Lyrikkforlaget © 2026
Inkognito publisering
Postboks 112
4395 Hommersåk
www.lyrikkforlaget.no
Lyrikkforlaget er et imprint av Inkognito publisering
ISBN: 9788283985436
Omslag: CF media
Sats: CF media
Materialet i denne publikasjon er omfattet av åndsverklovens bestemmelser. Uten særskilt avtale med Lyrikkforlaget er enhver eksemplarfremstilling og tilgjengeliggjøring bare tillatt i den utstrekning det er hjemlet i lov. Utnyttelse i strid med lov eller avtale kan medføre erstatningsansvar.
Køane til DPS blir berre verre og verre i tempo til ei reversert sytrådspole
Men det er ingen stress for fleire går då berre til jamleg behandling hos Vinmonopolet
Å håpe på varme, støtte og kjærleik
frå ein emosjonelt impotent person
Er som å forvente strandbar og gratis solseng på ein arktisk forskingsstasjon
Det er visst oss vanlege sin tur
å få sjå kor fort liva våre snur
Så dei maksar opp renta og prisen på alt
Men det var visst heilt som venta, blir vi fortald
Sånn er denne tida, vi får som betalt
Vi slikkar våre sår medan fiffen strør på salt
Så sel huset ditt og svelt, dei i dress snur seg vekk
Til helvete med oss alle
så lenge rentebobla sprekk
Ein vanleg sunnmørsk sommar
er litt som ein dårleg mann
Du ventar nok for mykje
frå ein som ikkje kan
Han kjem for seint
og dreg for fort
Han er for kald
og held for kort
Og når han så er ferdig
lenge før han skal
Så ligg du att åleine
skuffa, sur og kald
Vi sjukeleggjer det normale og normaliserer det som er sjukt
Vi fråtsar i alt det falske for det ekte har blitt skjult
Vi fiksjonaliserar fakta og faktifiserar fiksjon
Og det er ingen som fagfellevurderer den gemene opinion
Eg saknar ikkje ungdomstid til det var ho for stri
Men eg kan stundom sakne det å vere rett naiv
Ein ungdoms steile optimisme
kunne eg trengt no Å møte kvar ein dag på ny med stoisk tru og ro
Men åra har vel slipt meg ned og tatt meg bit for bit
Så får eg heller brette opp mot vaksenlivets slit
Han såg ein vakker blome og sa:
«Denne vil eg ha!»
Han røska den frå bakken opp og tok den, likeglad
Men utan vatn, utan jord
så visna blomen hen
Då tenkte mannen:
«Nei, så stygg! No treng eg ikkje den.»
Det siste nye, har du høyrt om han Lars?
Sikre kjelder seier at han drikk seg heilt frå gards
Ja, eg ser han køyrer bilen sin kvar morgon klokka sju
Men det betyr då ikkje at han faktisk køyrer edru
Hæ, kor eg har kjeldene mine frå?
Det er sånt som alle veit, det veit du då?
Men det er aldri nokon som spør om sånt direkte for det blir faktisk rekna som ganske frekt, det
Og har du ikkje høyrt, er du ikkje oppdatert?
Det firmaet til naboen din har elendig likviditet
Men ikkje nok med det, han har visst tukla greitt med skatten
Han skulle leike storkar
og langt og lenge datt han
Så berre vent du, far, for snart no får dei tatt han
Snuten er visst på saken for du tullar ikkje med Staten
Kor eg faktisk har det frå?
Eg kjenner ei som kjenner ei på Spekematen
Har du høyrt det dei seier om ho dama der bak?
Ho knaskar sterke pillar og er heilt nervevrak
Ja, visst ser ho normal ut og fungerer ganske greitt
Men likevel er dette noko heile bygda går og veit
Og nei, ho er visst ikkje mykje innom apoteket
men dreg ganske ofte ut til nabobygda og reker
For eg har høyrt det no frå meir enn ei kjelde, sikkert minst to
Og det som blir gjentatt
blir opplese og vedtatt og etablert som fakta
så lenge børsen sitt med makta
Det kjøpast lavt og seljast høgt på bygdas beste business: ryktebørs
Eg fryktar
at vi mistar ein heil generasjon av kunstnarar
forfattarar
filosofar
og fritenkjarar
til seks tommar med mobilskjerm