MAÐUR ER MIKLU STRESSAÐARI Á HLIÐARLÍNUNNI SEM PABBI

Hvaða íþróttir stundaðir þú á yngri árum? Fótbolti var alltaf í aðalhlutverki enda byrjaði ég 4 ára að æfa og spila enn mér til skemmtunar þrátt fyrir að hafa lagt skóna á hilluna fyrir bráðum 6 árum síðan. En ég æfði líka handbolta í 1. og 2. bekk og svo fór ég líka á nokkur golfnámskeið.

Var FH þitt uppeldisfélag eða spilaðir þú með öðrum klúbbum?

Ég spilaði alla tíð með FH. Þegar ég var 20 ára var FH með ansi gott lið og ég að koma upp í meistaraflokk. Þá var ég svo heppinn að Atli Eðvalds heitinn fékk mig á lán í Þrótt, hvar ég svo spilaði fjögur tímabil áður en ég gekk svo aftur til liðs við FH árið 2009. Á tíma mínum í Þrótti var ég á fótboltastyrk hjá Boston University svo ég spilaði alltaf með háskólaliðinu á veturna.

Hvaða stöðu spilaðir þú á vellinum?

Í sjö manna boltanum var ég alltaf varnarmaður á yngra ári og kantmaður á eldra ári. Þessar stöður runnu svo náttúrulega saman í hægri bakvarðarstöðuna þegar ég kom á stóran völl í 4. flokki. Það varð svo aldrei nein breyting þar á og ég spilaði hægri bakvörð allan minn meistaraflokksferil.

Númer hvað spilaðir þú alltaf í og var einhver sérstök ástæða fyrir því?

Í yngri flokkunum spilaði ég alltaf númer 10. Ég held að ástæðan hafi nú bara verið sú að Davíð Þór Viðarsson, frændi minn, spilaði alltaf í númer 10 líka. Þó hann sé bara einu ári eldri en ég og við miklir vinir þá var hann alltaf svo góður í fótbolta að það var auðvelt að líta upp til hans.

Hver var þín helsta fyrirmynd í fótboltanum og afhverju?

Þegar ég var lítill horfði ég rosalega mikið upp til eldri bróður hans Davíðs frænda, hann Arnar Þór Viðarsson. Flestir þekkja hann í dag sem fyrrum landsliðsþjálfara Íslands. En Arnar er 7 árum eldri en ég og sama ár og ég spilaði á mínu seinna Shellmóti fór hann út í atvinnumennsku til Belgíu þar sem hann átti frábæran feril. Ég fór svo einmitt með FHvinum mínum í knattspyrnuskóla Kristjáns Bernburg í Lokeren í Belgíu þegar ég fermdist árið 1999 og ég man hvað okkur fannst geggjað að fá smá leiðsögn frá Arnari.

Nú fórst þú sjálfur á Orkumótið/ Shellmótið? sem peyi, hvernig var sú upplifun og hvað fannst þér eftirminnilegast?

Ég fór heldur betur á Orkumótið sem peyi en í þá daga hét það Shellmótið. Árið 1994 var ég á yngra ári og sigraði mótið með liðsfélögum mínum í FH í keppni C-liða. Ári síðar var ég fyrirliði A-liðsins en við töpuðum úrslitaleiknum gegn Fjölni. Ég man að sjálfsögðu eftir boltanum stóra við Illugagötuna og svo man ég þegar við FH-ingar lögðumst í brekkuna við vellina og mynduðum risastórt FH. Ég man líka bara eftir því hvað mér fannst gaman að vera með félögum mínum allan daginn og hvað við vorum duglegir að finna upp á allskonar skemmtilegu að gera saman. Í þá daga var enginn með síma og ég er svo þakklátur fyrir það hvað við vorum duglegir að styrkja böndin okkar með góðri samveru og leikjum. Ég skora á ykkur krakkar að leggja símana til hliðar á meðan á mótinu stendur og reyna frekar að njóta betur þeirra forréttinda að vera með vinum ykkar og vinkonum.

Þú hefur fylgt peyjanum þínum á Orkumótið - hver myndir þú segja að væri helsti munurinn að fara sem leikmaður og sem foreldri? (Er þetta alltaf jafn gaman?)

Ég fór á Orkumótið í fyrra sem pabbi því Jón Tryggvi sonur minn spilar með Gróttu. Við mætum aftur í ár og eftirvæntingin er mikil. Mér finnst þetta alveg svakalega skemmtilegt enda skín gleðin úr hverju andliti. Munurinn er auðvitað sá að maður er miklu stressaðari á hliðarlínunni sem pabbi enda getur maður ekki gert neitt inn á vellinum til að áhrif á leikinn. Ég öfunda peyjana að vera inni á vellinum að gera sitt besta og uppskera eftir því.

Hvernig stóð það til að þú samdir lag fyrir fótboltamótin í Vestmannaeyjum?

Fyrir rúmu ári síðan minntist Sigga Inga hjá ÍBV á það að gaman væri að gera lag sem myndi virka fyrir pæju- og peyjamótin. Við tókum það ekkert lengra en svo spilaði ég á kvöldvökunni í fyrra hjá strákunum og bullaði eitthvað lag á staðnum sem peyjarnir svo héldu bara áfram að öskursyngja. Þá var ekki aftur snúið og við Sigga ákváðum að ég myndi semja lag fyrir mótin í ár. Og að sjálfsögðu er viðlagið það sama og varð til á sviðinu síðasta sumar.

Hvert sóttir þú innblástur fyrir lagið?

Ég í raun lokaði bara augunum og sá sjálfan mig fyrir mér sem ungan gutta á þessu geggjaða móti. Svo fannst mér líka gaman að kíkja á lög sem hafa verið gerð fyrir HM í knattspyrnu. Það skýrir af hverju það eru svona margir kaflar þar sem við syngjum bara O - þannig geta jú allir sungið með, líka þeir sem kunna ekki texta. Pálmi Ragnar, vinur minn, sem m.a. annars gerði Power með Diljá hjálpaði mér að gera lagið svona stórt og kraftmikið enda hentar það vel á þessum stóru og kraftmiklu mótum.

Er eitthvað sem þú vilt segja að lokum?

Njótið þess að spila leikina en njótið þess líka að gera alls konar skemmtilegt með vinum ykkar og vinkonum. Styrkið böndin ykkar á milli og búið til minningar sem vara að eilífu. Takk fyrir að hlusta á lögin mín og vera svona skemmtileg þegar ég stíg á sviðið.

F Tbolti Ti Eyjum

Lag og texti: Jón Jónsson

Nú er tími ævintýra.

Grænir vellir okkar bíða.

Hér eignast munum haug af minningum

Tvöföld skæri og svo spretta.

Í góðu færi verð að negla.

Við skiljum allt eftir á vellinum

Oooooh, gaman útí Eyjum

Oooooh, sameiginlegt eigum að trúa draumana á.

Hér í Eyjum upplifum þá

Oooooh, í fótbolta' útí Eyjum

Oh oh ooooh!

Pabbi og mamma, afi og amma

Dómarann má ekki skamma

Ef eitthvað klikkar gengur betur næst

Viljum njóta, viljum þora.

Þarft að skjóta til að skora.

Við vitum öll að draumar geta ræst.

Oooooh, gaman útí Eyjum

Oooooh, sameiginlegt eigum að trúa draumana á.

Hér í Eyjum upplifum þá

Oooooh, í fótbolta’ útí Eyjum

Oh oh ooooh!