1. tölublað 2015
Fréttabréf KFUM og KFUK
Fullur salur og mikil gleði á hæfileikasýningu KFUM og KFUK KFUM og KFUK stóð nú í annað sinn fyrir hæfileikasýningu yngri deilda KFUM og KFUK 5. nóvember síðastliðinn. Sýningin heitir KFUM og KFUK Got Talent og gefur börnunum tækifæri til að sýna hæfileika sína en um leið er þetta æfing í að koma fram. Börn úr yngri deildum félagsins á höfuðborgarsvæðinu, frá Hveragerði, Keflavík, Grindavík og Njarðvík fylktu liði á Holtaveg 28, stigu á stokk og sýndu frábær atriði. Hæfileikasýningin tókst með afbrigðum vel og var gaman að fylgjast með börnunum
sýna listir sínar. Rúmlega 20 atriði voru á sýningunni og meðal þess sem boðið var upp á voru: söngur, dans, töfrabrögð og hljóðfæraleikur. Það þarf mikinn kjark til að koma fram og stóðu þátttakendur sig vel, enda fullur salur af áhugasömum gestum, foreldrum, ömmum og öfum, systkinum og vinum sem fylgdust með og hvöttu þátttakendur áfram. KFUM og KFUK leggur ríka áherslu á að öll börn séu jöfn, séu dýrmæt sköpun Guðs og hafi öll hæfileika, það sáum við
svo sannarlega á sýningunni. Leiðtogar úr barna- og unglingastarfi félagsins héldu utan um sýninguna og gengu í þau verk sem sinna þurfti til að allt gengi upp auk frábærra tæknimanna félagsins sem sáu til þess að kvöldið gekk hnökralaust fyrir sig. Pollapönkarinn og Eurovisionfarinn Heiðar Örn Kristjánsson stýrði sýningunni með sóma og tók nokkur lög með þátttakendum. Það er á stundum sem þessum sem auðvelt er að fyllast stolti af félaginu sínu, félögum þess og börnunum sem eru framtíðin. 1