
3 minute read
Ngaa Heamana Takirua
Pūrongo
Tiwhatiwha te poo, tiwhatiwha te ao.
Kua tiwha ki te mate, ka tiwha ki te ora!
He kura tangihia, he maimai aroha.
Ko te wehi ki a Ihowa te tiimatanga o te whakaaro nui.
Me whakahoonoretia a Kiingi Tuheitia Pootatau Te Wherowhero te tuawhitu
E noho mai raa i te ahurewa tapu o oona tuupuna maatua. Paimaarire.
Kei ngaa maunga whakahii, kei ngaa puke koorero, kei ngaa wai tukukiri
Teenaa koutou, teenaa koutou, teenaa koutou katoa.
Nei raa te manawa reka, hei maangai moo te poari, ki te whakaputa i te Puurongo aa-tau 2023 a Waikato River Authority, e whakapuaki ana i ngaa kaunekehanga ki Te Ture Whaimana o Te Awa o Waikato, otiraa, ki ngaa kaupapa whakarauora, me ngaa paatuitanga.
Kua huanui hoki te whai i te huarahi o te mahi tahi hei maangai whakahaere motuhake. E kitea tonutia ana, i roto i ngaa mahi, ehara kee i te mahi whakaheke taumata ngaa mahi whakahaere, engari he whakapiki tonu. Ko te whiriwhiringa kaupapa i roto i ngaa mahi whakahaere ngaatahi he mea arataki naa te pono, e whakauu nei i te rangona me te ine a ngaa tirohanga kanorau puta noa i te taumata poari. Maa roto puu i te whakarite tika i ngaa hanganga, te whakapuumau i te whakakitenga rīrā, te kukume i te hunga whai i ngaa tino taumata, waihoki, e mihi ana ki ngoo maatou hoa poari kua uu ki te kaupapa i roto i te tau.
E ngaakau whakahii ana ki te whakamoohio atu kua tino whai hua teenei whakahaerenga ngaatahi, e kitea ana te pai ake o ngaa tikanga mahi me ngaa putanga moo ngaa awa o Waikato me Waipaa. I whakaaetia e te Waikato River Clean-Up Trust ngaa kaupapa e 26 te whakapuutea i roto i te tau tahua, araa he $5,719,938.95 te puutea i toha. I taua waa he toru tekau maa tahi ngaa kaupapa i tutuki hei taapiri atu ki te tapeketanga o te 280 kaupapa whakaoranga.
E uruhau hoki ana ki te kite atu i ngaa nekehanga o te arotake tuatahi o Te Ture Whaimana o te Awa o Waikato.
Ko Te Ture Whaimana te tuhinga matua e tohu ana i te aronga moo te Awa o Waikato me te kaapehu e tohu ana i ngaa mahi a te Waikato River Authority. Kua manawaruu hoki i te whakapootaetanga o taa maatou Pou Whakahaere, i puta te ihu i te akoranga, Oxford Advancement
Management and Leadership Programme (Saïd Business School, Oxford University). I whakarewa hoki maatou i taa maatou rautaki pae paapaaho paapori maa te Pukamata (Facebook), Honotahi (LinkedIn) me te Paeaahua (Instagram) kia hora te moohiotia moo ngaa kaupapa whakaoranga me ngaa taangata e whai puutea ana mai i a maatou. E aata rongo ana maatou i ngaa hiahia a taa maatou hapori, aa kua eke panuku hoki te urupare me te nui o te hiikaka ki te whai waahi atu ki ngaa mahi whakarauora awa.
Hakoa, noo roto i te paunga o te tau, i puta te mate Gold Clam, he mate e heke ai te kounga wai, he whakararu i ngaa Kaaeo me te taipuru i ngaa rerenga wai, e tika ana kia whakamaanawatia te mahi tahi i waenga i te Whare Waananga o Waikato, i a Waikato Tainui, me te Waikato River Authority, ngaatahi nei ka manaaki i te Kurutetenga Huatau Whakaoranga Te Awa o Waikato 2023 (Te Awa o Waikato Restoration Symposium 2023) hei te whiore o Whiringa aa-rangi. Ko te whaainga he whakaari i te rohe o Waikato me ngaa kaupapa whakarauora puta noa i te ao e kite ai me peewhea e koke tonu ai taatou i teenei huarahi whakarauora i ngaa Awa o Waikato me Waipaa. Kua kite taatou i roto i ngaa mahi me nui ake te hua o te mahi tahi i eera o te kore, ka mutu, ka peeraa tonu te aro ki ngaa mahi tahi a te tau e haere ake nei. Kaati ake nei, teenei te poroaki me te mihi ki te Heamana Takirua ki a Paula Southgate, raatou ko ngaa mema poari a Jackie Colliar raatou ko Dylan Tahau, i mahi nei i ngaa mahi, i tautoko titikaha nei i te whakakitenga i roto i ngaa tau e toru kua pahemo. Naa konaa, he whakatau tonu i ngaa mema Karauna, araa, i a Stu Muir, Susan O’Regan raatou ko Shadrach Rolleston e kawe mai ana i ngaa wheako me ngaa tirohanga hou ki te poari. Maatou katoa ko te Pou Whakahaere a Bob Penter e hihiri ana ki ngaa aaheinga kei mua i te aroaro kei te tau e kainamu mai nei.

Ngaa manaakitanga
Tipa Mahuta
Heamana Takirua, Mema aa-Iwi
Waikato River Authority