DEL IX: FLORA Tekst: Oddhild Dokset (feltleiar) og Solveig Roti Dahl OMRÅDESKILDRING
Traseen går frå grensa mellom Flora og Naustdal kommune over Svartehumleheia før den kryssar Rv 5 og fortset nordvest mot Torsvatnet. Ved Storebru kryssar traseen Syninga ved Endestad og fortset nordvest mot Eikefjorden. Frå Eikefjorden går traseen nordvest mot Rustamyra, over mot Fløgen, kryssar Norddalsfjord og fortset vidare opp Skalia til Memyra. Frå Memyra fortset traseen mot Grytadalen og grensa til Bremanger kommune på Myklebustfjellet.
Oversiktskart over dei registerte områda i Flora. Sjå óg kartvedlegga bak.
Traséalternativet mellom Memyra og Grytadalen var ikkje avgjort på det tidspunktet registreringane pågjekk, og begge traséalternativa vart derfor registrerte. Terrenget var varierande. Mykje av planområdet var mellom lågland og fjell og var derfor prega av mykje og tett vegetasjon. Der traseen gjekk i fjellområde var terrenget prega av bergknausar og myr mellom desse. Det var generelt dårleg med lausmassar. Planområdet var også generelt dominert av bratte, steile bergveggar/knausar og store rassteinar.
319