寫作 作者:高嘉徽
自細漢我學 ē-hiáu 寫字了後，就 chiok 愛 tī 家己 ê 筆記簿仔
內底寫 mih 件，m管是寫心情，iah 是記錄學校上著 kah 意 ê
課程，我 lóng ē kā 寫 起-來，做我 ê 寶貝日記。Chit 項寫 ê
工夫，是我讀國校二年 kah 三年 hit 个時 chūn 就開始有--ê。
逐 kái 寫作文 ê 時，同學 in lóng 頭殼 mo͘h teh 燒，有 ê 想 bē
出 來、有 ê m知 beh 按怎用文字表達。
同學逐个 tng-teh 想 ê時，我 ê頭殼內底就想好 beh 寫啥 mih--ah！
一時仔 niâ，我就 kā 我所想 ê、beh 寫 ê，一字一字親像一
个畫家用筆 kā 無仝 ê 色彩畫 起-去，就 án-ne 完成我 ê 文章
ah！我學生時代 ê 作文，大部份 lóng 有 hō͘老師呵咾，分數
lóng 真 koân，só͘-pái 細漢 ê 時 chūn，以靜態 ê 活動來講，除
了讀冊以外，就是寫作。
因為 khah 早學 ê 是華語 kah 英語 khah 濟，留 落-來 êlóng
是華文 kah 英文 ê 作品。講實在話，我 tī 高中接觸英語寫作
了，soah 感覺比華語 koh-khah 有興趣，老師 mā hō͘我 bē-bái ê
分數。Iáu 未學台文 ê 時，文學性 ê 冊我已經讀 chiok 濟 ah。
我真愛讀冊，我感覺讀冊比 kah 同學 sńg koh-khah 趣味，ē-tàng
學著真濟無仝 ê 智識，mā ē-sái 增加家己寫作 ê 元素，是一
層有夠讚 ê 代誌！
而且，我發現學台文了後，三種語言比--起-來，我上愛台語，
因為 ē-tàng 用台灣話寫 lán 土地 ê 感情，mā 為台語出聲。所
致 chit-má 我有法度寫作，ài 感謝 hit 个細漢就愛讀冊 ê 我。
我上愛寫台文，lán 做伙來寫，好 無？
**刊登 tī 台文通訊罔報 NO.349(2023/4 月)