Haʻiʻōlelo ma ka mauna Mataio 5:1-48 1 I kona ʻike ʻana i ka nui o nā kānaka, piʻi akula ia i luna o ka mauna; a noho ihola ia, hele maila kāna mau haumāna i ona lā. 2 A ʻoaka aʻela kona waha, aʻo maila iā lākou, ʻī akula, 3 Pomaikai ka poe i haahaa ka naau; no ka mea, no lakou ke aupuni o ka lani. 4 Pomaikai ka poe e u ana; no ka mea, e hooluoluia lakou. 5 Pomaikai ka poe akahai; no ka mea, e lilo ka honua ia lakou. 6 Pomaikai ka poe pololi a makewai no ka pono; no ka mea, e hoomaonaia lakou. 7 Pomaikai ka poe lokomaikai; no ka mea, e alohaia mai lakou. 8 Pomaikai ka poe maemae ma ka naau; no ka mea, e ike lakou i ke Akua. 9 Pomaikai ka poe hoohauoli; no ka mea, e kapaia lakou he poe keiki na ke Akua. 10 Pomaikai ka poe i hoomaauia mai no ka pono; no ka mea, no lakou ke aupuni o ka lani. 11 E pōmaikaʻi ʻoukou, ke hōʻino mai kānaka iā ʻoukou, ke hoʻomaʻau mai hoʻi, a noʻu nei e ʻōlelo wahaheʻe mai ai iā ʻoukou i nā mea ʻino a pau. 12 E hauʻoli ʻoukou, a e ʻoliʻoli nui hoʻi; no ka mea, he nui ka uku no ʻoukou ma ka lani: no ka mea, pēlā lākou i hoʻomaʻau aku ai i nā kāula ma mua o ʻoukou. 13 ʻO ʻoukou nō ka paʻakai o ka honua: akā, inā pau ka ʻala o ka paʻakai, pehea lā ia e liʻiliʻi ai? ʻAʻohe ona mea e pono ai ma hope aku, e kiola wale ʻia i waho a e hehi ʻia ma lalo o nā wāwae o kānaka. 14 ʻO ʻoukou nō ke kukui o ke ao nei. ʻO ke kūlanakauhale i kū ma luna o ka puʻu, ʻaʻole ia e hūnā ʻia. 15 ʻAʻole hoʻi e hoʻā nā kānaka i ke kukui a waiho ma lalo o ke poʻi, akā, ma luna o ke ipukukui; i hoʻomālamalama mai ia no ka poʻe a pau i loko o ka hale. 16 Pēlā ʻoukou e hoʻomālamalama aku ai i ko ʻoukou mālamalama i mua o nā kānaka, i ʻike mai ai lākou i kā ʻoukou hana maikaʻi, a i hoʻonani aku ai hoʻi i ko ʻoukou Makua i ka lani. 17 Mai manaʻo ʻoe ua hele mai nei au e hoʻopau i ke kānāwai a me ka poʻe kāula. ʻAʻole au i hele mai e hoʻopau, akā, e hoʻokō.
1
Haʻiʻōlelo ma ka mauna
18 No ka mea, he ʻoiaʻiʻo kaʻu e ʻōlelo aku nei iā ʻoukou, a hala ka lani a me ka honua, ʻaʻole e lilo kahi iota, ʻaʻole hoʻi kahi lihi iki o ke kānāwai, a hiki i ka hoʻokō ʻia ʻana o nā mea a pau. 19 No laila, ʻo ka mea e uhaʻi i kekahi o kēia mau kauoha liʻiliʻi loa, a e aʻo aku i kānaka pēlā, ʻo ia ke kapa ʻia he mea ʻuʻuku loa i loko o ke aupuni o ka lani; akā, ʻo ka mea e mālama a e aʻo aku i ia mau mea, ʻo ia ke kapa ʻia he mea nui i loko o ke aupuni o ka lani. 20 No ka mea, ke ʻōlelo aku nei au iā ʻoukou, A i ʻole e ʻoi aku ko ʻoukou pono ma mua o ko ka poʻe kākau ʻōlelo a me ko ka poʻe Parisaio, ʻaʻole loa ʻoukou e komo i loko o ke aupuni o ka lani. 21 Ua lohe ʻoukou i ka ʻōlelo ʻia mai e ka poʻe kahiko, Mai pepehi kanaka ʻoe; a ʻo ka mea e pepehi kanaka, e lilo ana ia i ka hoʻohewa ʻia. 22 Eia hoʻi kaʻu e ʻōlelo aku nei iā ʻoukou, ʻO ka mea e huhū aku i kona hoahānau me ke kumu ʻole, e lilo ana ia i mea no ka hoʻohewa ʻia; a ʻo ka mea e ʻōlelo aku i kona hoahānau, He lapuwale, e lilo ana ia i mea no ka ʻaha hoʻokolokolo; a ʻo ka mea e ʻōlelo aku, He lapuwale, e lilo ana ia i mea no ke ahi o Gehena. 