1. tölublað 2013
Fréttabréf KFUM og KFUK
Skemmtilegt og fjölbreytt sumar framundan hjá KFUM og KFUK Í sumarbúðum KFUM og KFUK í sumar verður boðið upp á skemmtilega og fjölbreytta dvalarflokka fyrir bæði börn og unglinga. Í öllum sumarbúðunum verður boðið upp á ævintýraflokka þar sem áhersla er lögð á óvæntar uppákomur og ævintýri og hafa þeir verið mjög vinsælir undanfarin ár. Listaflokkar verða í Ölveri og á Hólavatni, en þar er lögð áhersla á listsköpun, föndur og handverk. Pjakkaflokkur (fyrir stráka, 6-9 ára) og Krílaflokkur (fyrir stelpur, 6-9 ára) fyrir yngstu kynslóðina verða í Ölveri. Tveir Ungbarnaflokkar
verða í Vindáshlíð og eru þeir fyrir mæður með ung börn að þriggja ára aldri. Í Kaldárseli verður boðið upp á Sirkusleikjanámskeið þar sem börnum gefst kostur á að læra sirkusfræðin af reyndum þjálfurum þar sem sérstök áhersla er á leiki og æfingar í sirkusleiktækjum eins og á einhjólum, stultum, jafnvægisleiktækjum, trúðagríni og öðrum sirkustengdum leikjum. Leikjanámskeið á vegum félagsins verða haldin á þremur stöðum í sumar, í Hjallakirkju, í Reykjanesbæ og í Kaldárseli. Margir aðrir dvalarflokkar eru jafnframt í
boði, en allar upplýsingar um þá er að finna á heimasíðu KFUM og KFUK, www.kfum. is. Fullt er orðið í nokkra flokka, en hægt er að skrá á biðlista í þá. Velkomið er að leita til Þjónustumiðstöðvar KFUM og KFUK að Holtavegi 28 í síma 588-8899 ef fyrirspurnir um sumarstarfið vakna. Það má því með sanni segja að skemmtilegt, fjölbreytt og ævintýralegt sumar er framundan í sumarbúðum og á leikjanámskeiðum KFUM og KFUK.
1