II NJUOVA

JOVSSET ÁNTE II NJUOVA

Jovsset Ánte Sara ii jeagat stáhta. Son ii dáhtu njuovvat ealus, nugo gáibiduvvo.

Govven: Roger Manndal

Jovsset Ánte Sara advokáhta Trond Biti dieđiha dál ahte Jovsset Ánte Sara ii jeagat eiseválddiid njuovvat 265 bohcco ovdal ođđajagi.

ČÁLLÁN: MÁRGGET JON BIRET ÁMMUNA ÁNNE BIRET

– Mun sáhtán dál duođaštit ahte son ii čuovvul bággodoaimmaid. Sávan ON olmmošvuoigatvuođakomitea jođánit cealká dán áššis. Lean maid guoddalan bággodoaimma mearrádusa. Vaikko dieđán ahte das ii soaitte ávki, de ain jo áigi gollá, lohká Jovsset Ánte Sara bealušteaddji Trond Biti.

Jus Jovsset Ánte Sara ii geahpet ealu 75 heggii dán jagi maŋimuš beaivái, de sáhkohallá beaivvis beaivái.

Čogget ruđa sáhkuide

– Odne leat sus 350 bohcco ja jus šaddá beaivesáhku máksit 265 bohcco nammii, de gártá sáhkku sullii 16500 ruvnnu mánnui, čilge Biti. Son oaivvilda ahte dán riskka ferte váldit go ON sáhttá gomihit Norgga mearrádusa.

Dáiddárat leat olles leahtuin čoaggime ruđa sáhkuid máksimii.

– Mii dustet Jovsset Ántte dán roasus. Stáhta ii galgga uhkádusaiguin ja bákkuin nagodit bissehit ášši olaheame ON:i. Jus eiseválddit nagodit bágget Jovsset Ántte njuovvat, de dat mearkkaša ahte son lea dohkkehan stáhta gáibádusa ja nu gahččá maid ášši ON:s, lohká Jovsset Ántte oabbá, Máret Ánne Sara.

Stuorradiggi hilggui ON

Mannan vahku Stuorradiggi mearridii ahte eai vuordde bággodoaimmaid čađahemiin dassái go ON olmmošvuoigatvuođakomitea lea gieđahallan ášši. Jovsset Ánte lea vihtta jagi juo dorron vuoigatvuođaidis ovddas. Son stevdnii stáhta ja lea vuoitán sihke diggegottis ja lágamánnirievttis. GO vuoittáhalai Alimusrievttis, de guoddalii ON Olmmošvuoigatvuođakomiteai.

– Alimusriekti lea gieđahallan ášši, ja mii čuovvulit dan. Eará 230:s, geain lea leamaš beare olu boazu, leat geahpedan. Dan ferte Sara maid dahkat. Mii fertet guohtuneatnamiid suddjet, logai Eanandoalloministtar Bård Hoksrud njuolgga maŋŋel stuorradiggemearrádusa.

Sámediggi ii vuollánan

Sámediggepresideanta Aili Keskitalo lei vuordán eambbo Kristtalaš Álbmotbellodagas, mii gomihii Stuorradiggeárvalusa vuordit bággodoaimmaiguin. – Vaikko manai dieinna lágiin Stuorradikkis, de sáhttá ráđđehus goitge mearridit vuordit bággudoaimmaiguin. Eai dárbbaš stuorradikki mearradusa dasa. Sávvámis válda olmmošvuoigatvuođalávdegoddi ášši meannudeapmái nu jođánit go vejolaš, ja sin mearrádus berre mearkkašit ollu, logai Keskitalo njuolgga maŋŋel Stuorradiggemearrádusa.

Jorgun gávtti

Stuorradikki olggobealde ákšunerii stuorra oabbá Máret Ánne Sara ja eará sámit jorggugávttiin.

Govven: Anne Berit Anti

Máret Ánne Sara lei jorggugávtti coggan ja vulggii Stuorradiggái geiget 5000 vuolláičállaga. Sii gáibidit vuordit bággodoaimmaiguin. Maiddái Sámediggi geigii cealkámuša, mas gáibidit vuordit áššiin. Maŋŋel Stuorradiggemearrádusa Máret Ánne lei beahtahallan.

– Norgga Ráđđehus njuovvá min ealuid ja geavaha ággan ahte áigot suddjet eatnamiid, seammás go boazodoallit miehtá riikka vigget bissehit sisabahkkemiid daid seamma eatnamiidda. Go eanandoallo-departemeanta ii loga iežas geatnegahtton bissehit ovdamearkka dihte Fovsena bieggamillopárkka huksema gáhtten dihte eatnamiid nugo go ON dáhttu, de in šat ipmir maidege. Dat gal lea njulgestaga jallodat, lohká Máret Ánne Sara.

Eanandoallodirektoráhta direktevra Liv Berit Hætta ii dáhto kommenteret vuos Trond Biti cealkámuša, mas daddjo ahte Jovsset Ánte ii čađat bággodoaimmaid.

– Háliidan vuos sudnos dan gullat ja ságastit siskkáldasat direktoráhtas dan birra, ovdal go cealkkan dien áššái maidege, lohká Hætta.

Eanandoallodirektoráhta direktevra Liv Berit Hætta ii dáhto kommenteret dan ahte Jovsset Ánte ii čađat bággodoaimmaid. Priváhtta gova.

Priváhtta govva