23 No ia mea, inā e lawe mai ʻoe i kāu mōhai i ke kuahu, a ma laila ʻoe e hoʻomanaʻo ai he mea kā kou hoahānau e hewa ai iā ʻoe; 24 E waiho ma laila i kāu mōhai i mua o ke kuahu, a e hele aku ʻoe e hoʻolauleʻa mua i kou hoahānau, a laila e hoʻi mai e kaumaha aku i kāu mōhai. 25 E hoʻokuʻikahi koke ʻoe me kou hoa paio, ʻoiai ʻoe ma ke alanui me ia, o hāʻawi aku ka hoa paio iā ʻoe i ka luna kānāwai, a hāʻawi aku ka luna kānāwai iā ʻoe i ka ilāmuku, a e hoʻolei ʻia ʻoe i loko o ka hale paʻahao. 26 ʻOiaʻiʻo kaʻu e ʻōlelo aku nei iā ʻoe, ʻaʻole loa ʻoe e puka mai i waho o laila, a pau loa ka ʻaiʻē i ka uku ʻia e ʻoe. 27 Ua lohe ʻoukou i ka ʻōlelo ʻia mai e ka poʻe kahiko, Mai moe kolohe ʻoe: 28 Eia hoʻi kaʻu e ʻōlelo aku nei iā ʻoukou, ʻO ka mea e nānā aku i ka wahine i mea e kuko aku ai iā ia, ua moekolohe ʻo ia me ia ma kona naʻau. 29 A inā e hoʻohihia mai kou maka ʻākau iā ʻoe, e poʻalo aʻe ia mea, a e hoʻolei aku, mai ou aku; no ka mea, e pono iā ʻoe ke lilo kekahi o kou mau lālā, ʻaʻole e hoʻolei ʻia aku kou kino a pau i loko o Gehena. 30 Inā hoʻi e hoʻohihia mai kou lima ʻākau iā ʻoe, e ʻoki iā ia, a e hoʻolei aku mai ou aku; no ka mea, e pono iā ʻoe ke lilo kekahi o kou mau lālā, ʻaʻole e hoʻolei ʻia aku kou kino a pau i loko o Gehena. 31 Ua ʻōlelo ʻia mai, ʻO ka mea hoʻohemo i kāna wahine, e hāʻawi aku ia iā ia i ka palapala hemo. 32 Eia hoʻi kaʻu e ʻōlelo aku nei iā ʻoukou, ʻO ka mea nāna e hoʻohemo i kāna wahine, ke ʻole no ka moekolohe, ʻo ia ke kumu e hoʻomoe kolohe ai: a ʻo ka mea nāna e mare i ka wahine i hemo, ua moekolohe nō ia. 33 Ua lohe hoʻi ʻoukou i ka ʻōlelo ʻana mai i ka poʻe kahiko, Mai hoʻohiki wahaheʻe ʻoe; akā, e hoʻokō aku ʻoe no ka Haku i kāu mea i hoʻohiki ai: 34 Eia hoʻi kaʻu e ʻōlelo aku nei iā ʻoukou, Mai hoʻohiki iki; ʻaʻole hoʻi i ka lani, no ka mea, ʻo ko ke Akua noho aliʻi ia. 35 ʻAʻole hoʻi ma ka honua, no ka mea, ʻo kona keʻena wāwae ia: ʻaʻole hoʻi ma Ierusalema, no ka mea, ʻo ke kūlanakauhale ia o ke Aliʻi nui. 36 ʻAʻole hoʻi ʻoe e hoʻohiki ma kou poʻo, no ka mea, ʻaʻole hiki iā ʻoe ke hoʻokeʻokeʻo a hoʻi i ʻeleʻele kekahi lauoho. 37 Akā, e ʻōlelo ʻoukou, ʻAe, ʻae; ʻAʻole, ʻaʻole: no ka mea, ʻo ka mea i ʻoi aku ma mua o kēia, no ka ʻino mai ia. 38 Ua lohe ʻoukou i ka ʻōlelo ʻia mai, He maka no ka maka, a he niho no ka niho: 39 Eia hoʻi kaʻu e ʻōlelo aku nei iā ʻoukou, Mai hoʻopaʻi aku i ka ʻino; a ʻo ka mea nāna e hahau mai i kou papalina ʻākau, e hāʻawi aku ʻoe iā ia i kekahi. 40 A inā makemake kekahi e hoʻopiʻi iā ʻoe ma ke kānāwai, a e lawe i kou ʻaʻahu komo, e hāʻawi aku hoʻi iā ia i kou ʻaʻahu komo. 41 ʻO ka mea e koi mai iā ʻoe e hele i hoʻokahi mile, e hele pū me ia i ʻelua.
