s
¿He zó hehe ya?
Jessica Yuridia López Perales xah, Julia Leticia Montaño Barnett xah, taax yatoosiploj iha.
¿He zó hehe ya?
Julia Leticia Montaño Barnett xah, Jessica Yuridia López Perales xah, taax yatoosiploj iha.
Título: ¿He zó hehe ya? (en la lengua cmiique iitom (seri), código ISO 639-3 = sei) Traducción al español: ¿Qué tipo de planta soy? Tercera edición, 2015 Socaaix, Sonora, México Ilustradora, Cathy Moser Marlett Editor de la serie, Stephen A. Marlett © 2015 Jessica Yuridia López Perales © 2015 Julia Leticia Montaño Barnett © 2015 Cathy Moser Marlett Derechos reservados conforme a la ley La creación de esta obra fue posible gracias al apoyo del Christensen Fund y el Instituto Lingüístico de Verano.
!ii
Hapaspoj hipquih ziix quih iti cötpacta ma cöipaxi hac Xiica quiistox quih cmaa cqueej xah, xicaquiziil xah, hehet quih itaasitoj quih pti immis quih comcaac quih hant quih iti yaii xah, Tahejöc quij iti quiticol quih comcaac quih yataasitoj xah, ziix quih ihaseaalam xah, taax ipacta z imaaj quih haquix poom x, cöisiyaj hac, taax oo cötpah tpaxi ma, hiz cöquiih iha. Ipooht x, ipahooza x, hehet com ziix quih ihasiijim xah itaasitoj xah, ipacta xah, taax coox oo isiyaj aha. Stephen Marlett quih, tiix anxö cöhamacaailajc, ziix quih he ihacoaatim tintica xah, ziix quih hiicot he ihaaitim xah. Cathy Moser Marlett quih, tiix mos anxö cöhamacaailajc, hehe yapxöt quih inol cöiyaasipl coi iiqui itacatx ma, hapaspoj hipquih iti cöiyaii hac.
iii
1 Án hihíhijc coi hax tiixlc oo ma x, quiho quih haquix tiih x, imatapzil. Hehe quih ano hptiti x, ihmiiijoj. Ihyapxöt coi tixt, mos cooxp iha. Hístalca coi xpanaams yaail cömooil. He hehe mos halx caacóój iha. ¿He zó hehe ya?
1
2
3
4
�hax quipoiin (Cardiospermum corindum)
2 Ihyapxöt coi hax tmasol oo, mos quixt iha. Ihptpaztoj ma x, hasxeen ijizi quih hmahiipet. Hítajc coi hax timaaxat oo ma, hístalca coi tixt, mos xpanaams yaail cömooil. Hixcoocoj quij hax mimaaxat oo. Tahahitaj ma x, iquihicaai quih quinaail com ano miij; taax chaa quih mos ihmahiipet. ¿He zó hehe ya?
5
6
7
8
�haaxat (Larrea divaricata)
3 Ihyapxöt coi, hax cömihmasol oo ha. Ihyapxöt coi, hant cöteme ma x, quiho quih haquix tiih x, itapl x, inyaa. Toox tayaxi xox, hax quih ano tpah ma x, ziix cmaa quiih itmis x, hant zo cömiih. ¿He zó hehe ya?
9
10
11
12
�cof (Bonellia macrocarpa)
4 Hístalca coi hax tooiplam oo, mos xpanaams yaail cömooil. His coi mos cooiplam iha. His coi tahahitaj ma x, halit hant yaait quih iic cömiipe. He hehe halx caacóój iha. ¿He zó hehe ya?
13
14
15
16
�pnaacÜl (Simmondsia chinensis)
5 Hístalca coi cooscl iha. Ihyapxöt coi hoox oo tixt, hatx cöcaazoj ix immis. Hant hihiti cop cacösxaj iha. Hístalca coi cötahahootilc ma x, hateiicloj quih ano hpmahzapalim. ¿He zó hehe ya?
