Ang Pagpakaon sa 5000 Mateo 14:13-21 13 Sa pagkadungog ni Jesus niini, migikan siya gikan didto sakay sa sakayan paingon sa usa ka dapit nga awaaw: ug sa pagkadungog niini sa mga tawo, misunod sila kaniya nga naglakaw gikan sa mga lungsod. 14 Ug migula si Jesus, ug nakita niya ang usa ka dakong panon sa katawhan, ug naluoy siya kanila, ug giayo niya ang ilang mga masakiton. 15 Ug sa pagkahapon na, miduol kaniya ang iyang mga tinun-an, nga nagaingon: Kini usa ka dapit nga awaaw, ug ang takna milabay na; palakta na ang panon sa katawhan, aron sila mangadto sa mga baryo, ug mamalit alang sa ilang kaugalingon ug makaon. 16 Apan si Jesus miingon kanila, Dili kinahanglan nga manglakaw sila; hatagi ninyo silag makaon. 17 Ug sila miingon kaniya, "Lima ra ka tinapay ug duha ka isda ang ania dinhi." 18 Miingon siya, Dad-a kini dinhi kanako. 19 Ug gisugo niya ang panon sa katawhan nga manglingkod sa mga sagbot, ug gikuha niya ang lima ka tinapay ug ang duha ka isda, ug sa mihangad siya sa langit, iyang gipanalanginan kini, ug gipikaspikas kini, ug gihatag kini sa iyang mga tinun-an, ug ang mga tinun-an ngadto sa panon sa katawhan. 20 Ug silang tanan nangaon, ug nangabusog: ug ilang gihipos ang mga tipik nga nahibilin, napulog duha ka bukag nga puno. 21 Ug ang mga nangaon mga lima ka libo ka mga lalaki, gawas sa mga babaye ug mga bata.
Marcos 6:30-44 30 Ug ang mga apostoles nanagtigom kang Jesus, ug ilang gisugilon kaniya ang tanan nilang mga nahimo, ug ang tanan nilang mga gitudlo. 31 Ug siya miingon kanila, " Pangadto kamo nga kamo ra sa usa ka dapit nga awaaw, ug pahulay kamo ug makadiyot: kay daghan ang nanganhi ug nanglakaw, ug wala silay panahon bisan sa pagkaon."
1
32 Ug sila migikan sakay sa sakayan paingon sa usa ka dapit nga awaaw nga silasila ra. 33 Ug nakita sila sa mga tawo nga nanglakaw, ug daghan ang nakaila kaniya, ug nanagan sila nga naglakaw paingon didto gikan sa tanang lungsod, ug nanguna kanila, ug nangadto sila kaniya. 34 Ug sa pagkawas ni Jesus, nakita niya ang daghang mga tawo, ug naluoy siya kanila, kay sila sama sa mga karnero nga walay magbalantay: ug misugod siya sa pagtudlo kanila sa daghang mga butang. 35 Ug sa nagkahapon na, miduol kaniya ang iyang mga tinun-an ug miingon, "Awaaw kining dapita ug karon nagkahapon na." 36 Palakta sila aron makaadto sila sa mga kasikbit nga lugar ug sa mga baryo, ug makapalit ug pagkaon alang sa ilang kaugalingon, kay wala silay makaon. 37 Mitubag siya kanila, “ Kamo ang mohatag kanilag pagkaon.” Ug sila miingon kaniya, “Moadto ba kami ug mopalit ug pan nga mobalor ug duha ka gatos ka denario ug among ihatag kanila aron ilang kan-on?” 38 Nangutana siya kanila, “ Pila ka tinapay ang anaa kaninyo? Sige, tan-awa ninyo.” Ug sa ilang nahibaloan, miingon sila, “Lima ka pan ug duha ka isda.” 39 Ug iyang gisugo sila nga palingkoron ang tanan sa pundok-pundok diha sa lunhaw nga mga balili. 40 Ug nanglingkod sila nga nagpundokpundok, sa ginatos ug sa tagkalim-an. 41 Ug sa dihang gikuha niya ang lima ka tinapay ug ang duha ka isda, mihangad siya sa langit ug nagpasalamat, ug gipikaspikas niya ang mga tinapay ug gihatag kini sa iyang mga tinun-an aron idulot kanila; ug gibahinbahin niya ang duha ka isda alang kanilang tanan. 42 Ug silang tanan nangaon, ug nangabusog. 43 Ug ilang gitigom ang napulog-duha ka bukag nga puno sa mga tipik, ug sa mga isda. 44 Ug ang mga nangaon sa mga tinapay mga lima ka libo ka mga lalaki.