2
Haʻiʻōlelo ma ka mauna
42 ʻO ka mea e noi mai iā ʻoe, e hāʻawi aku iā ia, a ʻo ka mea e makemake e hōʻaiʻē iā ʻoe, mai hoʻi aku ʻoe. 43 Ua lohe ʻoukou i ka ʻōlelo ʻia mai, E aloha aku ʻoe i kou hoalauna, a e inaina aku hoʻi i kou ʻenemi. 44 Eia hoʻi kaʻu e ʻōlelo aku nei iā ʻoukou, E aloha aku i ko ʻoukou poʻe ʻenemi, e hoʻomaikaʻi aku i ka poʻe hōʻino iā ʻoukou, e hana maikaʻi aku i ka poʻe inaina iā ʻoukou, e pule aku hoʻi no ka poʻe hoʻohewa wale mai iā ʻoukou, a e hoʻomaʻau mai hoʻi iā ʻoukou; 45 I lilo ai ʻoukou i poʻe keiki na ko ʻoukou Makua i ka lani; no ka mea, nāna i hoʻopuka mai i kona lā ma luna o ka poʻe ʻino a me ka poʻe maikaʻi, a hoʻoua mai hoʻi i ka ua ma luna o ka poʻe pono a me ka poʻe pono ʻole. 46 No ka mea, inā e aloha aku ʻoukou i ka poʻe i aloha mai iā ʻoukou, he aha lā ka uku e loaʻa iā ʻoukou? ʻAʻole anei pēlā ka poʻe luna ʻauhau? 47 A inā e aloha aku ʻoukou i ko ʻoukou poʻe hoahānau wale nō, he aha kā ʻoukou e hana ai ma mua o nā mea ʻē aʻe? ʻAʻole anei pēlā ka poʻe luna ʻauhau? 48 E hemolele ʻoukou, e like me ka hemolele o ko ʻoukou Makua i loko o ka lani.
Mataio 6:1-34 1 E mālama iā ʻoukou, ʻaʻole e hana wale aku i ko ʻoukou manawaleʻa i mua o nā kānaka, no ka ʻike ʻia mai e lākou; a i ʻole, ʻaʻohe o ʻoukou uku mai ko ʻoukou Makua i ka lani. 2 No laila, i kou manawaleʻa ʻana, mai hoʻokani i ka pū i mua ou e like me ka hana ʻana a ka poʻe hoʻokamani ma nā hale hālāwai a ma nā alanui, i hoʻonani ʻia ai lākou e nā kānaka. He ʻoiaʻiʻo kaʻu e ʻōlelo aku nei iā ʻoukou, Ua loaʻa iā lākou ko lākou uku. 3 Akā, i kou manawaleʻa ʻana aku, mai hōʻike kou lima hema i ka mea a kou lima ʻākau e hana ai. 4 I nalo ai kou manawaleʻa; a ʻo kou Makua e ʻike mai ana i kahi nalo, ʻo ia ke uku aku iā ʻoe ma ke akea. 5 A i kāu pule ʻana, mai hoʻohālike ʻoe me ka poʻe hoʻokamani; no ka mea, makemake lākou e pule kū ana ma nā hale hālāwai a ma nā kihi o nā alanui, i ʻike ʻia mai ai lākou e kānaka. He ʻoiaʻiʻo kaʻu e ʻōlelo aku nei iā ʻoukou, Ua loaʻa iā lākou ko lākou uku. 6 Akā, i kāu pule ʻana, e komo ʻoe i loko o kou keʻena mehameha, a i kou pani ʻana i kou puka, e pule aku i kou Makua i ka mea ma kahi nalo, a ʻo kou Makua e ʻike ana i kahi nalo, nāna ʻoe e uku mai ma ke akea. 7 Akā, i ka wā e pule ai ʻoukou, mai hoʻohana ʻoukou i nā ʻōlelo lapuwale, e like me ka poʻe ʻē; no ka mea, ke manaʻo nei lākou e hoʻolohe ʻia mai lākou no ka nui o kā lākou ʻōlelo ʻana. 8 Mai hoʻohālike ʻoukou me lākou; no ka mea, ua ʻike ko ʻoukou Makua i nā mea e pono ai ʻoukou, ma mua o ko ʻoukou noi ʻana aku iā ia. 9 No laila e pule aku ʻoukou penei: E ko mākou Makua i loko o ka lani, e hoʻāno ʻia kou inoa. 10 E hiki mai kou aupuni. E mālama ʻia kou makemake ma ka honua nei, e like me ia ma ka lani. 11 E hāʻawi mai iā mākou i kēia lā i kā mākou ʻai no kēia lā. 12 E kala mai hoʻi iā mākou i kā mākou ʻaiʻē, me mākou e kala aku nei i ka poʻe ʻaiʻē iā mākou. 