17
18
19
20
⇐xeescl (Hyptis albida)
6 Hant hihiti cop miizàj xah imaacoj iha. Him quiho quih haquix tiih x, hítajc comtax coi itaacloj x, hin tásinim x, hin tapocjitac, hin tamizj, mos hin tazeee x, cmaax him miip. ¿He zó hehe ya?
21
22
23
24
�haat (Jatropha cuneata)
7 Ihyapxöt coi hax cömihmeel oo. Hístalca coi xpanaams yaail cömooil. Cayajaacoj cop ah thaa ma x, ihpmopxöt. Yaiij quih hamt caaitic quih cooxp quih chaa cah iti hpmoocp. Hax hant xah z iti himoocp iha. He hehe colx quiyat zo he imhaa ha. Hant com ah iti hpmiij. He mos iisax quihiih cah ihasii cöquiipe ha. ¿He zó hehe ya?
25
26
27
28
�hantoosinaj (Abronia villosa)
8 He hehe miizàj xah imaacoj iha. Ihyapxöt coi hax cömihmeel oo. Hixaai tintica ah tpatj x, itac com hapx tpaxquim x, hihasnaailc coi, taax aha tpaztoj x, haat quih ano cömahjiit. ¿He zó hehe ya?
29
30
31
32
�heepol (Krameria grayi)
9 He hehe iisax quihiih cah cöcooil iha. Hitajc coi cötiih oo, mooil. Hax quih hant quih it iihca cah iti hpimpaho. Hitajc coi cötootij ma x, iti tahcascax ma x, hapaxcaj him maaizi. ¿He zó hehe ya?
33
34
35
36
�xapij (Phragmites australis)
10 He hehe caacoj iha. Hitajc coi toosotoj, taaijac, mos cooil iha. Ihyapxöt coi hax immasol oo. An hihís coi miizàj xah tmacöla, mos hax mooil oo. Hantx cömiiha hac haaztoj imeme him maaizi. ¿He zó hehe ya?
37
38
39
40
⇐ziipxöl (Cercidium microphyllum)
11 He hehe caacoj zo he imhaa ha. Histalca coi hax mooscl oo. Ihyapxöt coi hatx cöcaazoj ix immís. Ihptahmaanoj ma x, hax ihpimmasol oo. Mos haat quih ano he imjcooil. Yaiij cah ano hpmiti. ¿He zó hehe ya?
41
42
43
44
⇐xomeete ~ xomeete caacöl (Psorothamnus emoryi)
12 He hehe caacoj iha. Hitajc coi hax ticoploj oo, mos caaijac iha. Ihyapxöt coi hax toiilc oo, mos hax immasol oo. Iic cötocaai ma x, ihazinz quih hpthaa, iti hpmocaaaxoj. Ox tpacta ma, tyáám ma x, cmaax cohptootij ma x, him miiitoj. Icapaznij ihtaa, he mos icapaha quiya ha. ¿He zó hehe ya? 45
46
47
48
�haas (Prosopis glandulosa)
13 He hehe iisax quihiih cah cöcacösxaj iha. Mos hax ihpmoiij oo. Ziix quiisax quih haquix tiih x, he tafp, he tiin ma x, hai quih taaixaj x, immooit. ¿He zó hehe ya?
49
50
51
52
⇐cótotaj (Fouquieria columnaris)
14 He hehe caacoj iha. Hítajc coi tsooploj, mos caaijac iha. Histalca coi hoox oo tixt, mos iisax quihiih cah ihasii quih cöcaaixaj iha. His coi hax timaaxataj oo, hoox oo mixt. Hant hihiti cop tahtaxoj x, tahtiixp ma x, hix cop hax théél oo ma x, taax ah yeencoj cöimaaizi, hantx mocat com. ¿He zó hehe ya? 53
54
55
56
�xoop (Bursera microphylla)
57