1. tölublað 2014
Fréttabréf KFUM og KFUK
Fyrsta sr. Friðrikshlaupið haldið 2014 Sunnudaginn 25. maí sl. var sr. Friðrikshlaupið haldið í fyrsta skiptið. Hlaupið var haldið í tilefni af fæðingardegi sr. Friðriks Friðrikssonar en hann fæddist á þessum degi árið 1868. Markmið hlaupsins var að vekja athygli á því sem KFUM og KFUK leggur áherslu á í starfi sínu, það er líkama, sál og anda. Um 70 hlauparar á öllum aldri tóku þátt. Hlaupin var fimm kílómetra leið í Laugardalnum í fyrirtaks hlaupaveðri, rigningu og logni. Samhliða hlaupinu var haldin barnaskemmtun í tilefni af Degi barnsins, þar sem boðið var upp á andlitsmálningu, hoppukastala og veltibíl. Einnig var haldið sérstakt barnahlaup og fengu
allir þátttakendur í því verðlaunapening. Einstaklega skemmtileg stemning myndaðist þegar hlauparar komu í mark, einn af öðrum, og voru þeir duglegir að hvetja hvern annan áfram á lokasprettinum. Börnin skemmtu sér vel á barnaskemmtuninni, þrátt fyrir rigninguna, enda margt spennandi í boði. Veltibíllinn og andlitsmálningin vöktu sérstaka lukku og mátti sjá börn á hlaupum með alls kyns teikningar í andlitinu. Að hlaupi loknu var boðið upp á hressingu fyrir bæði börn og fullorðna. Verðlaunaafhending fór fram þegar allir keppendur voru komnir í mark og voru verðlaun veitt fyrir fyrstu þrjú sætin
í karla- og kvennaflokki, óháð aldri. Fyrstur í mark kom Arnar Ragnarsson en á hæla hans komu þeir Þórólfur Ingi Þórsson og Gunnar Ólason. Fyrsta kona í mark var Eva Skarpaas, annað sætið skipaði Guðný Ólafsdóttir og í því þriðja var Sigrún Erlendsdóttir. Einnig voru fjölmörg og glæsileg útdráttarverðlaun í boði þar sem allir áttu möguleika á glaðningi. Stefnt er að því að sr. Friðrikshlaupið verði árlegur viðburður, enda vel við hæfi að heiðra fæðingu sr. Friðriks Friðrikssonar á þennan hátt.
1