13 Mai alakaʻi iā mākou i ka hoʻowalewale ʻia, akā, e hoʻopakele iā mākou mai ka ʻino mai: No ka mea, nou ke aupuni, a me ka mana, a me ka hoʻonani ʻia, a mau loa aku. ʻĀmene. 14 No ka mea, inā e kala aku ʻoukou i nā hala o kānaka, e kala mai nō hoʻi ko ʻoukou Makua o ka lani iā ʻoukou. 15 Akā, inā ʻaʻole ʻoukou e kala aku i nā hala o kānaka, ʻaʻole hoʻi e kala mai ko ʻoukou Makua i ko ʻoukou hala. 16 A i ka wā e hoʻokē ʻai ai ʻoukou, mai hoʻomāinoino maka ʻoukou e like me ka poʻe hoʻokamani; no ka mea, ua hōʻino lākou i ko lākou mau maka i ʻike ʻia mai e nā kānaka e hoʻokē ʻai ana lākou. He ʻoiaʻiʻo kaʻu e ʻōlelo aku nei iā ʻoukou, Ua loaʻa iā lākou ko lākou uku. 17 Akā, i kou hoʻokē ʻai ʻana, e poni i kou poʻo, a e holoi i kou maka; 3
Haʻiʻōlelo ma ka mauna
18 I ʻike ʻole ʻia kāu hoʻokē ʻai ʻana e nā kānaka, akā, e kou Makua i ka mea ma kahi nalo; a ʻo kou Makua, ka mea e ʻike ana i kahi nalo, ʻo ia ke uku mai iā ʻoe ma ke akea. 19 Mai hoʻāhu ʻoukou i waiwai no ʻoukou iho ma ka honua, kahi e pau ai i ka mū a me ka popo, kahi e wāwahi mai ai nā ʻaihue a ʻaihue. 20 Akā, e hōʻiliʻili ʻoukou i ka waiwai no ʻoukou iho ma ka lani, kahi e ʻino ʻole ai ka mu a me ka popo, kahi e wāwahi ʻole ai nā ʻaihue a ʻaihue paha. 21 No ka mea, ma kahi e waiho ai ko ʻoukou waiwai, ma laila pū nō hoʻi ko ʻoukou naʻau. 22 ʻO ke kukui o ke kino, ʻo ia ka maka: no laila, inā he maikaʻi kou maka, e piha ana kou kino a pau i ka mālamalama. 23 Akā, inā he ʻino kou maka, e piha ana kou kino a pau i ka pouli. No laila, inā he pouli ka mālamalama i loko ou, auwe ka nui o ia pouli! 24 ʻAʻohe kanaka e hiki ke hoʻokauwā na nā haku ʻelua; no ka mea, e inaina aku ia i kekahi, a e aloha aku i kekahi; a i ʻole, e hoʻopili aku ia i kekahi me ka hoʻowahāwahā i kekahi. ʻAʻole hiki iā ʻoukou ke hoʻokauwā i ke Akua a me ka mamona. 25 No ia mea, ke ʻōlelo aku nei au iā ʻoukou, Mai hopohopo no ko ʻoukou ola ʻana, i ka mea a ʻoukou e ʻai ai, a i ka mea a ʻoukou e inu ai; ʻaʻole hoʻi no ko ʻoukou kino, i ka mea a ʻoukou e ʻaʻahu ai. ʻAʻole anei e ʻoi aku ke ola ma mua o ka ʻai, a me ke kino ma mua o ke kapa? 26 E nānā i nā manu o ka lewa; ʻaʻole lākou e lūlū, ʻaʻole hoʻi e ʻohi, ʻaʻole hoʻi e hōʻiliʻili i loko o nā hale papaʻa; akā, ua hānai ko ʻoukou Makua o ka lani iā lākou. ʻAʻole anei ʻoukou i ʻoi aku ko ʻoukou maikaʻi ma mua o lākou? 