ᓄᓇᕗᒥ ᐆᒪᔪᓂᒃ ᖃᐅᔨᓴᕈᑎᒃᓴᓂᒃ ᐸᐸᑦᓯᔨᑦ ᑲᑎᒪᔨᖏᑦ (NWRT) ᐊᖅᑯᑎᖃᕐᖢᑎᒃ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂᒃ ᑮᓇᐅᔭᖃᖅᑎᑦᓯᖃᑦᑕᖅᑐᑦ ᒐᕙᒪᒃᑯᑦ ᐱᓕᕆᕕᖏᓐᓂᒃ ᖃᐅᔨᓴᐃᔾᔪᑎᒃᓴᖏᓐᓂᒃ ᐆᒪᔪᓂᒃ ᓄᓇᕗᑦ ᐃᓗᐊᓂ ᒪᓕᒃᓯᓯᒪᔪᓂᒃ ᐃᓄᖕᓄᑦ ᓯᕗᓪᓕᐅᑎᔭᐅᓯᒪᔪᓂᒃ ᐊᒻᒪᓗ ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂᑦ. ᖃᐅᔨᓴᐃᖃᑦᑕᕆᐊᖃᖅᑐᑦ ᐆᒪᔪᑦ ᐊᖑᓇᓱᒃᑕᐅᔪᓐᓇᖁᓪᓗᒋᑦ ᖃᐅᔨᒪᓗᑎᒃ ᐊᒻᒪᓗ ᓄᖑᑦᓯᕙᓪᓕᐊᖏᓪᓗᑎᒃ ᐆᒪᔪᓂᒃ ᓄᓇᕗᒥᐅᑕᐅᔪᑦ ᐊᖑᓇᓱᒍᓐᓇᐃᓐᓇᕐᓂᐊᕐᒪᑕ ᐊᒻᒪᓗ ᐃᖃᓗᒐᓱᐊᖏᓐᓇᕈᓐᓇᕐᓂᐊᕐᒪᑕ ᐊᑑᑎᖃᒻᒪᕆᒃᑐᒥᒃ ᐃᓅᓯᖏᓐᓄᑦ.ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓯᕗᓕᖅᑎᐅᖏᓐᓇᖅᐳᑦ ᐱᓕᕆᔭᐅᑎᓪᓗᒍ ᑕᒪᓐᓇ ᐊᒻᒪᓗ ᐊᖏᖅᓯᒪᑦᑎᐊᖅᑐᑦ ᐆᒪᔪᓂᒃ ᖃᐅᔨᓴᐃᓂᐅᔪᖅ ᑭᐅᑦᑎᐊᖅᓯᒪᖁᓪᓗᒋᑦ ᑭᓐᖒᒪᔭᖏᓐᓄᑦ ᐊᒻᒪᓗ ᐃᓱᒫᓗᒍᑎᖏᓐᓄᑦ ᐃᓄᐃᑦ ᓄᓇᕗᒥᐅᑕᐅᔪᑦ.
ᓄᓇᕗᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑲᒪᑦᓯᐊᖅᓯᒪᓪᓗᑎᒃ ᐊᐅᓚᑦᑎᕙᒃᐳᑦ ᓄᓇᕗᒥ ᐆᒪᔪᓂᒃ ᖃᐅᔨᓴᕈᑎᒃᓴᓂᒃ ᐸᐸᑕᐅᔪᓂᒃ ᓯᕗᒧᐊᒃᑎᑦᓯᖁᓪᓗᒋᑦ ᑮᓇᐅᔭᑦ ᐊᑐᖅᑕᐅᖏᓐᓇᕈᓐᓇᖁᓪᓗᒋᑦ ᐱᕈᖅᐸᓪᓕᐊᓗᑎᒃ ᐊᒻᒪᓗ ᐊᑐᐃᓐᓇᐅᓗᑎᒃ ᐆᒪᔪᓄᑦ ᖃᐅᔨᓴᕈᑎᒃᓴᐅᖃᑦᑕᕐᓂᐊᕐᒪᑕ ᓯᕕᑐᔪᒧᑦ ᐊᑐᖅᑕᐅᓗᑎᒃ. ᑮᓇᐅᔭᐃᑦ ᐊᑐᐃᓐᓇᐅᑎᑕᐅᔪᑦ ᑲᓇᑕᑉ ᒐᕙᒪᒃᑯᖏᑕ ᐱᓕᕆᕕᖏᓐᓄᑦ ᐅᕝᕙᓘᓐᓃᑦ ᓄᓇᕗᑦ ᒐᕙᒪᒃᑯᖏᑕ ᐱᓕᕆᕕᖏᓐᓄᑦ.
ᑖᒃᑯᐊ ᐅᖃᓕᒫᒐᒃᓴᓕᐊᖑᔪᑦ ᓇᓗᓇᐃᖅᑎᕆᓯᒪᕗᑦ ᐱᓕᕆᐊᒃᓴᐅᔪᓂᒃ ᑐᓂᔭᐅᓚᐅᖅᑐᓂᑦ ᓄᓇᕗᒥ ᐆᒪᔪᓂᒃ ᖃᐅᔨᓴᖁᑎᒃᓴᓂᑦ ᐸᐸᑦᓯᔨᒃᑯᑦ ᑮᓇᐅᔭᖁᑎᖏᓐᓂᑦ 2021-ᖑᑎᓪᓗᒍ. ᐱᓕᕆᐊᒃᓴᓄᑦ ᓯᕗᓕᖅᑎᐅᔪᑦ ᓇᓗᓇᐃᖅᑕᐅᓯᒪᓪᓗᑎᒃ ᐊᑖᒍᑦ ᐊᑐᓂ ᐱᓕᕆᐊᒃᓴᑦ ᓇᓗᓇᐃᖅᓯᔾᔪᑎᖏᑕ.
