LA FELGUERA Y SOTRONDIO RECUPEREN EVENTOS SIDREROS

Tres dos años d’andanciu Covid 19, La Felguera cellebra’l LXVII Concursu Nacional d’Echaores y la XXIV Fiesta de la Sidre, mentes Sotrondio cellebra’l XIII Certame de la Sidre

En dambos casos, caltúvose’l sistema tradicional de mercar el vasu sidre previamente, pa poder esfrutar llibremente de la sidre. Nel casu de La Felguera, el vasu llevaba xerigrafiao una imaxe de la central térmica de Lada –agora desmantelá-, y nel casu de Sotrondio un diseñu del dibuxante sotrondín José Luis Fernández, ‘Cholo’. Como nun podía ser d’otra miente, l’ambiente foi espectacular, con perimportante participación de xente de toles edaes, pero especialmente de la mocedá, qu’aprovechó la “normalidá” pa esfrutar de la sidre. En total consumiéronse más de 1.000 llitros de sidre en caúna de les convocatories, tou un ésitu, qu’afala la vitalidá de la sidre na Cuenca El Nalón.