27 ʻO wai lā ka mea o ʻoukou e hiki ke hoʻohui i kona kiʻekiʻe i hoʻokahi kūbita ma ka hopohopo? 28 No ke aha lā ʻoukou e hopohopo ai no ke kapa? E nānā i nā līlia o ke kula, i ko lākou ulu ʻana; ʻaʻole lākou e hana, ʻaʻole hoʻi e milo. 29 Ke ʻōlelo aku nei hoʻi au iā ʻoukou, ʻo Solomona i kona nani a pau, ʻaʻole ia i kāhiko like ʻia me kekahi o ia mau mea. 30 No laila, inā pēlā ke Akua e hoʻaʻahu ai i ka mauʻu o ke kula, ka mea e ola ana i kēia lā, a i ka lā ʻapōpō e hoʻolei ʻia ai i loko o ka umu, ʻaʻole anei ʻo ia e hoʻaʻahu nui mai iā ʻoukou, e ka poʻe manaʻoʻiʻo ʻole? 31 No laila, mai hopohopo ʻoukou, me ka ʻī ʻana, He aha kā kākou e ʻai ai? A he aha kā kākou e inu ai? A he aha hoʻi kā kākou e ʻaʻahu ai? 32 (No ka mea, ke hoʻoʻimi nei nā kānaka ʻē i kēia mau mea a pau:) no ka mea, ua ʻike ko ʻoukou Makua o ka lani he pono ʻoukou i kēia mau mea a pau. 33 Akā, e ʻimi mua ʻoukou i ke aupuni o ke Akua, a me kona pono, a e hoʻohui ʻia mai ua mau mea lā a pau iā ʻoukou. 34 No laila, mai hopohopo ʻoukou no ka lā ʻapōpō: no ka mea, na ka lā ʻapōpō e hopohopo no nā mea nona iho. Ua lawa ka ʻino o ka lā no ia mea.
Mataio 7:1-29 1 Mai hoʻohewa aku, o hoʻohewa ʻia mai ʻoukou. 2 No ka mea, me ka hoʻohewa a ʻoukou e hoʻohewa ai, pēlā hoʻi e hoʻohewa ʻia ai ʻoukou: a me ke ana a ʻoukou e ana ai, pēlā nō e ana ʻia mai ai iā ʻoukou. 3 No ke aha lā ʻoe e nānā aku ai i ka pula iki i loko o ka maka o kou hoahānau, ʻaʻole hoʻi ʻoe i ʻike i ke kaola i loko o kou maka ponoʻī? 4 Pehea lā hoʻi ʻoe e ʻōlelo aku ai i kou hoahānau, E ʻae mai iaʻu e unuhi i ka pula iki mai loko mai o kou maka; a he kaola nō hoʻi i loko o kou maka iho? 5 E ka hoʻokamani, e unuhi mua ʻoe i ke kaola mai loko mai o kou maka ponoʻī; a laila e ʻike pono ʻoe e unuhi i ka pula iki mai loko mai o ka maka o kou hoahānau. 6 Mai hāʻawi aku i ka mea hoʻāno na nā ʻīlio, ʻaʻole hoʻi e hoʻolei i kā ʻoukou mau momi i mua o nā puaʻa, o hehi ʻia ma lalo o ko lākou mau wāwae, a e huli mai lākou e haehae iā ʻoukou. 4
Haʻiʻōlelo ma ka mauna
7 E noi, a e hāʻawi ʻia iā ʻoukou; e ʻimi, a e loaʻa iā ʻoukou; e kīkēkē, a e wehe ʻia no ʻoukou. 8 No ka mea, ʻo ka mea e noi ana, ua loaʻa iā ia; a ʻo ka mea e ʻimi ana, ua loaʻa iā ia; a ʻo ka mea e kīkēkē ana, e wehe ʻia nona. 9 ʻO wai lā ke kanaka o ʻoukou e hāʻawi aku i ka pōhaku i kāna keiki, inā noi mai ia i ka berena? 