientras ta disfruta di e bunita arte cu ta refleha e momentonan cu Evelyn Wever-Croes ta relaha, recarga di su trabounan duro como Prome Minister y cu esaki tambe ta inspira tur ciudadano pa tuma tempo pa explora otro pasion, talento y interes, manera arte y creatividad.

Partido MEP ta felicita nos Lider, Evelyn Wever-Croes pa su 15 aña como Lider di nos Partido. Danki pa guia e Partido den gran forma cu vision y determinacion pa haci nos Partido fuerte y asumi responsabilidadnan pa goberna nos pais. Bou liderazgo di nos Lider, MEP lo sigui cu e trabou duro y logra cosnan mas grandi ainda pa Aruba.

MEP A SER FUNDA

DIA 9 DI FEBRUARI 1971 y den transcurso di añanan e partido aki a contribui grandemente na e desaroyo politico, estatal, economico y social di nos pais. MEP como un partido social democrata a ser funda door di un movimiento popular a base di principionan democratico y cu un sentimento social pa bienestar di tur ciudadano den e pais aki.