Lucas 9:10-17 10 Ug sa paghiuli sa mga apostoles, ilang gisugilon kaniya ang tanan nilang nabuhat. Ug gidala niya sila ug milakaw nga silasila ra ngadto sa usa ka awaaw nga dapit nga sakop sa lungsod nga ginganlan ug Betsaida. 11 Ug ang mga tawo, sa ilang pagkahibalo niini, misunod kaniya: ug gidawat niya sila, ug gisultihan niya sila mahitungod sa gingharian sa Dios, ug giayo niya ang mga nanagkinahanglan nga pagaayohon. 12 Ug sa nagkahapon na, miduol kaniya ang napulog duha ka tinun-an ug miingon, "Palakta na ang panon sa katawhan aron moadto sila sa mga lungsod ug kasikbit nga mga dapit ug mangitag kapuyan ug makaon, kay ania kita dinhi sa awaaw nga dapit." 13 Apan siya miingon kanila, " Kamo ang mohatag kanilag pagkaon." Ug sila miingon, "Wala na kitay lain gawas sa lima ka tinapay ug duha ka isda; gawas kon molakaw kami ug mopalit ug pagkaon alang niining tanang mga tawo." 14 Kay mga lima ka libo ka lalaki ang gidaghanon. Ug siya miingon sa iyang mga tinun-an, Palingkora sila nga tag-kalim-an ang matag pundok. 15 Ug gibuhat nila kini, ug gipalingkod silang tanan. 16 Unya gikuha niya ang lima ka tinapay ug ang duha ka isda, ug sa mihangad siya sa langit, iyang gipanalanginan kini, ug gipikaspikas kini, ug gihatag ngadto sa mga tinun-an aron ipanghatag sa atubangan sa panon sa katawhan. 17 Ug sila nangaon, ug nangabusog ang tanan: ug dihay natipon nga mga tipik nga nahibilin kanila nga napulog duha ka bukag.
Juan 6:1-14 1 Human niining mga butanga, si Jesus mitabok sa lanaw sa Galilea, nga mao ang lanaw sa Tiberias.
2
2 Ug misunod kaniya ang usa ka dakong panon sa katawhan, kay nakita man nila ang iyang mga milagro nga iyang gibuhat ngadto sa mga masakiton. 3 Ug si Jesus mitungas sa bukid, ug didto milingkod siya uban sa iyang mga tinun-an. 4 Ug ang paskuwa, ang pista sa mga Judio, haduol na. 5 Unya, sa pagyahat ni Jesus sa iyang mga mata, ug sa pagkakita niya sa usa ka dakong panon sa katawhan nga nagpadulong kaniya, siya miingon kang Felipe, Asa man kita makapalit ug tinapay aron kini sila makakaon? 6 Ug kini iyang gisulti aron sa pagsulay kaniya: kay siya mismo nahibalo kon unsa ang iyang buhaton. 7 Si Felipe mitubag kaniya, Ang duha ka gatos ka denario nga tinapay dili paigo alang kanila, aron ang matag usa kanila makakuha ug gamay. 8 Usa sa iyang mga tinun-an, si Andres, igsoon ni Simon Pedro, miingon kaniya, 9 Adunay usa ka batang lalaki dinhi nga adunay lima ka tinapay nga sebada ug duha ka gagmay nga isda: apan unsa man kini alang niining kadaghanan? 10 Ug si Jesus miingon, “Palingkora ang mga tawo.” Karon, daghan ang mga sagbot niadtong dapita. Busa nanglingkod ang mga lalaki, nga may gidaghanon nga mga lima ka libo. 11 Ug gikuha ni Jesus ang mga tinapay, ug sa nakapasalamat na siya, iyang gibahinbahin kini ngadto sa mga tinun-an, ug ang mga tinun-an ngadto kanila nga nanaglingkod; ug ingon man usab ang mga isda kutob sa ilang gusto. 12 Sa dihang nabusog na sila, miingon siya sa iyang mga tinun-an, Tigoma ang mga tipik nga nahibilin aron walay mausik. 13 Busa ilang gitigom kini, ug napuno ang napulog duha ka bukag sa mga tipik gikan sa lima ka tinapay nga sebada, nga nahibilin alang sa mga nakakaon. 14 Unya kadtong mga tawo, sa pagkakita nila sa milagro nga gibuhat ni Jesus, miingon, Kini sa pagkatinuod mao ang propeta nga moanhi sa kalibutan.
3