10 A i noi mai ia i ka iʻa, e hāʻawi aku anei ʻo ia i ka nahesa nāna? 11 Inā hoʻi, ʻo ʻoukou ka poʻe hewa, ua ʻike ʻoukou i ka hāʻawi ʻana aku i nā makana maikaʻi na kā ʻoukou poʻe keiki, ʻaʻole anei e ʻoi aku ko ʻoukou Makua i ka lani e hāʻawi mai i nā mea maikaʻi na ka poʻe e noi aku iā ia? 12 No laila, ʻo nā mea a pau a ʻoukou e makemake ai e hana ʻia mai e nā kānaka iā ʻoukou, pēlā ʻoukou e hana aku ai iā lākou; no ka mea, pēlā nō ke kānāwai a me ka ʻōlelo a nā kāula. 13 E komo ʻoukou ma ka puka pilikia; no ka mea, he ākea ka puka, a he ākea hoʻi ke ala e hiki aku ai i ka make; a nui ka poʻe e komo ana ma laila. 14 No ka mea, he haiki ka puka, he ololi hoi ke ala e hiki aku ai i ke ola, a kakaikahi ka poe loaa ia. 15 E makaʻala iā ʻoukou no nā kāula wahaheʻe, ke hele mai nei i o ʻoukou nei me ke kapa hipa; akā, ma loko, he poʻe ʻīlio hae lākou. 16 Ma ko lākou hua e ʻike ai ʻoukou iā lākou. Ke hōʻiliʻili nei anei nā kānaka i nā hua waina mai luna mai o ke kākalaioa, a i ʻole nā fiku mai luna mai o ke kākalaioa? 17 Pēlā nō hoʻi nā lāʻau maikaʻi a pau e hua mai ana i nā hua maikaʻi; akā, ʻo ka lāʻau ʻino, e hua mai ana hoʻi i nā hua ʻino. 18 ʻAʻole hiki i ka lāʻau maikaʻi ke hua mai i nā hua ʻino, ʻaʻole hoʻi e hiki i ka lāʻau ʻino ke hua mai i nā hua maikaʻi. 19 ʻO kēlā lāʻau kēia lāʻau i hua ʻole mai i ka hua maikaʻi, ua kua ʻia i lalo, a ua kiola ʻia aku hoʻi i loko o ke ahi. 20 No laila hoʻi, ma ko lākou hua e ʻike ai ʻoukou iā lākou. 21 ʻAʻole e pau ka poʻe e ʻōlelo mai iaʻu, E ka Haku, E ka Haku, e komo lākou i loko o ke aupuni o ka lani; akā, ʻo ka mea e mālama i ka makemake o koʻu Makua i loko o ka lani. 22 He nui ka poʻe e ʻōlelo mai ana iaʻu i kēlā lā, E ka Haku, e ka Haku, ʻaʻole anei mākou i wānana ma kou inoa? a i mahiki aku i nā daimonio ma kou inoa? a i hana i nā hana mana he nui ma kou inoa? 23 A laila e haʻi aku au iā lākou, ʻAʻole au i ʻike iā ʻoukou; e hele aku ʻoukou mai oʻu aku nei, e ka poʻe hana hewa. 24 No laila hoʻi, ʻo ka mea e lohe i kēia mau ʻōlelo aʻu, a e mālama hoʻi ia mau mea, e hoʻohālike au iā ia me ke kanaka naʻauao, nāna i kūkulu i kona hale ma luna o ka pōhaku. 25 A hāʻule maila ka ua, a kahe maila nā waikahe, a pā maila nā makani, a pā i ua hale lā; ʻaʻole naʻe ia i hiolo; no ka mea, ua hoʻokumu ʻia ia ma luna o ka pōhaku. 26 A ʻo ka mea lohe i kēia mau ʻōlelo aʻu, a mālama ʻole hoʻi, e hoʻohālike ʻia hoʻi ia me ke kanaka naʻaupō, nāna i kūkulu kona hale ma luna o ke one. 27 A hāʻule maila ka ua, a kahe maila nā waikahe, a pā maila nā makani, a pā ihola ma luna o ua hale lā; a hiolo ihola ia; nui loa kona hiolo ʻana. 28 A pau aʻela kēia mau ʻōlelo a Iesū, kāhāhā ihola nā kānaka i kāna aʻo ʻana. 29 No ka mea, ao aku la ia ia lakou me he mea la me ka mana la, aole e like me ka poe kakauolelo.
5